شرح اللي راح يوصل أمريكا أول مرة ويبغى يعرف ايش يسوي لمن يوصل المطار يدخل هنا

يوم الأحد راح توصل طيارة جدة - واشنطن الساعة 3 العصر بتوقيت واشنطن. يعني راح يكون فيه واحد او اثنين من موظفين الملحقية متواجدين في المطار ومعاهم اللوحة. مالهم مكتب ولا شي بس بأقولك كيف بتلاقيهم بالتفصيل. أول شي بعد ما توصل الرحلة راح تطلعون من الطيارة على مركبة مثل الباص تنقلكم من صالة الى صالة. أول ما توصل الصالة الثانية راح تدخل في صالة كبيرة حقت الجوازات ومقسومة نصين الأمريكان من اليمين والأجانب من اليسار انت طبعا تروح لليسار الا اذا معك الجواز الأمريكي. المهم السرا طويل مرة بس فيه كاونترات كثير يخلصون اموركم بشكل اسرع. لمن توصل للكاونتر تعطيه

1. جوازك
2. I-20
3. I-94 ( الكرت الأبيض وتحصل عليه وتعبية في الطيارة)
4. ورقة الجمارك (لونها أزرق وتحصل عليه وتعبية في الطيارة برضه)

الضابط راح يبصمك و يسألك أسئلة بسيطة مرة و بما إنك سعودي إحتمال كبير بنسبة 90% يكتب على الورقة الزرقاء (B) بالقلم الفسفوري ومعناتها انك تحتاج تروح للقسم (B) عشان يختمون لك دخول على أمريكا.



اذا قالك تروح للقسم الثاني أول شي تاخذ شناطك من السير حق العفش وبعدين تروح للقسم الثاني وعفشك معك.

اذا وصلت لهم عطهم نفس الأشياء الأربعة اللي فوق وتروح تجلس تنتظر من 10 دقايق الي ساعة على حسب الزحمة إلين ما ينادون على اسمك وراح يختم على جوازك ويقولك توكل انت اطلع من هناك وبتلقى في وجهك عسكري تعطيه الورقة الزرقاء وتمشي قداااام وبتطلع على باب ما تقدر ترجع منه

أول ما تطلع من هذا الباب امش شوية قدام وبتلقى موظفين السفارة على يدك اليمين ماسكين اللوحة

والحمد لله على السلامة

اتمنى اني وضحت لك كل شي واس استفسار حاضرين