ياشباب داخل على الله ثم عليكم اين تقع جامعة California Lutheran University.

اخوي سليمان انا جاني قبول اليوم فيها

بس مادري كيف الاسعار ؟؟ لاني بصراحة طالع على حسابي ويهمني الاسعار كثير

يعني اسعار السكن؟ والمعيشة ؟ بشكل تقريبي

وين طالع على حسابك في لوس انجلس
والله اسمحالي انك غبي
لانها مدينه مره ناااااار
ياليتك اخترت ولاية الشمال ولا الي في الوسط كان ارخصالك

سلامات

وش غبي وماغبي ؟؟

الكلام بلاااااش لكن ماودي اصير زيك وارد عليك بالمثل

ياليت احد يرد علينا يدرس فيها لني حتى انا انشالله بنتقل لها

اتمنى من الجميع المساعده

ياليت يسمعنا احد ويرد علينا انا كمان ودي اعرف عنها الكثير وعن المنطقه الي هيا فيها
تحياااتي للجميع

السلام عليكم
أعتذر من الجميع بسبب التأخير بالرد ... لكن تووي ادخل بالويك إند ... عموما


المعهد تجاري لكنه مرتبط بالجامعة وموقعه موجود داخل الجامعة ... وعلاقتهم ببعض ممتازة , حتى ان مديرة المعهد لما عرفت اني ناوي أدرس حاسب آلي نسّقت موعد بيني انا واياه ومديرة برنامج الحاسب بالجامعة ... واتوقع ان القبول سهل أساسا .. ومع كون الشخص يدرس بالمعهد يعطيه شفاعة زيادة ...
موقع الجامعة هنا:
California Lutheran University - Google Maps
ومافيه مشاكل وبالتوفيق ان شاء الله ...

السلام عليكم , المدينة ممتازة جدا جدا جدا للمتزوجين ... بالعكس تصلح للمتزوجين اللي يبحثون عن الهدوء والاستقرار اكثر مما تصلح للشباب اللي يحبون الاكشن والهيصة والزحمة ... والشعب بكاليفورنيا بشكل عام جدا جدا يتقبل الناس من أي مكان بالعالم ... أصلا هم نفسهم عندهم أكثر جاليات من العالم والمكسيكان كثار بشكل ... أنا نص راحتي لهالمكان ونييتي لإكمال الدراسة هنا بالذات هو لأني ناوي اتزووج قريبا واجي انا وزوجتي هنا ان شاء الله (دعواتكم لي بالتوفيق )
وبالنسبة للدراسة انا حاليا ادرس لغة ويمكن ادرس لمدة سبع اشهر تقريبا قبل ما ابدأ دراسة الماجستير ... لذا أي استفسار ممكن ترسل لي وارد لك ان شاء الله

أسعار السكن + المعيشة غويلية شوي ... والجامعة تعتبر غالية غالية! ... يعني على حسابك الله يعينك صراحة ... ما اتوقع انه قرار سليم انك تدرس بهالجامعة على حسابك ... يعني على الأقل ممكن تدرس بجامعة حكومية بكاليفورنيا ... اللي هي يصير اسمه California state university ... وبالتوفيق ان شاء الله



ومعليش اعتذر مرة ثانية على التأخير ... لكني باسوي تنبيهات بالإيميل لهالموضوع علشان أرد عليكم بشكل اسرع ان شاء الله

السلام عليكم اخ سليمان

عندى استفسار بسيط بخصوص اسعار الحاضانات؟ ممكن تفيدنا الله لايهينك


شكرا

للأسف ما عندي خبرة ... أتمنى لو كان عندي خبرة بهالموضوع علشان افيدك لكن لا أنا ولا اللي اعرفهم بالمعهد عندهم اطفال ... عموما ان شاء الله يوم الاثنين يبدأ الدوام ... ولغدين ما أنسى أسألّك الموظفين بالمعهد

اخ سليمان مشكور على الرد واالله يعطيك الف عافيه
ابي اسالك عن السكن كم يعني يكون تقريب وكيف نوعيت السكن والموصلات يعني مافي باصات قطارات
الله يسعدك رد عليا
تقبل تحيااتي

المواصلات طبعا مافيه أي نقل عام ... it's not an option للأسف ... بالنسبة للمعهد اللي ادرس فيه (ELS) هو يتكفل بالتنقلات ... ممكن الواحد يسكن في سكن الطلاب بالجامعة وما يحتاج أي نقل ... وممكن يسكن عند عائله ويجي مع الفان حق المعهد أو مع العائلة أو على سيارته اذا عنده ... طبعا السيارة هنا شي ضروري ... على سبيل المثال هالحين عندي ثلاث أيام إجازة ما تعديت البيت حق العائلة ... قمة الزهق ...

أما بخصوص السكن ... السكن في سكن الطلاب غالي وجع ... حوالي 1500 دولار ... شامل اكلك وكلش ... أما العائلة السكن عندهم مع المواصلات والأكل بحوالي 950 دولار ... طبعا هالاسعار هذي كلها تبع المعهد لكن اتوقع انها مقاربة ..

أما اذا تبي تاخذ السكن بنفسك ... عندك خيار انك تاخذ شقة ... ما بحثت بالموضوع كثير لكن اسمع الطلاب يقولون انهم يسكنون على طالبين طالبين بالشقق ... وتكلفهم مابين 1500 إلى 2000 مع البذخ بالفواتير والموية والتلفزيون ما يطفونه! ... اذا تم تقسيم المبلغ على اثنين تصير هيينة شوي على الطلاب ...
فيه خيار آخر اللي هو السكن الفردي عند العوائل الأمريكية ... بحيث ان الشخص يستأجر غرفة فقط من بيت العائلة ... والأكل عليه وكلش عليه ... يعني ماله الا مكان ينام فيه وفيش كهرب للكمبيوتر ... وهذي حسب ما سألت عائلة وحدة فقط (يعني يمكن العوائل الثانية اكثر أو أقل بشي بسيط) كان بين 550 و650 شهريا للشخص ...

على فكرة بالنسبة لأسعار السيارات ... 4000 تعطيك شي صغير وبسيط وحليل ... 7000 شي وسط ... 12500 تعطيك شي حلو ... طبعا كله مستعمل ... لكن عندهم نظام فحص تاريخ السيارة ويضمن لكم ان شاء الله ان السيارة ما كان فيها حوادث ولا انكرفت ولا ولا ولا ...

والله يوفقكم ويسهل عليكم اموركم