خمس شهور في مدينة فلادلفيا ( Phildelphia )

هلا أختي حياك الله


عادي أختي الكل ما يدري هل هو يدرس الجامعة بنفس مدينته اللي درس فيها اللغة الا اذا انه جايب قبول معهد يؤهله لدخول الجامعة هذا ممكن انه يستمر في نفس المدينة.

لأن أنا إلى الان جالس ادور لي على قبول ولا أدري وين أكون ولا بأي ولاية وغيري كثير ولكني طامع بدعوات الجميع بالتسهيل من الله سبحانه.

وأبد لا تشيلي هم أهم شي تسوينه انك اذا جيتي تسعين على قبول الجامعة على طول عشان ترتاحي.



وأمنى أكون قدرت ارد عليك بنفس تساؤلك.



وبالله التوفيق،،








أخوك/
*عظيم الصمت*

ااخوي عظيم الصمت..
ماشاء الله تبارك الله ..انا سمعت عنك هنا انك تحب تساعد وترد على استفسارات الناس واسئلتهم
فالله يجعل جزاك الجنه والمغفره ويحفظك من كل شر ومكروه..
انا حبيت اسالك وابي" العلم الوكاد"..لاهنت
انا بروح بعائلتي 4 اطفال ودراستي ماستر ادارة اعمال انشاء الله

1-الحين من ناحيه الامان.هل تصلح لي ولعيالي خصوصا اذا بدرسهم هناك يعني تشوف فيه عائلات سعوديه باطفالهم او على الاقل عربيه؟

2-الا سعار..تخيل شلون راح تكون المصاريف وانت لحالك فمابالك ب4 اطفال..مشكله,فهل هي مناسبه بعني رخيصه مو غاليه؟؟

3-ومن ناحية المعهد..ابي معهد يكون قووووي يعني عشان افهم اللغه وامشي مع دراستي زين يعني مو اكون مفهيه

4-ومن ناحية الجامعه اخوي العزيز..انا صحيح ابي ادرس بجامعه قويه وممتازه.بس تعرف مع الاطفال ومسئولياتهم بيكون الدراسه صعب شوي..فيعني اخاف تكون الجامعه صعبه علي..فهمتني اخوي ,يعني ابي جامعه اقدر انجح فيها.

5-واخر شي...برايك الافضل بنسلفيا ام اوهايو..انا عجبتني اهاويو بس يقولون بردها صقيع.والاطفال دايم في المقام الاول

*طالعه على حساب البرنامج.

والله يوفقك ياخوي ويطول بالك علينا..ويحفظك ويرجعك لاهلك بسلامه يارب.

السلام عليكم ورحمة الله وبركاته

يعطيك الف عافية اخوي غظيم الصمت على جهودك جعلها الله في موازين اعمالك
وانار الله دربك وسهل امرك واعطاك ما تشتهي وتتمنى

اخوي انا حاط فبالي ثلاث معاهد على الترتيب..
1/ معهد ELP التابع لجامعة بنسلفانيا
2/ معهد ELC التابع لجامعة دريكسل
3/ معهد كابلان (( ما اعرف عنه تفاصيل لكن سمعت عنه ))

أولا:: انا حاط فبالي جامعة دريكسل لكن بما ان معهد اليوبن اقوى واقل فترة دراسة فإني راح ادرس فيه
(( سؤالي هل ترى ذلك جيد ام تنصحني بشيء آخر ))

ثانيا:: هل تعلم شيء عن معهد كابلان.. قوته ، اعتماديته ، و و و الخ .. اي معلومات تعرفها عنه والا استبعده من القائمة
ايضا اذا فيه معاهد تعتقد تكون مفيده

ثالثا:: بالنسبة للسكن علما ان معي زوجتي وطفلتي ايهما افضل..

1/ Rittenhouse Square
2/ ستي افينو city avenue
3/ المدينة الجامعية Unievercity City

طبعا المدينة الجامعية اقرب لكن اعتقد اغلى ..
ستي افينو ابعد الثلاثه وممكن يكون ارخص..
رتنهاوس بين لااثنين..

لكن بماذا تنصحني وخصوصا عشان الحضانه للطفلة..


وفقك الله واسف على الاطالة اخي العزيز واذا كان فيه خطأ لمعلوماتي ارجوا التصحيح

دمت بمحبة وتقدير،،،

هذا أقل واجب أقدمه وباللي أعرفه ما راح أبخل على أحد بإذن الله

اللهم آمين والله يستجيب دعواتك

أبشري أختي وماشاء الله عليك تبارك الله وعسى الله يوفقك ويخلي لك عيالك ويصلحهم.


بالنسبة لسؤال الأول هي ماعليهم الأمان إذا أنتي أبعدتي عن منطقة اللي من شارع 40 واللي بعده 41 ومن بعدها فهي هذي المنطقة الأكثر خطورة لأن نسبة السود تكثر فيها.

أما المنطقة اللي أنا ساكن فيها في سيتي أفينيو فهي ولله الحمد آمنة وبنسبة عالية جداً.

أما بالنسبة لعيالك ما أدري هل هم بعمر الدراسة أو أقل أو أكثر ولكن فيه حضانة قريبة والاسبوع اذا هو دوام كامل 120 دولار وإذا هو نصف دوام بيكون بستين دولار ونصف الدوام يكون من خمس ساعات وأقل.

وإذا هم بعمر المدرسة فممكن يدرسون في المدارس الحكومية الامريكية وما عندك أي إشاكلية فيها.

وفيه عوائل سعودية فيهم خير وبركة ولكن ما ادري اذا سؤالك متعلق بإن عيالهم يدرسون في المدارس الامريكية ما عندي معلومات كافية بس اتذكر واحد اماراتي كان يقول ان عياله مبسوطين في المدارس ما عندهم اي إشكالية هذا كلامه قبل ما يرجع للإمارات الله يحفظه ويذكره بالخير.

نجي للمصاريف مكافأة كل طفل 270 دولار بحد أقصى أربع أطفال هذا حسب ماقريته قبل ما أطلع لأمريكا عن المكافأت هل تغيرت الآن ما عندي خبر. ولكن ترجع للشخص أولاً وآخيراً هل هو اقتصادي أو راعي صرف عالي ولكن أمريكا تعلم الإقتصاد غصب على الواحد هو أكثر شي يتعب الإيجار والباقي إن شاء الله مقدور عليها بكيفية موازنة الشخص لمصروفة وكيف يتصرف فيه وكلها كم شهر وأنتي عارفة نفسك وعارفة مصروفك كم بيكون.

والمعهد اللي أنا فيه قوي بس إنه متعب شوي من ناحية كثرة الواجبات وهذا ما يعاب عليه.

والجامعة اللي بمدينتي فيلادلفيا كلها قوية ولكن ممكن تشوفي سانت جوزيف وهي قوية بالتخصصات الإدارية او دركسل فهي حليوة وقوية بالتخصصات الهندسية والادارية عادية مو مثل سانت جوزيف ولكن معهدها حلو ولكن السشن فيه مدته عشر أسابيع ومعهد اليوبن اللي أنا فيه مدته سبعة أسابيع والخيار لك.

أوهايو مثل ما سمعت عنها إنها برودتها أشد من بنسلفانيا صح إن كلها ينزل فيها ثلج بالشتاء ولكن ما يقال إن أوهايوا أبرد والله أعلم ما أقدر أخوض بشي ما جربته ولا عرفته ولكن أنقل لك المعلومات اللي عندي من اللي حولي أو من اللي قريتها.
أما فيلادلفيا تمتاز يقربها من واشنطن DC عشان قرب الملحقية منها وقريبة بعد من نيويورك والمدينتين هذي كل مطاراتها دولية وفيها الطيران السعودي موجود.

والله يسهل أمرك ولا تنسي صلاة الاستخارة تراها مهمة قبل أي خطوة وخصوصاً في قرار مثل الابتعاث.

وياليت تعذريني لو كانت إجاباتي مو كافية ولكن اللي أعرفه قلته لك.

والله يجزاك خير على دعواتك ولا تحرميني أنتي أو غيرك من دعوات ظهر الغيب.



وبالله التوفيق،،







أخوك/
*عظيم الصمت*

يا هلا والله أخوي وعليكم السلام ورحمة الله وبركاته


والله يخليلك بنوتتك ويحفطها لك ويقر عيونكم فيها.


والله يستجيب دعواتك بفضله وكرمه.


رأيي بالنسبة لإختيارك المعاهد فقد أحسنت الإختيار وترتيبها هو المثالي من وجهة نظري ولكن كابلن حسب ما سمعته من واحد من الشباب إنه شبه موقوف لنه ما يقبل أحد الآن فما أدري من صحة المعلومة ولكن يمدحونه من ناحية التحدث يقال إنه قوي فيها بس.


وجامعة دركسل لو حصلت فيها قبول توكل على الله ولا تترد والله يوفقك وإذا تخصصك إداري فجامعة سانت جوزيف تصنيفها أقوى بالإدارة من دركسل والله يسهل أمورك.


السكن إذا علي أنا راح أقولك تعال لمنطقتي ستي أفنيو راقية وممتازة صح انك عشان توصل الجامعة بالباص بتاخذ علي من 20 إلى 30 دقيقة وأنت في المعهد بحول الله ولكن كل شي قريب منها والخيار لك.

والله يسهل أمورك ويكتب لك ما فيه الخير وعليك بصلاة الاستخارة.





وبالله التوفيق،،







أخوك/
*عظيم الصمت*

أخوي عظيم الصمت أنا متواجد بفيلي

لو تكرمت وأردت أريد التواصل معك

حاولت أرسل رسالة خاصة لكن مشاركاتي لا تسمح لي

أرجو إرسال رقمك أو إيميلك في رسالة خاصة ولك الشكر.

هلا والله حياك

الحمد لله على سلامتك


وحياك الله



وبالله التوفيق،،






أخوك/
*عظيم الصمت*

الله يوفقك ويسهل امورك والله انك ماقصرت وانا طولت عليك وغثيتك كثير
اسال العلي القدير ان يحقق لك حلمك ويردك سالم غانم يااااارب
الله يكثر من امثالك اخوي الناس الي تحب تساعد الناس وتسخر وقتها لنفع غيرها
بالله كل من قراء لاخوي عظيم الصمت لايبخل عليه بلدعاء.
وموفق يااارب

اللهم آمين أختي


وهذا هو اللي أنا أبيه أبي دعوة بظهر الغيب

والحمد لله بدت البودر يارب لك الحمد

فلا تبخلي علي أنتي وغيرك بدعواتكم وياليت تخلي الوالدة والوالد مايبخلون علي بالدعاء اذا هم على الوجد الله يطول بعمارهم على الطاعة.



وبالله التفيق،،




أخوك/
*عظيم الصمت*

السلام عليكم
لو سمحت ابي اسالك عن الجامعه
جامعة فرجينيا هل فيها قبول مشروط للماستر ابي تخصص انجليزي
وشكرا