السياحة الداخلية

April 18th, 2007, 08:42 AM

كيف اجازتكم ؟
السياحه الداخليه
اشغلونا عند السياحه الداخليه دعايات وكلام فاضي وهم ماعندك احد
.....
بالصيف يحطون لك كم دباب بالثمامه ويجيبون لك قناة المجد يتميلحون على البزارين وانواع المصاله
ماسكين البزارين والعرق يصب ويسألونهم
صيفنااااا مع اهلناااا ؟؟؟
البزر ووجهه احمر من الحرر يقوول احلىىىى
بجده جنقل لاند وماتوصل لها الا بخريطه من صعوبتها بوسط مزارع
ومن غير الغربان الي ماليه الشوارع
الغربان موب التكارنه اقصد الغربان ماغيرها
بالطايف تلفريك الهداا تمسك سرى 5 ساعات عشان تنزل لقريه
مدري وش تبي مافيها الا مسبح بزارين وخلني ساكت
انتم عارفين وش تشتهر فيه مسابح البزارين
والردف غبااار وشووك ودبابات وصعايدده واحمد ربك
بالشرقيه
مافيه الا الواجهه وجلسات ثيل
او الراشد وجيان وماتقدر تحك خشمك من الزحمه
غير الهاف مون الي مليان قواطي بيبسي من سنة جدي
وناشبين لنا سياحه داخليه
........
بقول لكم سالفه وابيكم تحكمون على الاهتمام بالسياحه عندنا
قبل اسبوعين جاني شباب من الرياض وكان الجو مرره حلوو
قلت بسوي رومانسي واوديهم الواجهه البحريه بالخبر
المهم مشينا شوي الا لقينا حاجز وقدامه ولد شعره مليان جيل وطول ركبتي
وين ياشباب ؟ ؟
قلنا بنمشي مع المسلمين على البحر
قال ممنوع وخصوصا انكم لابسين ثياب
ليه؟؟ قال للعوائل فقط وانتم لو جايين عشان رياضه مالبستوا ثياب
<<< يحقق معنا هالصغير
يبينا نلبس بكيني عشان يدخلنا
تخيل شكلي عاد لابس بكيني وشعر صدري طالع كنه تين شوكي
يلعن ام المنظر
اغراااااااااء
ماتشوفه ولا بحديقة الحيواان
وعزوي جنبي لابس لبس بحر قطعتين ابو ربطه
وتشوف كروشنا طالعه متر قدام
من جد بنقوم الدنيا وماتقعد على البحر
باسكال وجينيفر
<<< قديم باسكال
نرجع حق محور حديثنا
مع العلم انا واقفين معه والهنود والاجانب يمرون من جنبنا داخلين
تخيلوا بديرتي مقدر امشي على البحر والهندي يقدر
المهم بغينا نقبر البزر بمحله ودخلنا وخليناه
<<< سعوديين مايعرفون النظام
تخيل المهزله داخل الحاجز مليان اجانب يتميلحون ومشخصين وماأبالغ اذا قلت
مشغولين يسوون بحث بلوتوث بجوالاتهم
والسعودي ورى الشبك كنه بعيير
يتفرج من بعيد
حتى بديرته محرووم
............
طبعا على بالهم يخافون نضايق البنات
مايدرون ان المكان الي مافيه شباب مايجونه البنات اصلا
ياغبي البنت تشخص لمين ؟
للسواق ؟ للهنود ؟للزبال ؟ للحريم ؟
اكيد للشباب يادلخ
وش الفايده من التشخيصه حقتها اذا ماعلقوا عليها الشباب
......
وهذا مثال ثاني يبين لكم اهتمامهم بالسياحه للسعوديين
فيه بمكتب كانو للسياحه عرض سياحي
يقولك بمبلغ 900 ريال تقريبا
رحله بالطياره للمدينه المنوره ومن هناك باص فخم ياخذك لمدائن صالح
وسكن بفندق 5 نجوم ومخيم راقي جنبه
من الاربعا للجمعه مع التمشي هناك مع الوجباات للمشافيح
ويورونك كل الاثار والمعالم هناك
العرض مررره كويس والا لاا ؟ ؟
العرض للأجانب فقط
الاجنبي فوق راسه ريشه
السعودي يفشل ومايواجه يدخل محلات فخمه
خله يروح لجده والطايف وابها والخبر والشقه ب1000 ريال باليوم
والي راتبه على قده يطلع للبر ويشربون شاهي وياكلون بسكوت مالح ويرجعون بيوتهم وش يبون بالسفر
هذي سياحتنا الداخليه يالربع
...........
الحين الي مزعجينا وينصحون بالسياحه الداخليه
وين يروحون هم وعيالهم بالصيف؟
باريس ولندن
والطفران من موظفينهم يروح لمصر
عمركم شفتوا واحد معروف بالطايف ماسك سرى على التلفريك ؟
عمركم شفتوه بالواجهه البحريه بالخبر جالس على فرشه بلاستك وياكل
كليجا وكراث وعياله يلعبون حوله ؟؟
الكليجا = حلا يحبونه القصمان يشبه للسلحفاة
زي الكوكيز عند الامريكان
الكراث = زرع اخضر يشبه البرسيم يحبونه الحريم
عمركم شفتوه بقناة المجد هو وبزرانه يطامرون قدام التلفزيون ؟
طبعا اصفقني ببلكه على راسي كان الاجابه نعم
تلقاهم بمطار باريس او بهيثرو لندن
<<< مسوي يدل المطارات
اذا رحت هناك تحس انك قاعد تطالع الاخبار
كل الي قدامك تعرفهم
الي وزير والي مسئول كبير وهلم جراا
حلوه هلم جراا
.............
على الطاري ذكرتوني
كنا على البحر جالسين وجنبنا عائلتين اجانب اعتقد انهم لبنانيين
معهم على ولدين وجالسين على كراسي وشغل متعوب عليه
طبعا حنا ذابين وجيهنا نتفرج كنا اول مره نشوف ناس جايين للبحر
شوي الا مر من عندنا عائله سعوديه
الي شايل فرشه والا شايل مركى والي شايل اغراض الشاهي
والا شايله اخوها والام ماسكه يد بزر
والابو زي العاده يدربي كرشته قدامهم ومطنش الدنيا
تقريبا عدد عيالهم 7
طبعا حنا قلنا ليه السعودي معه 7 او 8 والاجنبي بس 2 ؟
وقمناا نناقش ونحلل الموضوع
محنا بعاقلين مجلس الامن
المهم طلعنا بالتحليل التالي
يقول لك السعودي عنده 4 عيال و4 بنات
الولد الاول موظف بمدينه ثانيه ومايجي كثير
الثاني عسكري ودوامه صعب ومايشوفونه
الثالث زوجته ناشبه له ومدبر نقل بعيد عشان ماينشبون له اهله
الرابع طفران من الاسهم وعايش عند ابوه غصب عليه
البنت الاولى متزوجه وبمدينه ثانيه وطبعا ماتجي كثير
الثانيه عندها عشر عيال وماتجي لاهلها الا الخميس
الثالثه زوجها عسكري ومتشرده معه
الرابعه مطلقه او ماكتب الله لها نصيب وعندهم بالبيت
يعني المحصله النهائيه
عندهم بنت وولد بالخدمه
زي الاجنبي
<<<< يازينكم ساكتين
.....
بالاخير عندي نكته
يقول لك شايب عنده ولد مطووع
راحوو ا السوق وقام الشايب يكحل وعيونه زايغه
قال له ولده يبه ترى ذا البنات يزينهم لك الشيطان
خاااف الله
قال ابوه خذ 500 ريال رح انت وابليس زينوا امك
ههههههههههههههههه
كانها بايخه حصل خير
.........
المقال الجاي فيه لغز والجوائز قيمه جدااا
<<< قديم لغز هههههه

للأمانه منقول من بريدي
اخوكم mbt3th

• نشر عبر تويتر
• نشر عبر فيسبوك
• نشر عبر جوجل