احتاج معلومات جديدة عن ولاية فرجينيا مدينة Blacksburg

السلام عليكم ورحمة الله وبركاته

تحية طيبة لاخواني واخواتي المبتعثين ومرافقينهم

قريت مواضيع كثيرة عن هالمدينة ولكن كلها تكون معلومات بمواضيع قديمة

فياليت من هو موجود بهالمدينة يفيدنا ولو بالشي القليل لانه بالنسبة لنا يسوى كثير

حالة الجو من شهر وبعد كيفه

المدينة للعوائل هل هي امنة بعد ستر الله

الشقق نظامها وحدود سعرها وهل هي متوفره وقريبة من المعهد فرجينيا تك

طريقة الوصول للمدينة من الرياض مع اخذ بالاعتبار اللغة لكم عليها


انتظر ردودكم ونصائحكم واضافاتكم


وعسى الله يكتب لكم التوفيق

ننتظر اخبار عن الشقق

المدينة سمعت ان فيها فندق الهلتون كم سعر الليله فيه بغرفة لشخصين

وهل يوجد فيها فنادق اخرى بنفس مستوى الهلتون

ارجوا اني القى جواب

والله يامشعل ودي انفعك بس توي جديد على الولاية واخاف اعطيك معلومة مو دقيقة
انا في فينا مدري مدينتك قريبة منا ولا بعيدة
ابسال واعطيك خبر ابشر ولا يهمك يالغالي

مشعل حياك الله ..
ان تبي صوره كامله ابشر بسعدك وانا اخوك بحاول افيدك صارلي سنه وراح اغادرها قريبا ..
فيه فندقين الهولدي ان + الهيلتون هذي احسن فندقين .. الاقرب للمعهد هو الهولدي ان .. انصحك تحجز عن طريق الانترنت افضل وارخص بمواقع مثل priceline.com , booking.com
ان نزلت بالهيلتون فيه محطه باص قريبه تقدر تسال عنها الرسيبشن او حتى ممكن تشوف سعوديين او كويتيين بالفندق ساكنين بمجمع سكني تابع للهيلتون .. اسمه سميث لاندنق .. مجمع سكني فخم هادئ جدا بس فيه سلبيات .. اولا ان حطيت تأمين اول ما تسوي العقد .. ازهلها يرجعلك التأمين .. يمكن يدفعونك عليه بعد .. المطبخ مفتوح نظام امريكي .. ولا انصح بالسكن فيه ... ايجاره اغلى شي يعتبر ..
فيه مجمع سكني اسمه فوكس ريدج يعتبر افضل الخيارات واكبرها .. كبير جدا ميزاته متعدده .. سعره متوسط .. خدمه ٢٤ ساعه صيانه .. فيه ملاعب ومسبح والباصات متوفره فيه بكثره .. المجمع مقسم على ثلاث مجموعات .. فيه عمايل قديمه .. وعادي تسكن فيها نظيفه ولا عليها .. وفيه عماير حديثه وفيه احدث .. واشوف انك تسكن بالعمايل العاديه اغلب السعوديين ساكنين فيها .. الا ان كنت تبحث عن مستوى معين .. بس المجمع مقسوم قسمين .. قسم لطلاب البكالوريوس وقسم للدراسات العليا .. طلاب الدراسات العليا عادي يسكنون بمكان البكالوريوس لكن العكس ترفضه ادارة المجمع .. ميزة مكان الدراسات العليا انه ممنوع عمل حفلات فيه .. مع ان حتى الحفلات ماهي مزعجه بالفوكس ريدج ... وانصح انك تستخدم الباصات من اول يوم .. لا ينصبون عليك التكاسي .. التكسي طبعا ما راح تلقاه بالشارع .. تدق على ارقاهمهم ويجيون لين حدك .. الباص لو انك من طلاب المعهد او الجامعه فيه بطاقه تاخذها من المعهد او الجامعه تطلع الباص فرررري .. وان ما عندك بطاقه تدفع نص دولار ..


هذا بالنسبه للسكن

بالنسبه للمعهد
ان كنت متوهق وخلاص ضبطت كل امورك بالمعهد .. فانصحك انك تدور معهد ثاني .. المعهد لو جيته بتلقى مستواه متوسط .. خل نكون واقعيين اقل من المتوسط بشوي .. ما راح اقول سي لان فيه معاهد بامريكا اسوء بكثير ..
طبعا فيه فلسطينيه هي مسؤولة الطلبه الاجانب بالمعهد تعاملها جدا سئ .. تحب الكلام المعسول والابتسامه .. هيئة التدريس بالمعهد الاغلب سيئين بطريقة تدريسهم لكن فيه عينات من مدرسين يعتبرون متمكنين بالتدريس ..
فانصحك ان كانك مجبر تجي .. انك تبحث عن افضل المعاهد بالاقليم وتنقل لواحد منها ..
خلال هالسنه ناس كثير نقلو من بلاكسبرق وكل من راح معهد ثاني اسمعه يمدح ويتحسف على الايام الي قضاها هنا .. طبعا ناس كثير يخلصون المستوى الاخير بالمعهد ولا يجيبون توفل .. وهذا ان دل دل على ضعف المنهج ..


ميزة المدينه .. جامعه قويه ... امأأأأأأن لأبعد درجه .. ما عاد صارت كم حادثه من قبل طلاب بالحرم الجامعه .. وهي حالات فرديه .. مستوى المعيشه متوسط الى رخيص .. النادي السعودي فيها نشط جدا .. والسعوديين فيها كثير !

ابو ريتال

الله يعطيك العافية

ويوفقك

تحكمنى قناعاتي

الله يسلمك ع هذى المعلومات ولايهينك

المشكلة خلاص خلصت اموري وطبعت القرار

طريقة التحويل سهلة والا فيها تعقيد من الملحقية

باقي لي اكثر من شهر ع القدوم لها وش تنصحني فيه كيف اعمل لو رغبت بالتحويل لسمعت المعهد السيئه من كثير من الاخوان

انصحك حاليا تبحث بالنت على معاهد تابعه للاقليم الشرقي الجنوبي من ولاية ديلور حتى فلوريدا .. مع ان فلوريدا مقفله .. ابحث عن معاهد جيده ... واول ما توصل لامريكا .. قدم ع المعهد جيب القبول واطلب التحويل للمعهد الجديد .. عن طريق الملحقيه .. طبعا النقل هين ان كان بنفس الاقليم .. وان تبي تغير الاقليم ... لازم قبول مشروط مع قبول المعهد ..
طبعا ان ناوي تنقل اول ما تجي .. انصحك تاخذ شقه مع شخص سعودي روميت يعني .. او خذ شقه " صب ليس " يعني تاخذ شقه من شخص يبي يترك الشقه .. تشتري عقده فهمت ..

اخي تحكمني قناعاتي

شاكر لك حبك لفعل الخير وسرعة ردودك

وارجوا ان يتسع صدرك لى قليلا




المشكلة ماني بلحالى ياخوك معي زوجتي

لكن هل المعهد الي في بلاكسبيرج يعترض لو احول ع طول

واجراءات االموافقة ع لتحويل من الملحقية كم تاخذ وقت بالعادة اذا جبت قبول لغة من الولايات الشرقية

اذا ماعليك امر لو ترشح لى معهد او اكثر حسب خبرتك سوى في ولاية فرجينيا او اى ولاية شرقية لسلاسة الاجراءات حسب افادتك

مدينة امنة
المعهد ممتاز ويكون تابع لجامعة
لو قريب من الملحقية كويس لاني شكلي بحتاجهم مستقبلا
الاجار الله يعيننا عليه

انتظر ردك والله يحقق لك مبتغاك

شوف اخوي مشعل ..
مو مشكله لو قعدت شهرين هنا .. بس تنبيهي لك انه لا تضيع وقتك .. يعني بنفس السمستر الي بتدرسه هنا سارع باجراءات التحويل .. الملحقيه طبعا حسب المشرف الاكاديمي .. ان كنت تابع لبرنامج الملك .. فمشرفتك وحده اسمها مزين .. ملكعه تاخذ وقت بس تقدر تنقز لها بيوم عشان تضبط وضعك ..
بالنسبه للتحويل قبل تدرس .. اعتقد ما يسمحون .. بس معلومه غير اكيده ..
بالنسبه للمعاهد .. واشنطن دي سي فيها معهدين قويه جدا .. جورج تاون وواحد ثاني نسيت اسمه عموما ما انصحك بواشنطن .. لانها غاليه موت .. يعني شقه غرفه وحده مو اقل من ١٥٠٠ الى ١٨٠٠ او ٢٠٠٠ دولار بعد .. مكلفه جدا واشنطن ...

فيه معهد ثاني الي هو معهد جامعة ولاية ديلور .. المعهد يمدحون فيه حيل .. وفيه معهد بشارلوت بفرجينيا يمدحونه ..
بلاكسبيرق عن واشنطن ٤ ساعات ... ديلور ساعتين لواشنطن ..

الله يوفقك ي رب وييسر لك امرك ..