شرح كيفية الحصول على الكشف الطبـي من مدينة جدة

بسم الله الرحمن الرحيم

الله يوفق الجميع في الالتحاق بالبعثة

حابب اشرح لكم طريقة الحصول على الكشف الطبي في مدينة جدة، احكيها لكم عن تجربة حصلت لي ...

اول شي تطبع الابكليشن فورم من موقع الوزارة http://workflow.mohe.gov.sa/Workflow...tionReport.pdf


بعد ما تطبعه تجيب صورة شخصية لك 6 x 4

بعد كذا تبدا المهمه

اكتب اسمك بالانجليزي فوق زي ماهو مكتوب اسمك في الجواز ورقم الهوية ورقم الجواز حلو الكلام

بعدين تروح اول شي تكشف على الصدر في مستوصف اسمه الدرن في طريق مكة

عنوان مستوصف الدرن :

انتا جاي من طريق الحرمين : تعدي كبري فلسطين بعدين كبري الملك عبدالله وبعدين يجيك كبري حي الجامعة تطلع منه ، وتمشي على طول بتجيك اشارة وفيها دوار خذ معاها يسار يسير الجامعه بلازا على يمينك وتمشي على طول بيجيك دوار صغير وتمشي على طول معاه ، الين تجيك اشاره ياتروح يمين او يسار وقدامك في وجهك شركة عبداللطيف جميل تويوتا ، تروح يسار مع الاشارة وخش خدمات وامشي على طول بيجيك كبري خليك في الخدمات وامشي على طول وبتلاقي على يمينك بعد مسافه تمشيها في مبنى شركة كبيره بعدها تلاقي مبنى لونه وردي صغير على الشارع حتى مافي مواقف ، (( اذا ضعت اسال اي احد حولينك بتلاقيه مايضيع انشالله )) وبس

ابشركم المعاملة في مستوصف الدرن جدا سهله ومافي زحمة انا رحت لهم على الساعه 9 ونص وخلصو الكشف في ربع ساعه ماطولت وختم على الورقه انه كشف .


بعد ماخلصنا من الدرن تروح على مستوصف اسمه مدائن الفهد قريب من الدرن ...

عنوان مستوصف مدائن الفهد :

انتا جاي من طريق الحرمين : تعدي كبري فلسطين بعدين كبري الملك عبدالله وبعدين يجيك كبري حي الجامعة تطلع منه ، وتمشي على طول بتجيك اشارة وفيها دوار خذ معاها يسار يسير الجامعه بلازا على يمينك وتمشي على طول بيجيك دوار صغير وتمشي على طول معاه ، الين تجيك اشاره ياتروح يمين او يسار وقدامك في وجهك شركة عبداللطيف جميل تويوتا ، تروح يسار مع الاشارة اول دخلة بعد تويوتا ضيقة خش منها يمين ، وامشي مساافه وتقطع اكثر من تقاطع الين يجيك على يمينك الدفاع المدني بعده خش يمين وبتلاقي المستوصف وفي برحة كبيره جمبه ملعب انصحك توقف فيها وتمشي ،

ايضا الحمدلله المعامله في مستوصف مدائن الفهد كانت اكثر من سهله مافي زحمة ولا شي وصلت المستوصف على 10 تقريبا خرجت 10 ونص ! الصبح الحمدلله كان الموضوع جدا سهاله ، والصوره يدبسها لك مستوصف الدرن الموظف ، وبعدين يختمون على الورقة اختاام كثيره الين تروح لي مدير المركز ويختم الختم النهائي و على الصوره حقتك يعطيها ختم كمان ...

وانتا كذا انتهيت من الكشف الطبي والف الف الف مبروك وعقبال البعثة

حاولو تروحو بدري افضل لكم، ولا خدو صوره من الهوية احتياط حطوها في جيبكم احتياااط

اتمنى يكون شرحي واضح ، واي سوال انا حاضر ...

ونسال الله ان يوفق الجميع جزاكم الله الف خير وعقبال البعثة للجميع قولو امين
اخوكم ايمن