الهلل وماأدراك ماالهلل ...(الهلل=البنسات)

April 10th, 2010, 03:24 AM

تتفقون معي اننا متطورين عن البريطانيين بموضوع الفلوس

استغرب ليش يستخدمون الكوينز وليش مايبدلونها بالورق مثلنا مع ان الورق اريح واحسن بواجد

يعني يوم تشوف الواحد يطلعها عشان يحاسب كنك تشوف مسلسل من ايام الجاهليه ايام يحطون دراهمهم في صرة
واحيانا اذا جيت ابي احاسب في محل والا سوق وقمت اطلع البنسات والكوينز وقمت اعدها اتخيل ان ابو جهل وابو لهب وراي بالكيو ماسكين سرا وكنهم يقولون : يااخ العرب ثكلتك امك اخرج دنانيرك وخلصنا فنحن موقفين خيولنا بموقف ممنوع ..

ودايم اذا جيت احاسب ابلش بها واقعد اعد حبه حبه وابطي اعد واخر شي يطلع حسابي غلط
لا و مرة كنت اعدها ويطيح مني باوند ويروح بين رجول اللي وراي واقفين بالصف ولو تشوفون شكلي اوخرهم عشان ندوره .. سوري سوري .. وواحده منهم بدون قصد طقتها برجلها الينه هناااك عند بوابة المحل واروح اجيبه وانا جاي للكونتر رافعه بيدي تذكرت نفسي كني مستر بن بهالموقف

وتصير معي واجد يكون معي مثلا ثلاثين باوند ورق اروح المحل الاول واحاسب ويعطيني الباقي واروح اللي بعده واخذ الباقي اجي المحل الثالث وانا متاكد ان حسابه تغطيه الكوينز بس اعطيه العشرة عشان اريح راسي واجيك راجع البيت وكل الجيران يسمعون صوتي من هالهلل تقول معبي جيوبي مصاقيل او لب مع اختلاف اللهجات

وعلى طاري الهلل اول ماجيت ومعي ولد عمي سمينا الكوينز وكل البنسات من الخمسين الين اثنين وواحد بنس سمينها هلل على الهلالات السعودية

وكل شي يهون الا اثنين بنس وواحد بنس ياهي تقعد على القلب ماتنتصرف ودايم اذا كثرت عندي فرحت عشان اشتري بها شي وتكون واجد واذا جمعتها ماتجي خمس باوند بس ومايشيلها شي بعد يبيلها كيس والا صرة عجوز
تبون الصراحه كل شي ليه ايجابيات ومن ايجابيات هالهلل انك تخليها الين تكثر وتجيها اذا طفرت تنفعك وتفك ازمات عاد بالعاده احطها بكوب قديم عندي مخليه حصاله ... حصالة الفقر. ههههه

ومع الايام اذا انحديت خاصه اخر الشهر ارجعلها واقعد اتربع واحسبها

وافرزها كل خمسه باوند لحال واذا جيت طالع احط خمسه باوند بجيب الجنز اليمين وخمسه باليسار وخمسه بجيب الكوت اليمين والكسور باليسار واجيك ماشي للمحل واذا قال الحساب عشرة يعني حسابه جيبين لان كل جيب فيه خمسه والحسابه بتحسب

واضاف لفيف من علماء الطلاب السعوديين ان من فوائدها اشياء كثيرة منها :

انك تلعب بها مملكة و حسابه وتصلح قرعة في حال الاختلاف من يروح البقالة وايضا ممكن تحك بها بطاقات الاتصال او تنظف بها قدرك المحروق وتصلح تشيل العلك اللاصق و تقدر تحذف بها كلب جارك اذا قام يتمسح حولك مع مراعاة ان تفعل ذلك في غفلة من جارك الشايب ... وكذلك تستطيع تبني منها بيت او برج صغير في اوقات الملل او تلعب بها زقطه وغير هذا الكثير والكثير ...

ويالليل ماطولك مع هالهلل ... وسلامتكم
*
سوال اخير انا حصالة الهلل عندي قلتلكم كوب قديم بس ودي اعرف مكامن الابداع عندكم وين تحطونها .. بعلبة نيدو ... قدر .. كيس ... بخنق عجوز ... ترميها علي الطاولة .. ؟*

• نشر عبر تويتر
• نشر عبر فيسبوك
• نشر عبر جوجل