يا اهل ولاية كنتاكي مدينة بولبينج جرين اسعفوني

السلام عليكم
اعزائي المبتعثين من منكم متواجد حاليا في ولاية كنتاكي مدينة بولبينج جرين بليز الي ساكن فيها يساعدني جايه عندكم في رمضان وعندي عيال وماني عارفه ويش اسوي ؟الا الان لم استاجر الشقه ولا اي شي؟ا
يا اهل الفزعه ساعدوني؟ انا محتارة اخاف اجي وانا مااعرف اي شي ولا اتكلم انكليزي وما القي احد يساعدني؟ الله يجزيكم خير الي عندة اي معلومة يساعدني فيها لايتاخر ؟
والله معي عيالي وانا رجلي مجبرة وامكن اطلع ولسه مافكيت الجبس ؟ خايفه اضيع وانا بهلحاله؟
ياهل النخوة ياهل السعودية لاتبخلوا علي؟انتظر ردكم؟
:(:(:(

السلام عليكم
وش من معلومات تحتاجون ممكن أقدر أساعدكم
وبالتوفيق

السلام عليكم
اخوي ابو نواف اتمنى انك تفيدنا بمعلومات عن قبول الماستر بجامعتك و السكن كيف اسعاره

وعليكم السلام ورحمة الله وبركاته
كل عام وانت الى الله اقرب
اخوي هل يوجد سكن قريب من المعهد؟
وكيف اسعار السكن عندكم ؟ لاني معي عائله؟
وكيف الجو حاليا؟ عشان اعرف اخذ ملابس شتويه ولا صيفيه؟
وممكن في حال وصولنا لبولينج قرين تقدر تساعدنا؟
كم البلغ الي اخذه معاي يكفيني للشهرين؟ لاني مبتعثه؟
وهل احول المبلغ كله بالدولار اواخلي بعضه ريال؟
انتظر ردك
:help:

السلام عليكم ورحمة الله وبركاتة
شهر مبارك وتقبل الله منا ومنكم صالح الأعمال


انا بساعدكم باللي اعرفه :)
اول شي الامان في هالديره شي غير معقول للامانه وخاصه انها مناسبة اكثر للعوايل مافيها جرايم الا وحده ثنتين وما ندري عنها الا من التلفزيون ولا من الجرايد ولا غيرها ماشفت الا ان كل واحد يحترم الثاني ويعرفون ان فيه طلاب كثير دوليين


بالنسبة لقبول الماستر ماعندي خلفيه عنه بس تقدرين تتصلين على المعهد حق الجامعة وفيه وحده أسمها ديمـا "مره طيوبه" وسعودية تشتغل بالمعهد
ممكن تسئلينها عن القبول وهذا رقم المعهد ٠٠١٢٧٠٧٤٥٨٨٧١
وهذا رقم مشرف النادي السعودي وتقدرين تستفسرين منه عن اي شي بالنسبه للجامعه والمدينة وان شاء الله مايقصر
أسمه / فيصل الزميلي
٠٠١٩١٨٥٠٦٠٤٦٥

"١"

السكن يختلف فيه البيوت اللي على ٩٠٠ دولار بالشهر من غير فاتورة الكهرب + الموية + النت والحي آمن (من بعد الله) ويبعد عن الجامعة ١٠ دقايق بالسيارة
وهذي شركة Remax وعقد لمدة سنة وهذا موقعهم وانا شخصيا تعاملت معهم لمدة سنه وثلاث شهور والحمد لله مافيه اي مشاكل
ثلاث غرف ومطبخ "مايكرويف وثلاجة" وصاله وكراج وجاكوزي في الغرفة الرئيسية ومدخل لسيارتين وحديقة خلفية وأمامية
"وعلى حسب عدد الغرف يكون متوفر عندهم بالنسبه للبيوت"
http://www.calljoehogan.com/remaxky/index.asp?p=professionalprofile.asp
اسم المسؤول عن البيوت ( جو هوقن )
وهذي صوره للبيت في الشتاء شهر ١ ماعندي صور حاليا غيرها

ملف مرفق 22589

ملف مرفق 22590

ملف مرفق 22591


"٢"
وفيه السكن اللي لك حالك شقه ٤٥٠ دولار غرفه ودورة مياة (تكرمون) من غير فواتير الكهرباء والموية والنت وتبعد عشر دقايق بالسيارة
وفيه كثير زي هالسكن ومنها
College Suites At Campbell Lane Apartments

وهنا معلومات وصور أشمل

"٣"
وفيه السكن المشترك اللي حول الجامعه وهو مشترك مع اربع اشخاص والعيال لحال والبنات لحال (بس ما أنصح فيه ابد ابد حوله قطار والسكن انواع الإزعاج) واسمه The Registry At Bowling Green وهذا موقعهم ولا تغرك الصور وعقدهم سنوي وياخذون ٤١٠ مع النت + ٤١٠ تامين حق آخر شهر ولو طلعتي سحبو التامين وحطوك بالبلاك لست عند شركتهم (بقريح هم وشركتهم)
اللي فيها / غسالة + نشافة مشتركه + دورة مياة خاصة لكل شخص داخل الغرفة + ثلاجة + مايكرويف
هذا موقعهم


وفيه اماكن قريبه للجامعه من خلف مبني الـ الماس ميديا
33 Mass Media and Technology Hall
حي جميل وهادي وقريب للمعهد والجامعة ١٠ دقايق مشي



* فيه سواق تاكسي اسمه " لاري " شايب جداً طيب وهو اللي كنت اعتمد عليه بعد الله اول ماجيت هنا
وهـذا رقمه
0012709968647

ملف مرفق 22592


بالنسبة للاجواء حاليا "حر" صيف مع متقلب
الشتاء على بداية السنة شهر ( ١،٢،٣) وبعض الاحيان ينزل ثلج ومرات لا

بالنسبه للمبلغ بما انك مبتعثة اتوقع أن شاء الله ٢٠٠٠ دولار مع جميع الاحتمالات
لين تعرفين توزنين الميزانية ولأمانة كل شي رخيص مقارنة بالولايات اللي حولنا

وبالنسبه اول يوم وصل لك ترا المسألة عادية واقل اول يومين اسكني في فندق هوليدي آن
وبعدها شوفي البيوت والمكان المناسب لك

كل هالمعلومات مني انا شخصياً وشي عشتة اتمنى اني اكون افدتكم وما ابي الا دعواتكم واللي يبي اي شي وانا اعرفة يبشر به
والله يوفقكم ويسهل اموركم جميعاً وكان ودي اني اكون متواجد علشان اساعدكم بس المشكلة اني نازل للسعودية هالايام من بعد غيبة سنة وثلاث شهور

(إن أحسنت فمن الله، وإن أسأت أو أخطأت فمن نفسي والشيطان)

الله ييعطيك العافيه اخوي معلوما مره قيمه بالتوفيق لاختي ربي يسهل دربك ان شالله انا نازل مع عايلتي الي هذه المدينة نهاية شهر رمضان اول مره وربي يسهل الامور

اقتباس:

---

المشاركة الأصلية كتبت بواسطة اخصائي اجتماعي مبتعث

الله ييعطيك العافيه اخوي معلوما مره قيمه بالتوفيق لاختي ربي يسهل دربك ان شالله انا نازل مع عايلتي الي هذه المدينة نهاية شهر رمضان اول مره وربي يسهل الامور

---

ربي يسهل امورك يارب واي مساعدة تحت امرك الله يسعدك :)

الله يعطيك العافيه اخوي اكيد لو بحتاج شي ما راح تقصر معنا وجعلك ذخر ان شالله

اخوي عصام الله يعطيك العافيه بس حابه اعرف انا وعائلتي بنجي يوم 19 رمضان ؟على تامبا ومن هناك على بولينج جرين؟ممكن اكلم السواق وقت الوصول ويجي ياخذني انا وعائلتي من هناك مدام انه ثقه؟ عشان بصراحة خايفه اضيع وانا ماعدي لغه؟ممكن القى بيت قريب جدا من المعهد لاني بصراحة مصابه بكسر في رجلي وما اقدر امشي وادور؟فاذا امكن انك تقدر تساعدنا بهلخصوص؟ جزاك الله خير؟ اخوي انا جاني قبول من المعهد والحين يوم كلموهم من الملحقيه بخصوصي ؟قالوا المعهد متكدس؟ واالمحلقية تقولي لازم تغيرين المعهد بمجرد وصولك لامريكا؟فماذ افعل في هذه الظروف بما انك من اهل الخبرة؟ وعندي كم سوال معليش كثرة الاسئله ؟ عيالي يحتاجون مدارس؟ فهل هناك مدارس قريبه من المعهد؟ في حال وصولنا لامريكا فهل يستقبلنا احد اعضاء الملحقيه؟ وجزاك الله الف خير

اقتباس:

---

المشاركة الأصلية كتبت بواسطة محبة الله

اخوي عصام الله يعطيك العافيه بس حابه اعرف انا وعائلتي بنجي يوم 19 رمضان ؟على تامبا ومن هناك على بولينج جرين؟ممكن اكلم السواق وقت الوصول ويجي ياخذني انا وعائلتي من هناك مدام انه ثقه؟ عشان بصراحة خايفه اضيع وانا ماعدي لغه؟ممكن القى بيت قريب جدا من المعهد لاني بصراحة مصابه بكسر في رجلي وما اقدر امشي وادور؟فاذا امكن انك تقدر تساعدنا بهلخصوص؟ جزاك الله خير؟ اخوي انا جاني قبول من المعهد والحين يوم كلموهم من الملحقيه بخصوصي ؟قالوا المعهد متكدس؟ واالمحلقية تقولي لازم تغيرين المعهد بمجرد وصولك لامريكا؟فماذ افعل في هذه الظروف بما انك من اهل الخبرة؟ وعندي كم سوال معليش كثرة الاسئله ؟ عيالي يحتاجون مدارس؟ فهل هناك مدارس قريبه من المعهد؟ في حال وصولنا لامريكا فهل يستقبلنا احد اعضاء الملحقيه؟ وجزاك الله الف خير

---

الله يعافيك يارب ، وعلى فكره بولينق قرين مافيها مطار يعني اتوقع بتوصلين على مدينة ناشفيل ولاية تنسي ، وهي ٥٠ دقيقة من بولينق قرين ، وايه تقدرين تكلمين السواق ويجي ياخذك من المطار او من بولينق قرين اذا كنتي متفقه مع سواق يجيبك من المطار لبولينق قرين ، البيوت زي ماقلتلك فوق فيه كثير بس على حسب اللي تبينه وممكن اكلم لك السواق علشان يدور لك شي قريب من المعهد ، المعهد حالياً متكدس وهذا اللي اشوفه من الطلاب ، وبخصوص المدارس فيه سعوديين عيالهم بالمدارس يعني فيه ان شاء الله ، وبخصوص التكدس لازم تشوفين لك معهد ثاني لان بولينق قرين مافيها الا معهد واحد واقرب مالنا مدينة ناشفيل ولاية تنسي ٥٠ دقيقه بالسيارة
بالنسبه لـ اعضاء الملحقية مافيه اعضاء عندنا عندنا بس النادي السعودي وحطيت رقم المسؤول فوق يمكن يفيدك ، واي استفسار انا حاضر والله يسهل امورك يارب بس نصيحه اذا متكدس لاتجين هنا وتتبهذلين مع الملحقيه ورفع اوراق وقلق وبالاخير محد يرد ، فطلعي قبول من عندك احسن لك من تجين هنا