بحمد الله اليوم وصلت لوس انجلوس (سانتا مونيكا )اي استفسار او مساعده انا حاضر..

January 7th, 2012, 08:31 AM

بعد تاجيل سفرتي الاولى المقرره ب 28 ديسمبر لمرض الوالد والحمد لله عمل عمليه وقام بالسلامه..

دورت حجوزان مالقيت الا على الخطوط الاماراتيه سعرها مناسب والتوقيت حلو لي يوم الجمعه 6 يناير وانا دراستي تبدا في 9 يناير في ucla طبعا كانت الرحله ترنزيت من الرياض لدبي 20 ساعه عطوني فيه فندق شامل فطور وغداء وعشاء..

اقلعت الرحله فجر الجمعه وكانت مدتها 16 ساعه دبي - لوس انجلوس راح نصها نوم ((سلم لي على بندول نايت))

اول ماوصلت بجد انصدمت بالمطار فرق بين مطار دبي ولوس انجلوس..

فيه موقف استغربت منه في المطار كان معي فصفص وكنت خايف لايقفطوني فيه بس كان التفتيش اسهل من مطار الرياض اول ماجيت عند حق الجوازات كنت اشوف اللي قدامي كل واحد يجي يخليه يبصم يوم جاء دوري سالني سؤالين على الطاير ليش جاي امريكا وكم تبي تجلس يوم جيت بحط يدي على حق البصمه قال لا مو لازم ختم جوازي ومشيت رحت لمكان العفش اخذت شنطي ومسكت سرا ورا العالم ننتظر التفتيش جا واحد قالي معك اكل قلت لا قال خلاص رح من هنا طريق ثاني مايودي على التفتيش انا استغربت قلت معقوله بالسهوله هذا ياحسافة القهوه والهيل والتمر بجد اول ماجاء في بالي هم اما الرز المطاعم الهنديه تزبن..

استقبلتني موظفه في مكتب هوم ستاي واخذتني على طول للعائله وطول الطريق تشرح لي هذا اسمه كذا وهذا الطريق يروح للمكان الفلاني..

كان سكن العائله في سانتا مونيكا طبعا يفصلها عن لوس انجلوس شارع واحد...

منطقه راقيه ورايقه وهاديه في نفس الوقت اعجبني بيت العائله لي غرفه فيها نت وتلفزيون بلازما وانتم بكرامه حمام لحالي والبيت مره حلو...

ام العائله قالت لي اعتبر البيت بيتك تقدر باي وقت تسوي لك اكل تدخل المطبخ تاخذ من الثلاجه ورتني كل شيء واخذتي سوبر ماركت نتقضى..

طبعا هذا اول يوم لي الحين الساعه 30-9 بتوقيت لوس انجلوس وانا واصل الساعه 7 الصباح..


مع السلامه ولي رجعه لاحداث بكرا..

• نشر عبر تويتر
• نشر عبر فيسبوك
• نشر عبر جوجل