استفسار Northern Kentucky University في احد قبولة في هالجامعة

وعليكم السلام ورحمه الله .. الحمدلله على سلامتك اخوي يزيد .. شيك على الرسايل الخاصه لو تكرمت

وعليكم السلام اخوي المشتاق

ما اظن يمدي الحين على قبول بسميستر الخريف (فول) يالله على بعد الكريسمس لان اللجنه اكيد تسكرت
لاكن بسأل لك بكره ان الله قدرني واشوف وعسى الله يسهل امورك ويوافقون
مع العلم انهم يعادلون للدبلومات او مايسمى Bachelor's بدون معادله شركه wes كما ذكرت في احد الردود

تحياتي لك اخوي المشتاق

الله مير يسلمك اخوي فهد
والله يعينك علي بنشب لك
ترى امزح ياخووك
اليوم رحنا نشوف شقق حول الجامعة رحنا للهامبتون فارم واخذنا موعد لـ بكرة نشوف شققهم
ورحنا بعد لل ردجز هايلاند
حلو ونظيف بس ابعد من الهامبتون فارم
عاد ما قررنا للحين وين بنشوف اكثر من خيار
بكرة بنروح ان شالله للجامعة بس مدري وين نروح اول شي
وابي اسألك يقدرون يعطوني قبول اكاديمي لما بعد اللغة عشان ارسله للملحقية عشان يسهل الضم للبعثة ان شالله

وشكرا لك

الله يحييك اخوي يزيد .. الا عزيز وغالي ان ما عاونتك وساعدتك ولا من اساعد رحم الله والديك .. مرينا بهالظروف ولا نبي احد يمر بالي مرينا به ..

ممتاز اجل مريتوا الهامبتون فارم .. ان شاء الله تعجبكم وتستقرون ..

الريدجز كويسه برضو وهاديه وصاده عن الناس لو خيروني ماراح اروح عن هالثنتين..

بكره بتروح للجامعه وش تسوي؟ .. اذا تمشيه ف كل الجامعه مناسبه وتتعرف على مبانيها .. اما اذا تبي شغله معينه فعلمني وشي عشان اقدر اساعدك .. وغالبا اي شي تبيه مفتاحه واول خطوه تكون عن طريق مكتب الانترناشونال وتلقاه في مبنى اسمه University Centre ويختصر له ب UC وهم راح يدلونك على الي تبيه ..

ايه نعم يعطونك قبول اكاديمي مشروط بحصولك على التوفل او مايعادله واسمه Conditional admission

وان احتجت اي شي زي ماذكرت لك بالرساله الخاصه ... لا يردك الا لسانك

تحياتي لك اخوي يزيد وان شاء الله اشوفك قريب قبل رمضان

السلام عليكم
شلونك اخوي فهد
اليوم كان يوم حافل اول شي رحنا استأجرنا سيارة
بعدين رحنا موعدنا في الهامبتون فارم ولقينا وحدة اسمها سارة
المهم قالت لنا ان طلبنا موجود اللي هو غرفتين ودورتين مياة الله يكرمك
وورتنا شقة مفروشة وعجبتنا الحمد لله
المهم دفعنا 40 و50 دولار بس موب كاش
عن طريق كوبونات من كروجر
وانشالله بننقل على الجمعة
قالت لنا اننا بندفع تأمين 805 دولار عشان ماعندنا سوشل نمبر ( هذا صعب نطلعه؟؟)
واجار باقي الشهر هذا اربعميه وشي
وفي 12 دولار شهري ندفعها مدري حقت ايش شي انشورنس
وسوت لنا دسكاونت ميتين وشي
والموية 30 دولار داخلة في ال 805
وبس صح الاجراءات هذي فهد؟؟ (وانت شلون طريقة دفعك لهم يعني شهري ووشلون تدفع لهم )
وبعدين رحنا ايكيا ذااك البعيد بس الله يخلي الجارمن
واخذنا نظره عامه عشان ان شالله نأثث الشقة
بكرة الصباح بنروح الجامعة وبعدها بنروح نفتح حسابات
وش رايك احسن بنك يدعم المنطقة (انا شفت بنك فيفث ثيرد ) وش رايك فييه؟؟
لان واحد من الشباب نصحني فيه بعد
اذا تعرف محلات اثاث بعد قريبه علمني نسير عليهم بهاليومين قبل انقل

وبس شكرا ياغالي واسمح لي بغثك بالاستفسارات بس هاليومين

وعليكم السلام ورحمه الله .. ماشاء الله عليك والله مشورت ورحت لأماكن مانروح لها الا مره كل شهرين او ثلاثه

ايه ترى ساره حليله مره وخدومه .. الهامبتون فيها اكثر من تصميم للشقق يمكن زي ماقالت لكم ..

ترى الشقه المفروشه الي ورتها لكم هذي فقط للعرض ومو للأجار .. الشقه الي بتاخذونها بدون عفش .. فاضيه وجدرانها بيج ..

وش هالاربعين والخمسين الي دفعتوها ؟ وش حقته ؟

ايه التأمين لابد منه عشان يضمنون اي تأثير في الشقه بعد ماتطلعون ..

السوشل هذا يبيله شغله بس ان شفتك شرحتها لك .. وهي تاخذ تقريبا شهر بس مافيه شي صعب ولا مستحيل فقط اجرائات ومقابلات تسويها ..

ال 12 الي دفعتها هذي تأمين شقتكم ضد السرقه او احتراق الشقه لا سمح الله يعوضونكم عن عفشكم ويعوضون المالك عن خساير عمارته .. وهي تندفع شهريا 12 دولار ..

ممتاز المويه داخله ضمن هالعرض الي عطوك .. المويه سعرها ثابت شهريا وتشمل المويه والصرف الصحي الله يكرمك ويكرم من يشوف ..

انا ادفع لهم حق الشهر مقدما بشيك من عندي او بشي اسمه كاشير شيك تسويه من البنك او عن طريق موقع المجمع (موقع المجمع ياخذون عليك 27 دولار زيادة بكل عملية سداد كمصاريف فيزه) .. ويحل عليك الدفع بتاريخ 1-2 من بدايه كل شهر واي تأخير يحسب عليه رسوم تأخير متراكمه ..

انا شقتي غرفة نوم وصاله ومطبخ وغرفه يسمونها دانس روم لانها بدون باب ودورة مياه وحده الله يعزك ويعز من يشوف ومع اجار الموية طالعه علي ب 765 بالشهر ..

ايكيا ميزتها تقدر تأثث شقتك منها بأرخص الاسعار + جودتها جيده نوعا ما + تلقى فيها كل شي من غرفه نوم الى دورة مياه ومطبخ وصاله يعني من دخله وحده تأثث بيتك بالكامل .. ويوصلون العفش لبيتك من بكره مقابل 70 دولار ..

فيه محل مفروشات كبير وقريب مره ورى برجر كينق ووينديز الي قريبه من كروجر بس اسعاره غاليه ..

البنوك خياراتك فيها واجد .. المنطقه الي حنا فيها مدعومه من قبل اكثر من بنك .. انا حسابي في US BANK وميزته فيه فرع في وسط الجامعه عند مكتب الانترناشونال اوفيس وفيه فرع قدام كروجر وتعامل موظفينه مره ممتاز مع الانترناشونال .. بس عيبه انك لو رحت لم واشنطون مثلا ماراح تحصل له فرع ..

ولا والله بالعكس ماعتبرك الا اخ ويشرفني خدمه الطيبين ولا يهينون باقي الشباب وولله اسعدتني هالتطورات اخوي يزيد ودائما البدايات صعبه .. عسى الله يسمح امري وامرك وكل مسلم ..

ان جاء بخاطرك اي استفسار او سؤال او حتى احتجت لأي مساعده ترى رقبنا سداده

تحياتي لك

مشاء الله عليكم ماقصرتوا كل شي كنت ابي اساله لقيت له جواب هنا



الله يوفقكم وعقبال ما نوصل لكم

مرحباً فيك أخي فهـد...الله يعطيك العافية على مساعدة إخوانك المسلمين وجعلها الله في موازيين حسناتك...


أنا سجلت للتوفل في الجامعة بعد 10 أيام تقريباً ، بس بصراحة مو عارف الموقع ولا أدري وين أروح لأن معهدي في سنسناتي ، إذا ممكن تخبرني عن الموقع؟؟ وجزاك الله خيراً..


الأخ يزيـد...الحمد لله على سلامتك ، وأتمنى لكم إقامة سعيدة...


أنا أسكن - من شهر تقريباً - في Highland Ridge مع عائلتي ، وأتمنى أن نلتقي في القريب العاجل ، وإذا احتجت أي خدمة - رغم معرفتي البسيطة بالولاية - فأتمنى مراسلتي على الخاص ، وأنا جاهز لخدمتك بأي وقت بإذن الله...

السلام عليكم
وشلونك اخوي فهد مع هالشهر والصيام
خل اقولك وش سويت بهاليومين
بالاول انت تقول ما تروح لـ ايكيا الا كل 3 شهور مره
انا للحين رحت له 3 مرات بـ 3 ايام
وش رايك فيني بسسس
ابشرك شريت الاثاث وبيكلموننا اليوم عشان جدول التوصيل على بكره يوصلونه ان شالله
انا طبعا بكره اول يوم لي في الشقه عشان كذا استعجلت بالاثاث والحمد لله تعبنا وحنا صايمين بس ان شالله تعبنا جا بفايدة
قبل امس الصباح رحنا لمكتب الانترناشونال وقابلنا اليزابيث وقالت لنا لا تجون الا بـ 23 اوغست عشان بداية دراسة اللغة
واخذت اوراقي عشان القبول الاكاديمي
وقالت ياخذ اسبوعين بس لما رجعت وشيكت ايميلي لقيت رساله من وحده ثانية بمكتب الانترناشونال
تبي ضمان بنكي ب 28 الف وكسور وتبي صورة من السجل الاكاديمي مع اني عطيتها اليزابيث
المهم يوم رجعت لسيارتي لقيت غليها مخالفه بـ 35 دولار اصلا مدري وين اوقف عشان اروح لمكتب الانترناشونال فـ شكلي موقف بمكان غلط ,,,
الحين عندي كم سؤال غير اللي فوق واستحملني شوي
الحين الانترنت من سينسيناتي بيل صح؟؟ والا فيه شركات ثانيه؟
كم ياخذ لين يركبونه؟؟
والكيبل سألت اليوم سينسيناتي بيل قالو ما يوصل لكم
فيركبون دش
هل مسموح اركب دش في الهامبتون فارم؟؟
واذا ابي اركب من دش نتوورك قنوات عربية هل مسموح بعد؟؟ والا يستقعدون؟؟
وهل دش نتوورك يوصل لـ حارتنا؟؟
بس هذا اللي ببالي الحين وانتظر مني اتصال قريب اذا تسمح لي بس خلني اخلص من الشقه على خير
شكرا جزيلا فهد

اخوي رصيف الشمس
هلا وسهلا وان شالله نلتقي قريب ما تقصر ياغالي

حياك الله اخوي رصيف الشمس بين ربعك واخوانك ..
اذا تعرف الجامعه .. فيها مبنى اسمه University Centre ويختصر ب UC هناك تجرى عاده اختبارات التوفل

هذي خريطة للجامعه والمبنى المقصود رقمه هو 18 وتحصله في يسار الصوره قريب من مبنى رقم 12

اتمنى اني افدتك واذا الموضوع صعب عليك عطني خبر وان شاء الله يسهلها ربك

تحياتي لك