ولايــة كــنتــاكــي

السلام عليكم ورحمه الله وبركاته

تحيه طيبه لكم اخواني جميعا.... وشكر لكل من ساهم في هذا الصرح الشامخ....
انا مثل كثير من الطلبه خلصت الثانوي ونسبتي 91.9 علمي واختبار القدرات 81 ولم يتم قبولي بالبعثه والسبب لا تنطبق علي شروط البعثه الشي الوحيد اللي ناقص هو اني اكبر من العمر المطلوب وما اظن ان هذا نقص المهم رحت للوزير وجبت له توصيه من الامير واحسب انه خلاص انقبلت طلع ماعندي سالفه الوزير حتى ما ناظر بالتوصيه اللي من الامير انا انقهرت المهم يوم قدمت له الاوراق كتب على ورقتي كلام لليوم مادري وش هو لانه الله يسلمه يوم كان يكتب توجيهه الكريم رفع الورقه من قدام عشان ما اشوف وش يكتب هههههههههههههه وطبعا عنده واحد ينظره يخلص وياخذ منه الاوراق اخذها وراح يركض لواحد واقف له برا مكتب الوزير الثاني اخذها وراح يركض للموظفين اللي عند مكتب الوزير (طبعا النظام اللي اكتشفته اول ما يكتب لك وزير التعليم العالي التوجيه عض ثوبك والحق اوراقك ) وصلت عند الموظف اسأله بشر وش كتب لي الوزير يقولي ان شاء الله خير قلت له ان شاء الله بس وش صار يقولي ان شاء الله خير تراجع شئون البعثات باليوم الفلاني وتعرف وش صار احاول فيه يمين يسار مافي مجال قلت له مايصير ادخل عند الوزير واطلع وانا ماعرف وش الطبخه ووش صار لي ياخي يمكن كاتب لكم ارموا اوراقه عشان ما اتعب روحي واراجع مره ثانيه الوكاد يا جماعه طلعت من الوزير وانا ماعرف وش اللي صار بعد كم يوم تكرموا وارسلوا لي رساله على الجوال زبدتها انه مالي اي شي
كانت هذي قصتي القصيره مع الوزير مستغرب منها لليوم عشان كذا كتبتها
.................................................. .................................................. ........................

الحين يا جماعه انا ناوي اروح ادرس على حسابي واحاول التحق بالبعثه اذا الله كتب وطبعا امريكا انا اجهلها تماما رحت لشخص خبره 13 سنه في امريكا وقال انه بيساعدني بقبول الجامعه ومن هالامور نصحني جزاه الله خير بجامعه مورهيد بولايه كنتاكي

عاد يا جماعه انا بحثت عن معلومات عن الجامعه او عن ولايه كنتاكي مالقيت معلومات وافيه
فياليت اللي يعرف ويقدر يساعدني يعطيني معلومات عن الولايه من ناحيه الاسعار ومن ناحيه جوها
وابغى معلومات عن الجامعه اذا كان ممكن
ومعلومات عن معهد الجامعه واسعاره وهل هو مناسب ام لا
وايضا ابغى معلومات عن اسعار السكن ( مع العايله) وهل الدفع اسبوعي ولا شهري
واخيرا ابغى عن المواصلات
ادري زودتها عليكم لكن انتم عارفين الحيره اللي يكون فيها الشخص قبل السفر فاللي عنده معلومه ويقدر يساعد جزاه الله خير والفايده تعم الجميع ان شاء الله


اخوكم فيصل الشمري