تكفووون نصيحتكم ورايكم راح يحدد مصيري...اترك وظيفتي واكمل دراستي ؟؟؟؟؟؟؟

الحمد لله بخير ونشاء الله انك تكون بخير
انا بقول وجهة نظري الطموح والرغبة أهم شيء ونت من كلامك ماشاء الله بس أمرك محير من جد بصراحة انت أي تصرف بيكون هناك مخاطرة بالنسبة لك ( أنا كنت مثلك ومتخرج وموظف وجيت أدرس لى حسابي بس ماستر ) نكمل الراتب ووممتاز وضعك وشركة موبايلي مايحتاج ونت تطمع للافضل وهذا شيء حلوو جداً .
1- أنت موظف براتب مع شهادتك أعتبرة ممتاز .
2- بعد الدراسة بترجع تدور وظيفة .
3- أمر الألتحاق صار فيه صععوبات .
الوظيفة أنت أذا ماتوفقت ورجعت السعودية عندك قابلية أنك أذا توظفت براتب أقل ماعندك مشكلة ( أقولك الله يسهل دربك )
وأفضل حل عندي تطلع أذا توفرت الشروط :
1- تأخذ أجازة مفتوحة مدة 6 شهور ( بدون أستقالة ) ظروف عائلية ، او حاليا عندك مشكلة زي كذا .
2 - هل بتدرس بنفس تخصصك وفيه معادلة ساعات أذا مافيه معادلة صعب . لان لو مافي معادلة بتدرس سنة لغة وسنة فاونديشن و3 او 4 بكالوريوس تكون راحت 6 سنوات ( هنا خلك على وظيفتك لانه في خبرة 6 سنوات أفضل من شهادة بكالوريوس وكمل بالسعودية تخلص أنضم للجامعة سلطان )
3 - الرغبة الصادقة بالدراسة .مو عشان سفر وخلاص للاسف بعض المبتعثين مافيه جديه عنده .
4 - تحمل التكاليف الين الانضمام ( معهد ، جامعة ، سكن وغيره )
أذا توفرت هذي الشروط توكل على الله هذا بنظري واذا ناقص شيء اتوقع الاخوان مابيقصروون
أخوك أهلاوي الرياض

مرحبا اخوي تبي راي الاول ولا اخير استخير واكثر من الدعاء والالحاح فيه
1 انااقولك شركه موبايلي وظيفتك غير حكوميه يعني مامن حسافه اذا طلعت
2 اخوي انت انسان عندك طموح وعمرك في نظري صغير يعني تقدر تدرس مو بس بكالريوس
حتي ماستر باذن الله
3 بنسبه الالحاق صعب جدا لكن لاتاياس في كل مرحله تكون اصعب من قبل وفي نظري الالحاق
والله توفيق من ربي يعني طلاب برطانيا كان مافيه الاحاق لكن زياره الوزير اتلحقوا وكذلك الزياده
الرواتب زارهم الملك الله يطول في عمره وزادوهم يعني مافي شب ثابت علي حاله اذا انت بتفكر في
الوزاره مو بس بطيح شعرك حتي رموشك وحواجبك بطيح
4 امابنسبه للوالدين اهم شي راضاهم والاقناع في بدايه الموضوع يكون صعب لازم تحمل عشان توصل ياخي شوف في بنات مبتعثات انا وحده ابي ادرس برا مع المعارضات الكثيره ووضع الوزاره
ماياست لاني اعرف رحمه ربي في عبده واسعه
5 اهم شي الدعاء وخل الوالدين الله يطول في عمرهم يدعون لك بقلب صادق وربي يكتب لك الخيرولا تنسنا من صالح الدعاء الله يوفقك وينولك ماتبي

شوف أنا بقولك أنا وش سويت بس لاتقول إني وهقتك
أنا متزوج ولدي عائلة وكنت موظف بمبلغ (13000)ريال
قدمت على البعثة وتمرمطت لحين أحلقت وبعد كذا قدمت إستقاله
والحين بسافر انا وعيالي لنبدأ حياة جديدة
أنا عارف إن أكثر الإخوان حيقولوا إني متهور لكن هالخطوة ماسويتها إلا بعد تفكير عميق ودراسة مستفيظة ومشوارة والأهم من ذلك كله إستخرة الله سبحانه وتعالى.
تمنياتي لك بالتوفيق ،،،

السلام عليكم
أخوي midocash أتوقع إن رد أخوي أهلاوي الرياض وسلوة النفس في محله
وأما الروقي فمضرب مثال لتحقيق الطموح
أستخر الله مرة ومرتين وخمس وأحسبها صح من كل النواحي
والله يوفقنا وإياكم جميع .

معليش اخوي
اعذوروني اعضاء المنتدى

صاحب الموضوع
طبعآ انت ماتعرفني معرفه شخصيه ولا تعرف تفكيري كيف ولا تعرف هل انا انسان مجرب او انسان عندي خبره في الحياه
ممن اكون انا انسان جاهل في الحياه
ممكن اكون حديث تجربه

طبعآ الكلام هذا علي انا وعلى اخواني اعضاء مبتعث

يعني اذا تبغى تستشير في مواضيع مستقبليه خاصه بك
ماتستشير معارف النت
اسشير المقربين لك في حياتك اللي عندهم خبره في الحياه واللي تثق في كلامهم واللي يعرفون مين انت
بمعنى اصح اللي تعرفهم معرفه شخصيه وتعرف تفكيرهم ويعرفوك مضبوط

استشارة اعضاء المنتدى الكرام خليها في امور البعثه
امور الالحاق

ممكن كلامي يزعل اخواني الاعضاء
ممكن يقولو ليه احنا محنا اكفاء حتى يستشيرنا

لكن هذا رأي الشخصي

الله يوفقك ويسهل امرك
ويسهل امر اخواني في مبتعث

السلام عليكم ورحمة الله وبركاتة
اخوي اذا انت مرتاح في العمل لا تفصل افضل لك وتقدر ان تتطور نفسك وتدرس في الانتساب لا تقول شهادة الانتساب ماتنفع اخي الكريم اعرف ناس في مناصب عالية وهو معه شهادة الانتساب يعني تصيد عصفورين بحجر واحد.
اما بنسبة لي انا ..انا كنت عسكري وفصلت لكن تعرف العسكرية مو زي المدنية ورحت سجلت في الجامعة بالسعودية والحمد الله في تخصص اللغة انجليزي .. ولكن ماني ندمان على شي غير العمر الي راح يمكن تقول ليش ماسجلت انتساب طبيعة عمل كانت صعبة اول شي عدم الاستقرار في مدينة معية يعني كل شهرين او ثلاثة اشهر وانا في مدينة ثانية وهذي مشكلة كبيرة يعني كل شوي وانت شايل العفش حقك غير الدوام ملخبط مرة في الليل وفي الصبح يعني في كل وقت غير الجوال لازم يكون شغال لو قفلت الجوال هذي فيها سين وجيم ومحضر وتوقيف ..

نصيحتي لك اذا ماجبك الانتساب روح الجامعات الاهلية منتظم والتخصص الي تحب تختارة

ولك التحية

يا هلا فيكم منوورين الموضوع ...

يعطيك الف عافيه اخوي اهلاوي الرياض على نصيحتك ومساعدتك ومشكووور وماقصرت ،، وبالبنسبه للاجازه بدون راتب ( بسبب الدراسه ) صعب جدا في القطاع الخاص وخصوصا موبايلي .. ومشكور على تفصيلك وشرحك للموضوع بكل وضوح ،، وكل النقاط الي انت ذكرتها والله قاعد ادرسها من فتره ،، وربك يكتب الي فيه الخير ،،، وفقك الله يالغالي

يا هلا اختي سلوة النفس ماقصرتي والله وانا عرف والله سني صغير على الشغل المفروض الي في سني يدرس ،، مع اني ادرس بس مو مقتنع ابي الافضل ... وعلى قولك وظيفتي اهليه ماهي حكوميه عشان اندم عليها ،، والله يووفقك وترجعي بالشهاده ان شاء الله وترفعي راس اهلك ..

يا هلا اخوي ولد الروق .. واللهي اهنييييك علي طموووحك وشجاعتك في اتخاذ القرار ... واكيد انت ما اخذت قرار مثل هذا الا وانت درسته دراسه تفصيليه وشفت انه الافضل لك علي المستقبل البعيد ... الله يوووفقك ياارب ويكون لك مستقبل زاهر ان شااء الله ويحفظ لك ربي عائلتك الكريمه ... ويارب ترجع وتلاقي وظيفه احسن من الي كنت فيها وبضعف الراتب

مشكووووور اخوي مساافر علي المرور والرد ،،، يعطيك الف عافيه

مشكوور اخوي طال السفر منور الموضوع

السلام عليكم

عشان اختصر عليك الموضوع : بقول قصتي :
كنت موظف حكومي براتب 7200 ريال تقريبا وكان عندي طموح زي طموحك واكثر
قدمت على المرحلة الرابعه من البعثات وقبلوني مبدئي ورفضوني في الترشيح النهائي لأني موظف حكومي
رحت الوزارة وسألتهم وقلت لهم انا ما عندي مانع استقيل في سبيل البعثة والدراسة ، قاللي واحد من الموظفين الله يسامحه : استقيل خلال اسبوع وتاخذ البعثة لأنك مقبول مبدئي
استقلت .... ورجعت لهم قالوا لي : ما ينفع لأنك يوم قدمت كنت موظف حكومي = كذبت علينا وقتها
وقاللي واحد من الموظفين : روح على حسابك وتنضم حالك حال غيرك
انا الحين في استراليا لي 4 شهور ...... الملحقية تقول ما راح نرسل ملفك الين تكمل 9 ساعات ماجستير والوزارة .....
عداد الفلوس بدا يفضى علما اني تسلفت من كل اللي اعرفهم وعلي قرض من البنك ايام الوظيفة وحالتي تشكى الى الله نسأل الله ان يضمنا للبعثة ويضم اخواني واخواتي في كل البلدان.

بالنسبة لك : انت تقول انو ما عندك مشكلة لو كملت 30 ساعه..... طيب انا بسألك : لو جا وقتها وقالوا لك : لازم يكون تقديرك في ال 30 ساعه هذي جيد جدا وانت ما قدرت تجيبها . ايش راح تسوي ؟؟؟؟
لأنهم بصراحة في الوزارة يطبقون النظام متى ما بغوا وفجأة وبدون سابق انذار... واحيانا يمشون ويدوسون على الانظمة متى ما بغوا . فلازم تاخذ كامل احتياطياتك ( مثل ما حصل لي : بمجرد ما وصلت استراليا قالوا وقفوا الالحاق وصار صعب ومدري ايش)

أنا اشوف يا اخوي: ان البكالوريوس هو بكالوريوس من جدة ولا من فرانكفورت ، محد ينتبه للفرق وخصوصا انك بترجع للسعودية وراح تعامل معاملة اللي يتخرج من جامعه سعودية.

رأيي : انك تمسك وظيفتك بسنونك ، واذا انت راعي علم على قولتك ، ياخي خذ لك دورات وخذ لك برامج وطور نفسك بالاضافة الى الانتساب اللي تقول عنه

صدقي انا مجرب بنفسي ووالله ما اكتب لك الان الا من حرقة في قلبي على ضياع وظيفتي
والله يوفقك لما فيه الخير لك وللوطن

اخي الكريم وفقك الله اذا كنت لا تريد جامعة الملك عبد العزيز لانها انتساب فلديك جامعة فلديك الجامعه العربيه المفتوحه وعلى حد ما اعرف ان شركة موبايلي تساعد موظفينها للارتقاء لتعليمهم
وان ابيت فحبذا لو ارسلت لي ايميلك وباذن الله ان اجد لك حلا ولكن لا تنساني من دعواتك الطيبه