مساعدة في معرفة الميزانية اللازمة للدراسة لمدة شهر ( بريطانيا )

للرفع

_______________

أخوي ادخل موقع المعهد وتحصل أسعار الكورسات وأسعار السكن في المعهد
واحسبها أنت ومصروفاتك اليومية

وبالتوفيق إن شاءالله

حبيبنا ديزاينرز والله اني كنت كاتب لك هالتقرير ومفصله لك تفصيل فجأه انحذف
وكان ماخذ مني قريب الـثلث ساعه
قلت والله لأرجع أعيده لعلك تستفيد
وأنا أطلبك طلب أنك تخصني بدعوه أنا وزوجتي أن الله يسهل أمرنا ويوفقنا في الماجستير
واحنا على وجه اختبارات

طيب نعيد
نقول بسم الله

أول شغله تكلفة المعهد تختلف من معهد لمعهد آخر
بس في الغالب أن متوسط التكلفه من 200 _ 300 باوند أسبوعياً
طيب يا حبيبنا خلينا ناخذ الماكسيمم
اللي هو 300 باوند في 4 أسابيع = 1200 باوند

بالنسبه للعائله
المعهد نفسه لو تبغى يرتب لك مع عائله يرتب لك
لأنه في الغالب يكون في عوائل مسجله عند هالمعهد ويكونون متعودين على الطلاب
ومتوسط تكلفة العائله من 500 _ 700 باوند في الشهر
خلينا على الماكسيمم ونقول 700 باوند

بالنسبه للمعيشه هي تعتمد عليك وعلى صرفك في الحقيقه
ولا ننسى أن العائله يتوفر معها وجبه واحده يومياً هذا إذا ما كانت وجبتين يومياً
بس خلينا نقول أنها وجبه وحده
والوجبه الثانيه انتا تاكلها برى

فباعتقادي الشخصي أن متوسط الصرف اليومي 10 باوند يومياً
وحتى أقرب لك الصوره وعليها تقدر تحكم على معدل صرفيتك
ناخذ مثال اللي هو مطعم ماكدونالد
الوجبه للشخص الواحد مابين 4_6 باوند
طيب يا حبيبي مسكت معاك هذا اليوم أكل عربي وحاجه طيبه
في الغالب أن تكلفة الشخص الواحد من 10 _ 17 باوند باختلاف اسعار المطاعم

يعني نقدر نقول ان المتوسط اليومي للصرف حقك 10 باوند في 30 يوم = 300 باوند

طيب نجي للمواصلات
أول حاجه أفضل شي تطلع بطاقه اسمها أويستر Oyster بـ 3 باوند تقدر تستردها اذا بغيت تمشي يعني طلعها من الحسبه ..
قيمة شحن البطاقه هذي في الأسبوع تقريباً 30 باوند ( طبعاً على حسب الزون اللي انت ساكن فيه _ وهذي لو قررت تجي علمني أفيدك فيها أكثر بإذن الله تعالى )
وتستخدم فيها الأندرقراوند والباصات والقطارات اللي داخل لندن
طيب نقدر نقول
30 باوند في 4 أسابيع = 120 باوند

خلاص غطينا كل شي الحمد لله خلينا نجي للحسبه النهائيه

1200 تكلفة المعهد + 700 تكلفة السكن مع العائله + 300 المصروف اليومي + 120 مواصلات = 2,320 باوند

يعني لما نحولها بالسعودي تطلع تقريباً = 13,500 ريال سعودي

طبعا ياخوي ديزاينرز دريم تراني حطيت لك بالماكسيمم يعني مستحيل تتعدى هالمبلغ
لكن برضوه لازم يكون عندك احتياط زيادة ألفين مثلاً أو ثلاثه

شغله ثانيه ترى هذا كله من غير التذكره والفيزا

فالله يوفقك ويكتب لك الصالح .. ويسهل دربك وأمرك
أي خدمه أو سؤال أنا حاضر يالغالي

أجمل تحيه

نسيت أقول لك شغله يا اخوي ديزاينرز دريم

أن هالتكلفه خصيصاً تبع لندن

ومعروفه لندن أغلى منطقه في بريطانيا
فيعني أنا جبتها لك من الآخر
ما راح يطلع فوق السعر اللي انا حطيته لك فوق

واذا بغيت غير لندن طبعا الأسعار راح تختلف كليا

والله يوفقك

اخوي العزيز يمكن بالتوفيق للجميع ان شاء الله

الغالي أبو فيروز

عجز عن تعبير شكري و امتناني لك

سوف ادعوا لك من كل قلبي في الصلاة بالتوفيق لكل خير

____

ما شاء الله

المعلومات اللي عطيتني اياها ممتازة مره وخصوصاً لاني بعد نويت اروح لندن

اشكرك جزيل الشكر

تعبتك معي



وان شاء الله اغسطس في لندن

بالتوفيق لك

أخوي ديزاينرز أحنا أخوان يالغالي

والله يتقبل ما تدعو به

اتمنى أن أفدتك

واغسطس احنا راح نكون في اجازه وممكن نكون في السعوديه لكن إذا جيت لندن ولزمك أي شغله أنا حاضر

وأن بغيتنا نلتقي فأبركها من ساعه

الله يحييك ويسهل دربك في قدومك لـ مدينة الضباب

بالمناسبه إذا رتبت مع المعهد سكن وعرفت وين مكانه ممكن انك تراسلني بالخاص عنه بالضبط حتى أطلع لك تكلفة المواصلات بالاسبوع بالضبط
طبعاً لو أنت حاب هالشي

فمان الله وموفق يالغالي

آمين يا رب

اخوي ابو فيروز

انا جمعت حوالي 21 معهد حق لندن وقاعد اسوي مقارنة بينهم

من ناحية الخدمات و اقصى ساعات الدراسة

ان شاء الله اذا استقريت على المعهد المناسب راح اعطيك خبر واستشيرك فيه



وان شاء الله نلتقي على خير

مرحبا اخوي
فيه معهد اسمه هامستد جدا ممتاز جدا ويفور سكن للعايله مع السرق 600باوند المحل الحلو وقريب وموقع المعهد جدا ممتاز على شارع الفينشلي رود وحي راقي جدا

وشووووووووووووووووووووور لا تاخذ اكثر من 20 ساعة