اخر اخبار اوامر الاركاب والالحاق بالبعثة ( مفيد للدارسين على حسابهم الخاص)

August 12th, 2008, 03:28 PM

بسم الله الرحمن الرحيم
السلام عليكم ورحمة الله وبركاته

__ من فضلك اقرأ(ي) الموضوع كاملا صدقني ستجد(ين) مايفيدك وعلى فكرة إذا منت(ي) فاضي(ة) تقرا(ين) القصة المشوقة والطوووووووويلة انزل للاسفل ستجد ملاحظات قد تفيدك

اولا / اليوم بفضل الله اصدرت لي التذاكر من عند الدكتور علي العطية الله يجزاه عني كل خير(صدقوني مادام هذا الرجل في منصبه فأمور الابتعاث على خير مايرام)

طبعا قصتي كالتالي/
ذهبت اليوم في الصباح الباكر انا وولد عمي لمبنى الوزارة اللي في الناصرية الساعة 7,5 صباحا , وحنا مفطرين ومجهزين نفسنا لجميع الاحتمالات السيئة والجيدة لكي لاننصدم (وبصراحة حطيت في بالي أن قدامي 100 واحد وكلهم نفس موضوعي وحطيت في بالي ان موضوع التذاكر يبغى له اقل شي ثلاث ايام الى ان تتضح الرؤية
طبعا اول ماوصلنا تلقينا الصدمة الاولى_ قال لنا السكيورتي ترى العطية له اسبوع ماداوم_
قلت في نفسي عاااااااااااااااااادي ولا كأني سمعت شي , وجلسنا انا وولد عمي ومعنا ثلاث اشخاص فقط إلى ان جاء الموظف وبدا يوزع علينا ارقام ولمن جاء يعطيني الرقم سألني قال/ وش موضوعكم , قلت له ابد حنا نبغى اوامر إركاب, طبعا تلقينا الصدمة الثانية طالع فيني بدهشة وإستغراب وقال من قال لكم إن فيه اوامر إركاب للطلاب اللي يدرسون على حسابهم الخااص؟
يمكن كل واحد فيكم يسأل ويقول ذا وش تخصصه؟ ووش قلعته ؟ ووش يبي يدرس وكيف اوراقه؟
واجاوبكم واقول
انا أبي اكمل ماستر
وتخصصي المبدئي كمبيوتر ساينس
والدولة بريطانيا
وعندي قبول من معهد وجامعة وعندي فيزا توي مطلعها مالها يوم واحد وطالع على حسابي إلى ان اتحول على حساب البعثة بأذن الله زي اخواننا اللي سبقونا

المهم نرجع للموضوع بعد الاستطرادة السريعة, قلت للرجال انا جاي ومتوكل على الله وجاي اسوي الاسباب واطلب تذاكر قال اوكي بس ترى ماودي لك باللطعة الى الظهر وبعدين مابتاخذ لاحق ولاباطل ... قلت عااااااااااااااااادي اصلا ماوراي شي خخخخخ

بعد كذا اعطاني الرقم وبدأ الطلاب يتوافدون الى أن امتلت الكراسي وبدأ ينادي بالارقام الى ان جاء رقمي وادخل عنده وشاف اوراقي وقالي الموظف وش ذي الجامعة ؟؟ انت متأكد انها معتمدة؟؟؟؟
قلت ايه معتمدة والامور تمام المهم اقابل الدكتور قال خلاص انتظر لين يجي الدكتور , طبعا ولد عمي نفس وضعي ومن شان كذا حط اوراقنا مع بعض
وانتظرنا لين جاء الدكتور حدود الساعة 10 طبعا اكيد صباحا خخخخ
وبدا السكرتير الاسمر ينادي عالاسامي وطلع اسمي ثاني اسم , وأني أفز وانطلق وادخل عنده ومعي اوراقي واوراق ولد عمي واشرح له الموضوع وعلى طووووووووول كتب (عناية ناصر الفوزان مدير عام الابتعاث ووقع )وبعدها طلعت وانا مدري وش السالفة قلت اكيد التذاكر بجيبي الحين طبعا على نياتي واقابل السكيورتي برا وشاف الورقة وقال يالله رح لمبنى الغدير وتحصل الشخص المطلووب .
وبالفعل ماصدقت خبر واروح إلى المبنى حق الغدير ونقابل الصدمة الثالثة_ الرجال طلع في إجازة_ وقلت عااااااااااااااادي شوف لي النائب حقه واروح له واشرح له الوضع طبعا الرجال محترم ومتفهم لابعد جد ولكن وجه لي الصدمة الرابعة_قال الدكتور كان يصرف تذاكر لكن خلاص وقفها_ والله ياناس كثر الدق يفك اللحام مايصير كل شوي اقول عاادي هاذي المرة شغلت موتري وقلت كويس مبنى الغدير قريب من بيتنا (خلاص فقدت الامل ).
بس قال لي ولد عمي ارجع للدكتور العطيه وخل نجرب حظنا من جديد , وصرف لي امثال من طقة
1) فاز باللذة الجسور
2)صاحب الحاجات من قاسها
3)لولا المشقة لساد الناس كلهم
المهم اني انسان اقدر الامثال لانها تجارب السابقين وحكمتهم .
أدري انواع الخروج عن الموضوع لكن نعود لموضوعنا
رجعنا المبنى على صلاة الظهر وصلينا الظهر وانتظرنا تحت في المكتب حق الاستقبال
(طبعا استغليت هذه الفترة في بناء شبكة علاقات واسعة ومن اهمها السكيورتي اللي عند الباب اللي نشبت له لين قال اول مايجي الدكتور تعال عندي وادخلك مباشرة وبالفعل ماقصر الله يوفقه)

وشوي وجاء الدكتور وادخل له واشرح له الموضوع كامل مرة ثانية ( بس هاذي المرة رررايق ) وعلى طول كتب لي في ورقة صفرا عناية الاستاذ عبدالله.. بعدها مدري وش اسمه وكتب فيها اسمي واسم واسم ولد عمي وعلى طول اطلع من عنده واروح للمكتب حق التذاكر ووقالوا وين تبي بس اامر تتدلل واعطيتهم الوجهات وقال بكرة تجي زي الوقت ذا وتحصل تذاكركم جاهزة

ملاحظات مهمة جدا
1) الدكتور علي العطية بصراحة كومة عسل اصلي جالس عالمكتب يضحك مع الكل وتخيلوا جاء قدامي خمسة وكلهم مارد احد منهم طبعا الكلام ذا بعد الظهر
2) إذا جيت الصباح وشفت فيه زحمة لاتنصدم وتقبل الوضع بكل بروودة وثق انك بتقابل العطية بأذن الله
3)طبعا نقطة مهمة جدا وحطوها حلقة في اذنكم قال لي الدكتور بعظمة لسانه سافر وافتح لك ملف وخلال اسبوعين الى شهر بالكثير وانت ملتحق بالبعثة ونرد لك كل اللي دفعته ولاتشيل هم ابد ونفس الكلام اللي قاله العطيه قاله المدير المساعد حق الابتعاث قدامي اليوم( قال البكالوريوس يلحقون بالبعثة مباشررررررررة بدون ثلاثين ساعة اهم شي يروحون امريكا او كندا فقط والماجستير يلحقوون بالبعثة مباشرة اهم شي يفتحوون ملف)
4) شف لك اي شايب يجي معاااك ترى على طول تمشي امورك زي الللوز وكل مازاد عمر الشايب تمشي امورك بسرعة
5) والله اعطى واحد قدامي خطاب سفارة يعني رح وجرب حظك المهم اثبت له انك جاد في الدراسة
6) اترك وراء ظهرك كل الامور المحبطة وتوكل على الله وحده( ومن يتوكل على الله فهو حسبه)
طبعا موضوعي هذا تم في يوم واحد من 7 الصباح الى 1 الظهر ولله الحمد

اسف جدا عالاطالة لكن حبيت افيدكم مثل مااستفدت منكم جميعا وخصوصا مواضيع اخوي عاسف الغيد

وتقبلوا تحياتي ( اكيد اي استفسار انا في الخدمة )

• نشر عبر تويتر
• نشر عبر فيسبوك
• نشر عبر جوجل