كم احتاج من رصيد مقدما للسفر ؟؟

اولا اختي بالتوفيق ان شا الله
ثانيا ما دام انك بامريكا وحقية تمنيت لو اعرف هل انتي على حسابك الخاص او لا
بالنسبه لمبلغ السفر المتوقع فلله الحمد انا مع تواصل ويا الاخوان اللي بنفس المدينه والجامعه وسالتهم عن المبلغ المطلوب ؟؟
قالوا حوالي 2500دولار ومن الافضل ان تكون شيكات سياحيه ويكون معك بجيبك من 50الي 200 دولار ويفضل ماستر كارد تكون معك وهو باختيارك وللمعلوميه فان الملحقيه تعطيك مكافأة شهر لما توصلين لكن خلي في بالك انك بتنتظرين حوالي الشهرين حتى تنزل المكافاه الثانيه وهذا في حالة انك عن طريق برنامج خادم اتلحرمين

الله يعافيك أخوي مبتعث على الرد والإهتمام والله يوفقنا وإياك ..
من ردك اتضح لي انه يلزمني ذكر بعض النقاط عشان توصل الصورة ..
أولا انا بالسعودية .. وافكر أن اخوي هو اللي يبتعث مو أنا على حسابنا الخاص وبعد كذا نلحقه بالبعثة ..
النقطة الثانية اللي عرفته ان لازم يكون برصيدك 120 ألف مثلا عشان تقدر تفكر بالإبتعاث
هل هذا صحيح ؟؟
وهل تشمل هالدراهم اللي فوق مصاريف اللغة + الجامعة مقدما ؟؟


وبالنسبة لتوضيحك للمبلغ اللي نحتاجه اثناء السفر فتشكر عليه نقطة مهمه لازم احطها في بالي .

لالالالا ليش هالمبلغ هذا كله وبعدين ليش الجامعه ترى الابتعاث ماوقف

الله يوفقك أختي لما تريدينه واوصلكم لمساعيكم
اخواني طلاب امريكا الحين ماهي متطلبات القبول في جامعات امريكا ؟؟

صح أخوي المبلغ كبير وعلشان كذا أسأل ..
ليش الجامعة ؟؟ مافهمت بالضبط بس اتوقع انك تقصد ليش هالجامعة بالذات اللي بأكلوهوما ..<انا الى هالحين مادري الجامعة اللي هناك كم تحتاج برضو بس أسأل ..

ترى الإبتعاث ماوقف <<< برضو هنا مافهمت وش قصدك ياليت توضح اخوي

في النهاية عشان افكر التحق بالبعثة مثل باقي الخلق كم نحتاج ؟؟ << يقال فسرت ألحين


تشكرااااات ألف مرة للجميع

واياك أخوي ..
اتمنى هالموضوع يفيدك http://www.mbt3th.us/vb/forum14/thread33000.html
واي استفسار انا متأكدة ان الأخوان هنا مايقصرون ..

بسم الله الرحمن الرحيم

المبلغ يعتمد على المعهد أو الجامعة , يعني كل معهد لع سعره الخاص ولكن الأغلب (وحسب حوستي في جامعات أمريكا بالنت) يتراوحون بين 2000 - 4000 دولار للسمستر الواحد .

المعلومات هذي كلها تلاقيها في نفس موقع الجامعة ومايحتاج تدوخي راسك وتنتظري إجابة من أي أحد ... ماعليك إلا انك تروحي لموقع الجامعة ثمن

ESL Program
Undergraduate Programs
International Students
Applications & Fees

دوري على إحدى الكلمات هذي في الموقع وراح تشوفي المعلومات الي تحتاجيها إن شاء الله



إذا تواصلتي مع الجامعة وخلصتي أمورك معهم راح يرسلون لك طرد فيه ظرف يبين لك مصروف الجامعة أو المعهد وكم من المتوقع إنك تصرفه خلال إقامتك في المدينة , أكل , سكن , مواصلات .. يعطيك توقعات عن المبلغ الإجمالي خلال مدرة الدراسة (سواء سمستر أو سنة)

وهم هذي المعلومات تقدري تلاقيها في موقع الجامعة




أنا عانيت كثير في البداية وتعبت وأنا أسأل كل واحد يقولي شي وينصحني شي , في الأخير اعتمدت على الانترنت وبحثت وتخاطبت مع الجامعة لين أرسلو لي القبول من غير أي مساعدة من أحد .


ومضة:
إذا عندك أحد يجيد الإنجليزية , خليه يساعدك في الحصول على المعلومات , تراها سهله مررة وكل شي مبين في الموقع من طق طق إلى السلام عليكم. وإذا ماعندك عطيني اسم الجامعة أو موقعها وأنا إن شالله أطلع لك المعلومات الي يحتاجها اخوك




لا تنسونا من صالح دعائكم

مرحبا أخوي 7Keem

وضحت لي كثير من الأمور الله يعافيك ويكثر من أمثالك ..
يعني أراسل الجامعة واعرف المبلغ المطلوب بدون أي اعتبارات ثانية مثل الضمان المالي والسفارة والإفتراضات المالية اللي اسمعها من الأخوان هنا اللبس عندي .. ؟؟؟
ادري اني كذا في الشرح وربما الموضوع بسيط بس ماعرف اوصل له
أو ما أعرف أبدا من وين بالضبط ...سالفة المادية شاغلتني و ماودي الفرصة تروح لأسباب الجهل بالشيء فقط ..
براسل الجامعة وأشوف وارجع اخبركم <<< نشبة
كيف افترضت اني مااجيدها بحاول وان شاء الله ما احوس مثلك

الله يجزاك ألف خير ..

السلام عليكم

اختي , انتي أول شي تسوينه قبل ماتراسلي الجامعة انك تدخلي موقعهم وتقرين شروطهم ووش متطلباتهم ووش مصاريفهم ووش برنامجهم الأكاديمي ومتى موعد فتح باب التسجيل وبدء الدراسة .... أول شي تقرين ثم تقرين ثم تقرين

لأنهم مايحبون يجاوبون على أسئلة اهي موجودة أساسا في الموقع والأرجع إن لو سألتيهم راح يعطونك الرابط ويقولون لك اقري هنا

بالنسبة للمبلغ زي ماقلت لك , بدون ماتراسلي الجامعة تقدري تعرفينه من الموقع وإذا عزمتي على الجامعة (أقصد اخوك) ابدأي راسليهم
أما موضوع السفارة فهذا موضوع مستقل , تقدري تبدين فيه إذا وصلتي لمرحلة التأكد من إن الجامعة بترسل لك القبول




نصيحة: خلي اخوك يبعد عن الجامعات الي فيها تكدس سعودي , وإذا كان ناوي يدرس هندسة يقدر يستفيد من الروابط الي تحت .. احرص على ان الجامعة ماتكون أي كلام .. على الأقل من بين أفضل 150 جامعة في أمريكا

رابط لترتيب الجامعات (تخصص الهندسة)
Best Colleges - Education - US News and World Report

هنا رابط لترتيب الجامعات لكن الطلاب هم من قاموا بالتصويت ,,, فيه وجهات نظر ويدوخ الراس لكنه مهم
StudentsReview College Rankings: Top 50 Engineering Schools and Colleges


بالتوفيق لنا ولكم