تجمع طلاب RIT اللي دراستهم في شهر 6

والله انا جديد يفيدونك الاخوان بس الصور شكله حلوو

الحمد لله طلعت تقريبا خلال شهر و نصف
لكن لا يضيق صدرك انا كنت مرسله لهم ايميل وبعد ما وصلت الفيزا باسبوع توهم يردون علي
حاول تكلم السفارة وهذا رقمهم 4883800 افضل من الايميل من 3 الى 5 العصر
الله يسهل امورك يا رب

مبروووك ..

كان الموعد حقي يوم 10 مايو .. يعني بعد يومين يخلص شهرين بالتمام و الكمال ..
وبالنسبه للايميلات ما يقولون شي .. ارسل لهم يقولون تحت الاجراء .. خخخخ .. ما استفدت شي.

متى كان موعدك ؟ قبل او بعد موعدي ؟ ومتى وصلتك تقريبا ..

انا الظاهر علشان اسم العائله شبهه .. و سافرت بعض الدول المشبوهه .. علشان كذا تاخرت ..
بس والله قصيت التذاكر وجالس ارتب للسفر .. و ادور على سكن .. الله يستر لا يكنسلون و يروح تعبي بلاش ..

السلام عليكم
انا كنت منزعج عشان الفيزا بس لما عرفت انك قبلي باسبوعين وما وصلك شي لحد الان عرفت انه الامور كذه مع اكثر الناس
انت مقدم على الرياض او الظهران؟
لان كذا واحد من اللي قدم على الظهران بعد بداية شهر مايو الى الان ماستلم شي

و عليك السلام ..
انا مقدم على الرياض .. و الى الان ما صار شي ... ما بكلمهم و لا بدور عليهم .. حتى يخلصون من لخبطتهم ...
اذا اعطوني رحنا ابتعاث ... و اذا ما اعطوني .. مو مشكله اجلس لين السنه الجايه واقدم على دولة ثانيه و ربك يسهلها.

تحية...

من خلال بحثي عن سكن في المواقع .. جمعت هذي المعلومات اتمنى تستفيدوا منها ..

الرستك فيليج:

تحتاج روم ميت .. الايجار 1030 دولار تقريبا .. شقه غرفتين، غير موثثه. عقود طويله
متوافره تقريبا في اي وقت. فيها عائلات سعوديه كثير.
قريبه من المسجد و الاسواق و باص الجامعه ياخذك يوميا و يوديك للجامعه.
موقعها بالضبط: بجانب مونرو كوميونتي كوليج.

البارك بوينت:

اقرب المجمعات السكنيه للجامعه .. غالي 1200 دولار تقريبا ..شامله كل الخدمات .
موثث .. يعتبر بعيد شوي عن المسجد ( مو بعيد مره ) بس ابعد من الرستك.

الروك رومز:
او تسمى sunnyside suites
مأثثه اثاث كامل .. قريبه من الرستك فيليج .. قريبه من المسجد و الاسواق ..
لست متاكد مما اذا كان الباص حق الجامعه يمر عليها او لا ..
اتوقع اذا بتستاجر فيها .. تحتاج سياره.
تقريبا ارخص من غيرها ..


winton villege apartment :

تقريبا ابعد شي عن الجامعه .. تعتبر قريبه من الرستك فيليج.
تصميم الشقق حلو " اعجبني ض1 ".
يعطون شهر مجانا اذا استاجرت سنه كامله .. مافيه سيكوريتي ديبوزبت ..


السكن بالقرب من جامعه روشستر:

هذي المنطقه تسمى ( شيلي ) .. الاسكان فيها متوفر بشكل كبير للطلاب و غيرهم ..
تعتبر مأهوله بالسكان لانها اقرب الى وسط المدينه من الاخريات ..
تسهل لك الاندماج في المجتمع ... لان السكان فيها و العوائل و الاطفال اكثير من الاماكن السابقه ..
تستطيع ايجاد " روميت " بسهوله .. حيث ان طلاب جامعه ار اي تي و جامعه روشستر .. يسكنون كثيرا في هذه المنطقه ..
تحتاج سياره بالتأكيد.. لانها بعيده عن المسجد و المطاعم الحلال .. لست متاكد من ان باصات جامعه ار اي تي توصل هناك او لا ..
تعتبر المنطقه رخيصه الا حد ما ..
موقعها بالتحديد ... بجوار جامعه روشستر .. من ناحيه النهر .. و دائما ما يرمز لها با ( 19th ward ) او chili ...


السكن في سكن جامعه ار اي تي:

اولا فيه اكثر من مجمع داخل الجامعه ...
الاول اسمه:
Colony Manor
السكن في هذه الشقق شامل جميع الخدمات .. فيها شقق غرفه او غرفتين و ثلاث ..وعاده فيها بلكونه او باحه ...
اتوقع انه لازم يسكن معك روميت في " نفس الغرفه " ..

النوع الثاني اسمه :
Perkins Green
يوجد بها شقق من غرفه او غرفتين فقط .. شامل جميع الخدمات .. و الروميت .. اذا دخلت مع احد لازم يكون معك في نفس الغرفه.

النوع الثالث:
Racquet Club
هذا سكن تابع للجامعه و لكنه يقع خارج الحرم الجامعي .. تمر عليه باصات الجامعه ..
الايجار فيه شامل جميع الخدمات .. ونوع الشقق فيه غرفه واحده فقط .. مع بلكونه ..

النوع الرابع:
Riverknoll

يقع داخل الكامبس قريب من المباني الاكاديميه و معامل الكمبيوتر..
يعتبر اقرب سكن للمباني الاكادميه .. شامل جميع الخدمات ..
نوع الشقق فيه اكثر غرفه و غرفتين و ثلاث غرف ..
بالنسبه للروم ميت : شقه الغرفه الواحده تقدر تستاجرها لوحدك فقط ..
و اذا بتسكن مع روم ميت ... تسكن في شقه ابو غرفتين او ثلاث .. ويمكن يكون معك في نفس الغرفه او يكون في غرفه ثانيه في نفس الشقه ..
لان الشقه ابو غرفتين : تحتاج ثلاثه اشخاص ... يعني اثنين رح يكونو في غرفه و واحد في غرفه ..
الشقه ابو ثلاث غرف .. تحتاج اربعه اشخاص .. يعني اثنين رح ينامو في غرفه و اثنين رح ينام كل واحد منهم في غرفه.


النوع الخامس :
University Commons

سكن داخل الحرم الجامعي .. هوه عباره عن بيت كامل من اربع غرف .. يعني رح يكون معك في نفس البيت ثلاث روميت ..
ماثثه .. شامل الخدمات .. كل غرفه ممكن تتاجر لحالها ..


النوع السادس :
RIT INN

بصراحه ما فهمته هذا .. بس احسه فندق .. و مكانه خارج الكامبس حق الجامعه ..


السكن خارج المجمعات السكنيه:

في هذا النوع .. السكن يكون تقريبا ارخص.. ويكون عادة داخل الاحياء الامريكيه .. يعني رح يسهل عليك الاندماج في المجتمع بشكل اكبر ..
و هي عباره عن بيوت خاصه .. يتم تاجيرها .. او تاجير غرفه او غرفتين من البيت ..
المشكله في مثل هذي البيوت .. انها احيانا تكون غير امنه .. او ان الروميت اللي معك يكون " صايع ضايع " .. يعني اتذكر مره شفت اعلان عن
غرفه في بيت ... و الرجال كاتب " free smoking / free drugs " .. لذلك اذا بتسكن في اماكن زي كذا ... لازم تتاكد
ان الروميت يكون كويس .. و حاول توضح له من البدايه الاشياء هذي .. علشان ما تصير مشاكل بعد العقد ..
ايضا الحفلات .. بعضهم يقلب البيت " قصر افراح " .. علشان كذا حاول تعرف هالمعلومات من البدايه ..
ايضا بعض الاشخاص .. يكون هوه صاحب البيت .. " يقولك التلفزيون هذا اللي في الصاله حقي .. اذا تبغى اشتر لك واحد وحطه في غرفتك " ..
او شي زي كذا .. حاول تتفاهم معاه من البدايه على الاشياء هذي ..
الحسنات في هذا النوع من الايجار .. انها تفيد تعلم اللغه ... لانك رح تسكن مع ثلاثه او اربعه .. و الوضع شبابي و فله ..
و ايضا انها في العاده تكون رخيصه .. يعني ما تتعدى 400 دولار ..



اللي يبغى يشوف مواقع الشقق هذي بالتفصيل ... يدخل على قوقل ماب .. و يروح على مدينه روشستر .. و بعدها يشوف هالاماكن حول الجامعه ..

ان شاء الله استفدتوا .. و لكم التحيه ..

الي يبغى اي خدمه انا حاظر يراسلني على الخاص واذا كان في امريكا يرسلي رقم جواله

الله يوفق الجميع

السلام عليكم اخي الفاضل بقايا
اناا قادم ان شاءالله بداية 9
انا وعائلتي واحتاج سكن نظيييييييف وقريب
ان عرفت شيئا اكون من الشاكرين
وفقك الله

وش رايكم بالحجز
احجز على واشنطن اونيويورك؟
يقولون نيويورك فيه تدقيق اكثر وواشنطن سمحين
شي ثاني اسال عنه
هل معهد اللغة مايقول شي اذا تاخرت عن بداية الدراسة اسبوع مثلا لان الفيزة والاجراءات لم تنته بعد ودراستي اول 9
اللي في المعهد تكفون يسالهم
الله يوفقكم

تحملوني بثقل عليكم
اللاب توب هل صحيح انه عند الدخول في المطار ممكن يقتشون على البرامج هل هي اصلية؟
وبما تنصحونني ؟
اتوكل على الله وانتم عارفين ان البرامج في السعودية كلعا منسوخة
الله يوفقكم