انا وبابا والسفر..(قصتي+وما انحرم من رايكم)

السلام عليكم ورحمة الله وبركاته ...

اول شيء صباحكم خير وتفاؤل وكل شيء حلو..شخباركم ان شاء الله كلكم طيبين وبخير ..

مفروض القصص تنقال قبل النوم لكن بما ان اليوم النوم مجافيني قلت خليني اعلمكم قصتي .. انا اتخرجت قبل ست شهور من الجامعة تخصص فيزياء طبية بمعدل بالدف

المهم انا انسانه مالي مود محدد بس بصفه عامه طموحه الست شهور عدت علي مثل البرق فالهفتره دخلت المعهد البريطاني لان تخصصي لازم انجليزي تحدثا وكتابه وتقريبا اغلب

الشعب مثلي يفهم بس ما يقدر يتكلم الصراحه استفدت بس طبعا النسبه قليلة وبما ان البيئة المحيطه ما تساعد واجد قررت اغير الخطة ..،

، لحظة فاصل ،ههههههههههه تذكرت وحده بالمعهد الله يسعدها مصريه والانجليزي حقا مصري

تخيلوا تقول (وتس زس يا استازة) وما انتبهت علي حالي الا الكلمتين الانجليزي الي عندي صارت كلها تنتهي بالسين وبعد هالكارثه قلت مانيب رايحه المعهد هونت ..

وفهالفتره جبت قبول من الهند بسرعة البرق من غير لا اكلم احد عاد يوووووووووووووووووه انا والهنود قصة عشق لا تنتهي مثل دعاية الجالكسي احبهم هم وافلامهم حتي صرت امشي واهز راسي يمين ويسار ..

وذاك اليوم قررت اعطي اهلي خبر باللي سويته انتظرت اللحظه الحاسمه وخليت بابا يتغدي مضبوط عاد تعرفون الرجال اذا بطنه مو مليان الحواس كلها تتعطل .. رحت له و ضروسي من قوة التميلح بانت..عاد هو فهم ان

عندي خبعه جديدة (ملاحظة:خبعة بمعني مصيبة) وقالي اخلصي قلت بارك لي قبلوني ماستر طب نووي بس لازم اخلص اللغه قال مبروك وقالي بأي جامعة قلت له في بنقلور بس اسم الجامعة صعب

يا حياتي عليه حاول يستوعب ما قدر قالي هذه وين بالضبط قلت له ابد طال عمرك بالهند هههههههههههههههههههههه عاد ما يحتاج اعلمكم هو شرارة ما خلا شيء ما قاله مسح فيني سابع ارض

وانا الدموع اربع اربع وطلعت من عنده اشاهق واقوله مافي ديموقراطية بالبيت وراح اتزوج ومعد بجيكم وأظن ان فيه تفله لحقتني وانا نازلة ابكي والي الان ماني متأكدة منها ..

احلي شيء فينا ان انا وهو نتهاوش وبعد ثلاث ساعات بالكثير نتصالح المهم جاتني حالة نوم مو طبيعه مع الجو البارد يمكن تقريبا قعدت ثلاث اسابيع نايمه من غير مبالغه وشكله بابا حس بتأنيب الضمير

وشافني مره الصبح بالصدفة وفرح اني صاحيه وقال لي بوديني عند دكتور نفسي عاد انا انفجعت قلت له لا عادي ماله داعي .. عاد انا احب استغل الفرص قلت خليني اجلس صاحيه واتغدي مهم لي فتره ما اتغديت معهم

المهم اتغديت معهم و نويت اني اعيد كرة ذاك اليوم بس قلت خليني اغير الوجهه عسي ربي ييسرها وقد اني شفت اعلان شركة تتدرس لغة بره .. اخذت الجريده وحطيتها قدامه وقلت له اقري وكانت لامريكا تقريبا 3

شهور قلت له بس باخذ لغة واغير جو وارجع هونت ماني مكمله دراستي ما خلصت جملتي الا قال طيب الله يوفقك .. وقررت امريكا مدينة سيتايل واستخرت واجد الحمدلله .. بس سبحان الله ما ادري اشلون ربي رزقني

بولد حلال ساعدني وقال نشوف كندا لانه كان بكندا وانا صرت متردده خلق الله وبابا يقولون امريكا وهذا يقول كندا وجاني قبول اللغة في يوم واحد من كندا بكالجري ما شاء الله و الولد منصدم وصابته حالة ذهول <<

متعوب عليها هالجملة ..وتخيلواما ارسلت الضمان المالي حتي .. المهم رتبت كل شيء تقريبا

بس كنت في حيره شديدة بين كندا وامريكا وسويت بحث عن الاثنين لين قلت امين محد يمدح كندا بالقبول مع احترامي الشديد لها .. نجي في النقطه المهمه جدا

انا بروح لحالي اوكيه من شروط الالتحاق للبعثه في كندا صورة من فيزا المحرم وما خلو شيء ما طلبوه غير اتمام اللغه وقبول من الجامعة اما امريكا يا حليلهم كل الي طالبينه 3 او اربع شروط...

سؤالي هل ينفع اجيب قبول من جامعة امريكة واقدم علي البعثة لامريكا من كندا << امانه لاحد يضحك علي لاني ما اعرف

انا اخذت قبول للغة لمدة 5 شهور والصراحة مبيته النية اني اقعد ثلاث شهور واروح امريكا بس بابا الله يطول بعمره ويهديه ما عطاني غير 60 الف وقالي لا تتحلمين بغيرها ..

حاليا جهزت شهاداتي و اوراقي حاولت اقدم من النت بس ما عرفت وان شاء الله بروح الاسبوع الجاي اجيب شهادات توصية من عند الدكاتره واخذت نماذج من كذا جامعة ..المشكلة ما لقت غير كنديه

المهم انا ماشيه علي مشيئة الله واذا جاني القبول للبعثه خير وبركة واذا ما جاني انا سويت الي علي ومو زعلانة في كل الاحوال ..

الحين ايش رايكم هل انا ماشية صح او لا ومدي الحين شسوي ومعلييييييييييييييش طولت عليكم شوي ..

بالنهاية الله يسعدكم ويحقق مطالبكم ويوفقنا اجمعين .. قولوا امين

وتوتة توتة خلصت الحتوتة ..

ملاحظة : بابا قبل فترة طويلة جاه مرض الدرن والحمدلله ربي عفاه بس ظهره تأثر حيل وما يتحمل السفر وانا اكبر اخواني بس قلت لكم عشان لا تهاوشوني و شكرا