يا أهل معهد UCLA-extension سؤال عن عدد الطلاب السعوديين و نسبتهم في الفصل الواحد

عدلنا العنوان
و يا الله يا رزاق ارزقنا يا كريم

وينكم يا جماعة الخير

وش دعوه
يا كثركم في المعهد
خذوا المايك و اعطونا المطلوب

من عير واقع تجربة خخخخ عشان ماتزعل مني بعدين!!!

المهم! أتوقع قليل مرة، ليه؟!
لأن عدد طلاب المعهد كلهم 698 طالب، عدد الطلاب السعوديين= أظن 80
هذي آخر قائمة حطتها الملحقية

هههه
الله يعطيك العافية أخوي

إن شاء الله يا رب

80 طالب من بين حول 700 طالب ، يعني تقريبا 11% بالنسبة لمجمل المعهد ،
يعني لو افترضنا أن النسبة هذي ثابتة في كل فصل أو كلاس ، يعني تقريبا إذا الفصل 20 طالب فراح يكون 2 إلى 3 ، العدد حلو و مناسب

لأني بصراحة كنت خايف يكون مثل معهد جامعة الـ UC في ساندييقو ، أعرف واحد يدرس فيه و يوم سألته عن عدد السعوديين معه قال 8 ! ، و يوم قلت له كم عدد الطلاب في الفصل كله ، قال 16 ، يعني 50% ، ما ينفع أبد
للأسف بعض المعاهد همها الربح و بس ، و ما تفكر في مسألة إعطاء نسبة محددة لكل عرق ، أو لكل مجموعة من الناس تتحدث لغة أصلية واحدة

جزاك الله خير و الله يعطيك العافية و الله يوفقك

لا غلطان اخوي انا متاكدة ان بيكون نصف الفصل سعودين لان تحديث المعاهد الجديد كان عدد الطلاب في المعهد 110 وباقي المقاعد 132 من اجمالي 692 يعني واللله اعلم بما ان المعهد قوي فا اتوقع ماتفرق معك اذا فيه سعوديين او لا ولكن المشكلة انت شاب يعني ماتفرق معك ولكن يا حسرة على البنت والله مشكلة
الله يعين ويساعد ان شاء الله

إنت بكندآ وش جآيبكـ على أمريكآ ؟! كندآ أفضل في مرحلة آللغه وهذآ شي معروف ومفروغ منه ..
ولكن صعوبتهآ دآئمآ في آلدرآسه آلجآمعيه .. أمآ من نآحية إكتسآب آللغه .. معآهد كندآ وأهلهآ وأقلية نسبة آلعرب يسآعدكـ كثير على تعلم آللغه ..

مآدري إنت بتدرس على حسآبكـ آلخآص لفترهـ معينه وترجع للسعوديه أو مبتعث !!
عمومآ .. آلله يووفقكـ وين مآتكون وللعلوميه آلسعوديين بكل مكآن وآلله أذكر خوينآ إمآرآتي وكآن وقتهآ طآلب عسكري يقول ودوني لمنطقه مآتوقعت ألآقي فيهآ بشر ..
إلآ بعد كم يوم يطلع آلصبآح ويلآقي جآرهـ سعودي معآهـ لكزس !! ههههههههههه

ترى غلبنآ على آلنهود بشوي ^^

لا تقولينها يا بنت الحلال ،
أنا أعرف إنه فيه بعض المعاهد ملتزمة بتوزيع النسب بحيث ما يخلوا أهل لغة واحدة يطغوا على الفصل لمصلحتهم و لمصلحة بقية الطلاب و مصلحة المعهد ، و أتوقع ، و بما أن التكلفة عالية، أن هذا المعهد يطبق نفس الأسلوب . لكن أحب أتأكد من الناس اللي موجودة في المعهد أو اللي سبق و درس فيه .... فـ... وين الناس اللي درسوا أو يدرسون في المعهد ؟

بالنسبة لك كبنت ، الله يعينك و يحفظك و الله .
يعني .. أنا اللي أعرفه أن الشاب السعودي يحترم البنت السعودية خصوصا إذا كانت محافظة و في حال سبيلها . و على كل حال ، وضعك كبنت يدعوك إلى أنك تكوني حازمة كثير مع أي شاب سعودي ليس قريب لك .. الله يعينك و يحفظك .

هههه
أنا في السعودية يا رجل و ما بعد طلعت .. أنا سجلت قبل عدة أشهر و أنا تركيزي فقط على كندا ، بعدين دخلت أمريكا على الخط . و لأني زمان قدمت على جامعة بريطانية و جاني قبول منها و جددوا لي قبولي للسنة القادمة أصبحت الآن على مفرق ثلاثة طرق و قاعد أسعى فيها كلها .
بريطانيا ، كل شي جاهز جامعة و معهد و مصاريف محددة و حسابها بالضبط و مميزات بريطانيا الأخرى من قرب و عدم احتياج لسيارة .
كندا ، الحب و العشق ، بس لا تفكره عشق بريء و رومانسي ، بل من أجل الكاش موني خخخخخ ، إضافة إلى النظام و الحياة و الشعب في كندا
أمريكا ، خيارات واسعة جدا للجامعات ، فيه بعض الجامعات فيها البرامج اللي أبيها بالضبط ، السمعة عند الناس و الشركات و كل العالم عندنا هنا الواحد فيهم يطيح لما يسمع أمريكا

دراستي على الحساب الخاص ، على أمل أن يوفقني الله عز و جل في الانضمام للبعثة

السعوديين في كل مكان ، صحيح ، لكن اللي أعرفه أن بعض المعاهد لديها سياسة صارمة في هذا الموضوع ( مثل معهد جامعة يورك في كندا و اعتقد معهد جامعة جورج تاون في واشنطون ) . أنا ، السعوديين ما عندي معهم مشكلة ، أزورهم في الأندية الطلابية ، أتعاون معهم ، أشوفهم في الشارع ، أسولف معهم ما عندي مشكلة دام أني ما راح أشغل نفسي معهم على طول ، لكن المشكلة الفعلية لما تلقى نصف الفصل سعوديين ، هذي مشكلة ، خصوصا أنه للأسف أن نسبة كبيرة من ربعنا لا يهتم و لا يكترث و لا يشعر بأهمية الوقت و المال اللي هو قاعد يصرفهم ، فضلا عن أن بعضهم مبتعث من الدولة و ما عنده ذرة إدراك بالنعمة اللي هو فيها ، فضلا أن بعضهم مجرد مرافق يعني ماخذها سياحة .. شفنا هذي الطباع السعودية في المعاهد عندنا في السعودية للأسف ، بدل ما ينصت للمدرس و يتحدث باللغة الإنجليزية ، تلقاه يحش في المدرس بالعربي ، و لا ينكت مع خويه اللي في الجهة الثانية من الفصل ، و يستقعد لنا لأنه يبي واجبات أخف ( عقدة الدراسة منتقلة لفصول اللغة الإنجليزية الله لا يبلانا ) .. فللأسف ، ما ودك بـ ولا واحد سعودي ، لكن ما أظن هذا ممكن ، فعلى الأقل 2 أو 3 معك في الفصل على الأكثر و يا الله يا رب يكونوا جادين .

لاحظوا قلت نسبة كبيرة من السعوديين >>>> 30% على سبيل المثال تعتبر نسبة كبيرة و لكن لا تعتبر أغلبية فأرجو التنبه
و ايضا لما تكلمت عن المبتعث أو المرافق ، كنت أقصد هؤلاء اللي في النسبة اللي أقصدها لما قلت "نسبة كبيرة من السعوديين" ، و لا أقصد كل مبتعث أو كل مرافق ، فأرجو التنبه
وفقكم الله لكل خير