الأعضاء الإشتراك و التسجيل

الملتقيات
ADs

دليلك للانتقال الى ولاية MASSACHUSETTS

دليلك للانتقال الى ولاية MASSACHUSETTS


NOTICE

تنبيه: هذا الموضوع قديم. تم طرحه قبل 2669 يوم مضى, قد يكون هناك ردود جديدة هي من سببت رفع الموضوع!

قائمة الأعضاء الموسومين في هذا الموضوع

  1. الصورة الرمزية faisalk828
    faisalk828

    مبتعث جديد New Member

    faisalk828 الولايات المتحدة الأمريكية

    faisalk828 , ذكر. مبتعث جديد New Member. من السعودية , مبتعث فى الولايات المتحدة الأمريكية , تخصصى Pharmacy , بجامعة MCPHS
    • MCPHS
    • Pharmacy
    • ذكر
    • Boston, Malden / Massachusetts
    • السعودية
    • Feb 2010
    المزيدl

    August 27th, 2010, 06:40 PM

    بسم الله الرحمن الرحيم

    السلام عليكم ورحمة الله وبركاته

    كيف حال الجميع وبارك الله علينا وعليكم هالشهر المبارك ( مع انه قرب يخلص ) الله يعيده علينا وعليكم اعواما عديدة وأزمنة مديدة...

    انشالله رح احاول باذن الله اني اوفر المعلومات الكافية عشان نسهل الانتقال من السعودية او من أي ولاية ثانية الى ولايتنا الحلوة ماساشوستس وبالتحديد مدينة بوسطن... لان فيه معلومات كثيرة تجينا عن هالمدينة وخصوصا كلنا سمعنا ان بوسطن غالية ولا تقدر تعيش بسهولة بالنسبة لك كمبتعث... وباذن الله رح نمشي خطوة بخطوة على عدة اجزاء بحيث اننا نتعرف على كل الاشياء المهمة ومن دون اي تعب وكيف نسكن ونمرر اول الايام بسهولة وبدون تعب...

    ارجو تثبيت الموضوع لانه انشالله رح يكون دليل كامل لكل الاجراءات في ولاي ماساشوستس وكيفية السكن والتعامل مع الناس والاخطاء التي يمكن تفاديها...

    قبل الابتعاث افتح حساب بالبنك الامريكي ( ليش البنك الامريكي) لانه بامكانك الدخول من اي تلفون بامريكا على سامبا فون وتسوي كل العمليات من تحويل وتسديد وتحويل لحسابك بامريكا بسهولة ومجانا مع سرعة التحويل لبنك اوف امريكا خلال يومين وبرسوم 90 ريال فقط ( مهمة للمبتعثين من جهات خاصة اخرى مثل ارامكو او المستشفيات الخاصة)
    _______________________________________
    الجزء الأول المقدمة والوصول للولاية....
    بالبداية رح نتكلم عن الوصول الى الاراضي الامريكية
    بعد الوصول بالسلامة الى واشنطن عبر الخطوط السعودية رح يستقبلونك الملحقية اوتماتيكي لانهم يستقبلون كل رحلات الخطوط.. تبي تلقاهم حاطين لوحة عليها شعار السعودية طبعا انت تكلمهم وتقولهم انك مبتعث يبي يعطونك اوراق ويقولون لك اركب السيارة ورح يودونك ببلاش للفندق بعد ماتتجمعون مجموعة طبعا السكن على حسابك ويختلف سعره حسب الموسم ونوع الغرفة .. انا اخذت غرفة انا وزوجتي طلعت علي ب 110 دولار عموما السعر يتراوح من 80 الى 120 هذا المعدل ويعتبر سعر حلو الى حد ما بالنسبة للفنادق الاخرى ... اسم الفندق Comfort Inn وهو قريب من المطار وهناك رح يجيكم واحد يتكلم عربي ويعطيكم الاوراق وتعبونهن طبعا الاوراق موجودة اون لاين على موقع الملحقية ولاتنسى تجيب معك صور لك وللمرافقين لو معك 4 في 6 وقرار الابتعاث والقبول و كل اوراقك والشهادة حقتك سواء الثانوي لو كنت تدرس بكالوريوس او البكالوريوس لو تدرس دراسات عليا وصورة من جوازك والاي ناينتي فور اللي هي البطاقة اللي قبال الفيزا مختومة وبطاقة العايلة وصورة الاي تونتي المختومة لك وللمرافقين لو معك مرافقين والظاهر صورة بطاقة الاحوال بعد خله معك احتياط وياخذونهن منك بالليل عشان يخلصون الشغل بدري بالليل وتجي تستلم اوراقك كاملة من بكرا ...

    ملاحظة: لو كنت جاي على اي خطوط ثانية غير السعودية لاتنسى تسجل على موقع الملحقية بنموذج استقبال مبتعث جديد اسمك ومتى انت واصل علشان يستقبلونك ويسوون لك كل الاجراءات وينقلونك للفندق بدل ماتصرف تكسي رايح وتكسي جاي وتصرف حوالي 150 دولار بتكاسي من المطار ومن والى الملحقية ....

    تنام ليلة سعيدة وترا النت مجانا بالفندق لو تطمن اهلك انك وصلت بالسلامة وتقوم من بكرا تصلي الفجر وبالمناسبة ترا قبلة واشنطن شمال شرقي وتنزل وتفطر مجانا بالفندق بوفيه فطور وتنتظر مندوب الملحقية المحترم يجيك ياخذك الى الملحقية واللي هي موجودة في واشنطن في منطقة اسمه جورج تاون بجانب السفارة السعودية...(استخدم خرائط قووقل للتعرف على الموقع)
    ملاحظة: خرائط قووقل ترا نعم الصديق في السفر لاتصير تدربي رويسك ماتدري وين انت فيه لازم تعرف موقع كل شي تروح له واهم شي مكان السفارة والقنصلية والاشياء الرئيسية بالبلد...

    المهم تروح للملحقية ( لو معك مرافقين ترا مهوب لازم يروحون... انت يا ولي الامر تكفي بس لو تبي تجي زوجتك معك والاطفال نو بربلم عادي مارح يقولون شي ) وتحضر محاضرة خفيفة لطيفة توجيهية... طبعا انا بلخص لك معظم الاشياء اللي تحتاجه في ابتعاثك الى ان تقف على رجليك.... بعد المحاظرة تاخذون بريك لمدة ساعة غداء ويقولون لكم روحوا تحت للمنطقة تغدوا وارجعوا... رح نستغل هذا الوقت في الحصول على شريحة جوال بارخص سعر وافضل خدمات
    فيه تحت الملحقية بمنطقة المطاعم بعد ماتنزل من السلم الكهربائي في نفس المجمع محل جوالات رهيب صراحة...
    طبعا لازم تعرف نظام امريكا في الجوالات كل الجوالات لازم معه عقد لمدة سنتين اشتراك يعني انتبه لاتوقع اي عقد ادامك تبي شي مؤقت مهوب توقع عقد سنتين مع جوال ومدري ايش وتبلش طول هالمدة
    فيه شركتين رئيسيتين tmobile atandt هالشركتين هم اللي يغطون معظم امريكا تي موبايل ممتازة لان عندهم شي بدون عقد اللي هو فلكس اكاونت ويشمل مكالمات و رسائل انت شف اللي يناسبك بس اهم شي اللي بدون عقد وتعطيه الاي تونتي حقتك عشان يعرف فيه تغطية اذا رحت لولايتك والا لا وتاخذ الشريحة هذي زي سوا عندنا تقريا وتحطه بجوالك وتشغله عااادي جدا وتاكد ان الشريحة حقتهم تركب على جوالك لان بعض الجوالات تطلب شريحة مايكروسيم مهيب سيم العادية
    ملاحظة في شركة اسمه Simple mobile هي فرع من تي موبايل وممتاااااازة بكل ماتعنيه الكلمة ولافيه اشتراك سنوي الدفع قبل كل شهر مقدما وبس وتستخدم نفس شبكة تي موبايل وسعره 60 دولار مكالمات ورسائل وانتنرت غير محدودة انا انصح فيها لان السعر ثاابت 60 يعني 60 مهو مثل الشكرات الثانية تضيف ضرايب
    همسة: تقدر تغير رقمك لاي شركة ثانية متى ماحبيت لو كان بدون عقد سنوي يعني لاتشيل هم لو حسيت ان الخدمة ماعجبتك والا اقتعك احد خوياك بشي مجرب بولايتهم تقدر تغير بسهووولة جدا
    بعد الرجوع للملحقية
    تستلم عدة اشياء من الملحقية بالنسبة للمبتعث
    1- الضمان المالي النهائي للمعهد او للجامعة ( ولو كان معك قبول مشروط لجامعة بدراسة انجليزي رح يعطونك ضمان فقط للمعهد وحق الجامعة يرسل لك بعدين )
    2-بطاقة التامين المؤقتة من شركة ايتنا او اي شركة اخرى وهذي مهمة للعوايل لانهم اكيد يتصخنون عيالهم شوي مع حوسة السفر وتغير الجو...
    وباذن الله رح افرد مقال كامل عن التعامل مع شركة التأمين الطبية...
    3- ورقة توضح كم دخلك في امريكا وهذي مهمة للسكن عشان ما يسكنونك وانت مالك راتب لازم اثبات انك عندك مرتب رح تسدد منه للسكن وحسب القانون لازم يصير الاجار ما يزيد عن ثلث الدخل واحيانا يتغاضون الى النصف وهذي مهمة في بوسطن لان الايجار هو اللي غالي اما الباقي كلشي عادي
    4- بطاقة تعريف اي دي من الملحقية وهذي مهمة لانه احيانا بعض السكن والشكرات يطلبون 2 اي دي منك وكذا يكون عندك اي دي الملحقية واي دي الجواز.

    بعدين رح يودعونك ويحذرونك من عدة اشياء سقط فيها اخوانك مبتعثين من قبل وسووا مشاكل ويبغون يتلافونها قدر الامكان...

    ترجع للفندق كانك مزبط السكن في بوسطن مع اخوياك الحمدلله كانك مازبطت السكن نرجع لصديقنا قووقل مابز واحجز لك فندق لا يقل عن 5 ايام للبحث عن السكن طبعا الحجز بالاسم والبطاقة الائتمانية لو معك يكون افضل واكد
    تاخذ قشك وفيه باص مجاني (شتل) من الفندق الى مطار دالاس وان كنت في مطار ثاني رح توديك الملحقية مجانا بس علم المندوب اللي عندكم متى رحلتك لولايتك ومدينتك وهم يودونك بدل ماتاخذ تكسي لانه التكسي غالي بامريكا ( تقريبا ب 50 دولار من الفندق الى واشنطن).

    تروح طبعا وتدخل للمطار وتسافر --) والله من زين الخطوة

    تصل الى مطار لوقان الدولي اللي هو في بوسطن وتاخذ تكسي لفندقك اللي حفظت عنوانه من قووقل مابز والا لو ماحجزت قل للتكسي ابي فندق في بوسطن وهو يوديك
    فندق انصحك فيه سعره حلو بس خدماته مهيب مرة ولا فيه انترنت ببلاش بس خلاص ماعندك مشكلة لانك طلعت جوال فيه الانترنت مفتوح اشبكه باللاب توب ويصير انترنتك معك اينما كنت لمدة شهر من الان....
    اسم الفندق وعنوانه وموقعه
    http://www.midtownhotel.com/

    اخترت الفندق لانه سعره رخيص بالنسبة للبقية في وسط المدينة ومنطقته اااامنة جدددددا قريب جدا من السب وي اللي هو صديقك في بوسطن لان المواصلات الرئيسية في بوسطن هو المترو او كما يسمونه البوسطونيون ال T

    هنا رح اوقف بنهاية الجزء الاول واي اسئلة على هذا الجزء بامكاني ارد عليه قبل ما انزل الجزء الثاني
    ودعواتنا لكم بالتوفيق....
    _______________________________________
  2. بسم الله الرحمن الرحيم

    مرحبا بكم في الجزء الثاني من دليلك الى الانتقال الى ولاية ماساشوستس

    الجزء الثاني رح يكون عن البحث عن السكن والاول الايام كيف تقضيها..

    بعد الوصول الى بوسطن وتسكن في الفندق اللي يناسبك من حيث السعر او المكان يبدا البحث عن السكن بس قبل لا تبدا عن البحث عن السكن فيه اشياء لازم تعرفها عن بوسطن لانه تختلف عن كل المدن
    1- اذا كانت جامعتك او معهدك داخل مدينة بوسطن فالافضل لك داااائما الوصول عن طريق القطار او كما يسمونه التي حتى لو معك سيارة ( انا معي سيارة ولكن المواقف جمب جامعتي تكلفتها 170 دولار بالشهر من دون مصاريف بنزين السيارة وخلافه) اما بالمقارنة للوصول عبر القطار تصل دائما بسرعة لانه مافيه اشارات والتكلفة لو اخذت بطاقة شهرية للقطار بسعر 59 دولار رح تستخدم القطار زي ماتبي خلال هالشهر ومن دون دفع اي تكاليف اضافية.
    2- السكن داخل مدينة بوسطن رح يكون غالي وسكن قديم جدا تقول انه مايستاهل ينسكن فيه اصلا واللي يقهرك ممكن يقولك الغرفة الواحدة والصالة ودورة مياة داخل بوسطن ممكن ان تصل الى 2000 دولار بالشهر من دون الكهرب
    ملاحظة دائما الكهرب تحطه بحسابك انه يحسب عليك من 80 الى 150 دولار بالشهر يعتمد حسب صرفيتك ونوعية الشركة وطريقة التدفئة لانه فيه ناس تدفي المبنى بالغاز ويدفعون فاتورة غاز وفيه ناس كل شي بالكهرب حتى الفرن ويدفع فاتورة كهرب بس.. الغالب ان معظم السكنات يكون عليهم الماء والتدفئة بس انت تأكد لازم ....
    3-بامكانك العيش في بوسطن لو كنت عزابي او مع عائلة بدون سيارة بكلللل راحة لاتحسب ان السيارة شي لازم في بوسطن لكن حط في بالك انك تسكن جمب محطة القطار ممكن يكون اغلى شوي بس صدقني رح ترتااااح كثييييييير تطلع من بيتك وتروح للقطار ولا تتمرمط مع الباصات لان معظم الجامعات والمعاهد يكون مقرها جمب محطة القطار مثال جامعتي ومعهدي كلهم لاجيت اوصلهم مايحتاج امشي اكثر من 10 دقايق من البيت الى قاعة الدراسة مع انه تبعد عني نصف ساعة بالقطار ...

    رح اوفر عليك البحث عن المكان المناسب للسكن وين ماكان مكانك في بوسطن لاني رح اقولك وين يسكنون السعوديين والخليجين بشكل عام وشروط السكن وكيفية التقديم على سكن...

    الان رح لخرائط قوقل واكتب
    Malden center MA usa
    ورح يطلع لك مكان محطة قطار مالدن على الخط البرتقالي اللي يعتبر من القطارات السريعة في بوسطن السعوديين معظمهم وخصوصا العواااائل تسكن في المنطقة حول القطار لان المنطقة هذي:
    اااامنة بكل ماتعنيه الكلمة
    جمبك سوبر ماركت كبير يفتح لمنتصف الليل
    مسجد يصلون فيه الصلوات الخمس جميعا حتى الفجر بمسافة قريبة جدا ووجود جالية اسلامية كثيرة لاتنسى ان المنطقة هذي في الكثير من المسلمين واليهود لذلك يتوافر اللحم الحلال واللحم الكوشر لليهود اللي نقدر ناكله حنا لانهم يطبقون نفس مواصفاتنا تقريبا...
    معظم الخدمات قريبة من بريد ومحلات جوالات و مدارس وروضة للاطفال قريبة بس منيب متاكد مكانه وين لاني اشوف الاطفال دايم يمشونهم بالمنطقة هذي
    العماير جديدة وفخمة وبنفس سعر اللي في بوسطن او ارخص شوي لكن فرق السماء عن الارض لو بحثت بقوقل مابز يطلع لك العماير الموجودة ولها موقع على الانترنت تقدر تشوف الشقق وتفصيلها واسعارها وتحجز بعد لو بغيت بس المعاينة افضل شي...
    وجود مركز شرطة قرييييب جدا يوفر الامان لذلك لاتجد الهوملس والا سكارى في هذي المنطقة خصوصا ان الاماكن هذي عائلية لايوجد فيها مراقص او بارات او اي شي يشمئز منه الانسان
    السعوديين متركزين في العماير اللي شمال المحطة على شارع فلورنس وشرق المحطة على بليزنت ستريت او في الاماكن اللي حولهم و الوصول الى هذي المحطة سهل جدا وخلال نصف ساعة بالقطار وانت في منتصف بوسطن في اشد اوقات الزحمة لان القطار زي مانتم عارفين مايكون فيه اشارات توقفك كل شوي
    جمبك معظم الخدمات مثل البنوك في هالمنطقة حوالي 4 بنوك من ضمنهم فرعين لبنك اوف اميركا اللي هو اكبر بنك في أمريكا وينصح انك تفتح حسابك فيه خصوصا لو كان عندك حساب في سامبا التحويل بينهم ياخذ من يومين الى 3 فقط برسوم 90 ريال زي ماقلت سابقا في الجزء الاول...
    معلومة : في شباب قالوا لي انه بنك سامبا هو جزء من سيتي بنك والتحويل بينهم ب 10 ريال فقط وبسرعة وفعلا لما شفت شكل بطاقتهم نفس شكل بطاقة البنك الامريكي بالضبط اللهم اللون يختلف لكن عموما يقال ان بنك اوف اميركا افضل وانت و اختيارك عاد...
    عيوب هالمنطقة من غروب الشمس كلشي يسكر ماعدا السوبر ماركت الكبير والصيدلية اللي تكون 24 ساعة للطوارئ ولا فيه مناطق ترفيهية للشباب يعني فهي منطقة عائلية بحتة لكن حتى الشباب اللي يسكنون هناك يروحون لبوسطن ومتى ماملوا وانبسطوا وراحوا للسينما والاشياء هذي 25 دقيقة وهم في بيتهم في مالدن

    اذا انت عزابي وتعرفون العزابية يحبون المدينة اكثر لانهم يبون ما تصك المحلات بالليل ويبون الاماكن الترفيهية اكثر فيسكنون في مناطق مثل كامبردج او في فينوي او باك باي لو كان يبي جمب الجامعات مباشرة بحيث انه يروح مشي لجامعته من دون ركوب اي قطار

    لو ما اعجبتك مالدن منطقتي المفضلة الثانية هي Medford
    وهي اللي محطة اللي قبل مالدن وهي ايضا منطقة عائلية لكنه حية شوي و السعوديين هناك متمركزين في عماير اربور بوينت لو بحثت عنه بالنت تقدر تشيك على الاسعار من السعودية عااادي وتقدر تكلمهم وتجي تشوف الشقة باي وقت
    عموما بينه وبين مالدن 3 دقايق بالقطار فاللي تقدر تروح له بمالدن تقدر توصله لو كنت في مدفورد بكل سهولة...

    بشكل عام اذا جيت تستاجر لازم تحط ببالك:
    مدة العقد كم ياجرونك ونصيحتى لك اذا انت مانت متاكد كم تبي تقعد مثلا ولا تدري المعهد او الجامعة معجبتك او لا خذ عقد ستة اشهر حتى لو زاد السعر لانهم لو كان عقدك سنة وجيت تبي تطلع قبل يدفعونك ايجار شهرين متتالين واحيانا ثلاثة حسب الاتفاق عند التوقيع فلذلك اسلم من قبل ولاتوقع على شي ماتدري وشو
    شف الخدمات المقدمة مثل الكهرب و الماء والتدفئة لانه مهمممة بالشتاء بوسطن برده مايرحم وشف تكلفة الخدمات الغير مدمجة في العقد مثلا
    انا عقدي سنة وعليهم الموية وانا علي الكهرب والانترنت موجود باللوبي تحت اذا تبي انزل واذا مابغيت تشترك ب 40 دولار بالشهر يجيك للشقة
    لاتنسى ان فيه قيمة تأمين ديبوزيت احيانا تصل ل 700 دولار واحيانا قيمة شهر مقدم كل هذا لان ماعندك سوشل سكيوريتي فلذلك لاتنسى قيمة التأمين حطها تبع الايجار لكن ترا بالنهاية رح ترجع لك لما تجي تروح....

    بالنسبة للكيبل ترا التلفزيون يوصل في هالمنطقة بالاريل العادي ويوصلك قنوات فوكس وان بي سي وايون وبي بي اس فيه منها دقتهم عالية هاي دفنشن يعني لاتقول الكيبل لازم لان الكيبل للي مقابل التلفزيون 24 ساعة ولاتنسى انك طالب لو عندك اطفال فيه قناتين مجانيات بث وحدة منهم عالي الدقة للاطفال
    المطلوب فقط شاشة ال سي دي فيها تيونر واريل عادي توصله وتبحث بالقنوات يوصل لك لحد 15 قناة مجانا من ضمنهم ذس بوسطن وفوكس اتش دي وان بي سي وبي بي اس وايون للاطفال

    ملاحظة لهواة القنوات العربية: تبي ام بي سي والقنوات العربية تشترك ب دش نتورك وهي مقدم خدمة تلفزيونية وتاخذ الباقة العربية بس ممكن تكلفك الى حد 80 دولار بالشهر عشان تاخذ الباقة الاساسية زائد العربية ولازم يوافق راعي العمارة عندك على انه يركبون لك دش لانه انا عمارتي ما يوافقون الا بالكيبل اللي هو كومكاست او فرايزون

    اعذروني للتوسع بس احاول اعطيكم اكبر قدر من المعلومات ...

    بعد ماتوقع العقد تقدم الاي تونتي والورقة اللي تبين كم دخلك (ملاحظة مهمة لو انت عزابي تقول باستاجر وبعدين اجيب زوجتي رح يقولون لك دخلك الشهري اللي هو 1845 دولار من الملحقية مايكفي نعطيك شقة ب 1575 بالشهر لكن لو كانت معك زوجتك رح تعطيك الملحقية ان دخلك رح يكون 2825 دولار بالشهر وبكذا يوافقون يعطونك الشقة فننتبه لهذي النقطة) المهم صورة من الجواز وتوقع العقد وتستلم الشقة من بكرا او بنفس اليوم مثل ماصار معي
    وتسكن اول يوم بشقتك وعلى البركة طبعا مافيه اثاث تبي تشتري اثاث اون لاين تراه حلو ويوصلون لبيتك والا السكن ممكن يدلونك لمحلات اثاث قريبة تزهم عليهم وياجرون لك او تشتري الاثاث
    تكلفة تأثيث الغرفة اثاث فخم ممكن يوصل لحد5 الاف دولار والا تبي تشتري شي خفيف والتاثيث كل شهر شوي مثل ماسويت انا براحتك

    ملاحظة عند التوقيع انا استاجرت بشهر 3 السنة اللي راحت بتاريخ 20 دفعت باقي شهر ثلاثة وشهر اربعة كامل مع تامين ديبوزيت 500 دولار لانك ماعندك سوشل سكيوريتي وقيمة ابلكيشن للشقة اللي هو 50 دولار عن كل نفر ساكن
    طلع الحساب حوالي 2800 قلت بدفعهن كاش قالت لي لا نبيهن شيك قلت ماعندي حساب قالت سو موني اوردر
    رحت للبنك قالوا مانعطي موني اوردر للشيك الواحد باكثر من الف دولار سحبت من حسابي بالسعودية من صرافة امريكية تحمل نفس الشعارات اللي على بطاقتي وسحبت 1500 من حسابي ووقف وصلت الحد للسحب اليومي اشوا الحمدلله انه كان زوجتي عندي حساب وايضا حولنا من حسابي لحسابه اونلاين وسحبنا باقي المبلغ كاش ورحنا للبنك اخذه 3 موني اوردر باسم الشركة الف والف و800 والحمدلله مشت الامور فلذلك انتبه لاامور المالية عشان كذا قلت لكم افتحوا في سامبا تقدر تحول عبر جوالك الامريكي من اي حساب لاي حساب بسهولة...
    بعد ماتسكن وتجيب قشك وتطلب الاثاث اون لاين او من محل تبدا المشوار بالتجهيز للدراسة وبداية الدوام

    ملاحظات
    الوصول الى بوسطن ياليت يكون قبل شهر من بدء الدراسة مثل ما يسمح لك القانون عشان تتولم وتعرف المدينة وترتاح ماتجي يالله كلشي بسرعة بسرعة وتزعج نفسك متى تبدا الدراسة...
    السكن يتراوح من 1100 للستوديو الى 1600 للغرفيتن تزيد قليلا تنقص قليلا لكن الخبر الحلو انه هذا اغلى شي في المدينة الباقي كله بالسعر المعقول
    حاول دائما ان النشافة والغسالة حقت الملابس تكون في نفس الشقة خصوصا بالنسبة للعوايل لانه صعبة جدا انك تودي الملابس للمغسلة غالي او انك انت تغسلها بنفسك باماكن الغسل العامة خصوصا اننا متعودين على انه دائما الغسالات تكون في البيوت اما بالنسبة للفرن والثلاجة فكل الشقق تامنها لك وبعضهم يزود مايكرويف وغسالة صحون مثل شقتي
    لاتنسى تضيف فاتورة الكهرب على الاجار وتتراوح من 80 الى 150 دولار بالشهر حسب الشركة والاستخدام
    زوجتك لازم توقع معك عقد السكن حتى لو ماتعرف انجليزي.. تدري ليش عشان لاجيت تطلع اي دي للولاية يبون دليل انه ساكنة معك ... عشان مهوب كل مارحتوا مشوار خذت جوازه معه ولو يمسكونكم مامعه اي دي ممكن يعطون تهمة فايليور اوف اي دي يعني تصير مجهولة الهوية فلذلك اول الايام تعبر بالجواز الين ننتقل للمرحلة الثالثة...

    وسلامتكم واي اسئلة رح نحاول نتساعد على الحل المناسب.....
    ______________________________________
    نهاية الجزء الثاني وانشالله الجزء الثالث بالطريق

    -------------------------------------------
    بسم الله الرحمن الرحيم
    سلام عليكم ورحمة الله وبركاته...
    اليوم باذن الله نكمل الجزء الثالث من دليلك الى الانتقال الى ولايتنا الحلوة ولاية ماساشوستس
    بعد ما سكنا الحمدلله واستلمنا الشقة فيه عدة اشياء لازم تسويهن اول شي واهم شي
    فتح حساب بالبنك ... طبعا والافضل في ولايتنا هو بنك اوف امريكا نروح ناخذ معنا عقد الايجار واللي فيه اسمك واسم المرافق اللي هي زوجتك وموقعين كلكم عليه وموضح فيه عنوانكم والاي تونتي والجواز وهذي اللي تحتاجونه لفتح حساب بالبنك طبعا تفتح انت وزوجتك حساب بالبنك
    ملاحظة يبي يقولون لك نبي نوعين من الاي دي مثل ماقالوا لي ولبعض الشباب قل للموظف او الموظفة استخدمي الجواز والفيزا كاي ديين مختلفتين وتمشي الامور ويطلبون عنوانكم بالسعودية وتفتحون حسابين مختلفين
    مهم: نوع الحساب هو شكنق اكاونت يعني حساب جاري لاتفتح حساب سيفنق اللي هو توفير لان حساب التوفير هو ربى مية بالمية ورح يعلمونكم هالكلام بالملحقية انا اذكر قالت لي طيب افتح الحساب مهوب ضارك شي تراه مجاني لك الان لو تبي بعدين بفلوس ههههه تحسب المشكلة اني مابي ادفع فلوس للحساب والبلى انه حرااام لكن الحساب الجاري مجاني

    ملاحظة ليش افتح حساب لزوجتي لعدة اسباب اولا بطاقة البنك يجي فيها الصورة حقتها وتقدر تستخدمه كاي دي غير رسمية عند محل والا شي لاجت تشتري ثانيا لا جيت تطلع اي دي من الولاية له او رخصة قيادة عشان ماتضطر تشيل الجواز معه دايم لانه خلاص الجواز يتسكر عليه ويتغبى يطلبون انه تجيب برووف او دليل للسكن اللي هو كشف حساب من البنك جاي على البريد طبعا هالكلام للطالب والمرافقة
    طبعا لارحت للبنك تقولهم اولا الحساب شكنق اكاونت ثانيا ابي صورتي على بطاقة البنك عشان مهوب اي احد يستخدمه ثالثا وهذا المهم جدا قلهم ابي كشف الحساب يجيني الين البيت يقولون لك تقدر تشوفه بالنت وتوفر ورق وتحافظ على البيئة لايهمونك لانك رح تستخدم كشف الحساب لك ولزوجتك لاجيت تطلعون الاي دي او الرخصة لك وحدة ولزوجتك وحدة
    بعد كذا يعطونك بطاقة مؤقتة طبعا مافيها صورة وياخذون لك صورة وتجيك البطاقة الرسمة بعد اسبوع على بيتكم الجديد
    ممكن تقولك تنبي ادارة الحساب بالنت قل ايه وتسوي لك حساب بالنت اسهل للادارة والتشييك على مكافات الملحقية نزلت والا مانزلت
    ثانيا الاثاث وما ادراك مالاثاث
    مافيه داعي تتعب راسك الطلب من النت يكل سهولة يوصلك لحد بيتكم ولاتنسى تاخذ الشحن المجاني انا طلبت كنب وماتريس اللي هي المرتبة حقت السرير وسرير وتلفزيون وكله اون لاين وبسعر افضل من اللي تحصله بالمحلات
    اشهر الاسواق
    Amazon.com
    buy.com
    walmart.com
    ميزة وولمارت بضاعتهم حلوة وقوية ورخيصة بس يبيلك تجلس على النت وتتقضى

    ملااااحظة بطاقة بنك اوف اميركا تقدر تشري به اون لاين لانه تعتبر كفيزا وتعتبر كبطاقة ديبت اللي هي حساب عادي
    واذا كنت تحب تاثث شخصيا تروح للمحل عندك محلات حلوة عندهم اسرة ومراتب وغرف نوم واغراض مطبخ ومفارش وخرابيط البيت كللله
    احلى شي
    Sears
    وهذا في مجمع اسمه قالاريا مول عند محطة ليتشمير على القطار الاخضر وبالمناسبة كل المحلات هذولي عندهم متاجر شخصيا وعندهم تطلب اونلاين يعني هيا هيا

    نجي للمواصلات في بوسطن
    المواصلات هي المترو ويبيلك تروح للمترو وتشوف بعينك طريقته وتسال الموظف او الموظفة هناك وشلون استخدم المترو ويشرح لك مرة ويساعدك بعد عشان تشري التذكرة سوء شهرية او مرة وحدة او حقت اسبوع..
    انا والله اول ماوصلت ماعرف ولا قد شفت مترو بحياتي والحمدلله طلع معي واحد من الشباب الله يجزاه عنا كل خير وشرح لي الطريقة خمس دقايق وعرفت كلشي وصرت اتنقل ببوسطن بكل راحة .....
    وفكرة المترو انه تشوف اقرب محطة جمب جامعتك وتنزل فيها وتروح للجامعة او المعهد على رجليك بس
    هذي خريطة مترو بوسطن وهي سهلة جدا جدا انا جلست اول شهر وحفظت معظم المناطق خصوصا الخط البرتقالي بس بالمناسبة ترا مهوب لازم تروح لكل مكان رح للاماكن اللي تهمك وبس
    http://www.mbta.com/schedules_and_maps/subway/

    اخيرا تبدا الدراسة بكل راحة وتروح للمعهد وتاخذ الاي تونتي لك ولزوجتك وصورة من جوازاتكم كلكم حتى لو كانت مرافقة ماتدرس لازم اول يوم ياخذون صور من كل شي معك الفيزا الاي ناينتي فور والاي تونتي المختومة
    وتبدا الدراسة وبالتوفيق....
    وانشالله نشوفكم بالجزء الرابع كيفية استخراج الرخصة والماس اي دي او بطاقة تعريف الولاية وتوجيهات عن الدراسة ووشلون ماتطيح بمشاكل وتتاقلم مع الحياة الامريكية واخلاقيات المسلم اثناء الدراسة

    -------------------------------
    بسم الله الرحمن الرحيم
    رجعنا لكم بالجزء الاخير من هذا الدليل للانتقال الى ولاية ماساشوستس
    ورح أتكلم عن اصدار الرخصة للطالب والاي دي للمرافقين او الرخصة بكيفكم عاد...
    اول شي تاخذ الاي تونتي المختومة وجواز السفر وتروح للسوشل سكيوريتي اوفس وهذا يكون موزع بمعظم الاماكن وبالمناسبة فيه واحد بمالدن قريب من محطة مالدن على الاورنج لاين
    تدخل للمكتب وتقولهم ابغى دينايل لتر وتعطيهم الاي تونتي والجواز ويعطيك ورقة مكتوب فيها انه مايحق لك ان يكون عندك سوشل سكيوريتي نمبر وبكذا يطيح عليك هالطلب لا جيت تطلع رخصة
    بعدين تذاكر الكتيب الصغير اللي موجود اون لاين عن النظام بامريكا للقيادة والعقوبات على المخالفات وتروح لمكت الار ام في وبالمناسبة اقرب شي موجود عند محطة شاينا تاون على الاورنج لاين اول ماتنزل من القطار رح تلاقى مكتب المرور بوجهك
    تاخذ معك الجواز والاي تونتي وعقد الايجار كاثبات للتوقيع و رسالة كشف الحساب للبنك جايتك على البيت وموضح فيها اسمك وعنوانك وهذا يعتبر اثبات للسكن او تقدر تجيب اي شي ثاني مثل فاتورة كهرب او موية ويمشون لك اياها وطبعا مع الورقة حقت الدينايل ليتر من مكتب السوشل
    وتروح تعبي الفورم انك تبي تطلع بيرمت اللي هي زي التصريح عندنا وتختبر بالكمبيوتر او ورقة اسئلة وان جاوبت 18 من 25 تنجح وتقدر تسوق بالرخصة المؤقتة الى حد ما بس ماتركب معك اطفال ولاتطلع بالليل بعدين تسوي موعد للاختبار بالسيارة ولك حلين يا اما تروح لمكتب تعليم القيادة ويطلعون معك سواق او وتستخدم سيارتهم وتدفع حوالي 120 دولار وتختبر بالسيارة حقتهم او انك تشري سيارة وتجيب لك واحد معه رخصة امريكية له سنة وتخليه يجي معك يوم الاختبار لانه لايمكن ان تختبر لحالك... طبعا الاون رود تست مشروح باالنت على يوتيوب دور المقاطع وتبي تشوف كلشي بعينك .... واذا نجحت 7 ايام وتجيك الرخصة على البيت
    بالنسبة للاي دي للمرافقين البالغين نفس الكلام كلشي لهم نفس الكلام . اللهم مالهم اختبار قيادة تقدم وكلها سبعة ايام والاي دي عندك بالبيت
    باقي شي واحد تعرفه وهي انه لايسمح بحمل اي دي ورخصة بنفس الوقت لازم وحدة بس...

    وتبدا الجامعة او المعهد بكل سهولة وتنتبة من بعض الشباب الاجانب او السعوديين ما يفرق لانه قلة الادب ماله جنسية محددة وفيه نماذج مرة مهي طيبة ببعض المعاهد وبالمقابل تبي تلقى ناس زي العسل وينحطون على الجرح ويبرا المهم انت خلك مضبوط ولاتروح مررررة مع اي احد خلك حذر جدا الى ان يثبت ان اللي مقابلك انسان سوي مية بالمية
    وايضا تنتبه من بعض البنات من اي جنسية لان فيه بعضهن تستهدف السعوديين بشكل خاص وتلقاه تمزح معهم وتقهقه بكل ما اوتيت من قوة مع ايحاءات الكل يفهم وش قصدها فلذلك تنتبه من البنات تحديدا حتى لو كانت سعودية ان شفتها بس تكلم الشباب وتضحك معهم لاتحاول تحتك فيها ابدا ابدا...
    وبالنسبة للشباب لو عزمك احد قالك تعال نبغى نروح للنايت كلب هذا مانشرب حنا ولا شي بس نلعب بولنق مثلا او نلعب بلياردوا... نصيحتي لك لاتقرب هالاماكن ابد ابد لانه هالاماكن المشبوهة هي اللي ممكن احد يجيك ويتبلى عليك او تصير لك مشكلة لاقدر الله فلذلك مانقول الا ربي سلم سلم وانتبهوا لدراستكم جميعا
    والله يحفظكم ويرعاكم...
    واي استفسار مستعدين وبالخدمة
    7 "
  3. سلام عليكم ورحمة الله وبركاته
    تم اضافة الجزء الثالث والجزء الرابع بالطريق

    بالنسبة للسؤال
    ماعتقد عند الجامعة اللي سالتي عنها تعليم انجليزي ولكن يتعاونون مع كليات ثانية تاهلك للدخول عندهم
    اتبعي هذا الرابط ورح تشوفين لستة الكليات اللي يتعاملون معها
    ESL Programs : International Students : UMass Lowell

    وللتاكد اكثر بامكانك تاخذين رقم خدمات الطلاب او الانفورميشن للجامعة وتتصلي عليهم عبر السكايب بسعر مررررة رخيص وتستفسرين شخصيا من الجامعة نفسها ترا الجامعات الامريكية تساعد الطلبة كثيييييير ويحبون الطالب اللي يسال لانه يصير كذا مهتم مرة

    اتصلي على الجامعة بسعر رخيص جدا جدا جدا عبر سكايب لان المكالمات لداخل امريكا عبر سكايب رخيصة مرة واستفسري عن كل اللي تبينه ولو ماتعرفين انجليزي خل اي احد من اهلك يسالهم بالانجليزي لانه كثير هنا الاهل يتصلون على الجامعة للسؤال عن اي شي
    وبالتوفيق يارب
    7 "
ADs

قم بتسجيل دخولك للمنتدي او

الانضمام لمبتعث

Search Engine Optimization by vBSEO ©2011, Crawlability, Inc.