استفسار بسيط بخصوص دراسة اللغة يا أصحاب الماستر

وين الشباب الطيبين ؟

والله هذا يعتمد على مجهودك وقابليتك للتعلم
انا اعرف ناس والله لهم 6 شهور بنفس المستوى مافي تقدم وفي ناس ماشاء الله عليهم
على فكره 30% على المعهد والباقي عليك
اتمنى لك التوفيق

يالغالي .. كيف حالك عساك طيب
اول شي الله يوفقك
انت معك لغة .. وهذا شي جيد يساعدك كثير
حتى وان كنت مبتدئ !
نصيحتي ..
كل 3 أشهر اعمل اختبار آيلتس من شان تشوف لغتك كيف صارت
ومن شان يكون معاك خلفية عن الاختبار وطريقته ..
هو سهل جداً لكن يحتاج واحد يفهمهم ويعرف كيف يقنعهم بإسلوب فيه نوع من الفلسفه !
الفلسفه < تحتاج فقط شوية كلمات ، مفردات ، أمثال .. الخ

8 - 10 أشهر تكفيك ان شاء الله وتعدي الاختبار بإذن الواحد الأحد
المطلوب منك انك تركز وتستخدم كل كلمة جديدة تتعلمها
لا تحفظ المعنى .. أحفظ جمل كاملة من شان تساعدك انك تتذكرها



موفق

احسن الله اليكم
والله ما قصرتوا ، وبيّض الله وجيهكم ..

لاتستطيع الا لو صاحبت بريطانين وهذا صعب لان الشعب البريطاني متكبر الى ابعد حد
او اذا جبت مدرس البيت كل يوم
غير كدة لاتأمل كتير
نصيحتي لك تعلم في السعودية قبل ماتجي هنا
وجيب الايلتس وتعال
اتمنى ماكون احبطتك لكن هذه وجهة نظري
والله يوفقك يارب

أخي دقيق . .
كل واحد وله إمكانيات تختلف عن الآخر !!!!!! والشعب البريطاني مو متكبر على قولتكـ . . . شعب هذه جبلته ومو فريندلي مثل أمريكا وكنـدا . . .لكن جدا شعب طيب بحكمـ خبرتي وعلاقتي معهمـ .. .

والأخ هيثمـ . . . إن شاء الله رح تجيب الدرجه المطلوبه في هالفترهـ . . .أهمـ شي ركز في دراستـك وطور من لغتكـ لأن المعهـد ما رح يعطيك إلا الأساسيات والباقي عليــك تتعلمه لما تختلطـ بالمجتمـع ..

بالتوفيق يارب .

والله ما أني متردد أن أرد عليك لأني خايف أحطمك ، لكن شف بقولك اللي عندي لأن المستشار مؤتمن وهذه تجربه شخصية، انا طالب ماستر مثلك رحت على حسابي ودرست ووجدت أن الدراسة في السعودية مثل هناك بالعكس بالسعودية أرخص وأحسن لعدة أسباب:ـ

الأول : أن المعاهد اللي هناك مثل اللي عندنا نفس الكتب والطلاب هناك كلهم سعوديين كل معاهد بريطانيا سعودين يعني تتعلم شويت كلمتين وبعدين يجي بريك تشوف السعودين يضلون عليك شفت المباراة أمس وشفت وش صار بالسعودية وشفت وشفت إلى إلخخخ وبعدين لما تنتهون من المعهد يلزمونك نتغدى سوى لازم نروح لشارع العرب ....إلخ .

ثانيا: بعض المعاهد هنا بالسعودية حلوه وعندهم برامج مكثفة ورخيصة مقارنة هناك ، كذلك المدرسين أجانب هنا يعني ما فيه فرق وما أبغى أسوي لها دعاية .

ثالثا: نجيء للسكن مع العائلة العوائل مو مثل أول زمان الآن والله ما يكلمونك ابدا تعال خذ عشاك وإذا قمت صلح فطورك بنفسك وبس وما يعطونك وجه للكلام يعني ما فيه تعليم ما هم فاضين والله أنا تبهذلت سكنت عند واحد مطلق زوجته وطارد عياله عشان ما يحبون الكلب وجيت أنا وكملت الباقي معه وكل شوي أصارخ إذا قرب مني الكلب وهو يضحك علي حسبي الله عليه ( طبعا أنا أخاف منه+ نجاسته شكله قذر) تهاوشت معه وخليته وطلعت منه وسكنت عند واحد شباب شكله حبيب مرره ويبتسم معي كثير ويحاول يعلمني كل شيء وبعدها فرحت وبعدين لما جاء يوم السبت والاحد الرجال أنقلب تغير مائة وثمانين درجة بعد ما قبض الفلوس جاني سكران الله يستر قعدت أقرأ الأذكار ليل نهار خوفا منه وكل ما جاء أقول (وجعلنا من بين أيدهم سدا ومن خلفهم سدا... الآية) مرة جايني سكراان ويصارخ علي ويسب الأسلام وكلام كثير وطلعت منه وسكنت عند عجوز تدخن تغصبني تقول ليش ما تدخن وتشرح لي مكونات التدخين وأزعجتني خلاص صرت أقفل على نفسي الغرفة وأسولف مع أصدقائي بالماسنجر ولي قصص مع العوائل وما ابغى أطول عليك وإلا كان ذكرتها أنا الآن في السعودية وبدرس في معهد وأسأل الله لي ولك التوفيق.

خلاصة الكلام ان المعاهد هنا أحسن أدرس هنا ستة أشهر إلى ثمانية أشهر بعدين سافر والله بتستفيد وبتتعلم بسرعة وتثق بنفسك أكثر وكذلك العوائل لا ترجوا منهم لغة ابدا وهي مسألة توفيق وحظوظ .

تحياتي لك ،،

اخوي هيثم... في شغلة تريح راسك من هالكلام هذا كللللللللللللللللللللله

راسل جامعتك وقلهم ابي ادخل المعهد حقكم ... منها تستفيد بشغلتين

تدخل الجامعه من دون ايلس والتعليم راح يكون مكثف على الاكاديمي اللي بتستفيد منه في بحوثك في المستقبل ان شاء الله

يعيني على الدرر .. والله يأخي كنك تتكلم عني وهذا الواقع حالياً .. كلامك سليم ميه بالميه .. ياخساره بس راحت علينا ولا كان تعليمنا بالسعوديه افضل بكثير...

والله يوفقك