خلاص ضاع المستقبل وش بقى ؟؟؟؟

October 19th, 2007, 08:32 AM

بسم الله الرحمن الرحيم

السلام عليكم ورحمة الله وبركااااته اما بعد

المستقبل ضاع والسبب ما دري هل لاني طموح او ليه الى الحين ما لقيت سبب

( رجاً من الي ماهو فاضي يقراء الموضوع لئنه طويل شوي يقراء اخر شي ويعطيني حل وش اسوي )

.................................................. .................................................. ....

من البدايه انا كنت طالب في المتوسط طالب يعني مو اي طالب يعني كسول مره ما انجح الا في الدور الثاني

في اغلب السنوات في المتوسطه المهم عدت سنتين في المتوسطه والسنه الاخير ثالث رحت لمدرسه اهليه

مع العلم اني كنت في مدرسه حكوميه بس انا كنت كسووول او لا مبالي ما اهتم للدراسه ( وكنت مدخن)

واهلي قررو انهم ينقلوني الى مدرسه اهليه والحمد لله نجحت في الدف والدفيف

وبعدها بدا يشتغل المخ ووين اروح لمعهد او لثانويه عامه افكر افكر قلت مالي الا المعهد الثانوي التجاري

احسن واسهل واذا تخرجت منه ادور لي اقرب وضيفه واخشها لو راتبها 2000 عادي مو مشكله

كان تفكيري كذا يعني ما فهي اي طموح المهم واول اسبوع لي في الثانويه توفى ابي الله يرحمه ويسكنه

فسيح جناته وشهر بعد شهر بديت احس اني لازم اانتبه لنفسي انا الحين ما فيه احد يأمرني لازم انا الي

اامر نفسي المهم الحمد لله نجحت في السنه الاولى بتقدير مقبول وكانت عندي الفرحه ما توصف في النجاح
من زمان ما ذقت طعم العطله الصيفيه زيك كذا كنت لازم اعيد دور ثاني المهم وانتقل للصف الثاني

والحمد لله تغيرت طريقة تفكيري ( وتركت الدخان بعد خمس سنوات من التدخين ) يعني بديت احس في

نفسي واهتم واعرف الصح من الخطاء واخطط للمستقبل وقلت اني بكمل الدراسه وبشيل فكرة

الوضيفه من راسي واكمل دراستي احسن لي

المهم نجحت من ثاني ورحت لثالث طبعاً في الفصل الدراسي الاول وانا مجتهد لاكن الى اين ان شاء الله

بعد الثانويه مادري بس الي علي اني اجتهد واجيب نسبه وبعدها يحلها الف حلال المهم بديت افكر اني

اكمل في جامعه او في الكليه التقنيه مادري بس ركزت على الجامعه وكان فيه زميل لي في الفصل يقولي

اانا بروح بعثه بقدم واروح ادرس في الخارج وانا في نفسي اضحك عليه واقول ليه اعني نفسي واترك

اهلي واروح برى ادرس هنا احسن في وانا في ديرتي وعند اهلي والله انك خبل مانت صاحي

المهم مرت الايام والليلي والى فيه لي صاحب مخلص الثانويه معنا في الحاره ويقولي نفس الكلام الي قاله

خويي الي في الفصل يقولي انا قدمت على بعثه وبروح وان شاء الله انهم يقبلونني المهم تقدر تقول ان

الفكره خشت المخ بس على خفيف اني ارو ح اكمل دراستي في الخارج المهم بعد فتره انقبل خويي الي

في الحاره ورح لم امريكاء يكمل هناك وانا بديت افكر اني اقدم زيه طبعاً انا لساء في ثالث الفصل الدراسي الاول

يعني الاختبارات لسه ما جت يعني في امكانيه اني اشد على نفسي والحمد لله شديت على نفسي وجبت

نسبه حلوه مع التطبيق صارات نسبتي 90.86%

والصراحه ماكنت احلم في هذي النسبه وكل من قلت له من اقاربي ان نسبتي كذا مايصدقي يقول انت

الي في المتوسطه تعيد وما تنجح الا في الدور الثاني نسبتك كذا يعني انا ماصدقت نفسي بس لكل

مجتهد نصيب والحمد لله جاني نصيبي

والحين جياء لأختبار القدرات وجبت في 66 % يعني الدرجه موب زينه لذيك الدرجه

المهم قررت اني اقدم على بعثه وارح طبعاً بعد الموافقه من اهلي والالحاح عليهم من اختبارات الفصل

الدارسي الاول وانا بادي اكلمهم عنها حتى تمت الموافقه بعد الالحاح الشديد

المهم واقدم انا وواحد من

اخوياي في المعهد الثانوي التجاري على وزارة التعليم العالي للبتعاث ببرنامج خادم الحرمين الشريفين

حفضه الله ورعاه وكنت اتردد بشكل متكرر على الوزاره حتى ان بعض الموضفين عرفوني يقولون لي

انت الي جيت اول اقول ايه وكل مره اجي اسئل سؤال مختلف اجي واضرب مشورا على شان سؤال بس

وارجع يعني البعثه كانت شاغله مخي لدرجه ما تتصورونها حتى في نومي احلم فيها وكل تفكيري فيها

وابني امال وطموح وافكار ووش بسوي ووش ماني مسوي وافكار كثيره وفي كل صلاة ادعي ربي انه

يوفقني وييسر لي اموري .


والحين جاء التقديم عن طريق الانترنت طبعاً من شروط التقديم رقم جواز سفر ساري المفعول

وطلعت جواز ماله اي فايده عندي انا ماني راعي سفريات خارج المملكه بس طلعته على شان الابتعاث

( الطموح ) وطبعاً كان علي مخالفات وسددتها على شان اطلع الجواز والحمد لله طلعت الجواز

بعد المرمطه بين الجوزات والاحوال المدنيه على شان اطلع بطاقه احوال جديد على شان اطلع الجواز

طبعاً من شروط الجواز ان يكون معك بطاقة الاحوال الجديده وطبعاً اروح للئحوال من الساعه 8 الصبح

الى 12 الضهر لمدة ثلاث ايام يعني باقي وقت قليل يمكن اسبوع ويخلص التقديم عن طريق الانترنت

ولقيت خويي الي في الفصل الي يقول اني بروح ادرس براء الي كنت اضحك عليه واقول عنه خبل

جاي يطلع بطاقه احوال جديده على شان يطلع الجواز ويقدم مع الي يقدمون يعني كلنا في الهوى سوى

وهو نسبته 91% في الدراسه و 70% في القدرات وقلت انت وش سويت قدمت على شي جامعه كليه

قال لا قلت ليه اذا ما جت البعثه وش تسوي قال انشاء الله تجي الولد عنده واسطه قويه لدرجة انه ماقدم

على جامعه هنا ولا كليه ولا شي يعني لو ما جت البعثه بيجلس في بيتهم لاكن شكله ضامنها مره عنده

واسطه قويه ( ما اقول الا الله يوفقه وييسر له امره )

وخلصت الحمد لله من الجوازات والاحوال وطلعت الجواز ورحت اسجل عن طريق الانتر نت ومن الشروط

ان تكون النسبه 90% فما فوق في الدارسه و 70% فما فوق في القدرات

وانا مثل ما انتم شايفين القدرات عندي ناقصها 4 درجات بس المهم قدمت مع الي قدمو بعد ماكلمت

الموضف عن الوضع وقلت له ان ناقصني 4 درجات في القدرات قال انت قدم والله يكتب الي فيه الخير

وقدمت ... والحين باقي القبول او الرفض يعني تحديد المصير .

وانا مسجل في الكليه التقنيه قسم تسويق طبعاً الخطه المرسومه اني اذا جت البعثه اترك الكليه واروح

وان ما كتب الله لي نصيب فيها اكمل في الكليه التقنيه .

وفي يوم من الايام اتصل علي خويي الي قدمت اانا وياه موب الي في الاحوال لا الي قدمت انا وياه

وقال لي ما جتك رساله من الوزاره قلت لا ليه قال انا جتني وقالو فيه نقص عندك في اوراقك نرجو

منك ان تراجعنا في فندق الضاهر انه ادسون ساس الي في الرياض.

وبعدها ...................

جاء الي ما كان في الحسبان الي جاب لي العقده في حياتي و تحطمت وقتها وياليت ماقدمت على

شان ما اتحطم كذا ولو اني على حالتي اول كسول ومهمل كان ما طلعت من الثانويه احسن لي ولا اتحطم

كذا امال بنيتها وافكار نسقتها وطموح كدت ان احققه و اشياء كثيره ضاعت في لحضه

افكر وش اسوي اليحين ابكي وش الفايده مادري وش اسوي لدرجة اني افكر اني انتحر خلاص ما بقى

لي شي اخاف عليه ولا افكر فيه خلاص الشي الي كنت باني عليه مستقبلي ضاع خلاص

بس الحمد لله على كل حال الله ماكتب لي فيها نصيب

وبعدها محتار ومدري وش اسوي في حياتي كل يوم اطلع في فكره جديده

كل فكره تختلف عن الثانيه وانا مستمر في الكليه التقنيه في رمضان بس طبعاً جالس في المحاضره

وفكري في البعثه يعني حضور جسدي بس حضور ذهني ما فيه وكرهة الدراسه وافكر اني اترك الكليه

الي الحين ما بديت فيها وخصوصاً المستوى الاول لازم اني اجيب فيه معدل حلو بس ما اضن اني اجيب

بعد الي صار واحيان افكر اني ارجع للدخان بعد ماتركه حوالي سنه افكر اني ارجع له يعني خلاص

برجع لحالتي الاولى واحيان افكر اني انسى اني قدمت على البعثه وانتبه لدراستي واشيل فكرة الدراسه

في الخارج ووالله اني في حيره من امري مادري لمن اشكي الحال رحت لأقاربي وما نفعوني

ورحت لواحد من الجماعه هو الي ضبط اوراق ابوي الله يرحمه على شان يطلع يعالج على حساب

الحكومه ولاكن الله يرحمه طلع لألمانياء وتوفاء هناك الله يرحمه الرجال كلمته وقال يصير خير عطني

رقمك وادق عليك وان شاء الله بكلم لك احد واضبط امورك

بس ما اضن انه يرد رح الحين فتره ولم يرد علي يعني خلاص وحاولت اني اكلم احد ثاني

وكل من كلمته ما نفعني وازداد التحطم فوق التحطيم الي تحطمته من قبل
.................................................. .................................................. ............................







واخيراً ما هو الحل

.................................................. ..........................................

افكر اني اروح للهند اخذ لغه انجليزيه وارجع بس على حسابي ومثلكم عارفين اسعار الهند

رخيصه ماهي مثل باقي الدول الاوربيه.


وبعض الاوقات اقول اني اعيد اختبار القدرات واجيب

ان شاء الله نسبه حلوه فيه واقدم من جديد في السنه القادمه وان شاء الله انقبل واجدد حياتي


و اوقات اقول كنسل كل الخطه وترجع حليمه لعادتها القديمه واحرق الجواز وافتك منه وخلاص

.................................................. .................................................. ...................


واخير شي اقول اسف على الاطاله بس والله هذا شي بسيط على شان اطلع جزا من الهم في في قلبي

وما لقيت الا ذي افضل طريقه اني اشكي فيها وافضفض عن الي داخلي

ولا تحرمونا من ردودكم وارائكم

اخوكم ابو علي

• نشر عبر تويتر
• نشر عبر فيسبوك
• نشر عبر جوجل