الدنــــــــــــــيا صغــــيرة

صدقت ... تحصل دايم

انا مااذكر اذا لي قصص او لا لان سعه الذاكرة عندي ماتتعدى مية ميقا ...

بس ذكرتني بصاحبي لي علمني بقصة قبل كم سنه مثل قصتك او مشابهه ... هذا من النوع اللي يمشي في حياته على نظام (سو شغلك ولا تعلم احد ) ولذلك قدم على البعثة وسافر عشان يفتح ملف ويرجع وكلها كانت فترة اسبوعين وقال للقريبين منه انه رايح مصر تمشية المهم حذف لهم هالديرة وماقال انه رايح بريطانيا ... في هالاسبوعين درس وفتح ملف للدارسين على حسابهم الخاص بالملحقية .. ويوم قالوا له خلاص الملف كامل وراح نرسله للرياض ويعرض على اللجنه خلال اسبوعين او ثلاثه ... ماصدق خبر ومن الملحقية الى المطار واقرب رحلة للسعودية ورجع لبيتهم وسلام يابوي وشلونك يمه مسوي انه جاي من سفر تمشيه واخوانه وخويايه من حارته يسألونه وشلون الديرة اللي جيت منها .. ويعطيهم قصص من راسه .. واحد من جيرانه وصديق الدراسه طالع فيه قال انت مارحت مصر قال ليه قالوا لك اني رحت جدة وجيت اسلخ عليكم .. وسكتوا وراحت... هو ممكن يقدر يقول الحقيقة بس عنده قناعه انه اذا علم الناس في شئ وماقدر الله انه يتم او يحصل يصير الناس تعلق عليه وتقول فلان راح وماقبلوه والا مايعرف ياخذ اللي يبيه مهوب ذرب ومن هالكلام ... مرت الايام وهو يتابع الملحقية بالنت يوميا حتى جاء ذاك اليوم اللي عرف انهم ضموه للبعثة وانقبل ... طلع من البيت الرجال وهو مبسووووط ماتشيله الدنيا .... بعدها علم والدينه واخوانه وقال لا تعلمون احد الا اذا سئلوا عني ... واقرب رحلة على لندن ... وراح يدرس في معهد خارج لندن وتوه جديد على المدينه وبلشان مايعرف احد وهو من النوع اللي يجد صعوبة انه يوقف احد ويسأله عن اي شئ حتى لو انهم سعوديين ... المهم بصعوبة وصل للمعهد اللي يبغاه في اول يوم دوام معهم ... وابو الشباب وهو داخل شاف في الريسبشن واحد انصدم ماكان يتوق انه بيلقاه ... فرك عيونه ... حك راسه في محاولة للاستيعاب .. طلع من الريسبشن ودخل مرة ثانيه يمكن ان الموقف مهنق معه شوي خخخخخ ... لقى جاره وصديق الدراسة اللي شك فيه بالبداية وكان وقتها يكلم الرسيبشن ... جاه وسلم عليه وهذاك كان مثله ومن نفس الطينه مايعلم احد ...

موضوع جميل و مسلي يعطيك العافيه gator


قصة مبتعث في زحل غريبه !! بس ممكن تصير ..

^ ^ ^

ترا مهيب قصتي ... العهده على اللي حكاها لي

وبالنهاية هي سالفه فيه من يتقبلها وفيه العكس

مبتعث في زحل تسلم على القصة ، والله خويك هذا مصرقع من جد لا هو ولا ولد الجيران

طيب وش رايكم يا حبايب يكون فيه رسوم على قراءة القصص وهي ان تبحث لنا عن قصة في نفس المحيط

هذه قصة اوردها لكم وهي قصة ايضا حقيقة ولكن فيها دلاله على ان المال الحلال ما يضيع، سبحان الله العظيم

مرة من المرات سافرت للقصيم مع ولد عم لي ولما وصلنا لبريدة حلفت عليه ينزلني عند موقف التكاسي لاني بروح البدائع عند مشوار ضروري ولا ودي اكلف عليه العنوة رايح جاي تقريبا 100 كلم ، المهم ركبت مع هذاك النشمي وهو شخص في الستينات من العمر وهاك سواليف بالدرب ، وسالته وش اغرب قصة مرة عليك ما دام انك تقول انك من طلعة الدنيا وانت تكد بين مدن المملكة، قال الحمد لله مع العلم اني لي في هذه الشغلة اكثر من 40 سنة الا انه لم يصدف ان واجهة مواقف صعبة او خطرة مثل غيري.

ولكن الموقف الغريب فعلا ذات مرة كان معي لوري ( اللي ما يعرف هذا النوع من السيارات هي سيارات الحوض او البيك اب من فورد قديما) يقول اخترت اروح لاهلي في مدينة الرس لقضاء عيد الاضحى هناك وكان يومها طالع من الرياض وتقريبا في وجهته صادف عدد من الاخوة اليمنين الذين كانو يعملون في السعودية وقالو للرجال وش رايك تودينا لمكة نبي نحج ، المهم الرجال يدور رزقة وقال حج وبيع مسابح وتوكل على الله ، المهم يقول بعد ما تعدينا مدينة ظلم على طريق مكة وكان الوقت بعد منتصف الليل، اذا بواحد متعطل سيارته ويطلب مساعدة ، في هذاك الوقت كان الحنشل كثير خاصة على مثل تلك الخطوط يقول ما وقفنا للرجال ويوم تعديناه ، الا اللي حذفنا بحجارة ويقول لعل بعض تلك الحجارة اصبت واحد من ابو يمن اللي راكبين في الحوض، طبعا ابو يمن وفزعه لصاحبهم اخذتهم العزة بالاثم وحلفوا الا يرجعون ويادبون الرجال اللي حذف صاحبهم، يقول صاحبنا صاحب القصة : ما تسمع الا اللي يطرب الغمارة من فوق ويقولون والله ان ترجع للرجال ، يقول قلت لهم انتم صاحين ، هذا مو وقت صنع الخير لانه يمكن الرجال من قطاع الطرق اهل الحركات المشهورة في ذالك الوقت، قالو اللي راكبين في الحوض حنا ما نشتي نساعد الرجال ، حنا نشتي نضرب الرجال ، يقول صاحبنا رفضت هذا الطلب ولما عرف السببب، قالو لي : شوف حبيبي ترجع نطيب خاطر صاحبنا في الرجال ونادبه او تنضرب بدلا منه، يقول قلت لا والله نرجع

المهم يقول رجعنا للرجال ناوين تاديبة ، يقول يوم قابلنا الرجال والركاب اللي معي من اليمن الشقيق متحزمين للضرب ولكن الرجال مباشرة بادر بشرح الاسباب لحذفهم بالحجارة ، السبب ان سيارته متعطله من العصر والان منتصف الليل وزوجته وابناءه في البر وخايف يوقف احد ولا احد اساسا وقف له لنفس السبب وهو الخوف في هذا الطريق خاصة، يقول ما قصروا الاخوان اليمنين فكوا السبير الخاص بسيارتي وركبوا للرجال وجلسنا نمشي خلفه نحرسة في الطريق ويقول يوم قربنا من الطائف قلت للرجال بكرا الوقفه ويالله حنا يمدينا نروح للحج ولكن انت اذا خلصت من الكفر خليه عند الدلال فلان وعلمه اسمه وانا بجي بعد الحج اخذه منه. يقول صاحبنا خلصنا الحج وحصلت ركاب يبون الشمال ويقول بدلا من ان يكون طريقي على الطائف باتجاه الرياض يقول رحت للشمال وبعدها بكم شهر قدر الله مركب ناس وجهتهم الغربية ويقول سبحان الله بعد منتصف الليل تعطل الكفر. ولما نزلنا بحثنا عن الكفر ولا حصلنها وتذكرت اني معطيه الرجال اللي انقذناه في طريقنا للحج. المهم صاحبنا يقول نزلت فراشي وزعلوا علي الركاب ليه ما معي كفر اضافي. يقول سبحان الله الا بعد شوي مر سيارة متجه بشكل معاكس لطريقنا وكانت السيارة متجه للرياض وكان الوقت قرابة منتصف الليل. يقول في البداية الركاب اشروا لصاحب السيارة ويقول ما وقف ولكن بعد مدة الا السيارة تتوقف ويرجع لنا والركاب صحوني يبوني اقوم اذا معي مسدس استعد لا يكون صاحب السيارة وراه بلا ، يقول قلت للركاب ما عندي شي مع العلم انهم زعلو عليه، يقول وصل صاحب السيارة وكان ملثم لا تعرف تفاصيل وجهة ويكون قلنا للرجال معك كفر ، رد علينا ما عندي كفر واحد بس ولكن عندي كفرين ، يقول راح جاب الكفر الثاني ويوم شافني عرفني ويقول سالني انت فلان ، يقول رديت عليه ايه ، قال انا فلان اللي انتقذتني بطريقك لمكة واني كل يوم ارح للدلال اسال عنك يقول ما جاء صاحب الكفر، وبعدها قررت ازور الرياض واخذت الكفر معي لعي اشوفك فيه والان قدر الله اني اقابلك تقريبا بنفس المشكلة وتقريبا نفس الوقت اللي عثرت فيه علي، فسبحان الله اللي جمعنا هنا وبهذه الطريقة

فعلا الدنيا صغيرة

جزآآك الله خير من جد المآآل الحلآآل مآ يضيع

هذه سالفة اسرده محتواها وقد حصلت تقريبا قبل عام من الان في ولاية تنسي. احد اعضاء هذا المنتدى خدمته في موضوع القبول ووصل لمدينة نوكسفيل وبصحبة عائلته الكريمة، سالني قبلها بفترة اذا كنت اعرف احد في هذه المدينة او لا. قلت للاسف ان ما فيها سعوديين الا كم واحد يعدون على الاصابع يمكن 5 او اقل ولكن لا تشيل هم شي احنا بنرتب موضوع السكن والتنقل وان شاء الله اذا وصلت المعهد بتحصل احد وتسال وش افضل واقرب سكن ان شاء الله.

على العموم العادة اذا وصل الطالب في امريكا اول شهر لازم يتواصل معاك بشكل يومي اذا مو كل ساعة ، خوينا الله يعافيه اول يومين كل شي على اتصال دائم ولكن بعدها بكم يوم اتصل يقول يا اخوي ما اقدر اصلح شي هنا ولازم احصل احد يساعدني في موضوع الاختيار وهو صادق الله يسهل امره.

بعد البحث صلحت واحد جزاه الله خير واتصلت عليه وطلبت منه مساعدة صاحبنا اذا ما فيه كلفه عليه ، الرجال رحب الله يجزاه خير ويجعلها في موازيين حسناته. الغريب في الموضوع ان صاحبنا ما عاد اتصل تقريبا لمدة 3 ايام وانا انشغلت صراحة ، بعدها بكم يوم اتصلت اطمن وين الرجال الان حي والا ميت وين الغيبة هذه

المهم بعد الاتصال قالي والله ابشرك طيب ولا عندي خلاف والرجال ما قصر مشانا وفرجنا على المدينة حتى انه اخذنا على gatlinburg وهي منطقة مررررررررة جميلة في جبال السموكي ومنطقة سياحية مشهورة على مستوى امريكا. صراحة الخدمات هذه خمس نجووووووووووووم ، الرجال مصلح اكثر من متوسط الناس لانه العادة الواحد يادوب يساعدك في موضوع السكن ويمكن تصل للبنك او الاتصالات وينساك بعدها والناس ما تنلام بس الاشغال والدراسة

المهم صاحبنا قال كلم الرجال، لما كلمني الرجال قال ابو سعود اطلع من اللعبة !!!! قلت له عفوا وش تقصد ، رد : صاحبنا هذاه عمته ... مربيتني من يوم انا طفل وانا وعيالها على طول سواء في الملحق ياعندهم يا عندنا ولا نفارق بعض ابدا، والان انت ازهل الرجال ولا تشيل له هم ، قلت : ايه والله الدنيييييييييييييييييييييييا صغيرة سبحان الله الله جمعتكم في هذه المدينة وجلسنا نضحك

ولكن المضحك موقف صار بعدها بكم يوم اخليكم لحينه على خير