!! ^^ النـــادي السعودي بتامبــا - فلوريدا ^^ !! رسمــــــيا معلومات + مساعدة +

اوك اول شي تواصل مع www.wes.org

ارسل لهم الدرجات مقفلة ومختومة في ظرف .. وشوف راح يعادلوها لك او لا!!

اذا عادلوها .. بعدها خلاص .. قدم على معهد اللغة .. ثم الجامعة .. وشوف الجامعة راح تقل المعادلة ولا لا !!

ممكن يقبلوها كلها ممكن 3 ارباع ممكن نص ممكن ولا شي !! على حسب ..من جامعة لجامعة يفرق !!

اهم شي الان تسويه سوي معادلة لدبلومك عن طريق الشرككة هذي

بالتوفيق

توضيح بس لاهنت
ارسل لهم كشف الدرجات الي هو الترنسكربت بس
والا وصف المواد بعد؟؟
بنتظار ردك

اخ مراد ... مع الاسف انا لي سنه في الجامعه الحين ولا اعرف النادي السعودي هذا الا في اجتماع الملحق .. وبصراحه النادي في الجامعه هو نادي وهمي ولايخدم الا اعضائه و الاصحاب .. يعني بالعربي نادي للعنصريه مع الاسف ..

استغرب ان القى نشاطكم في المنتديات والصفحات الفيس بوك ولا اشوفها على ارض الجامعه .. اكثر من شخص جاء وسألني عن النادي وانا مثله ما عرف شي عنه .. طبعا ما اخفيك عن الشكاوي اللي كل ما اسأل احد عن النادي ويبلغني ان ابتعد عنه مع الاسف لسؤء معامله الاداريين فيه من رئيس ونائب وباقي الاعضاء اللي ما اتوقع انهم اكثر من 3 وباقي بالبركه

اخرها قبل يومين من طلبه معهد اللغه واللي قدموا شكوى في رئيس النادي عن سلوكه السيئ معاهم في الحفل اللي اقامه المعهد ..


اتمنى منكم خدمه الطلبه بسلوك حضاري واحترام جميع الطلبه وزياده الفعاليه وفك الاحتكار عن الاصحاب والمعارف وخدمه الطلابه جميعا حتى لو ما تعرفوهم ..

ترانسكربت بس يكفي ارساله

اتمنى لك التوفيق

الله يوفقك دنيا واخره
بس استفسار اخير ان شاء الله
وصف المواد متى احتاجه ومين يطلبه ومتى؟؟؟
اعانك الله على فعل الخير

اولا النادي ليس وهمي .. ويخدم الجميع .. حقيقة الامر ان ليس هناك فعاليات وانشطة اقيمت خلال فترة تاسيس النادي
الاولى .. الوضع سينتقل للأفضل ان شاءلله ..

اما وصفك النادي بالعنصرية فهذي وجهة نظرك ودليل على اخلاقك وعقليتك .. وانت حر فيها

الحمدلله انا وسلمان وكلنا بنحاول قدر المستطاع معاونة الجميع بقدر ما يمكن .. ا
وفيصل ومحمد ومتعب وكل الشباب ما احد مقصر ..

نقطة اخرى .. انا سوف احاسبك امام الله يوم القيامة لانك اتهمتني بسوء المعاملة وقلة الإحترام
لك امام الجميع وافتريت علي بينما انا لم افعل ..

اما اتهامك لرئيس النادي فكن ( رجلا ) ..
وقل ماذا فعل لك سلمان - او انا - و اشرح للجميع كيف لم يتعامل
حضاريا معك او مع الشباب بالمعهد وكيف لم يحترمكم ؟؟

وان ( كنت صادق فيما تقول اخبرني امام الجميع ) ما هوا اسمك وماذا واجهت مني وهل واجهتني وتحدثت معي شخصيا ؟؟ ومتى ؟؟ وقل كل ما تريد عني !! لنرى الصادق من ( الكاذب ) ...

النادي مافيه احتكار .. و انا شخصيا مستعد لخدمة اي شخص يريد مني مساعدتي .. حتى بعضهم في اورلاندو وفي ميامي اروح لهم وكل هذا لوجه الله تعالي وبيني وبين الله يحاسبني على نيتي ولا انتظر من شخص تقييمي ..

مو عشان فلان يجي ويوقول مراد سوا ومراد ما سوا !!

اخي الحبيب .. اذا كان لك سنة في الجامعة وما تعرف انه فيه نادي هذا شي يرجع لك ومشكلة خاصة فيك .. لا تعممها
على الجميع .. واتق الله في ما تقول وتتهم الناس بالباطل .. وان كان عندك فكرة للنادي ونشاط تعال واطرح فكرتك
وبادر وقدم وشارك .. لا تقف في مكانك وتنتظر وتلقى اللوم على الجميع من وراء الشاشة !!!

اوضحت في بداية الموضوع سبب ركود النادي في البداية !! ولكن ............

ان اصبت فمن الله وان اخطات فمن الشيطان !!

عقبال نفرح بتخرجك من "ألجامعة"

الشكر على الرد وهذا ردي على جميع ما طرحت ..



يا استاذ .. اذا النادي مافيه فعاليات ونشاطات كيف اجل يخدم الجميع .. وكيف راح تكون خدمه الجميع من الاساس بدون تواصل معاهم .. بدون عمل هذه النشاطات كيف راح توصلوا خدماتكم ... الموضوع مهوب سلق بيض وانا اخوك .. !!!! عرفت ليه يعني نادي وهمي وعلى ورق بس .. هذا الكلام المنطقي



وجهه نظري !! طيب انا ليه كل ما اسأل اي سعودي في الجامعه يقولي مادامك ما تعرفهم اجل ماراح يفيدونك .. (( على فكره مين سلمان وفيصل ومحمد ومتعب وكل الشباب ... وماشاء الله كل الشباب وعاجزين تسوون نشاط .. ياخي جمع الشباب وسوو فريق كوره هذا نشاط يالله .. شفت اشلون نادي على ورق ولا النشاط بس الكتروني في المنتديات والفيس بوك )) المفترض لما اسألي اي شخص عن النادي يشجعني بالمشاركه ولكن ما يقولي ان وجود النادي مثل قلته .. وانا ما افتري عليك انا اكرر كلامك اللي انت تقوله (( مافي نشاطات ولا فعاليات))



حسبي الله ونعم الوكيل .. سوء المعامله وقلة الاحترام .. حسبي الله ونعم الوكيل .. وين سوء المعامله وقله الاحترام يعني لازم اكذب واقول انكم من افضل الانديه الطلابيه في امريكا ونشاطاتكم غطت امريكا ومافيها عشان ما اعطيك قدرك من الاحترام وحسن المعامله .. الله يهديك .. افهم وانا اخوك احنا جالسين نتناقش وماجيت جنب احترامك ولا معاملتك ..
واذا تحب اقيم عملك .. مراد في المنتدى ... 100% لاتزعل .. لكن قيم نفسك في النادي وانت وضميرك .. عشان هذه هي اللي راح تحاسب عليها

كلنا راح نتحاسب عند المولى .. الله يهديك بس ودي اعرف وش جالس تقرا انت في هذه الصفحه .. وين الاتهام هذا .. والحين انت معترف انكم ماتسوون فعاليات ولا انشطه تخدم الطلاب .. ياخي ودي اعرف وين الاتهام .. لكن انا وزملائي ان شاء الله راح نحاسبكم امام الله على تقصيركم هذا واللي انت معترف فيه.



اتهامي انا ... ياخي وشلون افهمك !!
على العموم رح اسأل طلاب المعهد اللغه اللي في الزاويه اذا ماتعرفه عن رئيسك وكيف اسلوب تعامله مع الطلاب هناك في الحفل الاخير .. انا ماجبت شي من عندي الله يهديك .. زملاء واصحاب وحتى العوائل شافوا بعينهم ... مو لحالي الله يصلحك بس.



مراد حسيت انك راح تطقني ... انا عبدالله .. واجهت منك !! انا ماعرفك اصلا والمفترض على الاقل اشوفك انت وباقي اعضاء ناديك في الاجتماع الاخير للملحقيه في الشيراتون او حتى تزودوا الطلبه بأرقامكم وعن الخدمات اللي تقدموها لنا كـالطلاب ولا هذا مهوب واجبك كـا مسؤول في النادي ..


ماشاء الله اورلاندو وميامي .. جزاك الله خير وكثر الله من امثالك .. مع ان النوادي في ميامي ومالبورن ما تقصر واكثر فعاليات وانشطه من تامبا ... ياليت تركز الجهد هذا في خدمه الطلاب في تامبا.



انا لي سنه ماعرف في الجامعه نادي بسبب قلت النشاطات والفعاليات اللي هي اهم شي لازم يركز عليها كل نادي وليس مشلكتي الخاصه .. هذه مشكلتك .. وهذا مهوب اتهام بالباطل لانه صادر منك يعني انت تتهم نفسك بنفسك .. ومع الاسف حسب علمي من الملحقيه ان فتره رئاستكم راح تنتهي الشهر القادم ... وراح يتم ترشيح اعضاء جدد .. ((وش رايك انت اشارك معكم في نشاطات واقتراحات وانتم باقي لكم شهر ولا انضم للاداره الجديده اللي مدتها سنه))

وش رايك طيب في الاقتراحين هذه:

وينكم يا اعضاء النادي في اول يوم استقبال الطلابه الاجانب الجدد .. (( ترى ممكن يكون من ضمنهم طلابه سعوديين بحاجه للمساعده في مدينه جديده عليهم في سكن وسيارة ومدارس وحضانات ..)) فكره صحيح (( مع الاسف فات وقت تنفيذها))

يااخوي لا تحضور في يوم استقبال الطلبه يمكن مشغولين كل الشباب حقين النادي .. اقل شي واسهل شي هو موقع الكتروني للنادي .. فيه جميع النصائح والخدمات للطلاب الجدد واماكن السكن واسعارها ووين اماكن شراء سيارات ومدارس وحضانات ... اعطوه مكتب القبول في الجامعه يسلموه لكل طالب سعودي يسجل في الجامعه ..

وغيرها كثيييره مع الاسف ماشفتها في اول يوم في الجامعه .... معليش اكيد انه تقصير مني عشان هذه وجهه نظري ومهوب احدى الاشياء السلبيه للنادي.



عقبال مانفرح فيك قبلي .. علمني عشان نجي نصور ونحط في الموقع .. ترى هذا احدى النشاطات تصوير الخريجين .. جلست ادور على صور للسعوديين المتخرجين الفصل الماضي واللي قبله .. يعني سنه .. يعني من بدايه رئاستكم .. ولا جاء في بال كل الشباب اللي ذكرت اساميهم هذا النشاط البسيط ... معليش ممكن تكون تقصير مني ووجهه نظري .. لانه لم يتخرج ولا طلاب سعودي لحد الان

تحياتي اخ مراد .. وتقبلها من زميل يهمه المصلحه العامه .. ولا اقصد شي بهذا غير انكم لم تكونوا عند حسن ظننا كالطلابه مغتربين نبحث عن تواصل بيننا وبين بعض في خدمه الوطن اللي اعطانا ثقه وطموح وخدمه نتمنى ان نردها ولو بأبسط شي وهو نشاط في جامعه.

سلامي لك وباقي الشباب اللي ذكرت اساميهم .. تشرفت في معرفتهم في هذا المنتدى.

عبدالله