انديانا بوليس وجامعتها ارجوا الافاده لا حرمكم الله الاجر

وعليكم السلام .. ويا هلا بك .
أنا من المدينة وراح أفيدك باللي اقدر أخدمك فيه ..
1- الجامعة سمعتها قوية في بعض التخصصات ومنها إدارة الاعمال والقانون ، يبقى تخصصك الدقيق ومدى توفره لك .
2- السهولة والصعوبة تعود لحسن الممارسة اللغوية والقدرة ع الانضباط العام + المذاكرة والجدية في الدراسة .
3- المعهد الملحق بها لا املك خلفية. عنه .. لكن يوجد معهد ELS مقبول فيها بعد المستوى 109 وإجراء الاختبار ، لكن اكثر من 80٪ من طلاب المعهد سعوديين .
4- المدينة جيدة جداً من حيث الأمان والمعيشة وحركة السير والسكن ، يعيبها البرد القارص شتاء .
5- وسائل الترفيه متعددة ومتنوعة من حيث الاسواق والمنتزهات وغيرها .. ، وعموماً المدينة تقع في قلب امريكا حيث تساعدك على السفريات القريبة والبعيدة بكل سهولة .
6- السعوديين هنا كثيرين جداً وتشوفهم بكل مكان .. لا تخاف بتمل من كثرتهم
7- المدينة آمنة جداً ومريحة بشكل كبير من هالناحية .. لكن ابتعد عن شرق المدينة في السكن .
8- الإيجار يتراوح بين 500 الى 1500 دولار حسب المنطقة والمساحة ، والسكن مع عائلة بمتوسط 750 دولار شهريا .
9- عليك بدراسة دورات تقوية في اللغة قبل الوصول هنا .. راح ترتاح كثير ، ولا تنسى الصلاة في وقتها اذا جيت .
10 حركة الباصات قوية وممتازة ودقيقة هنا ومتوفرة بكل مكان .. لكن السيارة أريح لك بلا شك .
وفي الخدمة الله يحييك ..

اخي ابو عبدالعزيز اسأل الله ان يجزيك خير الجزاء وان لا يحرمك الأجر وان يجعلها في ميزان حسناتك وان يحقق لك جميع امانيك في الدنيا والاخرة وفيت وكفيت جزاك الله خير.

* بخصوص الجامعة اللي اقصدها هي university of indianapolis وان شاء الله هذي اللي يكون قصدك مش جامعة INDIANA UNIVERSITY - PURDUE UNIVERSITY - INDIANAPOLISلأن كثير من الطلاب يغلطو بينهم.

* من ناحية سهولة وصعوبة الجامعة اكيد انه كل شي على مدى اجتهاد الشخص ومن ناحية الانتظام فراح يكون دائم ان شاء الله ولكن اللي اقصده انه فيه بعض الجامعات معروف ان الدراسة عندهم شديدة شوي وتحتاج لجهد كبير وبعض الجامعات لا اقل منها يعني ما راح يكون عليك جهد كبير جداً في الدراسة لأني انا متزوج وعندي ولدين وتخبر جو الدراسة ما راح يكون متاح لي على طول.

* من ناحية السكن تقول ابتعد عن شرق المدينة ليه؟؟؟ هل فيه مشاكل او عدم امان والا ايش وايش اسماء هالمناطق؟ وعشان تكون في الصورة بس انا ان شاء الله بأجي 3 شهور لحالي و اذا الله يسرها والحقت بالبعثه بأرجع اخذ اهلي.

* من ناحية الاجواء اذا كان فيه امكانية تعطيني نبذة سريعة عنها يعني متى الشهور اللي يكون الوقت بداية البرد ومتى الثلوج ومتى الجو المعتدل.

* هل في المدينة نادي للطلبة السعوديين وهل هو كبير والا صغير وكيف انشطتهم؟

* فيه مكان تنصحني فيه للسكن الحين وانا عزوبي وهل تفضل السكن لحالي والا مع عائلة؟

* هل الجامعة تعادل ساعات دبلوم تسويق من الكلية التقنية علما بأن اقل تقدير عندي B ولله الحمد وبمعدل 4.71 من 5

* جاني قبول في جامعة ويست فرجينيا اش تنصحني فيه اكثر هي والا انديانا بوليس؟

انا عارف كثرت عليك استفسارات بس تخبر الواحد اذا كان جاي لمنطقة اول مرة يجيها يحب يعرف امور كثيرة الله لا يحرمك الاجر.

تحياتي ابو سلمان

بالتوفيق ومشكور اخوي ابو عبدالعزيز