الأعضاء الإشتراك و التسجيل

الملتقيات
ADs

تقرير شرح مفصل عن موعدي في السفارة 18/1/2012 الى وقت صدور الفيزا ( على حسابي )

تقرير شرح مفصل عن موعدي في السفارة 18/1/2012 الى وقت صدور الفيزا ( على حسابي )


NOTICE

تنبيه: هذا الموضوع قديم. تم طرحه قبل 4445 يوم مضى, قد يكون هناك ردود جديدة هي من سببت رفع الموضوع!

قائمة الأعضاء الموسومين في هذا الموضوع

  1. الصورة الرمزية yahya.ar
    yahya.ar

    مبتعث جديد New Member

    yahya.ar الولايات المتحدة الأمريكية

    yahya.ar , ذكر. مبتعث جديد New Member. من السعودية , مبتعث فى الولايات المتحدة الأمريكية , تخصصى ادارة عامة , بجامعة جامعة الملك خالد
    • جامعة الملك خالد
    • ادارة عامة
    • ذكر
    • أبها, non
    • السعودية
    • Sep 2011
    المزيدl

    January 26th, 2012, 08:03 PM

    السلام عليكم ورحمة الله وبركاته

    ما أخفيكم انو استفدت من هالموقع بعض المعلومات والبعض الاخر لا وكان كله كلام فاضي ومجرد تخويف الخ ...

    حبيت اني أفيد الجميع اللي كانوا مثل وضعي خايفين وشايلين هم قبل الموعد ,,

    كان موعدي في سفارة الرياض يوم الاربعاء بتاريخ 18 / 1 / 2012 الساعه 9 صباحاً ,,

    طبعاً اخترت الرياض لأني سمعت عن سهولة تعاملهم وما ادري عن المعلومه صحيحه بالنسبه للقنصليات اللي بجده او الظهران ,,

    طبعا مافيه ورقه الا وأخذتها وصورتها وبالنهايه طلعت ما احتاج اشياء كثير منها ..

    راح أقولكم الأوراق المطلوبه وجهزوها معاكم :

    1- ورقة الموعد

    2- الجواز

    3- ايصال سامبا

    4- ايصال السفيس

    5- الآي توني i-20

    6- شهادة بنكية

    7- كشف حساب 3 شهور

    هذي اللي ذكرتها المطلوبه والمهمه وأساساً ماطلبوني الا هالأشياء بس للاحتياط خذوا معاكم :

    1- الشهادة لجامعية أو الثانوية

    2- السجل الأكادمي للجامعه لو كنت تبي ماستر

    * لاتنسون تاخذون من كل شي صورة للاحتياط ,,

    والحين بشرح كل شي بالتفصيل :

    1- لا تنسون تصلون الفجر في جماعه عشان الله ييسر لكم أموركم واقروا الأذكار ,,

    2- توجهت للسفارة وسمعت انكم ماتدخلون الا بورقة الموعد أما أنا قابلت تفتيش ولا طلب مني لا ورقة ولا غيره دخلت على طول ,,

    موقع السفارة عند دوار رقم 9 على اليسار وتدخلون توقفون بالمواقف وتنزلون تمشون على رجولكم مسافة بسيطة ,,

    3- أول ماتوصلون راح تلقون قدامكم سرى موب كثير ولا تنسون تكون متواجدين قبل الموعد بربع ساعة أقل شيء ,, راح توقفون بالسرى وفيه قدامكم شباكين والمطلوب منكم تجهيزها عشان تعطون الموظفه اللي ورى الكشك الآتي :

    * الجواز
    * ايصال سامبا
    * ورقة الموعد


    4- ا راح تاخذ منكم الأوراق وتعطفها وتدخلها جوات بعض وتردها لكم ,,

    5- بتوقف عند الشباك الثاني وبيسألك عندك جوال وبتنتظر شوي وبيفتحلك باب تدخل منه تنزل أغراضك مفاتيح وجوالات ( من الافضل تتركون جوالاتكم بالبيت عشان تمشون بسرعه )

    6- بيفتح لك باب ثاني تطلع منه وتخرج بساحة وتمشون وتوجهوا لآخر الساحة باليسار فيه باب كبير تفتحونه وتدخلون ,,

    7- أول ماتدخلون بتلقون قدامكم كونتر فيه موظفه ,, وفيه على اليمين كراسي روحوا اجلسوا على اخر كرسي فاضي لأنكم راح تمشون بالترتيب على حسب الكراسي ,, يعني واحد يروح للموظفة هذي ويفضى كرسيه اللي بعده يجلس على كرسي هالشخص اللي قام ( طبعا الكلام ينطبق على الاولاد والبنات )

    8- لما يوصل دوركم بتطلب منكم هالموظفه الاوراق اللي عطتكم الموظفة عند الدخول بالاضافة الى :

    1- الاي توني i-20
    2- ايصال السفيس


    وبتسألكم دراسة على حسابك أو برنامج الملك عبدالله وأكيد بتقولوا على حسابكم الخاص ,,

    9- بتاخذ جوازكم وتحط عليه رقم وتضبط الاوراق مره ثانيه وتعطيكم رقم وتمشون من عندها ,,

    10- بتكون فيه غرفه ع اليمين تدخلون فيها وتنتظرون لين مايوصل رقمكم
    * نقطة هامة هالرقم خلوه معاكم احتفظوا فيه لين وقت المقابله ,,

    11 - لما يوصل دوركم فيه 3 كونترات شوفوا رقمكم على أي كونتر وروحوا عنده وراح تقابلكم موظفه وتطلب الاوراق اللي عطتكم من شوي الموظفه اللي قبل وبتقولكم حطوا أياديكم على جهاز عشان ياخذون بصماتكم ويطابقون شكلكم بالصوره اللي بالموعد ,, وفيه تعليمات لطريقة التبصيم على الشباك اللي بينكم وبين الموظفه ,,

    12- خلصتوا من هالشغلة بتطلعون والرقم وتاخذ الاوراق وترد لكم ورقة الموعد بس ,, وتتوجهون لخارج الغرفة وبتلقون موظف يقولكم اجلسوا انتظروا وراح تشوفوا ناس كثير ينتظرون ,,

    13- فيه واحد ينادي بالارقام ولو جا رقمك تقوم عنده وبيقولك توجه للكونتر الفلاني اللي رقمه كذاااا ,,

    14- لما توصلون للكونتر هنا وقت المقابلة ,, أنا قابلتني وحده بالكونتر رقم 13 وكانت مره كويسه وبشوشة وكانت اسألتها لي كالتالي :

    * عرفت عن نفسها وانها مساعدة القنصل وانها هنا لاجراء مقابلة شخصية معاي ,,
    * سألتني ( هل تريد ان اتحدث معك باللغة الانجليزية أو العربية ) واخترت العربية ,,
    * قالت قولي اسمك بالكامل ,,
    * هذي أول مرة تسافر أمريكا وقلت لها نعم ,,
    * قالت خلال الخمس سنوات الماضية ماسافرت أمريكا قلت لا وقالت ولا أي مكان خارج السعوديه قلت لا ,,
    * قالت وين بتروح تدرس أي ولاية قلت بكالفورنيا وقالت أي مدينة قلت ساندييغو ,,
    * قالت ليش اخترت هالمدينة بالذات قلت لأن ولد عمي كان يدرس هناك وقال ان المكان جيد والتعليم بالمعهد قوي ,,
    * قالت عندك شهادة بنكية قلت نعم والشهادة البنكية باسمي وحسابي وكان فيها 80000 الف ريال ,,
    * قالت عندك كشف حساب قلت نعم بس مو باسمي باسم الوالده وقالت مافيه مشكله وقرت كشف الحساب ,,
    * قالت وشي وظيفة أمك قلت معلمة وقرت قالت صح معلمه ,,
    * قالت لو خلصت اللغة راح تكمل جامعة قلت لها نعم ,,
    * رجعت كشف الحساب والشهادة البنكية وورقة الموعد وقالت تم قبول التأشيرة
    * واخر شي قالت شكرا جزيلاً وروح عند فديكس عبي بياناتك ,,


    13- خرجت من المقابلة ورحت لفديكس وعطاني ورقة بالانقلش وهو راح يقولكم وش الخانات اللي مفروض تعبونها ,,

    لو كنتوا بالرياض بياخذ عليكم 65 ريال وبرى الرياض 125 ريال تعطونه كاش ,,

    14- خلاص خلصنا وتطلعون من مكان مادخلتوا والحمدلله رب العالمين ,,

    أتمنى ان الشرح كان كافي ووافي وافادكم كثير ,,

    بالنسبه لي أنا كنت طالع على حسابي للدراسه بمعهد فقط وابي اكمل ماجستير بس مالقيت جامعه للحين ( اللي يقدر يوفر لي قبول مشروط أكون له شاكر )

    يعني الشهادة الجامعية والسجل الأكاديمي ماطلبته مني أبد ,,

    * أهم شي الثقه بالنفس والابتسامه وعدم الارتباك ,,

    بخصوص الفيزا وصلت يوم الأحد بمدينتي لأني خارج الرياض والا كانت موجوده بفديكس من يوم السبت ,,

    يعني الفيزا طلعت خلال يومين فقط لا غير ,, الحمدلله رب العالمين ,,


    دعواتكم لي بالتوفيق وان الله ييسرها علي وعلى كل الطلاب ,,
  2. ههههههههههههههههههههه ..
    يالغالي يازين سفارة جده سهاله بكثير ...
    اولا يعطيك العافيه على الموضوع
    ثاني انا .. قدمت الفيزا يوم 21-1-2012 طلعت يوم 23 والفيدكس يدقون علي يقول تعال استلمها .!
    تحياتي لك يالغالي سفارة جده مره سهاله ..
    7 "
ADs

قم بتسجيل دخولك للمنتدي او

الانضمام لمبتعث

Search Engine Optimization by vBSEO ©2011, Crawlability, Inc.