في كلمات ماني فاهم معناها ومتضايق منها !!

وعليكم السلام ورحمة الله وبركاته ..
طيب ياغالي هدي أعصابك .. الامور ان شاء الله كلها بسيطه ..
راح احاول اجاوبك باللي اقدر عليه وإن شاء الله تكون الاجابات واضحه ..

اول شي القبول المشروط ..

القبول المشروط ياغالي معناته أن الجامعه قبلتك .. ولكن تحت شرط اللغه !
يعني ماتدرس بالجامعه على طول .. لا ... الجامعه تدخلك معهد خاص ويسمونه معهد ESL ... تدرس فيه فتره .. ولما تنتهي منه وتجيب لهم الدرجات المطلوبه .. حولوك على الجامعه .. وتصير طالب جامعي !
طبعا الـ ESL اختصار لكمة English as Secondary Language ( بالعربي : الانجليزية كلغة ثانية )

وسهل على الواحد انه يجيب القبول المشروط .. واذا اخذته خلاص مايحتاج تجيب قبول ثاني .. لان مثل ماقلت لك تعتبر انت بالجامعه .. بس لازم تخلص عندهم اللغه لانهم شارطين عليك انك تخلصها حتى تكمل في جامعتهم ..

اما الملحقيه .. فهي فرع وزارة التعليم العالي داخل امريكا !
واللي عن طريقها راح يتم الحاقك للبعثه وراح يكون تعاملك معهم مباشر في بلد الدراسه ..!

طبعا مسألة التقديم بسيطه ..
انت اذا درست في المعهد .. تنتظر اربع شهور .. وبعدها ترفع طلبك للملحقيه .. وهم يضمونك للبعثه ..
اذا ضموك للبعثه .. خلاص يصدر لك ضمان مالي واللي عن طريقه راح تتحول تكاليف دراستك على حساب الحكومه ..!
يعني ماراح تدفع ولا شي للمعهد بعد ماتنضم للبعثه .. والدوله راح تتكفل بتكاليف دراستك !
وراح تنزل لك مكافأه شهريه (راتب) من الملحقيه (الحكومه) على حسابك في البنك .. نفس نظام الطالب الجامعي بالسعوديه !
بس الفرق بيكون العملة بالدولار .. لانك في امريكا ماراح تتعامل بالريال .. راح تتعامل بالدولار !


اما الـ 120 الف ريال .. هذي باذن الله راح تكفيك في دراستك بمعهد اللغه حتى تنضم للبعثه ..
لان تكاليف المعهد ماهي غاليه .. وتختلف التكاليف من معهد لاخر .. فيه معاهد يكلف 20 الف ريال للفصل الواحد ..
وبعضهم يكلف 40 الف ريال للفصل الواحد ..
وانت ماتحتاج الا حق ثلاث فصول ... لان كل فصل بتكون مدته 4 شهور ..
فأنت تكون مضبط وضعك اساسا على ثلاث فصول .. علشان تكمل اول اربع شهور .. وتطلب الحاق بالبعثه عند الملحقيه ..
يصير ماتخلص الفصل الثاني ان شاء الله الا انت مقبول بالبعثه وتتحول المصاريف كلها على الملحقيه ..
وحتى لو تأخروا عليك للفصل الثالث .. الا انت مضبط وضعك من البدايه وحاسب حساب التأخير هذا !

اما متى تاخذ القبول .. فمتى ما قدمت انت على الجامعات او المعاهد واعطيتهم الاوراق اللي يطلبونها منك .. وقبلوها وكل شي جا مثل مايبون .. ارسلولك القبول .. واذا جاك القبول خلاص تروح تسنع الفيزا وتخلص امورك فيها .. واذا الفيزا خلصت .. خلاص تروح تسنع امور سفرتك !
واذا جيت للجامعه ماراح يطلبون منك شي خلاص لان كل اللي يبونه اخذوه منك .. فورقة القبول تكفي !
والوضع بيكون عادي .. يعني تجي تدرس على طول .. مافيه اي متطلبات ثانيه !

اتمنى اني وضحت لك ياغالي النقاط اللي تسائلت فيها ..

الاخ على ما اعتقد ما بقى شي الا قاله و وضحه الله يوفقنا واياه

بس نصيحة لك اخوي اذا انت تضايقت من انك ما قدرت تعرف معلومة بسيطة جداً يعلمك عنها العم ( قوقل ) صدقني اذا وصلت بالسلامة لامريكا وبدأت الحصه والناس كلها تحكي انجليزي وانت ما عندك ولا حرف راح تتعب وتتضايق كثير
علشان كذا وانا اخوك لازم تكون صبور ، المعلومه ما تجي بالساهل لازم تبحث وتسأل وتتعب وان شاء الله ما بعد التعب الا راحه

الله ييسر امري وامرك وكل مسلم

يااااااارجال لله درك انا قريت ردك قبل لاآصلي القيام قريت ردك بالجوال وبعد ماقريت ردك رحت صليت ودعيت لك دعوااااااااات يحبها قلبك وان شاء الله يتقبلها ربي دعيتلك مثل مادعيت لي
والله انك ريحتني ياعسى ربي يريحك , انا لي اسابيع اقرا واقرا وتعقدت من هالمصطلحات اللي ماني عارف وش معناها ( ملحقية يعني حكومه ) !!!!!
مشروط يعني مقبول بس لازم تجيب المعدل المطلوب وبعدين تصير طالب جامعي ) !!!! يعني ماكنت عارف وش معناها وانت الله يجزاك خير علمتني كل شي وحتى علمتني حاجات انا كنت بسئلك اياها
الله يدخلك الجنة بدون حساب ولا سابقة عقاب قل آمين.... وجميع المسلمين والمسلمات ,
واسف اتعبتك معي ويعطيك الف عافية ياابعد روحي ..

امين ان شاء الله

بس انا ماتضايقت بسبب قلة صبري لاوالله بس يارجال مصطلحات اول مرة اسمع فيها وطلعت سهـــــــلة بس هم ماوضحوها لنا .. ماوضحها الا الآخ الله يعطيه العافيه
واااااااااااااااامين الله ييسر امور المسلمين عامة ياعيوني

الله يتقبل منك .. والله يجزاك خير على هالدعوه .. وهذي تكفيني فديتك ..

عسا الله ييسر لك امورك وويسهل لك دربك ويحقق لك ماتمنيت ..

تقبل الله صيامكم وقيامكم ..