استفسار عن السكن في تامبا

وعليكم السلام ورحمة الله وبركاته ..

اللي انا اشوفه وانا اخوك .. إنك تبحث عن شقه دائمه .. لانك بتجيب اهلك معك بعد شهرين ..
فالشهرين هذي لابد انك تأسس امورك وتبحث عن سكن دائم .. تستكشف المنطقه كامله ..
وتشوف السكن المناسب ... وتاخذ السكن على اساس ان اهلك بيجون معك ..
وتأثثه وتجهزه .. حتى إذا جبت اهلك الا كل شي جاهز ولا تلعوزهم معك بالشيل والحط والروحه والجيه !

لانك اذا انت لحالك بتكون خفيف .. اما لو اهلك معك راح يكون الوضع شوي اصعب ! لان المسؤوليه بتكون اكبر وانت اعرف بهالامور !

واما عن العائله .. فهي على حسب العائله .. فيه عوائل ممكن تستفيد منهم لانهم يقعدون مع الطلبه ويتكلمون .. وفيه بعضهم مجرد بيزنس يعني يضيفك عنده ويعطيك الشروط وخلاص يكلمك كل شهر مره !
لان العوائل ماتسوي هالشي الا علشان الفلوس ! ..
فإذا انت بتسكن مع عائله .. لابد ان العائله تكون متعاونه .. ويقعدون معك كل يوم على الاقل ساعتين سواء متواصله او متقطعه .. اهم شي انهم ياخذون ويعطون معك بالكلام بشكل مكثف ! حتى بس يتعود على الكلام حتى لو كان مكسر ..
وفترة شهرين .. ماتوقع راح تفيدك بشي مع العائله حتى لو كانت متعاونه ..

فانا اشوف الافضل انك تاخذ شقه وتضبط امورك وتأثثها .. وتخلص بقية امورك وتستقر .. حتى تقدر تجيب اهلك اي وقت تبي !
وبرضوه تتعرف على الشباب هناك .. وتبحث عن المتزوجين حتى تستفيد من تجاربهم وايضا تساعد الاهل في تكوين صداقات مع اهاليهم ..
وبالتالي مايكون فيه نوع من الوحده لاهلك .. وعيالهم يكونون مع عيالك ..

هذي نصيحتي !

السلام عليكم ،،،

إذا كنت عائلتك بتلحقك بعد شهرين فالأفضل تاخذ سكن دائم للأسباب التالية:
١) تأثث الشقة وترتب وضعك
٢) أغلب الشقق عقد لمدة ست شهور على الأقل فراح تلاقي صعوبة اذا سكنت بسكن واذا جاو أهلك تنقل لسكن ثاني

بالنسبة للغة ما تفرق سكنت مع عايله او لا في كثير من العوائل ما تشوفهم أبد ما يفيدونك ونادر تشوف عايله تقدر تسولف معهم لساعات لكن إذا تبي تاخذ اللغة بشكل سريع أقصد السبيكنق فعليك أنك تشوف اجانب تمشي معهم وأهل تامبا جدا حبوبيين بيدخلون معك سرريع.

أنا حاليا بتامبا أي مساعدة أنا حاضر تبي أشوف لك سكن أو أستقبلك بالمطار أرتب لك حجز فندق بالخدمة. إذا ما خدمنا شعبنا وأهلنا من نخدم ؟!


بالتوفيق


( تمت المشاركة باستخدام تطبيق مبتعث )

شكراً لك اخي الكريم 1ok على ردك وتفاعلك ...
واقتراحك محل التقدير ..ووجهة نظر محترمة..جزاك الله خيرا
طيب اخي العزيز بالنسبة للسكن في بداية الأمر ..هل تنصحني بالسكن في فندق ؟ وهل هناك فندق قريب من المعهد؟ا
او شقق او مجمع سكن قريب يسهل علي الأمر في البداية..؟
وهل هناك من استطيع التواصل معه في البداية الى ان يسهلها ربك..؟

اسئلة كثيرة ..واستفسارت اكثر ارجو ان يتسع صدرك لها.. لكن حسن ردك ...وصدق نصيحتك...جرأتني على ذلك

أبالنسبة لبداية وصولك أنصحك بالسكن في فندق لمدة على الأقل ٤ أيام تتعرف فيها على المنطقة وتختار فيها السكن المناسب لأني مثل ما قلت لك قبل السكن راح يتم معك على الأقل ست شهور فلا تتهور وتحجز السكن وأنت بالسعودية تعال وعاينه بنفسك وعاين المنطقة لأن في بعض المناطق غير آمنة.

بالنسبة للفنادق فأنا طالب بجامعة جنوب فلوريدا يعني المنطقة شوي بعيدة عن منطقة ال UT تقريبا ربع ساعة بالسيارة فما عندي خبرة كثيرة للفنادق ألي بجنب الجامعة لكن غالبا هناك فنادق كثيرة وبأسعار مختلفة خصوصا أنه جامعتك قريبة من الداون تاون ففي فنادق هناك وإذا تبي أخدمك بأسماء فنادق معينة وأسعارهم وأيضا إذا ودك تحجز فيهم قبل ما توصل أنا حاضر.

وبالنسبة لسكن الدائم أنا حاليا أسكن بمجمع سكني جدا راقي مع عايلتي وسعره ب ١٠٠٠ دولار تقريبا لشهر وألي يميز المجمع هذا كونه قريب من ثلاث مساجد كل مسجد يبعد عني دقيقتين إلى ثلاث دقايق وأيضا قريب من أحد الحدائق المشهورة حيث يقع خلف حديقة الملاهي المشهورة البش قاردن وقريب من المطاعم والمحلات والكافيهات العربية وكثرة العوائل العربية بالسكن والأمان ولكن مشكلته انه يبعد عن جامعتك ما يقارب ١٥ دقيقة وهناك سكن اخر اعرفه بالقرب من جامعتك ومطل على البحر وجدا راقي وآمن كنت أعرف أحد الأردنيين ساكن فيه ولكن سعره غالي نوعا ما ب ١٢٠٠ دولار اشهر تقريبا واكيد في مجمعات سكنية أخرى إذا وصلت بالسلامة تقدر تتعرف عليها ومن خلالها تحدد سكنك

ح

بالتوفيق


( تمت المشاركة باستخدام تطبيق مبتعث )

وأي استفسارات ثانية لا يردك إلا لسانك،،،

كنا قبل مثل أي طالب بيجي وما قصرو الشباب معنا على الأقل نرد الجميل الحين.



( تمت المشاركة باستخدام تطبيق مبتعث )

لاخلا ولاعدم اخوي فارس الهيجاء...
والله يعطيك العافيه
واشكر لك نصحك وتوجيهك..
ومايدل هذا الا على طيبك وحسن ذاتك ..(واسم على مسمى :-) )
واسمحلي التواصل معك عالبريد الخاص فيما احتاج اليه من معلومات..
ودُم بصحة وعافية...


( تمت المشاركة باستخدام تطبيق مبتعث )

والله وانا اخوك انت لاتفكر بالفنادق بالوقت الحالي .. لان الفنادق امرها هين ومتواجده في كل مكان .. ومتاكد انك بتلاقي فنادق حول الجامعه .. لان الفنادق بامريكا متوفرها بكثره بشكل مو طبيعي !
لان السكن اصبح سهل هالايام انك تبحث عن طريق النت ..
بإمكانك تاخذ الـ Zipcode الخاص بعنوان الجامعه .. وتبحث عن الاسكان اللي حواليها ..
واذا كان بيكون عندك سياره .. تقدر تاخذ بمنطقه ابعد شوي !

وبإمكانك البحث عن السكن بإستخدام خرائط قوقل .. أو موقع Apartments ..
وبتلاقي كل سكن له صور وتشوف المنطقه بخرائط قوقل ..
وبتعرف اسعار السكن من موقع Apartments وجميع الخدمات اللي في السكن !

يصير بس عليك انك تسجل عناوينها عندك .. وبعدها اذا وصلت هناك .. اقرب فندق للمعهد توقف عنده ..
وتريح فيه .. وتروح تشيك على السكن على حسب العناوين اللي سجلتها عندك ..
حتى تلاقي شي يناسبك .. وترسى عليه .. وبكذا يكون تخلص السكن من اول او ثاني يوم وصول !

طبعا الاهم في الموضوع .. لو تكلم النادي السعودي هناك علشان يستقبلونك ويساعدونك بأمور السكن ..
لانهم بيكونون عارفين المنطقه وعارفين ايش افضل سكن بحسب تجاربهم ومعرفتهم بالمنطقه !

وهذا اخوي فارس الهيجاء عرض المساعده عليك .. بإمكانك التواصل معه وتعطيه موعد رحلتك وتتفق معه يستقبلك من المطار ..
ويعرفك على الشباب وعلى النادي السعودي ويساعدونك في تخليص امورك !

الاخوان ماراح يقصرون معك .. بس انت لاتستعجل بالامور ..
وتواصل مع النادي السعودي في تامبا .. وراح يفيدونك من وصولك ليما حتى تجيب اهلك معك !

وههذا بريدي الخاص اذا احتجت لمساعدة



( تمت المشاركة باستخدام تطبيق مبتعث )

وعليكم آلسلآم ورحمة آلله وبركآته ..

رآجع هذآ آلموضوع وأكتب إستفسآركـ ..

http://www.mbt3th.us/vb/forum39/thread434718.html

وشكرآ .