الحلقة الثالثة(طالب شركة سابك) هام داخل المطار

اول حاجة انا ااااااااااسف لاني سحبت السيفون عليكم وماكتبت لكم وش صار بعد ما وصلت المطار
المهم سامحوني تراي انشغلت بالتوفل وبالسات وهذا كله ابي علشان ادخل جامعة زينة وابشركم لقد تحقق المراد وحبيت اكمل القصة لعلي افيد الناس اللى جايين لامريكا
مرة ثانية اقبلوا اعتذاري واليكم ماحدث بالتفصيل الممل


اييييييييييييه وماادراك مالمطار حق فيلادلفيا ......... والله من الخوف والربكة اللى جتني من غير اي سبب او مبرر ولكن لا تلومني حسبتهم يطالعون في الشخص ويودونه الى ام جريف
على فكرة ام جريف هذه منطقة اللاعودة اذا رحت مافيه امل ترجع للابد

مالكم بالطويلة وصلت المطار ورجليني ترجف كاني ارقص دبكة .... خوف الله لايوريكم
شوي امشي زي النعجة مدري وين انا رايح الا جاني واحد امريكي يقولي سير اكسكيوزمي سير
التفت عليه وسالني قالى ابو على يالله حيه وش العلوم .............. وبعدين حلف انه يعشيني قلت والله معزوم ماقدر........ عفوا ياخواني هذا انا اتخيل معليش ....... التفت عليه قالي اللى ماهو امريكي يروح للطابور اللى هناك...... رحت ووقفت في الطابور ومعاي خوي علي.... وحنا واقفين بالطابور طب علينا هندي مدري وش يبي ومعاه عائلته...... قلت لعلي اتركه لاتعطيه وجه اثره المسكين مايعرف يعبي اوراق I94 وتعرفون طيبة السعوديين ساعدناه وحنا دجاج ما ندري وش السالفة...... وهذا اكبر غلط ياخواني......... قولوا ليه اانا اقولكم ليه
انتبه تعطي احد وجه لسببين : يمكن مشبوه ومراقب ويمكن تعطيه معلومات غلط وبعدين يقول سواها لي فلان ....... الطيبة والفزعة غير محببة على الاطلاق خلك في حالك واترك الناس عنك وصدقني هذا هو الافضل لك........ المهم مالكم بالطويلة جاء دوري قالي الجواز - عطيته الجواز- صورني - قالى روح للمكتب اللى هناك واشر لي عليه- عطاني ملف احمر ورحت للمكتب- وصلت هناك عططيتهم الملف - قال انطق هناك لين يجي دورك- انطقيت وبينما انا جالس شفت الظابط يتكلم مع واحد اسباني بطريقة عنيفة مهينة - انا زاد خوفي رحت فيها - بعد شوي قالوا له لك اربع وعشرين ساعة وبعدين ان شفنا رقعة وجهك بالمطار وريناك الشغل- يعني لازم يغادر على الفور- مسكين رحمته- المهم يوم طردوه انا قمت ارقص دبكة صح - رجليني تهتز قاعد افكر واقول- هذا اسباني وطردوه عاد انا سعودي مسلم وش بيسوون فيني- فكرت وقلت الله اعلم انا رايحين ام جريف انا وياك ياعلي- الله يستر- وبعدين ناداني- يومناداني خلاص شوي واموت - قال لي كيف الحال ياصديقي - قلت له فاين - قال فاين ولا كلينكس والقاعة ماتو امن الضحك....... عفوا انا اتخيل معليش ياخواني...... قال عب الورقة هذي - اخذت الورقة وهنا مربط القط ........

الورقة ذي فيها معلومات عنك يبونك تعبيها_ بالله يرحم والدينكم لا احد يجي امريكا ماعنده عنوان بيتهم -لا احد يجي امريكا ماعنده ايميل ولا مايدري وش الايميل حقه- لا احد يجي امريكا وماهو عارف وماهو عارف ارقام الاتصال الخاصة باهله وبالمثال يتضح المقال

انا سالوني عن رقم جوال ابوي- رقم جوال امي- بريدي الالكتروني- تاريخ ميلادابوي وامي
وسالني وين يشتغل ابوك - لاحد يجي امريكا وماهو عارف يقول وش وظيفة ابوه بالانجليزي- ترا هذي الاسئلة مهمة - اذا تبي تمشي بسرعة من عندهم خلك جاهز واوراقك معاك وصدقني خمس دقايق ويمشيك- بس لاحد يسوي زي على مايدري وش عنوانه - تدرون وش قالوا له - قالوا دق على ابوك الان وخله يعلمك اذا ماتعرف؟؟؟؟؟؟؟؟ قولوا ليه- لانهم اذا ماعطيتهم المعلومات ذي - قالوا ايه هذا بيسوي شي هنا وما يبينا نعرف عنه شي- وللمعلومية تراهم خوافييييييييين مرة فخلك صادق - انتبه تكذب- انتبه ثم انتبه....... ادري بيجي واحد بيسال ويقول وش اسوي؟؟؟؟؟؟؟؟ظ

سهله سجل كل شي بورقه خارجية - ارقام تلفونات اهلك - ميلاد ابوك- امك اي شي- علشان تسكتهم كل ما قالوا شي تجاوب- وصدقني ماراح يطولون معاك حدهم 5دقايق ان طولت بس خل اجاباتك واضحة- وحبذا تطلع ورقة توريه انك تهتم وتسجل المعلومات الصحيحة وانك انسان صريح وصادق- يعني ما يبي لها مخيمر عبدالرزاق...... على فكرة هذا مخيمر شخصية خياليه هي القدوة والافضل في جميع المجالات- افضل لاعب- افضل فنان- افضل سباك - افضل مهندس - افضل حلاق- هذا مخيمر بتاع كله وهي شخصيه خيالية من اختراعي........... عفوا نعود الى السالفة
يعني والله من جد لهم الحق يعرفون هالمعلومات -انت داخل ديرتهم يبون يتاكدون منك- وتراهم محترمين - ابتسم بشكل رسمي- مافيه اي داعي للخوف- اللهم ان داخل امريكا وبيسجل دخولك في الكمبيوتر - هذي كل السالفة بس- رجاء لاتسوون مثلي- كل المطار قاعد ادبك- يرحم والدينكم- سجل هالمعلومات البسيطة وريح جد عمرك

بالنسبة للكمبيوتر المحمول : حله بسيط وصراحة انا استغرب من الناس اللى تشيل الكمبيوتر معاها- حطه داخل شناطك اللى بتشحنها وريح عمرك وقابلني اذا فتشوها سواء فيها برامج تقليد ولا مافيها- يعني الله اكبر يالشغل اللى بيضيع عليك وانت مسافر- حطه داخل الشنطة وصدقني لن يفتش- اما تجي تسحبه معاك - ممكن مايعجبه شكلك ويقول وراه شايل الكمبيوتر معاه- يمكن يظن انك كنت تتصل بناس عن طريق الانترنت وانت مسافر- فيروح ويفتش كمبيوترك وهذا راح يطول عليك الاجراءات عندهم- زين اتفقنا كمبيوتر محمول داخل الشنطة- وين؟؟؟؟؟؟ داخل الشناط اللى شحنتها
انا جبته معاي بس مافتشوه- الدعوى مو ان فيه برامج ولا لا- الدعوى ياخذ وقت وياخرونك بسبته وانت توك جاي تعبان فمالها داعي - هذا اذا طلع سليم من برامج مقلدة بتاخذ ساعات- المشكلة لو لقوا شي- فريح عمرك وحطه داخل شناط الشحن وباذن الله في خمس دقايق وانت ماشي من عندهم
وحاجه مهمة الابتسامة- ابتسم- مو تجي معصب وتوريه انك تعبان مالك خلق عليه- لا بالعكس ابتسم وره انك متعاون وعلى اتم الاستعداد وصريح -ترون كم اخذ معاي الظابط- دقيقتين ومشاني بس قبل مايمشيني سالني سوال؟Do you swear every thing you told me is truth-انا على طول قلت له اوفكوورس- خلك واثق من نفسك - مهو تقول هااااه - اعتقد انها صحيحة- لا هذا غلط- اجزم قله صح وبنت صح بعد-
يوم قلت له اوفكورس- قال رح ومع السلامة- دقيقتين فقط لاغير ومشيت- لاحد يخاف- زين مانبي دبكة في المطار- الثقة + الصراحة+ جاهزية المعلومات والبيانات= اقل من خمس دقايق في مكتب الاميجريشن-
طيب بعد ماتطلع وش تسوي- يرحم والدينكم لاحد يجي ماعنده عنوان سكنه او معهده او الملحقية وانا يعجبوني اللى يدقون وياكدون على الملحقية انهم جايين بالتاريخ الفلاني- على الاقل تلقى من يستقبلك؟ ويعجبني اكثر اللى مرتب له سكن موقت- هذا انا ودي احب راسه لانه ذيب وفاهم- يرحم والدينكم اذا ماعندك سكن بالله وين تبي تروح- تبي توقف قدام باب الملحقية بشناطك كنك متشرد- هذا اللى جاي سيده على واشنطن - لكن فيلادلفيا وين بتروح- سهله فنادق حجز بالانترنت ولا اسهل- خذ عنوان السكن الموقت وروح نام ربي يحفظك وبكرة الصباح دق على اللى تبي للمساعدة
يمكن تضحكون لو قلت لكم - ان فيه ناس من جد مايدرون وش السالفة- المهم اذا انت مرتب مع الملحقية فهم اكيد يودوك سكن موقت تريح فيه- بس اذا انت لانت مرتب معاهم ولا حاجز سكن ولغتك مثل وجهك - بالله وين بتروح- وعلى فكرة ترا صارت لناس نكبات ومشاكل بسبة هالامور البسيطة
مرة ثانية خلك مبرمج - عارف بعد المطار وين بتروح- زين.........

المهم انا ماكننت مرتب مع احد يستقبلني- ولكن كان عندي عنوان السكن محجوز - بس اول ماجيت المطار واحد من طلاب سابك الدفعة اللى قبلنا كان يحترينا ماقصر ودانا للسكن- لكن نفرض ما كان هناك وش نسوي- سهلة اسال وين التكاسي واطلع وعط السواق العنوان وصدقني بيوديك وبتنام متهني وبتتيسر امورك- لكن طريقة على البركة هذي في ديارنا- الناس طيبة لو مالقيت سكن قلطوك عندهم- هناك مافيه- نفسي نفسي - والترتيب مرة ثانية تراه شي مهم

المهم نمت ومن بكرة الصباح دقيت على طالب سابك وقلت الله لايهينك- وريني المعهد- وداني ماقصر- رحت وريتهم اوراقي وظبطوني- مايحتاج تعرف تتكلم بس روح وريهم اوراقك وهم يفهمون كل شي- الحاجة الثانية - دقيت على نفس الرجال وقلت البنك- (ترا عادي لو تغث بعض السعوديين تراهم مايقولون لا ويتفهمون الوضع لانهم مروا بنفس الحالة) فعادي ترا مافيها شي ولا هي بعيب - اذا محتاج خدمة اسال السعوديين والعرب - ترا ماينفعك الا هم وصدقني بيساعدونك وهم مبسوطين بعد
المهم وداني البنك وماقصر(الله يجزاه خير ويوفقه) فتحت حساب ولا اسهل خمس دقايق ويمكن اقل بعد - وكل الامور تمام- من بكرة دوامت بالمعهد ....... وانتهت قصتي واتمنى انكم قد استفدتوا ورجاء اللى قراءة الاجزاء السابقة من القصة للفائدة....
والله يوفق الجميع ولاتنسوني بالدعاء
عبدالله المطيري
بعثة سابك
هندسة كهربائية
جاري اغلاق القصة........................ ولنا لقاء

الحمد لله على السلامه

وبصراحه

مشكور على النصائح

بس وش تنصح الى جاي لفيلادلفيا

ويبي يسكن مع عائله

الله يعطيك الف عافيه اخوي عبدالله ,, مع انك ابطيت علينا وجلست احتريك لين قلت الرجال سحب على مندوبنا ,, بس يلا استمعتنا بهالموضوع ونسينا السحًبه ,,

الحمد لله على السلامًه ,, والله يوفقك بدراستك ويسهل لك كل امورك ,,

ولا تقطعنا يالغالي :)

حبيبي يا محترف والله اني ودي افيدك بس م اعرف وين العوائل يسكنون لاني من يوم دخلت فيلادلفيا وانا منطق داخل المدينة الجامعية

لكن م اراح يفيدك الا من سبق له التمرمط في الشوارع يدور سكن لعائلته - وابشرك فيه ناس ككثير مع عوايلهم في فيلادلفيا بامكانك تسالهم- لكن انا اعرف مكان واحد عبارة عن شقق اسمه باركبليس - اربع مجمعات - وللمعلومية اكثرشوف الشيخ مبتعث ولكن -تراه ذيب
اما انا ما اعرف الا الشيراتون- ولانت رناشيونال هاوس لاني ساكن فيه-- ههههههههه
المهم اذا بتجيب العايلة سوا زي واحد من مبتعثي موسسة النقد- جاء لحاله -ضبط وضعه- بعدها باسبوعين جاب اهله- وترا الفكرة مو شينة- عاد انت ابخص-
المهم فيلادلفيا بتعجبك- موقع استراتيجي خرافي- قريبه العاصمة لو احتجت تروح السفارة ولا الملحقية- قريبة نييورك تبي تتمشى- وفيها مطار دولي - محطات قطارات - يعني مدينة متكاملة مية بالمية- مسالة السكن بتلقى وبسهولة بعد- لاتخاف - بس انت تعال والشباب السعوديين مايقصرون- اهم شي اسكن موقت لو ان شاء الله في عشة(بس انتبه لا تسكن في ام جريف منطقة اللاعودة انتبه)
طولت عليك حبيبي بس كما اذكر ان مبتعث ولكن عنده روابط لمواقع سكن- حاول تشوفها يمكن تعجبك
او لما تجي امريكا تسوي كل شي بنفسك
اتمنى اكون ساعدتك ...............

ياحليلك ياخيي
و الله إنك رهيب مرررة

صراحه استفدت منكــ خصوصاً تجهير المعلومات ..

تحيتي لكـ