May 26th, 2009, 05:34 PM
مثلكم عارفين أمس كانت إيجازة كالعادة كل شهر خمسة أيام عطلة
أكرهك بريطانيا (مسوي مجتهد) .........رحت اليوم وكلي ندم على هذا اليوم الضائع
دخلت المعهد قالوا لي عندك إيجازة بعد اليوم .....تقدر تروح تشرب كوفي في ستار بكس ...قلت ما أتفقنا لو أبشرب كوفي ، شربت بالسعودية ألذ وأطعم وبين الحبايب بعد.
وأنا ما عمري غبت إلا إذا (............).
أو (جرحتني الحبيبة بأسلوبها القاسي يوم كنت بها مغرم).
.أو( ..................).
رحت للسوق أصيع صياعة باحترام ...مليت رجعت لبيتي >>صار بيتكم بالله من متى ؟!
المهم رتبت الغرفة اللي من خمس شهور وأكواب الشاهي مبعثرة فوق أكوام الملابس وعلى جنباتها..كوب شاي فوق جنز
وجنز تحت فوق كوب شاي >>هذا يسمونه فن التلاعب باللغة.
المهم : دخلت المنتدى لقيت المنتدى مليان ونصفهم أعرفهم من قبل أمس وهم بالنت أتوقع حاضنين الكمبيوتر وهذولاء العزاب بصفتي عازب سابقا ومستقبلا لا إن شاء الله ، أما البنات كأني عارف وش حاضنين ؟!مالنا دخل.
فقلت ليش النت صار مصدر ضياع لوقتنا وشبابنا ونسيت نفسي أول واحد مضيع عمره فيه ...
قلت صح وأنا ؟!
أنا فعلا أفتح منتديات بس أكون فاتح مع الصفحة عشرين صفحة أولها منتديات .........اللغوية العصبية >>مقدر أقول اسمه أسوي له دعاية يزعل أمين مبتعث.
رجعت لنفسي قلت أصلح مشكلتي أول ، ومن أساسيات حل المشاكل في الإدارة البحث عن المشكلة بدايتها سببها ؟!
أحنا كلنا في غربة صح ...وكلنا ما معانا سيارات ...حتى يوم شرينا سياكل نبغى العز شوي : أنسرق سيكلي..بس لقيت الكفر الخلفي الحمد لله .شكلي الي سرقه كان حنون >>و ش معنى حنون بالإنجليزي ................Aff : ابحث عنها تلاقيها صدقني تستفيد.
لا شك أن الوحدة أثرت تأثير سلبي على جميع النواحي النفسية في المرء سواء ذكرا أم أنثى تعتقدون شخص تجاوز الخمسة وعشرين عام ما تزوج سليم من الآثار السلبية ؟!
تأخير الزواج لن يؤثر سلبا على الدراسة والتحصيل فقط بل حتى على البدن .
يقولون للعمر أسباب في الطول والقصر ومن أسباب طول العمر : أن تكون عندك قيرل فرند >>هذا المدرسة قالته والله العظيم مو أنا قسم بالله.
وإحنا المسلمين نقول: لا بل زوجة.
عندما كانت تسألنا في تعبئة فراغات برنامج يحسب طول عمرك تقريبا ..حسب المعايير الصحية والنفسية.طبعا لاتصدقون هالبرنامج.
من ضمن الأسئلة كان السؤال هل تمتلك قيرل فرند ؟
الغريب وحدة من العيال قليلة أدب: قالت أيوه >>>>طاحت من عيني قسم
مو أجنبية تراها من بني جلدتنا عربية مسلمة L
قرار الزواج قرار صعب وخصوصا لشخصين : شخص يبغى يضيع وشخص عاطفي مو قادر يختار من يشركها بحياته ..وهذا الكلام للجنسين طبعا.
اللي خلاني أتكلم عن هالمشكلة : مشكلة العزبة ( من عازب يعزب )وليس من عزبة قهوة وشاي على لهجتنا القصمان. ...لأن هي بحد ذاتها مشكلة تعيق التعليم والتحصيل.
ولا سيما إذا كانت مرتبطة بـ ( غربة ).
والغربة وين في بلاد ( غير مسلمين ).
يعني يتباوسوون بالشوارع : وبالباص وتحت الترين وفوق الإمبرلا . الموقف الغريب شفت وحدة جالسة تسولف شكلها مسنجر أو شات بالسنتر وووين جالسة ..جالسة على واحد بعير كبر الفيل ..حاطته طاولة وكرسي لها تخيلوا حتى كوب الشاي حاطتها على فخذه الأيمن.مالنا دخل....
فالعازب الطالب المسكين : وهذه كلمة واحد من زملاي بنفسه : قال ياخي وين الغلط عمري 27 ما عمري بحياتي بوست وحدة مع خدها لا حلال ولا حرام ...
ضحكت لين دخت ....
شباب أنا لما أتكلم بتكلم عن مشكلة لها إضرارها النفسية الظاهرة ليس فقط ضرر دراسي إحنا نسعى إننا نحصل أكبر قدر من النجاح فيه ، وأنا لما أتكلم هنا بتكلم من ظاهر شيء واقع إن الزواج أمر لا بد منه مو (شر لا بد منه ). إذا كنت قادر في اتخاذ القرار أما أن تفكر تكون علاقة عشان ممارسة اللغة ، : فلك أن تفعل هذا بعد ألا تنسى ( أنك مؤمن بجهنم ).
أو عندك حل ثاني : وهو تكييف النفس وهذا فن تحتاج إلى سنوات حتى تستطيع تطويع النفس ..حتى تجاوز ما قلته أنا من مشاكل.
تعالوا معاي نتكلم بشفافية أكبر عن اللي يقول أو عن اللي تقول ( ما بتزوج عشان أنتبه لدراستي : الواقع يدل على أن المتزوج في تحصيله أقدر من غير المتزوج.
ولو لزم شخص وقال بذاكر أربع وعشرين ساعة ما أقدر أتزوج أنشغل ..هذا نعذره
بس بشرط يكون مثل : الإمام النووي أو شيخ الإسلام ابن تيمية ، أو الزمخشري أو قريب منهم ...هذولاء فعلا ماتزوجوا لأجل العلم وأبدعوا لكن
ما تتزوج عشان ............لا ما اتفقنا .
بتكلم لكم عن أشياء تصير لي وعن بعض زملاي :
العازب (خفيف ) شوي مو كلهم ( لا أحد يجي يقول أنا ثقيل وعاقل ).
وأحيانا أشياء تكون ظريفة ..
مرة كان عندنا حفل وكان فيه تصوير ومثلكم عارفين ...
ففيه بنت كل الشعب المبتعث رايحين وطيء معاها إلا أنا (مير ما كذب ).
وفيه واحد يحبها من زملانا فحصلت له الفرصة بس إنه يوقف جنبها قلت بفزع له
تبغون أصوركم قال تكفى ...
فصورتهم : وجاني أسعد إنسان قال الحين ارتحت ( طبعا نشفت ريقه ما عطيته الصور نذالة ).
جيت مرة لقيت كرسي عند زميلي وكان معانا بنت قطعة قمر تجلس بهالكرسي دائما....فجيت أنا عبط لأني أعرف يبغاها تجلس جنبه ...
وجلست : قال عادل يا ثقل دمك ...قلت ليش أمانة سويت نفسي ما أدري.
لي زميل يقول يا عادل أنت كل مؤنث عندك حلوة :
فرشة غسالة ثلاجة مكنسة ...
قلت أهم شيء تاء التأنيث المربوطة .
ما ودي نطلع عن المووضوع : إحنا عارفين إن إحنا في فرصة غيرنا ما حصل عليها واسألوا بقية الجنسيات من غير الخلجيين يجي الواحد مجمع الباوند على الريال عشان يدرس وحنا نغيب ووننام.
في زمن مضى عدد المبتعثين في السعودية ثلاثة آلاف وكلهم بوسايط.
والحين أكثر من خمسين ألف وكلهم بدون وسايط. تغير جذري .يعني حنا لازم نستفيد من كل لحظة ولازم نتغلب على أي شيء ممكن يكون سبب في منعنا من التحصيل الدراسي .
وكل شيء لازم نسخره في خدمة تخصصنا أو دراستنا اللغوية .
أتمنى إني أكون وصلت إلى ما أصبوا عليه وأتمنى
أسمع مداخلات البعض أو التعليق سواء فيما ما من سبيله معوقا للدراسة أو سببا للتحصيل الأكبر.
عادل محمد العتيبي 26-5-2009
الثلاثاء .
LinkBack URL
About LinkBacks
May 26th, 2009, 05:34 PM