مدينة كولومبيا ولاية ميزوري

May 12th, 2014, 10:34 AM

الحمد لله تم قبول زوجي بجامعة ميزوري وانتقلنا لهالمدينه من اسبوع تقريبا . بحكم انه بحثنا كثير بالموقع وبمواقع اخرى وحاولت اتواصل مع النادي السعودي لاكن مالقيت اجابات وافيه لاستفساراتي.راح ابدأ اول شي بالسكنات لأن هذا اكبر شي ممكن نشيل همه انا صراحه استعنت بكتيب صغير يوزعونه بالسوبر ماركت أسمه :Apartment Finder يعرض اسم الشقه وعدد الغرف والموقع والايجارات وارقام التواصل اتعب وانا اقول جدا رائع . فأنا دورت باغلب السكنات الموجوده بهالكتيب ورحت شفتها نصها سكنات فيها من غرفه الى 5 غرف. طبعا نص اللي فيها غرف كثير مصممينها ان كل غرفه بداخلها حمام خاص يعني يقدر الشخص يستاجر مع طلاب اخرين فقط يشاركهم بالصاله والمطبخ والحمام مستقل الاسعار للشخص او للشقه اللي تتكون من غرفه وصاله ومطبخ تترواح من 400 الى 800 $ حسب فخامه الشقه ونظافتها. و كمان الغرف الكثيره ماتتجاوز 1000 $. اضيف نقطه كمان بخصوص السكن بعضها يتميز بوجود باص خاص يوصل لجامعه ميزوري. هالمدينه جامعيه بحته الجامعه تقع بالدوان تاون يعني بوسط المدينه اي مشوار بتروحه لازم تمر عالجامعه. يوجد شقق مفروشه ونفس الاسعار بعضها اثاث نظيف وبعضها قديم.
بالنسبه للأسواق موجود المحلات الكبيره مثل وولمارت وتارقت وميسيز وفيه مول كبير اسمه كولومبيا مول فيه ماركات كثيره.
بالداون تاون حول الجامعه فيه جميع انواع المطاعم وفيه 3 منهم عربيه واحد من المطاعم العربيه فيه بقاله عربيه كمان. فيه مسجد كبير ونظيف قريب من الجامعه طبعا هو المسجد الوحيد بالمدينه. فيه مستشفى الجامعه كبير وله اقسام كثيره متوزعه بانحاء المدينه. فيه كثير ملاعب قولف وكره قدم وتنس.
ودي اضيف ملاحظه لطلاب اللغه بحكم ان المدينه جامعيه والعرب قليل فأنا انصحهم يسكنون مع اجانب لأن بعض السكنات يسالونك اذا اخذت شقه فيها غرفتين مثلا في سكن طلاب مين حاب يسكن معك فأختار احد غير لغتك هالشي راح يدعم اللغه كثير . وبالنسبه للجامعه اللي اعرفه قبولاتها شوي صعبه بس مع الاصرار والتوكل على الله ان شالله تتسهل.

أتمنى اكون بالموضوع افدت كل من يبحث عن هالمدينه بالقليل من المعلومات و اللي عنده اي معلومات اضافيه ياليت يشرف موضوعي باضافتها ليكون مرجع لكل من يبحث عن المدينه. حاضره لأي اسئله.

حبيت اضيف نقطه بالنسبه للي جايين لهالمدينه فقط عشان يدرسون لغه بمعهد الجامعه وحتى لو معك قبول مشروط , ما أنصح بهالمعهد نهائي لأن المستوى فيه ياخذ منك 4 شهور وفيه تقريبا 7 مستويات ومو اي احد يطلعونه للمستوى اللي بعده من الآخر معهد فاااشل جداا نصيحه للمبتعثين مايضيعون وقتهم وجهدهم فيه نهائي واللي حابب يستمر بالولايه فيه معاهد ELS ومعاهد TLC من افضل المعاهد للتاهيل الاكاديمي موجوده بسانت لويس وكنساس سيتي بالاضافه ان المستوى شهر يعني من اول سنه يمديك تجتاز اللغه وتتفرغ للاختبارات الثانيه مثل GRE , GMAT واللي مو مطلوبه منهم يكون افتك من هم اللغه بمده بسيطه ويبدا يختار بين خيارات كثيره مو يحصر نفسه بجامعه وحده المعاهد اللي انا ذكرت عندهم اكثر من 100 جامعه تقبل المستوى الأخير وللأسف كثير رجعوا السعوديه لأنهم ماجابو اكثر من 5,5 بالايلتس او 60 توفل . الملخص بهالمعهد (IEP) تنتهي بعثتك وانت ماخلصت 3 مستويات بينما غيرك بمعهد كويس بسنه يجيب افضل درجات لغه.

• نشر عبر تويتر
• نشر عبر فيسبوك
• نشر عبر جوجل