شرح شرح تجربتي مع الإتصال بالسعوديه من أمريكا

January 25th, 2012, 10:45 AM

السـلام عليكم ورحمة الله وبركاته

أتمنى لكم الإلحاق جميعا يامعشـر الدارسيـن على حسابهم الخاص. المهم مالكم بالطويله كتبت رد على أحد المواضيع كان سطرين وتطور صار صفحه تقريبا فحبيت أحطه بموضوع مستقل عشان نستفيد ونتبادل الخبرات.

هذي تجربتي مع الإتصال وإستقبال المكالمات من أمريكا إلى السعوديه والعكس. واللي يبي يشارك تجربته ليستفيد الجميع فالمجال مفتوح وجزاه الله خيـر.



أنا عندي رقم موبايلي شغال هنا بأمريكا. طبعا رصيد مب فاتوره بس الرقم معي من زمان ويستقبل مجانا.

حسب علمي أن موبايلي الفواتير تستقبل مجانا على شبكة تي موبيل. أما الرصيد فالقديمه منها تستقبل مجانا أما الجديده لا.

تبـون تعرفون إستقبال المكالمات مجانا ولا لا. أضغطوا * ثم 100 ثم # ثم إتصال. إذا طلع لكم نوع إشتراكك يسمح لك بإستخدام خدمة تجوالي في ... فهذا معناه رقمك يستقبل مجانا. إذا لايسمح معناته مايستقبل مجانا.

شركة الإتصالات السعوديه الظاهر المفوتر يستقبل مجانا على تي آند تي.

فيه برنامج زين لموبايلي. إسمه روم توك. هذا تحملونه على الكمبيوتر يشبه السكايب. وترسلون roamTalk على 1100 ويرسلون لكم إسم المستخدم والباسورد.

طبعا البرنامج يوفر إستقبال وإرسال المكالمات الصوتيه والرسائل النصيه فقط. ومايشتغل إلا خارج المملكه. والتكاليف تحسب عليك وكأنك تكلم من جوالك من داخل السعوديه. وإذا إتصلت على شخص ثاني عنده برنامج روم توك ورد عليك من نفس البرنامج تصير المكالمة مجانا. البرنامج غالبا صوته واضح بس نسخته الأخيره سيئه للأسف. اللي قبل أزين.

بالنسبه لتجربتي مع البطاقات اللي نشتريها من البقالات. زي بطاقات هلا ومرحبا في السعوديه بس هذي تقدرون تتصلون من الجوال. هالبطاقات فيه لعب بالأسعار فيها. يعني مثلا أكلم دقيقتين يخصمون حق ثلاث أو أربع دقايق.

فيه هالموقع توي بديت أستعمله من يومين لأني كنت أبي أكلم الوزاره وبرنامج روم توك عجزت أدخل رقم التحويله منه.

PPoutlet.com : calling cards, international calling card, prepaid calling cards, international calling cards, pin free calling, pinless dialing, pinless cards, smart phone cards, prepaid phone cards

طبعا الموقع تشترون منه بطاقات إتصال زي اللي بالبقاله عن طريق الكريديت كارد.

الموقع سجلت فيه وطلبوا مني رقم الفيزا حقتي وحطيته لأني كنت أبي أي طريقه أكلم الوزاره. وبمجرد فعلوا حسابي خصموا من فيزتي 20 دولار وأضافوها على رصيدي. يعني زي كأني شريت بطاقه.

طبعا كنت بس أبي بطاقه بـ 5 أو 10 دولار وراسلتهم واللي رد علي أتوقع أنه عربي لأن أسـلوبه للأسف سئ زي ماتعودنا من المسؤولين عندنا. لو أمريكي يكتب لك dear و Thank you ومن هالكلام الزين مب هذا اللي راد من غير نفس.

وكمان فيه عندهم لعب بالأسعار. طبعا تقدرون تشيكون من الموقع على إتصالاتكم وتكاليفها وأشياء أخرى بشرحها. وبنسخ لكم من حسابي عشان تفهمون كيف يلعبون بالأسعار.

إتصلت على جوال سعودي تقريبا أخذت أقل من 10 دقايق وحاسبينها علي 11 دقيقه. وسعر الدقيقه 12 سنت يعني المفروض يخصمون بس 1.32 بس لو 11 دقيقه. بس خاصمين مني 1.72 دولار.

هذا مثال واحد ولاحظت تلاعبهم بأكثر من مكالمه أخرى وإحسبي ياحسابه كم دولار أخذوه منك بالأخيـر.

مميزات الموقع /
لما تسجل يصير عندك رقم حساب( بن ) هذا يعتبر زي الرقم اللي نكشطه على البطاقات اللي نشتريها من البقاله.

تقدر تربط حسابك عالموقع مع رقم جوالك وتصير تكلم من جوالك بدون ماتدخل رقم البن حقك. وتقدرون تربطون أكثر من رقم. يعني اللي عنده رقمين يقدر يربطهم كلهم مع نفس البن.

تقدر تشوف العمليات اللي سويتها من شراء وتحويل وإستفسار وتقدر تشوف تفاصيل مكالماتك وتكاليفها.

خاصية الإتصال المباشر Direct Dial


طبعا تقدرون تضيفون أرقام كثيره في هذي القائمة. أنا ما أضفت إلا رقم واحد ( رقم أخوي عبدالله) زي ماتشوفون.
يعني مثلا لو بتصل على عبدالله أدق الرقم حق الشركه وإذا قال أدخل الرقم الذي تريد الإتصال به أضغط 1 ويتصل مباشره على عبدالله.

فيه أيضا خدمة تحويل الرصيد من بن إلى بن ثاني. وخدمة شحن البن وخدمات أخرى ولكن هذي الأهم.

الموقع خدماته حلوه جدا وأسعاره معقوله الدقيقه عالسعوديه تتراوح من 6 سنتات إلى 14 سنت. حسب الباقه اللي تستعملها وإذا تتصل على جوال أو ثابت وأي منطقه.
تقدرون تشوفون الأسعار من View Rates

بس ودكم أنهم يتركون عنهم السرق.

هذي تجربتي مع الإتصال بالسعوديه. أتمنى أكون أفدتكم وطــــــــــآبت أيامكم.

تحيــــــــــــــــآتي

• نشر عبر تويتر
• نشر عبر فيسبوك
• نشر عبر جوجل