Spokane city - Washington

يا أخي ما أدري من إسم المدينة تقدر تقول ما جازتلي :gr_896:

إسمها كأيب مثل و لاية واشنطن ولاية كأيبه و برد برد برد مافيه حر أبد

من رايي خذ اللغة وإرجع أحسلك منها وبعدين كلهم كاثوليك متعصبين :gr_897: وش اللي قردك عليها

الله يكون بعونك ودور اللي يوسع صدرك وسط هالديره ولا كنسلها أما تروح لحالك فيها صدقني ما تنفع :gr_895:

اخوي وينك من زمان والله ادور احد في هذي المدينه من يوم سجلت في هذا الملتقى انا في مدينه Spokane جامعه gonzaga ابي معلومات عنها بلا الجمله وبتفصيل ارجوك
ابو بدر وش هلا الكلام

السلام عليكم ورحمة الله وبركاته...

تحياتي للشباب الطيبين وعلى الرغم من كوني أول المسجلين في المنتدى ولكن للأسف هذي أول مشاركه لي من شهر مارس ( من يوم وصلنا أنا وأمين لواشنطن العاصمه سوا )

واللي شدني للمشاركه بعد أنقطاع طويل هو تعقيب الشباب ووصفهم لمدينة سبوكان و ولاية واشنطن. ( ماشاء الله عليهم واحد يرفع والثاني يكبس ) .

الحيين ماشاء الله عليكم قمتم توصوفون في المدينه ومن يسب ومن يذم والمشكله أنه ولا واحد من الخشش عاش فيها ولا زارها ( ياحليل الشعب السعودي لاقام يهايط من غير سنع )

عموما القصد التقصير مو الأطاله . أنا أدرس في مدينة سبوكان في جامعة Gonzaga أدرس حاليا اللغه الأنجليزيه في آخر مستوى .

تعتبر المدينه من أأمن مدن أمريكا ( أتمشى بعد الساعه 12 الليل في الشارع ومحد لمي )

وخل عنكم التفلسف . ترا الشعب السعودي هنا ماشاء الله عليهم . بس أن كانك تدور الوناسه فأني أنصحك بالنحشه ( النحشه = حط رجلك ) لأن المدينه مدينة دراسه وتعتبر ثاني أكبر مدن ولاية واشنطن بعد سياتل اللي تبعد عنها 400 ميل يعني حوالي أربع ساعات بالسياره.

وش كمان ..... ؟

عموما . أذا عزمت حياك الله فيذا وهذا أيميلي : ahb60@hotmail.com

وأذا عزمت فتوكل على الله فهو المسهل وهو ميسر الأموور.


أخوك : أحمد باصـرة .

ارجوك ترد علي لاني ارسلت راساله على الخاص

هلا والله وغلا بسياتل المستقبل,

أيه قريت رسالتك يابو . المدينه جدا هادئه . جوها برد في الشتا ( جب معك ملابسك من السعوديه ) وهاليومين الجو ولا في الخيال.

صيفهم شوي حار بس معقول يعني مثل الربيع في السعوديه . الأسعار جدا معقوله ( يعني أنشاء الله المكافأه راح تكفيك )

السكن متوفر ( وبعدين خل عنك الوسوسه . ياخوك مركز اللغه بينسق كل شي من لحظة وصولك لين تدرس , وحنا ماراح نخليك تايه أذا أحتجت أي شي حنا أخوانك ونفيد بعض في الغربه , ترا الوضع أسهل مما تتخيل وأعتبر نفسك في الرياض ولا جده )


الناس ودودين لدرجة أن مابديتهم بالسلام هم يسلمون عليك .همممم وش بعد.

التخصص طال عمرك ماأقدر أفتيلك فيه لأني للحيين ماتخصصت . بعض الشباب الأمريكان اللي يدرسون هندسه يمدحونها . أنا هندستي جايبها معي من السعوديه وناوي على الماستر أنشاء الله في تخصص غير هندسي.

أتمنالك التوفيق . وياخي أيميلي عندك أن مارديت عليك فيذا أزعجني فيذاك.

يلا بالتوفيق ولاتجي هنا الا وأنت جايب معك درزن فناجيل قهوه . وبن وهيل والدله .

السلام عليكم،،،


هلا والله ومسهلا اخوي احمد،،،، قال لي (ابوبدر) ان فيه واحد من spokane راد على موضوعك ،، بيني وبينك ما صدقته ،، لانه مهوب أول مره يسحبني على وجهي :gr_896:


اخوي احمد،، اتمنى انك تتحملني شوي ،،، لاني ابحاول استغلك بكل الطرق وكل ما أوتيت من قوة :gr_929: ،،، بس عاد الله يعينك علي ومالك مجال الا انك تدعي الله يخفف عليك... لاني بيني وبينك احس ذا الديره ما فيها لا سعوديين ولا عرب .. وما اخفي عليك .. بعض الاحيان احس ان الامريكان انفسهم ما دروا عنها :gr_916:

انا رحلتي من الرياض لواشنطن ان شالله يوم الاحد 7/مايو بالليل وراح اوصل ان شالله لسبوكان يوم الاربعاء 10/مايو ،،، وان شالله ان الامور راح تسير على ما يرام

بس اتمنى اخوي احمد تفيدني وتفيد الشباب اللي راح يجون ان شالله عن بعض الامور ،، فضلا لا أمرا يعني :gr_876:

بحكم تجربتك ... كم المبلغ اللي المفروض أجيبه معي ؟؟!!
انا مثلا راح اجيب ان شالله حدود 2500 دولار كاش وتقريبا 3000 دولار شيكات غير الماستر كارد
هل المبلغ قليل،، كثير،،، او مناسب ؟؟!!

بالنسبه للمحلات أو السوبرماركت العربية ،، او اللي بالعربي المحلات الغذائية اللي اشتري منها وانا مغمض .. ما أشيل هم الحرام والحلال ،، لأنها ما تبيع الا حلال؟؟

وبالنسبه للمواصلات .. هل احتاج اشتري سياره ولا لا ؟؟ وكم تكلف تقريبا؟؟

واهم شي بالنسبه للسكن ؟؟ انا راح اسكن ان شالله في سكن الجامعة نفسها Gonzaga .. طبعا مبدئيا .. وبعدين راح ادور سكن برا ... كثير نصحوني اسكن برا الجامعة واغلبهم يقولون ابعد عن السعوديين (ما أدري ليش) وش رايك أنت بحكم تجربتك ؟؟

وبالنسبه لموضوع القهوه وملحقاتها .... أمس الوالدة الله يجزاها خير جهزة لي شنطة كاملة أكبر من شنطة الملابس .. كلها بساكيت وشابوره ومعمول والقهوه وملحقاتها :gr_885: ... عاد انا قلت الله يجزاك خير الشنطه هذي خليها على جنب ... اذا وصلت هناك اعطيكم العنوان وارسلوها لي ...

عاد الحين الامر لك يا احمد :gr_916: <<< مدري ليش اخترت الصوره هذي بس ما لقيت شي يوصف الوضع...

اذا تبي اجيب الشنطه .. أجيبها.. واذا تبي شي معين... انت آمر وحنا نطامر
ومثل ما ان لنا اخوان هناك ... ترا لكم اخوان جايين في الطريق ،،، يعني تدللو << من الدلال

هذا ايميلي اخوي احمد اذا تبي شي a_alsabi@yahoo.com

أتمنى اني ما طولت ولا ثقلت عليك <<< كيف الحال؟؟!!

مره أخرى شكرا لك وجزاك الله خير
وبالتوفيق للجميع

هلا والله أبو دحيم . توصل بالسلامه أنشاء الله .

أبو داحم : رسلت نموذج الأستقبال من المطار ولا باقي ؟ أذا باقي أرسله عشان يستقبلونك الجامعه .

بالنسبه للمبلغ اللي ذكرت. كفايه بالمره . أنا جبت معي أربع آلاف دولار وللحيين مكفيتني ولله الحمد والمنه .

ماهناك صرفيات الا أن صرت راعي ****** ( شغلات مشفره ) وأنشاء الله أنك ولد حموله ومالك في هالسوالف.


بالنسبه للسوبرماركت بوه فيذا السيفواي Safeway وأذا ماتعرفه خذ لك فره في شوارع الرياض وبتعرفه ( رح عند صحارى موول ترا يمدحونه ) .

وفيه كم بقاله عربيه تبيع شغلات عربيه ( حمص , تمر , مخلل وشغلات ثانيه ) .

بالنسبه للمواصلات ماأنصحك تتسرع. أصبر شف الوضع أذا جازلك أشتري سياره . بس بالعاده الشباب يشترون السياره بعد مايتأقلمون على الوضع.

بالنسبه للسكن : شف ياعزيزي . من واقع تجربه أنا أنصحك أذا كانت لغتك ميح ( يعني زيرو ) أن تسكن مع أمريكان في دورم الجامعه . بس راح تواجهك بعض المصاعب مثل تأقلمك معهم وأستخدام حمام مشترك وأنت بالكرامه .

أنا ساكن في شقه في دورم الجامعه فيها غرفتين وصالة معيشه وحمام ( الله يكرمك) ومروش ومغسلتين ومطبخ . طبعا عانيت في البدايه من مسألة الحمام المشترك تعرف الله يكرم ديننا حنا نظيفين والأمريكان الله بالخير . بس "من يبي الدح مايؤلش أح"
عاد أن كنت رجال راعي فله وتختلط بالناس على طوول راح تنبسط مع الأمريكان وراح تستفيد وتطور لغتك بشكل راقي وهذا يعتمد عليك وعلى مبدأك في تعلم اللغه وجرأتك.

نصيحتي لك في البدايه أسكن في سكن الجامعه وشوف الوضع وتعرف على العالم. أن جازلك كان بها وأن ماجازلك البديل أنشاء الله موجود .

وبالنسبه للي يقول أبعد عن السعوديين عطني رقمه عشان أجي أمصع أذانيه ... يعني معقوله تارك ديرتك وأهلك وأحبابك ويوم تشوف واحد من ربعك وأهلك مسلم سعودي راح تنحاش منه ؟؟؟

ياخوك خل عنك الهلوسه وكلام الناس . ربعنا اللي هنا ماشاء الله عليهم أكثرهم طيبيين . ويمكن يقصدون أبعد عن السعوديين عشان تتعلم اللغه أسرع , برضه الكلام هذا ماهوب دقيق ميه بالميه لأن تعلم اللغه في الأول والأخيير يعتمد عليك , على جرأتك وحبك للغه وأختلاطك بالناس .

الله يخليلك الوالده . خلها تدعيلي وماتقصر يابو داحم نبيك توصل سالم غانم .

عاد أحس أني بربست وطولت في الكلام. أن كان بوه شي مارديت عليه ذكرني .

أحمد.