October 17th, 2009, 08:04 PM
مابين لحظة ومثيلتها يبدل الله من حال إلى حال :
السلام عليكم جميعا أخواني الطلاب من المبتعثين المشردين في أنحاء الأرض المعمورة ...
أعتقد كل شخص يعرف عني إن ما كان على ظهرها أصعب مني في تعلم اللغة لساني كان ثقيل يمكن لأني جاي من قرية اسمها الرس : أو مدري ليش
كنت أقول : call تجي معي : kill فإذا جيت بقول لأحد بتصل عليك قلت بقتلك فأطيح في مواقف مرة لا أحسد عليها ، خذ هذه القصة من واقع حي لتتشجع في تعلم اللغة الإنجليزية :
ذكرت في قصتي من دخولي لبريطانيا : إني ما كنت أعرف أحد خارج السعودية إلا ثلاثة أشخاص :
شخص في الباكستان كان سباك عندنا بالحارة اسمه : بشير .وشخص بالبحرين يدرس ومن زمان ما أدري عنه.
وشخص مدري وين ..المهم لما جتني البعثة في بريطانيا قلت أشوف لي أحد يستقبلني هناك لأني ما كنت أعرف الماء بالإنجليزي قلت والله :
لأموت عطش ما سقوني رشفة ماء.
المهم دخلت هالمنتدى إلا وأبو جبل فاضي ذيك الفترة جديد بقراطيسه كان أسمه عبدالله القصيم ومعه هايلكس قديمة وأنا معي بنز خضراء
كانوا أخواني بنصف الأيجازة الطويلة يقولون ما توقفها عند الباب يقولون الناس راسبين وجايبين مدرس خصوصي وقفها عند البقالة اللي بجنبانا والله العز الحين نمشي على رجلينا سبحان الله العلم يرفع بيت وينزل بيت ثاني
وأبو جبل مشتري دباب ....المهم وكنت أحسب أبو جبل فاهم وقديم في بريطانيا ، ما دريت إنه مثلي ما يدري وش الطبخة ، المهم شبكته أحسبه في بريطانيا وصداقة كم شهروخسرت عليه مكالمات ومصاريف ، ومير يطلع توه ما سافر بيسافر ، ياليل الخسارة .
المهم صار بيسافر قبلي بشهر قلت بس يمديه يتعلم وإذا جيت يستقبلني لا أضيع .
دق علي مرة قال انا سفري بكرة من الرياض وأنا كنت مدرس في مدرسة اهلية بجنب المدرسة اللي يدرس فيها أبو جبل ..بالرياض وبنفس الوقت معاي ليموزين : قلت أوديك لما تجي تسافر قال ياليت ..!
الرجل يحسبني شغال ليموزين بوديه بفلوس يوم وصلته المطار ...طلع عشرين ريال بيعطيني ...قلت انقلع بس وأنا ما قصدي كرم فيه ..بس قصدي إذا جيت هناك يستقبلني عشان أصير صديقه ..
سافر الرجل واستقبله واحد يعرفه من لندن ..وأخذه وعرفه على واحد في كوفنتري (برمنجهام)لأن هالشخص يدرس في لندن وأبو جبل ما يبغى لندن قال خابر لك مدينة كويسة وشاله إلى كوفنتري :
جاء أبو جبل عند هالشخص اسمه فهد العنزي(وهذا اللي راح نبدأ معاه القصة ) : وهالشخص من أقدم الموجودين في بريطانيا له خمس طعش سنة ما خلص البكالوريوس لسه كل يوم يغير تخصص ويقول الملحقية هي اللي تغيرني : مالنا دخل ..المهم هالشخص اللي هو فهد العنزي : يستقبل أي شخص في بيته ويكرمه : بس ما يروح معاه لأي معهد أو أي مكان لأنه بعدين فهمني الوضع يقول أنا من زمان هنا وكل من جاء لبريطانيا جاء عندي ياكل ويشرب ويسكن وأغيب وأروح معاه للمعاهد والبنوك والمعاملات صرت أخسر دراستي عشان الناس ...يقول والله ما عمري خدمت أحد كثرك ...قلت صحيح أبو جبل يقول لي :
الحين أنا عرفتك على فهد العنزي وخدمك وأنا ما خدمني : سألت فهد ؟ ليش خدمتني وأبو جبل لا .؟!
قال ياخي أبو جبل أول ما جاء عندي دخلت لقيته حاط عفشه فوق سريري ومسندح ويكلم بالجوال ويوم دخلت قال بالله أطلع عندي مكالمة ضرورية ..!! لا يأبو جبل ما تسويها ...من اولها ميانة.
قال وأنت يا عادل لقيت عفشك محطوط بأدب عند الباب فأخذت منك موقف جميل جدا ...قلت ما شفت شيء..أنا أكثر أدبا والله J
مالنا دخل المهم : أبو جبل جلس عند هالرجل شهر يدور معهد وكل معهد يروح له يسوي زحمة ، ويسبب مشكلة :
دخل معهد لقى فيه خمس سعوديين من ثلاثة عشرة طالب وزعل مع المدير وقال : أروح لنيوهورازين أحسن لي من معهدكم.!
قال المدير وشهو نيوهورازين ؟
قال هذا معهد بالسعودية مليان سعوديين مثلكم .....
قال له المدير : كلمة بالإنجليزي ...أتوقع معناها شين وقوي عين ...
المهم جلس أبو جبل على هالطريقة ما فيه معهد إلا ويتهاوش معاهم سبحان الله يالآدمي عنيد جدا : وجلس ينتقل من معهد لمعهد من مدينة لمدينة لمدة سنة تقريبا ويبغى معهد ما فيه إلا هو سعودي.حتى السعوديين اللي في المعاهد كرهوه يقولون المعاهد شددوا علينا واللي يتكلم عربي يطردونه والسبب خويكم ذاك فضح بالمعاهد ...
...هو فعلا كافح الرجل وتعب لكن بنفس الوقت خسر أشياء كثيرة مرة أنسرق كمبيوتره ومرة أنسرق جوازه ومرة أنسرق جواله وما فيه شيء عنده إلا أنسرق والمضحك مرة أنسرقت شطنة مليانة نعال وكنادر يبغى يكشخ الرجل هههههههه.
في نهاية الأمر دقيت عليه وينك بأي معهد ...
قال تبي الصدق لقيت كتاب يحبه قلبك واشتريته وجلست أدرس بالشقة : تصدق يا عادل أحسه أفضل من المعاهد ..قلت لا يا شيخ
طيب وفر للمحلقية فلوس وأجلس بالسعودية موهنا دامك رجعت للكتب ....المهم ما علينا
انا جلست عند فهد هذا اللي عرفني عليه أبو جبل ....واللي معرف ابو جبل على فهد العنزي أسمه علي...
جاء واحد ثالث اسمه ماجد العنزي : جابه واحد ونزله كذلك عندنا في نفس الشقة :شقة فهد العنزي ..في كوفنتري..
صرنا أنا عادل العتيبي وأبو جبل وماجد العنزي هذا واعتقد اسمه مواطن في رتبة وزير بالمنتدى >>فضحه ..وصاحب الشقة فهد :
المهم فهد هذا اندبلت تسبده مننا ولا وده يطردنا كاسرين خاطره مساكين :بس كان يلعب علينا بشكل حقير ..:وهذا اللي مخليه مستانس مننا وسوى حركة كويسة الغذاء مقابل السكن ..يعني تجيب أغراض للشقة وأكل مقابل إنك تسكن وأحيانا تجيب له توب اب لجواله .....
كان يرسلنا للبقالة نشتري له شحن لجواله ويقول عشان تتعلمون ....يخلينا نغسل المواعين : وهو يجلس على النت ويقول أي قطعة تغسلونها جيبوها لي أعلمكم أسمها بالإنجليزي ..والله لاعلمكم أشياء المعاهد ما تعلمكم إياها لأنها عملي وحنا مصدقين وأول واحد مصدق ومتحمس يتعلم أبو جبل ..
تخيلوا كان لما يركبنا تاكسي عشان يوصلنا لمعهد أو شيء ويسأله التاكسي وين أوديهم :
يقول لصاحب التاكسي : ودهم للجحيم ...قصدي ودهم لمعهد كذا بالشارع الفلاني ويخلي صاحب التاكسي يضحك علينا .
يقول أعزموني في مطعم عشان أخليكم تتعلمون كيف تطلبون أكل بدون خنزير ..:ترى أكثر الشباب ياكلون خنازير ما يدرون لأني ما فيه أحد قديم يعرف إنجليزي يعلمهم.
ياخذنا للمطعم لما يجي الموظف يسأل وش تأكلون :؟
يطلب هو أكل معين ...
ولما يقول والشباب : يقول جيب لهم سم يقتلهم هذولاء حشرات ضارة بالمجتمع ...ويخلي حقين المطعم كلهم يضحكون...
كنت أقول خلني أتعلم قسم بالله لاوريك ....
يقول إذا تعلمت دغدني بضحك أشكالكم تقول لا للتعليم...
أبو جبل حقد عليه وأرتحل من المدينة...
بقيت أنا ووماجد
ماجد هذا يكسر الخاطر
كل ما يزعل فيه ويقول والله لاطردكم
يقول حرام وين نروح !!
والله تنزل دمعة فهد من هالكلمة
ههههههههههههههه
وأنا حقدت عليه بس قلت أصبر لين ألاقي سكن وأطلع ...هو محترم جدا بس مزحه ثقيل ..وخصوصا لما يرسلك تشتري أغراض ويقول تتعلم ....الغريب بعد ستة أشهر
درينا إنه كان يمزح لما يهددنا يطردنا بس ما كان يضحك قدامنا
وحنا نصدق
راحت الدنيا ومضى الآن سنة كاملة :
دخلنا الجامعات أحنا الثلاثة وتعلمنا اللغة بإحكام :
أنا صاروا الشباب يسموني الإنجليزي وكنت أقول لماجد هالكلام : يقول حتى أنا تصدق .....مرة من المرات انتقلت من مدينة لمدينة وتعرفت على صيني..وصار صديقي ...المهم دق علي مرة رقم غريب رديت إلا هذا هو خويي الصيني ....وشلونك طيب كيف الحال موعدنا اليوم نطلع .....قلت اوكيه يا هارلي ....طلع مو هاري ..طلع هذا ماجد خويي يهستر مسوي نفسه انجليزي وطلع مثل الصينيين باللهجة وأنا أقول للشباب ومن ذاك اليوم لين اليوم فاطسين ضحك....وش قال قال يسموني الإنجليزي..
مالنا ...:
دقيت على أبونا الأول : فهد العنزي : بسلم عليه بعد سنة كاملة : وكان توه متزوج ومواعد واحد إنجليزي بيشوف بيت عنده :عشان بيستأجره
الذكي : أول ما اتصلت قال لي هلا روب : قلت هلا
كيفك وشلونك ..قال متى أشوف البيت ...
يحسبني الإنجليزي صاحب البيت...:
وأنا ما صدقت على الله ...وكان في السوق هو معاه اثنين من زملانا الخاصيين :وأنا أعرف المول زين وأعرف المدينة زين ..
قال أنا في المول : قلت أنا في المول؟ ! وينك أنت بالضبط ...قال لا :
إنت اللي وينك : ؟
قلت أنا في كوستا كوفي ...قال خلاص جايك بس دقيقة . قلت أوكيه .
دق علي بعد دقيقة قال وينك : قلت في كوستا ....قال أنا في كوستا ما أشوفك ..؟
قلت أنا بالدور الأول ......قال أوه أنا بالدور الثاني ...لحظة وأجيك .
بعد دقيقة دق قال أنا بالدور الأول وينك ............قلت أوه أنا رحت للدور الثاني : قال اوك أنا جاييك .قلت لا أنا أجيك
قال انا رحت هناك أوك نو بلبلم أنا جايك
دق علي بعد فترة قال أنا بالدور بالثاني
قلت اوه ماي قود أنا نزلت للدور الأول
نزلته وطلعته وكل ما يدق علي من دور أقول له أنا بالدور الآخر ومو قادر يقول تراك أشغلتنا لأنه يحسبني صاحب البيت...وأدق على زميل لي قلت : وينكم ......قال أحنا مع فهد وهو مواعد واحد إنجليزي بيشوف بيت عنده ومن اليوم نمشي وراه طالعين نازلين ......قلت تراه أنا اللي مهستر فيه........قال الله يييييييييييييلللللللللع .......................
وإحنا من اليوم وراه من محل لمحل ........
قلت خله أنا قايل له العام ترى الدنيا دوراه .....قال تكفى :
طلعه من كوستا ووده لستار بكس ...وطلعه من ستار بكس ووده للتسكو وطلعه من التسيكو ووده لبري مارك
وحك السوق فيه حك خل وزنه ينزل .........
قلت خله علي بس والله لاخليه يعاف يلعب بعيال الناس : يوديهم للبقالات بنصف الليل يقول تتعلمون الإنجليزي ...
ذكرت هالسالفة وهالقصة الحقيقية لنا : ولثلاثة أعضاء في المنتدى ....
عشان أواسي فيها اللي شايل هم وحط في باله اللغة مستحيل تتعلم ...
عادل العتيبي
الجمعة : 18-10-2009فضأفأق
LinkBack URL
About LinkBacks
October 17th, 2009, 08:04 PM