استفسار سؤال مهم جدا لجميع الدارسين على حسبهم الخاص

اولا احب اهنيك على طموحك ورغبتك في اكمال دراستك
ثانيا لما تقدم على موافقة على الدراسة على الحساب الخاص ماراح يدققون هل انت موظف اولا وراح يفتحون لك حساب طالب في الملحقية
لكن لما تقدم طلب الحاق بعد اربع اشهر ويوصل طلب الحاقك للوزارة راح ترفضه اللجنة لانك موظف على رأس العمل وراح يطلبون منك اجازة لمدة خمس سنوات لو كنت تبي تدرس بكارليوس او اجازة ثلاث سنوات اذا تبي تدرس ماجستير وراح يرفضون اي اجازة اقل من المدة هذه حتى لو كانت اجازتك دراسية
بالنسبة لاستقالتك ورجوعك للسعودية تراها مو ضرورية مرة تقدر تقدم استقالتك وانت هنا سواءا بتصديق الاستقالة من الملحقية او السفارة او انك تكتب خطاب الاستقالة من الان قبل ذهابك لامريكا وتوقعه وتخليه مع احد من اقربائك الى بعد شهر ثم تخليهم يقدمون الخطاب بالنيابة عنك لرئيسك المباشر
مع العلم انه من الافضل انك تبلغ رئيسك المباشر من الان انك تبي تقدم استقالة وتتفاهم معه لان اهم شيء هي موافقة رئيسك المباشر ويقدر يوافق على استقالتك بدون حضورك والاستقالة تكون مقبولة وسو وكالة عامة لاي احد تعرفه بتقديم الاستقالة ومراجعة الدوائر الحكومية حتى يعدل مهنتك
مع العلم اني سمعت انك لو رجعت للسعودية راح يصفرون لك العداد وتبدا الاربع اشهر من جديد وايضا الاميقريشن بامريكا يمنعون انك ترجع للسعودية في اول تسع اشهر الا للضرورة القصوى
الكلام الي فوق كله عن تجربة واتمنى لك التوفيق وقرارك بتاجيل الاستقالة بعد الوصول لامريكا قرار صائب لان الانسان مايدري وش راح يواجهه وممكن يرفضون دخولك لاي سبب كان لكن بعد ماتوصل وتستقر هنا وتتاقلم مع الوضع قدم استقالتك واسال الله لك التوفيق
اما بالنسبة لقضية رجوعك للسعودية فهي مكلفة ومانت بحاجة لها

انا عندي سؤال
اذا كنت بدرس ع حسابي وزوجي مرافق لي يعني خمس شهور للغه
ايش الاجازه والعذر الي يقدمه زوجي وكم الاجازه الي تكون خارجيه براتب
وهل اربع اشهر بدون راتب يعطونها ولايرفضون

اذا كانت خدمة زوجك فوق 3 سنوات يجيب قبول جامعة ويقدمها لجهة عملة وياخذ اجازة دراسية
الحل الاخر هو انك تطلعين مع زوجك بالبداية كلكم على حساب انفسكم اربع شهور وبعد الانضمام زوجك ياخذ اجازة استثنائية مرافقة وهناك امر ملكي باعطاء المرافق اجازة استثنائية تصل الى عشر سنوات ولكن هذا بشرط انك انتي ماتكوني موظفة او تكون معك اجازة دراسية لانهم ماراح يضمونك اصلا بدون هذه الشروط
لكن يجب عليك الحذر ان الملحقية ماراح تضم اي شخص فيكم لو كان موظف ومامعه اجازة دراسية
اقصد يجب ان يكون احدكم غير موظف او معه اجازة دراسية حتى ينضم ويصير الاخر مرافق
وتمنياتي لكم بالتوفيق

بس الي اعرفه حاليا موقف القرار بالاجازه الاستثنائيه الي هي اربع سنوات
انا ابي منها خمس شهور بس فماعرف ايش العذر
مره قريت رد عسكري انه لكل شخص شهر اجازه وخمس اشهر بدون راتب في السنه
صحيح هالكلام ؟
جزاك الله خير
واعتذر لصاحب الموضوع

اخي العزيز انا عندي نفس فكرتك واود اني اكمل دراستي في كندا

وما ابي اتسرع بالفصل لكن استفساري عن الفيزا

هل من الممكن يعطوني الفيزا وانا ما عدلت المهنه؟

اتمنى اتواصل معك او احد الاخوان يفيدنا اذا عنده معلومه

ولكم جزيل الشكر يا اخوان.

الفيزا مالها دخل بالمهنة

الله يعطيك الف عافيه

لاني متردد لاني عسكري وممكن اخذ اجازه استثنائيه

بس اخاف يطلبوا خطاب من العمل يسمح بالدراسه

وبرضه شغلة العوده لرفع مباشره بعد نهاية الاجازه ثم الاستقاله امر مكلف فعلا

وهل يحق للعسكري السفر خارج المملكه اثناء الاجازه الاستثنائيه

ومحتار هل ابدأ باجازه استثنائيه ام الاستقاله

امور كثيره تحتاج الكثير والكثير من التفكييييير

السلام عليكم


يا شباب الله يهديكم كل واحد يعطي من راسه شي ، وانتوا ما تفقهون شي ، اذا سألك الواحد سؤال زي كيذا فيه شي اسمه شروط ،

ارجع لشروط الدارس على حسابه الخاص ، مكتوب الا يكون موظف حكومي ، واذا كان لازم يكون لديه اجازة رسميه او يكون معه توصيه من رئيسه ، بس انا مستغرب منك يالعسكري الله يهديك

انت تعرف نظام العسكريه ، ما تروحون برا الا اذا كان فيه دورة من الدوام عندكم او حالات خاصه مثل واحد هله تعبانين ،

الحين يومك تبي تروح امريكا ، بسألك سؤال ، هل تقدر تروح البحرين من قريب دوله خليجيه تعتبر الباب فالباب ، ما تقدر ؟! قول ليه ، لأن الجمارك السعوديه ما تخليك تروح لو تطير وتنزل
فتتوقع انك اذا طلعت فيزا امريكيه خلاص بتطلع ؟! لا ما راح تطلع ، لأن الجمارك اللي في المطار ما يخلونك >~ كل شي يطلع لهم

لذا ، يَ اخي العزيز الله يعطيك العافيه ، لا تتهور وتجيب العيد وتجلس عطالي بطالي ، اذا انت صامل ادخل الشروط على موقع الوزارة وشوف تتوافق معك او لا ؟

اذا توافقت معك ابدأ في تخليص اجراءات القبول لأنها تتأخر ، واذا جاك القبول قدم فصل وقدم على فيزا

وخلص امورك ، اهم شي لا تتطلع الا بعد تعديل المهنه الى متسبب من الاحوال المدنيه ،

رأيي لك ، انا ما اجبرك ~> مجرب

تحيـــــآتي ، والله يوفقك