وش اقولكم ياجماعه الربع .. تهيء تهيء
ترا من الحين اقولكم الموضوع هذا مافيه لاضحك ولا وناسه << غاوي نكد اليوم
الموضوع فيه سالفتي اليوم .. وبعض النصائح والارشادات من حضرة جنابي ^_^
اليوم الظهر رحت للوزارة عشان انهي كل شي يتعلق بالبعثه في حياتي
خلاص ابي انساها واركز بدراستي .. ابي اطوي صفحة شي اسمه بعثه ووزارة ومعجل << الكل متعقد من هالادمي ,,
الموووووهم .. رحت للوزارة في هالظهريه اللي ترد الروح .. الجو كان حلو
<< وكان لابس نظاراته الجديده اللي توه شاريها امس وفرحان فيها ^_^
مع ان الجو كان مغيّم .. بس لازم افرح بناظرتي ..
مابي اطول عليكم رحت للعمار المسوؤل عن بعثتي ..
ويوم وصلت له قال انزل جب صورة من قرار ابتعاثك ..
وانزل للاتصالات الادارية ..
وصلت عند الموظف قلت لو سمحت ابي صورة من قرار ابتعاثي
قال ابتعاثك انت ؟؟؟
قلت ايه انا ..<< في نفسه وش فيه مستغرب ماني مالي عينه ولا ماني مالي عينه يعني ؟؟
الموووهم قال وش اسمك .
قلت فلان بن فلان ..
قال تيب .. وطق طق طق طق على الكمبيوتر ..
طلع رقم القرار حقي
الموهم انه وهو يطقطق على كمبيوتره ازعجني وفقع راسي
ليش ماتبي البعثه ؟؟
قلت والله عاد حصلت ضروف وماقدر اكمل ..
قام هو علّق عاد : تراها فرصه فرصه فرصه فرصه فرصه فرصه
فرصه فرصه .. << لاحوووول طيب تراني فهمت ..
تراها فرصه فرصه فرصه والله فرصه .. طب من مايبيه
فرصه فرصه فرصه فرصه فرصه << ماسك خط الدمام
فرصه فرصه فرصه فرصه فرصه
طفشني .. !!!
قلت ياخوي الله يكتب اللي فيه الخبر << من داخله بيموت قهر
المهم رحت لموظف ثاني وهو راح وعطاني الورقه اللي مادري ليش يوم
مسكتها بغيت اصيح .. بغيت ابكييييييييي والله ياعالم بغيت اطيح على ركبي
عطاني ((( قرار ابتعاثــــي )))
وصورة منه بعد .. يقولي وحده لك وحده للعمار ..
وانا طالع لمكتب العمار قاعد اقرا وش مكتوب
مكتوب كلام كبير ياقماعه الخير تهيء تهيء
مكتوب اننا نحن معالي الوزير نوافق على ابتعاث الطالب صلووح << كذاب مكتوب صالح
الى دولة بولندا ومدري وشووو
لدراسة البكالريوس في جامعة وارسو ..
وتحت كاتبين مدة انتهاء القرار .. تخيلو متى ؟؟
عام 2014 !!!!!!!!!
صاحين انتو اروح برا لين عام 2014 !؟؟؟؟!!!؟؟؟!
الموووووووهم رحت للعمار وعطيته القرار وجيت ابي احط الصورة حقت القرار بجيبي
عشان ابكي عليها واخليها ذكرى لبعدين ..
وعشان اذا جاني حيوان مو مصدق انها جاتني بعثه ورفضتها اقوم اصك القرار بوجهه
عشان يصدق ^_^
وبعدين عطاني القرار وقال اكتب : انسحب عن هذه البعثه .. واستملت شهادتي
كتبتها ويدي ترجف تهيء تهيء
زبدة الكلام ياحلوين .. هي كلمتين بقولها يمكن احد يستفيد منها .. مش عارف ..
الواحد اذا قرر انه يبتعث .. لايقدم على اي خطوه الا وهو مقتنع 1000000 %
انه يبي البعثه ويبي التخصص اللي رايح يدرسه ..
والله انا كنت ماخذ المسأله عناد وتحدي .. قلت بعثه يعنيييييييييي بعثه
ويوم جتني رفضتها .. لاني اللي رحت ولاني اللي خليت شخص ثاني يستفيد منها ..
وهالشغله قاهرتني انه يمكن مايعطون مقعدي لشخص ثاني .. ويمكن ايه بس مادري
لاني يوم جا العمار عطاني شهادتي الاصل وجيت ابي اطلع قلت له :
على العموم يااستاذ هشام انا حبيت اعتذر عن اللي صار لكن ظروف ..
قالي معليش لكن لو جيتنا من اول كان خلينا شخص ثاني بدالك يروح ..
كنت بقوله تراني جيتك قبل شهرين بس قلت ياولد
اطططططططططططططلع من هالوزارة بس اطللللللللع والله العظيم لو قعدت شوية زيادة
كان يمكن انفجر ,,
.. بس بالاخير قلت خلني اسأله اخر سوأل .. موصيني على هالسوأل طابور من الاشخاص والشخصات ^_^
قلت اقدر اعطي مكاني لشخص ثاني اعرفه ^_^ ؟؟
قام يطالعني بنص عين .. قال لا
قلت سلاموووووووووووووو عليكم ..
وبس هذي كل السالفه .. تكفون لاحد يجيب لي طاري البعثه ثاني مره
والله العظيم اني كل مااتذكرها تجيني ضيقه .. دي كانت حلم بالنسبه لي ..
اتفقنا ياشطورين ؟؟
تصبحون على خير بروح اكمل نومتــي ،،
November 19th, 2006, 02:10 PM