زوج يفاجأ بزوجته انها سارقة ...بعد كفشها في احد محلات الاجهزة ..ماهو رأيكم في الزوجين

October 21st, 2008, 05:39 AM

سلام عليكم .....أحب أن أسرد حادثة حصلت أمامي ...كنت أتجول في أحد محلات الأجهزة الإلكترونية ... وصادفت زميلة من أيام الدراسة ....هية وزوجها وولدها في عمر 4 سنوات تقريبا ... وتبادلنا الايميلات والأرقام للتواصل .. المهم االي حصل انه زميلتي الله يهديها سار معاها موقف تفشلت فيه أمام الناس وامام زوجها وامام نفسها قبل كل شي ...
زوجها اشترى احد الاجهزة والموظف بيجهز لهم الجهاز... الحرمة قالت لزوجها انا آخذ الولد واستناك على الكراسي اللي عند الكاشير ...قالها زوجها طيب ...وراحت
بالصدفة شاف ولدها افلام كرتون DVD ...والا ويبغى منها ...وهوة عنده في البيت كتير ...وسعر الافلام من 69 _99 ريال واستغلتها ...وجلس يبكي قالتله طيب خذ واحد..وهوة يبغى 3افلام اشترتله واحد وحطت 2 في شنطتها ..على بالها محد شافها ...
زوجها حاسب ويستناها عند الباب ...بعد ماحاسبت وقفها الموظف عند باب الخروج وقالها ممكن تفضلي معانا ............(((انا وقتها شفتها كنت بحاسب عشان كدة كلمتها وفهمت منها كل الحكاية بالتفصيل))))
زوجها استغرب مو فاهم شي ...قال الموظف :انت زوجها ,قاله :ايوة قال تعال معانا لو سمحت شوية ...واخدهم ودخلهم في غرفة صغيرة ..وجا موظفين اثنين آخرين واصبحو 3 موظفين ..وقالوا للزوج ممكن تفك الشنطة ..اخذها من مرته ولقى واحد قاله تبغى ده ...قاله الموظف وفي غيره جوة في السحاب ...سأل حرمته قالها انتي اشتريتيه ومو مصدق ..قالتله انا مدري عنه يمكن الولد حطه ...اخذ الموظف الزوج في غرفة اخرى وشغل الكاميرا وشاف مرته وهية تسرق ....
واخذوا اسم الزوج والزوجة ..ودفعوه 5 اضعاف قيمة الافلام ..دفع 650 ريال ...
بعد كدة الحرمة انخفض ضغطها وداخت من الفجعة والفشيلة (((والله هية بنت ناس ومتربية ومو ناقصها شي مدري ليش سوا كدة ))) وشالها زوجها ودخلها الغرفة لدقايق وفاقت وخرجوا....
تعرفوا ايش سار بعدين .....أنا بصراحة ماتوقعت أبداااااا.....
الزوج أخذ بيد زوجته وقالها كل انسان بيغلط بس اهم شي الواحد يتعلم من غلطه ...وهذا شي عادي ...وبتحصل كتير ..والحمد لله عدت على كدة بس اهم شي تقوي ايمانك وانا عارف ومتأكد انها مو أخلاقك بس مدري ليه سويتي كدة ...وانسي ولاتفتحي ده الموضوع ابدا ...وعشان ننسى يالله نروح اي مطعم او اي مكان ..وكل ماتسرح يقولها خلاص انسي ....عشان الموضوع يعدي بسلام ...
الحرمة سارت مالها وجه ...وتفشلت وندمت مرررررة على اللي سوته ...وماتوقعت ردة فعل زوجها ...وسارت زيي المجنونة ماهي عارفة ايش تسوي عشان ترضيه وتنسيه ...وتنازلت عن كل شي كانت تطالب بيها من فشلتها ...وسارت تقوله انت لمن تغلط ماأعديها ليك وانت تسوي كدة معايا ...قالها خلاص انسي واهم شي انك ترتاحي ...وتقوي صلتك بربك...
ايش رايكم يا أخواني وأخواتي ؟؟؟؟؟بالزوج ...وماهو رأيكم بالزوجة ؟؟؟وماذا تتوقعوا في تفكير الزوج من ناحية الزوجة ؟؟؟؟وهل يفقد الثقة بها ؟؟؟؟...أو ممكن في يوم يزلها بيها في لحظة زعل ؟؟؟؟...
وسامحوووووووووني على الإطالة ...انتظر آرائكم بفارغ الصبر ...وشكرا..

• نشر عبر تويتر
• نشر عبر فيسبوك
• نشر عبر جوجل