بخصوص الحاق الدارسين على حسابهم الخاص باستراليا

الالحاق متوقف بأستراليا والنظام يطبق فيه كـ ( أ ) .

للالتحاق بالبعثه باستراليا للبكالوريوس :-
30 ساعة جامعية + سنة لغة = رفع الملف للرياض

للالتحاق بالبعثه للماجستير : 9 ساعات جامعية فقط .

ولايعفيك من هذه الامور الا اثنان :- ( أمر ملكي ) أو ( واسطة والوسيط الله ) .

وانا اكتب لك هذا الرد عن تجربة ولم انل الابتعاث الا بأمر ملكي .... تحياتي لك ووفقك الله

جزاك الله خير على الرد
بس انا اقصد انا سفري ممكن على شهر ٤ والجامعات الموجدة في موقع الملحقية ومتاحة لمرحلة الماستر جامعتي موناش وملبورن وهيا جامعات قوية...
الفكرة اني هل اتوكل على الله -واجلس هنا او اني اسافر واجرب حظي؟؟

شوف ياخوي انا ماابغى اقلك لاتجي استراليا عشان البعثه مقفلة ويفسر ردي على إنه تحطيم ولكن انا بقلك لو انا محلك حطلع استراليا واجرب حظي منها اتعلم ومنها اعرف البلد بس يااخوي لازم تحط بعين الاعتبار التالي :-

- تكلفة المعيشة بأستراليا غالية ولكن السوق الاسترالية حره يعني فيه الرخيص وفيه الغالي بعكس السوق السعودي الي يرغمك انك تاخذ الشيء هذا غصبا ً عنه لأنه مافي منافس له وسعر الدولار الاسترالي متأرجح ومايثبت على سعر واحد ساعات يطلع 3.80 ريال مقابل الدولار الاسترالي وساعات ينزل الى 3.60 ريال وساعات يصير 3.75 ريال .

- الابتعاث ووضحت وضعه فيه ولكن لازم ثم لازم تفكر بالسؤال التالي " ماذا لو ماجاتني بعثه ؟ " لازم تحط لك ثلاث خيارات في حال الله ماوفقك بالابتعاث وانا مثلا ً لما كنت على حسابي فكرت بالسؤال هذا كثير الي انتهى بالنهاية رجوعي للسعودية ولكن المكرمة رجعتني للبلد ثاني .

-استراليا دولة بصراحة فرص العمل فيها متاحة للطلاب وحتى الخريجين الحديثين من الجامعات الاسترالية عندهم امكانية عمل لان الشباب الاسترالي كسلان والحكومة الاسترالية تصرف عليهم بالاسبوع 220 دولار وماعندهم الا حفلات وقيرل فريند و ركوب امواج ولفلفه وكل الكلام الي اقلك عليه شرحته لي مدرسه استرالية تدرسني بمعهد اللغة لذلك ممكن تشتغل اذا تحب وتجرب امور جديدة باستراليا وانا نفسي اشتغل باستراليا بعد مااتخرج ولكن لابد من الرجوع للوطن .... يعني الزبدة ياخوي فرص عمل حلوة باستراليا والاجانب ماخذين الغله .

النهاية يااخوي انا احييك على طموحك واقولك توكل على الله وجرب حظك بس لاتجهد نفسك بالتفكير او تتدين خلك على قد ماعندك واذا ماتسهلت اعمل الي انا قلت لك عليه واستراليا بلد حلوة وعجبتني صراحة وسمعت ان ملبورن مرره حلوة و محلاتها تفتح لليل زي جدة بعكس المدن الاسترالية الثانية زي قولد كوست الي انا فيها .

معليش طولت لك بكلامي بس حبيت اوضح لك البلد هذه وانا اتمنى لك ولكل اخواني الي على حسابهم انهم ينضموا للبعثه .

اي اسئلة عن استراليا اذاني مفتوحة ابوابها هههههه

تحياتي

يحيى .

جزاك الله خير اخوي على التوضيح
ارتحت والله .
أجل انا بأتوكل على الله واختار الجامعة والتخصص وفي خلال هالفترة باستخير وربي يكتب اللي فيه الخير
ومشكور أخوي يحيى مرة اخرى