وداعاً ايها الحلم .. أقكر أن الغي البعثة بسبب مصاريف الحضانة

لاتضيع الفرصة ياغالي اللي بين يديك ..

غيرك كثير يتمناها ..

ابحث عن الولايات والمدن الرخيصة وهي بكثرة ..

وحاول تقنع الملحقية بذلك ..

الله يسهلها عليك يارب
مثل الحاله اللي جالسه افكر فيها عشان اول شهر بالبعثه كيف ادبر اموري فيها اول ماسجلت عابالي من اول مانروح بتكون المصاريف علي الوزاره لكن اكتشفت العكس لو كنت ادري كان ماسجلت عشان ماتروح علي البعثه ودبرت وظيفه للسنه الجايه يعني لو انقبل بنسحب منها لان الي الان مالقيت حل
الله كريم

اذا انت للان ماسافرت بامكانك تغيير الولاية

كثير غيروا ولاياتهم ..والموضوع مع الوزاره مايصلح بالمراسله ابدا لازم بالمشافهة

وروح لدكتور محفوظ الزهراني هو المسؤؤول عن القبولات يوقع لك على قبولك بالتغير ورجعه للمكتب يغيره مكان ماتبي واللي لمسته منه انه رجل متعاون

ووفقك الله اخوي ويسر امورنا وياك

أخوي ..

مالك إلا تروح للوزاره .. و تشوف المسؤول عن القبولات ..

و إدخل عليه إشرحله الوضع .. صدقني مايقصرون ..


ترا هم ودهم يطيرون الشعب السعودي كله هناك .. يعني لاتشيل هم ..



تحياتي ..

الله يعينك اذا انت وزوجتك تدرسون خلي دوامك انت مثلاً صباحي وزوجتك مسائي وتمشي الامور ان شاء الله وترا بعد المعاهد حقت الجامعات فيها حضانات رخيصه جدا

الاخ كلامه صحيح

يعني حرام تضيع البعثه روح للوزاره وتكلم معهم وشوف المسؤال عن القبولات وتكلم معااه واشرح المشكله
وان شاء الله تقدر تغير الولاية

الله يكون في عونك كان لابد من الاول ان تسأل وتجمع معلومات قبل الاختيار وليس العكس مثل حالتك اخترت وسويت كل ي وبعدها سألت عن المدينه واسعارها الله يكون في العون

اخي هذي فرصه وحرام تضيع عليك
انت تعلم انه عندنا ما ينفع شي بالمراسلة لابد من المقابلة الشخصيه وجه لوجه لكي تستطيع حل مشكلتك

يعني كل اللي رد ما فهمت كيف يفيد

الكل ينقد ويقول أبحثي عن ولاية رخيصة ومو عارف أن إختيار الولاية إجباري من الوزارة يعني بدل ما تقولون أبحثي عن ولاية وتنقدون في البنت عطوها حل

الحل عندي يا فستق

تراني مثلك الوزارة الله يخلف علينا وضعتني أنا وزوجتي وبنتي وأبن في الطريق سوف يأتي في ولاية هي من أغلى الولايات وفي مدينة بوسطن بالتحديد تعرفين كيف بوسطن يعني حتى المكافأة ما تكفي لشيء

بس أنحلت لأني وزوجتي جبنا بيبي ستر لبناتي وبيبي ستر تاخذ مبلغ ممكن يكون من 1200 إلى 1400 دولار للعائلة يعني ممكن تتفقون معها على المبلغ اللي تبغون وبهذه الطريقة توفرون مبلغ للأكل وللطلبات الثانية

لا تلغي البعثة ولا ترجعي أولادك للبلد خليهم معك مثلي لأني مستحيل أستغني عن أولادي مقابل البعثة

ولا تنسين أنها فترة لغة يعني سنة وراح تبحثين بعدها عن ولاية رخيصة تكفي عائلتك

أبحثي عن أي شخص يدلك على بيبي ستر معروفة في المنطقة أو بإمكانك الذهاب للدور الحضانة وأسألي عن البيبي ستر تراهم يعرفون الكثير منهم

أتمنالك التوفيق

تحياتي لك

السلام عليكم ورحمة الله وبركاته ..

أشكر الجميع على التفاعل ..

الأخ دكتور نت .. تراني رجال مثلي مثلك ..

فكرة البيبي سيتر ممتازة لكن أنا دورت ولقيت انها تاخذ في الساعة 15 دولار للطفل .. يعني الإثنين 30 دولار .. في خمسة ساعات في خمسة ايام في اربعة اسابيع .. يعني فوق 2000 دولار ..

اما اذا تاخذ في الساعة 15 دولار للأطفال كلهم يبقى شي ممتاز ..

الله يجزاكم خير.. وأرجوا المزيد من التفاعل .. لأنه أكيد في حل ..


تحياتي

تتوقع البيبي ستر ب دي سي مثل بوسطن !!!!!
اكيد اغلى الله يجزاك خير ،،

ــــــــــ

اخوي صاحب الموضوع ماعندك حل الا انك تغير الديره ،، ترا كثير غيروا لاسباب تافهه ،، وترا لو تعلم الوزاره الوضع ماراح يرفضون ابداا ،، وتراي انا طالعه علـي قبول انا جايبته بنفسي ومختارته والوزاره جابت لي قبول ورفضته ،، وكل شي يجي بالاقناع واذا صار عندك اسباب مقنعه ،، بس صراحه احس انك ماودك تغير وماتبي الا دي سي ،،

بالتوفيق

السلام عليكم ورحمة الله وبركاته

أخوي فستق الخيرة فيما اختاره الله سبحانه وتعالى هذا اولاً وصل صلاة الاستخارة قبل ما تقدم على اي خطوة

وأسأل الله التوفيق لك بكل خطوة تخطوها وأن يسهل أمرك وأمر كل مسلم بفضل وكرمه


أنا عندي لك اكثر من طريقة تحل فيها مشكلتك بس أهم شي تشيل فكرة إلغاء البعثة من راسك


شف وانا اخوك أولاً:

من المبتعث انت او زوجتك

إذا هو أنت المبتعث وفيزتك F1 وزوجتك مرافقة فيزتها F2 بيكون دوامها جزيء يعني نصف دوام بالطريقة هذي نقولك حل البيبي سيتر ممتاز ومناسب إذا أنت مصر على السكن في واشنطن دي سي.
ثانياً : من الممكن أقولك لك تخلي عيالك الفترة الاولى في السعودية وبعد ما تجي وترتب امورك تجيب عيالك بعدين مع امهم وأنا عارف إن الموضوع مو سهل عليك ولكن لو تحملت لك فترة بترتاح طول مدة ابتعاثك بإذن الله.


ثالثاً : اذا كانت زوجتك المبتعثة فيزتها F1 يعني بتدرس في المعهد بدوام كامل وإذا أنت فيزتك F2 بيكون دوامك جزيء يعني نصف دوام ومثل ما قلت لك البيبي سيتر حل مناسب وخصوصاً إن فترة دراستك انت او هي اذا كان الدوام جزيء تقريباً حوالي الساعتين فقط بيكون بس كلاس واحد.


ثالثاً : إذا كنت أنت وزوجتك فيزتكم كلها F1 هنا اقولك اسكن في فرجينيا اجباري وترى اللي يفصلها عن واشنطن دي سي تقريباً نهر فقط وإن شاء الله الشباب اللي في فرجينيا ما راح يقصرون معك بيفزعون لك وبيدورون لك سكن رخيص وحضانة سعرها معقول.

رابعاً : أقدر أقول لو مثل ما قالوا الشباب انك رحت لمسؤل القبول ولا قدر يسوي لك شي بعد ما تجي هنا إدخل على الدكتور محمد العيسى الملحق الثقافي وصدقني ما راح تطلع من عنده بإذن الله إلا وهو معطيك اللي تبيه الرجل متعاون من واقع تجربة مني ومن بعض الشباب اللي حوالي من غير اللي نسمعه عنه من علوم ماشاء الله عليه تبارك الله إنه رجل متعاون ومتفاهم وبابه مفتوح للكل وبأي وقت ولا يعرف سياسة خذ موعد والكلام هذا.

خامساً في المدينة اللي أنا ساكن فيها فيلادلفيا فيه حضانة ما اقولك انها خمس نجوم ولكن معقولة وسعرها شهرياً 480$ دولار إذا كانت دوام كامل.
ونصف دوام 240$ دولار اللي هو أقل من خمس ساعات وتزود عن الخمس ساعات دقيقة وحدة يدفعونك دوام كامل لليوم والدفع فيها اسبوعي وتحسب الايام اللي بيداومون فيها أطفالك مثلاً ثلاث ايام دوام كامل ويومين نصف دوام بتدفع حق دوام اربع ايام ومثل هالحسبة هذي.

وأسأل الله لك التوفيق وأن يسهل دربك ويكتب لك مافيه خير وصالح.

وأعتذر عن الإطالة.



وبالله التوفيق،،





أخوك/
*عظيم الصمت*