استفسار إستفسار هام جدا

الفيزا تبع ألمانيا هيا فيزا شنجن وتقدر تدخل بيها البلاد الأوروبية ما عدا بريطانيا أكيد لا وسويسرا أعتقد.
أخوي ليش ما يجيك قبول؟ وايش قصدك بسين وجيم؟

أهلين ياخوي فيه واحد من الشباب طالع لبولندا وعطوه فيزا بولندية مش شنغن وقال ما يقدر يسافر برا بولندا ؟؟

علشان كذا سألت مع العلم إن بولندا منظم للإتحاد الأوربي من 2004 ؟ السؤال لو طلعت لبولندا أقدر أطلع فيزا شنغن ؟

وبالنسبة للماجستير عندنا هنا بالسعودية اللي يقدمون عالماجستير عيون مثلا يسوون لهم إختبار الهيئة الصحية إذا عديته تخش مقابلة شخصية اذا عديت يختبرون كل الناجحين من المتقدمين إختبار وآخر شي يمنحوا 10 طلاب و3 طالبات على مستوى المملكة

فا هذا الشي مخوفني أخاف أقعد طبيب مقيم طول عمري

والله ما أدري كيف عن وضع بولندا ولكن على كل حال يمكن يعطوا هما تأشيره مؤقته لمدة ثلاثه شهور والتأشيره هذي تكون لها بنود معينه الين ما تقيم وتأخذ تأشير طالب مقيم. وفعلا حسب ما أذكر حصل انه حتى هنا في المانيا بعض الشباب ما كانوا يقدروا يسافروا باول فيزا أخذناها ولاحظ بعضهم كان عندهم تأشيره تانية وكانوا يقدروا يسافروا ما أدري والله كيف اللخبطه هذي، الين ما أقمنا هنا وجددناها وأنحلت المشكلة. الكلام هذا قبل 4 سنين عشان كدا ما أذكر التفاصيل.

الصراحة ما عندي فكره عن التقديم لطب العيون وما أعرف أحد ممكن يفيدك. أتمنى أحد من الأخوان يتجاوب معاك.

بالتوفيق

مشكور وما قصرت وفالك التوفيق إن شاء الله

يعني من آخر إذا انحدينا على فيزتهم اللي محكورة على الدولة !! أقدر اطلع أنا وشايبي وننقز للقنصلية ويكفلني ويطلعلي فيزا شنغن ؟

يعني تكون معي فيزتين ؟ يصلح كذا ؟ فيزا لبولندا وفيزا شنغن ؟

وكم أقصى مدة لها ؟ ما أبغى أنحشر في بولندا أبغى أعيش جو الدراسة صح كرررف بعدين ألف أوربا لف

ياهلا أخوي حياك الله
المفروض انه ممكن. الأفضل انك تسال نفس السفاره اللي بتطلع منها الفيزا عشان تتاكد
وممكن حتى لو تسأل مكاتب السياحة اللي يطلعولك تأشيره شنجن وانتا قاعد في البيت تعطيهم الجواز وهما يتكفلوا بكل شي. ما أدري اذا سألتهم يعرفوا عن هذا الشي هما أو لا.

نصيحتي:الشهور الأولى أهم شهور لك. أستغل وقتك فيها ولا تشغل نفسك بأفكار السياحة كرس جهدك في دراستك. الاجازات جاية كثير ان شاء الله

يعطيك العافية أخوي على إهتمامك

والله من ناحية جد اكيد بكرف لكن ظلم كذا غجازة 3 شهور لازم أقضيها ببولندا ولا السعودية ؟؟ ليه ما يحقلي أسافر فيها ؟

عاد طول بالك انت كمان المده حتعدي بسرعه. والله ماهي طويله بغض النظر عن امكانية سفرك أو لا لدول أوروبا أم لا. يعني كم حيكون عندك مجموع اجازة في الثلاثه شهور دي كلها؟ تاني شي أنصحك ما ترجع السعودية بالذات الفتره الأولى. ولو تتعرف على البلد اللي انتا فيها أفضل لك بكثير من السفر في أوروبا. زي ما قلتلك قبل. السفر لاحق عليه، ما بأقلك لا تسافر. بس حيجيك وقت مناسب. انتا لسه توك تطلع ان شاء الله وقدامك وقت تصيع فيه على كيف كيفك ^_^

ههههههه مرسي أعجبتني ذي أصيع على كيفي

بس حاب أسأل هل فيها نظام روميت ومن هالحركات ؟ في السكن وهل فيه عوائل تتكلم إنجلش ؟

في ألمانيا في كل المدن عندهم نظام اسمه WG اختصار كلمة Wohngemeinschaft ومعناها السكن الجماعي. تلاقي ناسي يكونوا ساكنين في شقة حسب حجمها يتشاركوا فيها عدد معين من الاشخاص، اثنين وانتا طالع. تكون عادة طريقة توفر بها، لكن قبل لا تسكن لازم طبعا تتعرف على الشخص او المجموعة اللي حتسكن معاها(على اساس مثلا لو كنتوا ثلاثة تتقساموا شقه) وتعرف هل نظامك زيهم؟ هل انتا تهتم بالنضافه بشكل كبير؟ تحب تجيب اصحابك كثير....الخ

سكن العوائل ما هو شيء شائع لكن على كل حال موجود في كل مكان. انت وحظك اذا كانت العائلة تعرف انجليزي ولا. والأفضل انهم ما يعرفوا، عشان تتورط وتضطر تتعلم اللغه.