اللي يعرف معلومات عن مدينةeugene بولاية oregon يتكرم في الدخول

مرحبتين اخوي التفاح ،،،

ياخي اسمك حركه ... قامت !!؟؟ <<<<< قديييييييم (ياشين التميلح اللي مهوب في وقته)

شف وانا اخوك انا ما اعرف الجامعة .. وكنت مخطط عليها بيني وبينك .. وجاني قبول منها بعد ... بس للاسف قفلتها الوزارة .. وان شالله انها خيره..

لكن للامانة .. فيه دكتور كان مديري في العمل ( الله يذكره بالخير ) رجل عنده خبره مهي سهله في الجامعات الامريكيه .. ويعرف عنها معلومات مهي سهله .. لانه من عمره وهو في امريكا ... من الثانوي الي خلص الدكتوراه .. ورجع يعطي محاظرات واشتغل في في جامعة الملك فهد للبترول والمعادن<<< وش رايك بالدعاية ؟؟!!

زبدة الكلام اللي فوق ... انه أول ما درى ان عندي بعثه على طول الرجال نصحني بـ university of oregon

وبرضه فيه واحد كان المدير المالي التنفيذي معنا في العمل (الله يذكره بالخير برضه ) معه السي بي اي (وأكثر ظني انه اخذها من نفس الجامعه )ومعه شهادات كثيره مدري وش هي ما شالله .. بس الرجال خبير بالجامعه... لانه دارس فيها .. ومدحها لي .. ومن ضمن كلامه كان يقول .. انه كان فيها وهو متزوج ومعه عيال .. وكان مرتاح مررره في "يوجين" وانها مدينة صغيره .. ولاكان يحتاج سياره .. ولا اشترا سياره الا يوم فكر يروح يتمشى ويزور المدن اللي حوله بس

هذا والله اعلم ،، اتمنى اني أفيدك أكثر .. بس المعذره ماعندي معلومات أكثر
وبالتوفيق

حياك الله اخوي عبد الرحمن تامر على الاسم وصاحب الاسم حبيبي والله يعطيك الف عافيه عالمعلومات القيمة والمفيده .....لكن مافهمت قصدك من كلامك هدا (بس للاسف قفلتها الوزارة).....هل تقصد انه مو معترف فيها؟؟؟مع اني شايفها بموقع الوزاره من ضمن الجامعات المعترف فيها...

مرحبا من جديد ،،،

أقصد بقفلتها الوزاره ،،، بالفترة الاولى من التقديم على البعثات والبحث عن قبول وجامعات امريكيه ... كانت تقريبا في رمضان 1426هـ ...

الوزارة لها نظام بالنسبة لعدد الطلاب السعوديين في الجامعات الامريكية .. بحيث يكون عدد الطلاب السعوديين بنسبة (س%) لاجمالي طلاب الجامعة .. كيف يحسبونها .. الله العالم !!!

على العموم كانت جامعة Oregon من الجامعات اللي وصلت الحد .. وبسرعه .. لكثرة التقديم عليها .. وقفلتها الوزارة ... وقالت روحو ابحثوا عن جامعات غيرها .. لأن هذي فُل :gr_907:

مرحيا اخ عبد الرحمن الان وصلت الفكره ...لكن عندي سؤال نوعا ما شخصي انت رايح لاي ولايه واي مدينه واي جامعه وايش تخصصك(باقي اسألك كم وزنك؟؟؟؟؟؟؟)وثانيا هل في جامعات اخرى تنصحني فيها(تخصص محاسبه- ماستر)وبالتوفيق your500@hotmail.com

مرحبا التفاح الاخضر،،،

ولا شخصي ولا شي .. بس اني هقيت اعضاء المنتدى .. لو تسأل اي واحد علمك وين انا فيه ... من كثر ما ازعجتهم :gr_897:

انا يا طويل العمر الحين في Spokane في Washington State في جامعة Gonazaga

وبالنسبة للجامعات ،،، والله وانا اخوك للاسف ما عندي معلومات ،،، يعني مثلي مثلك ،،،
لكن بالنسبة لـuniversity of oregon هي الجامعة اللي جاني عليها توصيات كثير وتمنيت اني اروح لها ( توصيات = :gr_908: الله يذكر ايام الاسهم بالخير)
وعلى فكره ترا الولاية هي الوحيدة اللي ما فيها ضرائب ..
وبالتوفيق يالغالي

حياك الله اخ عبد الرحمن من جديد
شكلي بديت افكر فيها بشكل جدي وسوف ابدى بالخطوات الاولى لكن فيه كلام اسمعه فيه تناقض كبير وهو اني مامعي ضمان مالي (شكلك تقول بنفسك:لا ومزعجنا تسأل ومسوي زحمه وانت ما معك ضمان مالي)وفيه فريق يقول مارح تقبلك الجامعه الا ومعك ضمان (حقهم) والفريق الاخر يقول ان الجامعات تقبلك بدون ضمان اضافه الى ذلك فيه صاحب مكتب للقبول يقول اني اجيب لك قبول بدون ضمان وناس تقول اننا جبنا i20 بدون الضمان المالي
والسؤااال.بما تفسر ما سبق ذكره ؟؟؟؟؟(هذا تمرين للاختبارات)

( توصيات = الله يذكر ايام الاسهم بالخير)
تصدق ظيقت صدري بذكرك للاسهم ماتدري ان اخوك متعلق تعلق العمر كله لكن الله يخلف لا ومن زين الحظ شغلت مخي وقلت خلني ابيع واشتري من تحت هذا الكلام يوم الخميس اللي فات ويوم السبت ايش صار؟؟؟؟ اللي صار انه كرشوا رئيس هيئة سوق المال (جماز)وحطوا واحد ثاني(التويجري) ومن يوم السبت والاحد والسوق %*% وانا قاعد اتفرج لكن لازم نعرف شي مهم ان الدنيا ارزااااااااااااااااااااااااااااااااق(كأني جبت شي جديد صح!!!)
شااااااااكر لك وبالتوفيق>>>>>>>

هلا التفاح الاخضر،،،

انا اشوف انه ما فيه الا انا في موضوعك .. قاعد اصرح عليك :gr_897:

شف يا طويل العمر .. من ناحية الجامعة .. زي ما قلت لك .. ممدوحة لي ... واسأل عنها أكثر عشان تآخذ معلومات كويسه ..

ومن ناحية الضمان المالي ... والله يا طويل العمر .. ما أفقه فيه شي ... وبيني وبينك ... يكفي ما جاك من تصريحات مني :gr_897: (رحمتك )

بس جد يا طويل العمر .. ما اعرف شي عن سالفة الضمان المالي .. لاني انا من اللي مقدمين من زمان .. ولله الحمد الضمان حقي طلع بعد تقديمي على الوزارة بيوم ... وارسلت صورة منه للجامعات اللي قدمت عليهن مع صور الشهادات والجواز .. وكلهن ولله الحمد جاني منهن قبول .. وطلبوا الضمان المالي النهائي (اللي راح تعطيك اياه الملحقية ان شالله أول ماتوصل لواشنطن).

وبالنسبة لموضوع (الأسهم) ... :gr_896: :gr_896: :gr_896: لا تقلب المواجع
اخوك في الله مسوي رجل أعمال :gr_876: ومساهم في ثلاث أسواق .. وكلهن خسرانات :gr_896: :gr_896: :gr_896:
لكن وراهن ... وراهن ... أبضيفهم في دفتر العائلة .. ولو ماعندي دفتر عائلة .. بس ابطلع لهم

اتمنى يرد عليك احد من الشباب اللي في المنتدى أفهم مني في موضوع الضمان المالي

مع تمنياتي للجميع بالتوفيق

باي

بالنسبة للضمان اخوي ... اما يكون عندك ضمان مالي من الوزارة تقدم عليه او يكون عندك ضمان مالي شخصي تقدم فيه على الجامعة ولازم يكون حسابك فيه فوق 25 -30 الف دولار تقدم فيه وبعدين لما يفتحوا البعثات ويجيك ضمان الوزارة روح اسحب ضمانك الشخصي وبدله مع ضمان الوزراة .. واني سمعت في مكاتب تساعدك بأنها تجيب لك قبول بدون ضمان مالي واتوقع هذا يكون اتفاق مع صاحب المكتب ومع الجامعة نفسها يعني تقدر تقول بانها واسطه .. بس هذا يلي اعرفه وانشالله افدتك ... بالتوفيق

[QUOTE=نبض المشاعر]بالنسبة للضمان اخوي ... اما يكون عندك ضمان مالي من الوزارة تقدم عليه او يكون عندك ضمان مالي شخصي تقدم فيه على الجامعة ولازم يكون حسابك فيه فوق 25 -30 الف دولار تقدم فيه وبعدين لما يفتحوا البعثات ويجيك ضمان الوزارة روح اسحب ضمانك الشخصي وبدله مع ضمان الوزراة .. واني سمعت في مكاتب تساعدك بأنها تجيب لك قبول بدون ضمان مالي واتوقع هذا يكون اتفاق مع صاحب المكتب ومع الجامعة نفسها يعني تقدر تقول بانها واسطه .. بس هذا يلي اعرفه وانشالله افدتك ... بالتوفيق[/QUOT
شكرا والله يعطيك الف عافيه