رجال مدينة johnson city الكرام , جامعة East Tennessee State University , فزعتكم

السلام عليكم ورحمة الله وبركاته

كيفكم يا زقرت johnson city ولا أقول GO BUCS! هههههه

أخباركم عساكم مرتاحين و مبسوطين

أبشكركم جاكم شقردي جديد للديرة ، بس تراه حقنة الله يعينكم عليه

يقلون عليكم ديرة تجيب الهم ، حتى واحد أمريكي قالي أنتبه من رعات البقر هناك موجودين بكثره و مدري وش إذا شفت ذهب بالأرض أنتبه تأخذه وهرج يضيق الصدر ، و الله يستر و يكفينا الشر . بس صراحة أنا بالنهاية فرحت شوي و الحمد الله على كل حال ، على الأقل أرحم من اللي أنا فيه ، أمس واحد طلق رصاص على شرطي بحارتنا هههههه الله يهديه ذاك الشايب خربها ، و أذكر أول يوم لي بالمعهد جثة أدمي مقتولة حول مدخل باب المعهد و شرطة وتلفزيون و عالم ، وما أنسى أول أسبوع ملاحقتي الشرطة أربع أوادم بلغين عني شبة ، يقلون شفنا معه مسدس ومهدد واحد و مسوين فلم هندي ، وطلع بالنهاية الجواز يومني طلعته على واحد لأني ضايع ويومنه شاف جواز السعودية و أسمي أنحاش وعاد هم حسبوه سلاح ، بس ما قصرت الشرطة وصلتني البيت ، و الفله ثاني أسبوع بشقتي بعد ما أثثتها وشغل متعوب عليه تم اقتحام الشقة و سرق كل شيء إلا الجواز طلعوا طيبين يا حليهم اللي سرقوني ، الزبد أنا أكلت تبن لين قلت بس ما عاد يفرق معي الديرة زينه ولا شينه ، و الحمد الله على كل حال.

المهم أنا جاني قبول بجامعنكم على فصل الخريف القادم والحمد و الشكر لله ، و لكن راح أجي بنهاية الشهر هذا إن شاء الله لأن عندي يوم الأورنتيشن حق طلاب الفرشمن لتسجيل مواد و يعلمونا خرابيط الجامعة، المهم بعد ما أخلص منهم إن شاء الله راح أرجع للسعودية ثم أرجع إن شاء الله على وقت الدراسة .
و أبي خدمة من اللي يقدر ، معي شنطة كبيره فيها ملابس و كتب مالها سنع اخذها و ارجعها معي بالسعودية ، و دي أحطها عند أي أحد لو بفلوس ، و اللي وده يفتشها يفتشها براحتة عادي كلها خلاقين و كتب ما فيها شيء خاص. و أي واحد يبي شيء من السعودية يعلمنا و ما راح نقصر مع إن شاء الله .

و الله يوفق الجميع , و شكراً

أرجوا من الأدارة تثبيت الموضوع و بسرعة << قايلكم الأدمي حقنه

مع الغربة و الوحدة صرت أكلم نفسي , و موضوي بعد أرد على نفسي , يا شباب عشاني نصراوي يعني ولا وش نوحكم يا الربع هههههه, لا تصدموني وتقلون ما فيه أحد بالجامعة و الديرة يعني هناك أبكون مع نفسي بعد , على كلن الحمد الله و الشكر لله وحده , و المسلم مهما كان لحاله مع رب يتوكل عليه بكل الحالات و تتيسر أموره بتوفيق ربه, و نعم بالله .

حياك اخوي .المدينة حق دراسة يعني فيها هدوء نوعا ما.وهي بصراحه تنفع للعوايل اكثر.المدينه امنه من كل النواحي .ومسرور بانضمامك لنا .وراجع عالخاص