حوار ليش نخسر بعض في الغربه

والله يادكتور حسام لا تزعل مني
انا ماني عارف ايش المطلوب؟؟؟

ممكن يكون ضعف فهم مني
ممكن يكون خانك التعبير في شرح الموضوع


تحياتي

كلامك واضح اخي الفاضل لبد من وقوع المشاحنات والتحسس من بعض لاقول بأن هذا شيء طبيعي ولكن اعتقد بأن السبب الظغط النفسي بسبب الغربه والخوف من المجهول

حقيقه أخوي دكتور حسام كلامك واضح وعين العقل ..

ولكن فعلاً أنا ملاحظ هذا الشي .. وللأسف الواحد في هالبلد يشوف العجب من شباب بلدهـ

اللحمدلله على كل حال .. والله يصلح الجميع

ان لله وان اليه راجعون

الله يالف بين قلوبهم ويحننهم على بعض يارب

ومن جد ليش يصير كذا والله حرام الغربه تخلي الانسان يهتم باخوه المسلم سوى كان من بلده او من بلد اخر فالمسلمين اخوه واذا صارو من بلد واحد يصيرو اكثر من الاخوه

ذكرتني بقصة ابوي الله يرحمه كان في زمان ابوي القديم الي يتخرج من المتوسطه يبتعثوه على امريكا يدرس ثانويه ودبلوم وبهذاك الوقت ياكبرها شي غريب عجيب عندهم في عهد الملك فيصل كان معه صديق له بالغربه سعودي ولكن ابوي ماتعرف عليه الا بالغربه مايعرفه من قبل يعني بالسعوديه

وكان ابوي يقولي انه في امريكا كان بيضيع الولد لكن ابوي مسك عليه والحمدلله قدر عليه يقول نشبة في حلقه مااخليه يطلع لأماكن مشبوهه ووقت الدوام اغثه الين يقوم ويداوم غصب يقول اوقات نتهاوش الين خلاص اقول مستحيل اشوف وجهه مره ثانيه بس ابوي عرف طبعه انه انسان طيب وكان ابوي يقول حتى لو غلط علي ازعل عليه واليوم الثاني اجي اسولف معه كان مافيه شي صار ومشت الحياة معهم وفي مثل لمح البصر خلصو
دراستهم ولمى تخرجو ورجعو لسعوديه رافعين روسهم بقو اصدقاء الين قبل سنه توفاء صديق ابوي وقبل ثلاث اشهر توفاء ابوي الله يرحمه والحمدلله احنا وهم الحين مثل الاهل انا مستحيل مايمر جمعه ماادق واسال عنهم لاني اعرف ان ابوي الله يرحمه كان يحبهم ويحب ابوهم وانا الي يحبهم ابوي احبهم


يعني هذا مثال ان الهوشات والخلافات عمرها قصير بس احنا الي نبداها ولازم ننهيها مانخليها تطول بينا وبين اصحابناواخوانا واحنا بغربه


اختكم قطره مطر

والله يا دكتور حسام أني تعلمت هنا أشياء والله لم ولن أتعلمها إلا في جيتي هنا

أنا لو ما فلحت في دراستي ورجعت لديرتي بالانقليزي واللي اكتسبته لكفى

يا رجل أشكال وأجناس وعالم غريب

ما أخفيكم أنا أسافر من قبل بس كانت سياحه ولا كنت أعتقد أنه باسقراري في بلد غير بلدي راح أطلع منه بحاجات مثل كذا ..

عموماً تعقيباً على الإخوه الأفاضل .. وتتمة لما بدأت به يا أخ حسام ..

أعتقد والله اعلم ان المسأله مسألة فكر ..

كيف فكر ؟؟

لو أنا أحط في ذهني أن هالصديق اللي اخترته لنفسي وهو اختارني لنفسه راح نمر بحلوه ومره ويشيلني اذا طحت واشيله إذا طاح مع العلم مسبقاً أن النوايا طيبه وحسنه .. وركزا على هالنقطه أنا ما اقصد الرفقاء أصحاب النفوس الخبيثه ..

إذا انا اعلم صدق نيته ومشاعره تجاهي وحصل بيني وبينه لبس أو سوء فهم أو خلاف بسيط صح يمكن يكون فيه كم يوم حق التفكير ورجعة النفس بس والله ما أخليها تطول المدة إلا ما شاء الله ..

يا أخي الكريم لو الناس هذولا يحطون في أذهانهم أن الشيطان سبب في الفرقه وان النفوس طيبه في الأصل وان الطرف الآخر ما يبي أذيه كان والله طابت النفوس وزانت الحال

لكن عندنا مصايب وبأذكرها بالترتيب وهي الكبر _ فن الإعتذار _ وعندك مفهوم الكرامه المغلوط ..

هذا من وجهة نظري

إذا كان الطرف الآخرما طاح اللي في راسه يا يكون من كبر .. وإذا ما كان من كبر .. يكون من الإعتذار وكيف اني اعتذر له وهو مخطي علي . ومع انه أحياناً ما يندرى من اللي مخطي على الثاني .. وأخيراً مسألة أني كيف أنزل كرامتي واعتذر له ..
والله ثم والله إذا كان الشخص اللي تتعامل معه من العقلاء واللي عنده مخ .. أن يزيد قدره عندك بشكل ما تتصوره إذا انت بادرت في الاعتذار .. جرب والله لن تخسر والله ثم والله ..
يا رجل تعال له من باب أني اعتذر ان بدر مني شي من غير قصد وكل هذا من باب العيش والملح اللي ذقناه سوا واتمنى انك تفهمني وانا فاهم وبالنسبه لي والله اني اسامح والله يسامحك وخله ورح إذا ما عطاك جواب

والله بأخلي النتيجه لك عشان تتفكر ..

يعني يفترض اننا ننظر لمسألة المبادره بالمصالحه لا لمن أخطأ أو بدأ بالخطأ بل على أساس قول الرسول صلى الله عليه وسلم ( وخيرهما الذي يبدأ بالسلام )

يا حبايبي والله الحديث هذا ما جاء من الرسول صلى الله عليه وسلم من فراغ تأملوا فيه

قال خيرهما يعني ما التفت لمسائل غير أبداً.. ما اهتم صلى الله عليه وسلم الا أنهم يصلحون وبس .. وش السبب ؟؟ وش المشكله ؟؟

ما تهم ؟؟ لانه ما فيه شي في هالدنيا يستاهل ؟؟!!

وكأنه خطاب للناس كافه يا جماااااااااعه والله ما فيه شي يستاهل في هالدنيا نزعل عليه وش سوى لك خويك ؟؟؟؟

كسر سيارتك ؟ شلح فلوسك ؟ سبك وشتمك ؟ اغتصب أرض لك ؟

والله ان مردك حفره مترين في نص متر قسم بالله العلي العظيم .. وان كانك غافل عنها تراني اذكر نفسي وأذكرك .. ولا يتبعك الا عملك بسسسسسسسسسسسسسسسسس

تفكر

عملك بس
تصدقت .. سامحت .. صبرت .. غضيت الطرف .. بريت .. حبيت في الله .. كرهت في الله .. ناصحت في الله .. أو في المقابل
سرقت .. غضبت وفرقت .. جزعت .. كابرت وغيرها وغيرها هذي كلها داخله معك

بس وين المسبب اللي كابرت عشانه ؟؟؟
وين الأرض والمال اللي فرقت فيها بينك وبين قبيلك ؟؟
وين المسبب لوقفة النفس بينك وبين خويك ؟؟
ووين ووين ؟؟

كلها فوق الأرض وانت تحت الأرض !! يا روضة من رياض الجنة بفعل اعمالك الصالحه .. نسأل الله أن نكون منهم
أو حفرة من حفر النيران بفعل المنكرات من مشاحنات وتوافه على هالدنيا أو مشاحنات .. يا ربي لا تجعلنا منهم ..

كلها لمن بعدك وستفضي إلى ما قدمت من عمل !! إن خيراً فخير وإن شراً فشر ..!!

يا بشر خلوا قلوبكم كبيرررررررررررررررره .. توسع الأرض ومن عليها ..

وتعقيباً وإضافةً لما ذكرته الأخت قطرة مطر عن والدها رحمه الله رحمة واسعة ..

أنا لي صديق وكنا أنا وياه عيش وملح وكانت صداقتنا في الغربه هنا ..
حتى لدرجة أننا نخطط لصداقتنا كيف بتكون في السعوديه إذا رجعنا بإذن الله تعالى ..

حصل بيني وبينه سوء فهم وخلاف بسيط .. وهو حقيقة ما عنده الا يا أسود أو أبيض ..

بدون مقدمات كلمني وقال أرجوك ما ودنا نتقابل ثانيه .. هههههههه أي والله ..

قلت مهوب على كيفك يا عسل وانا اضحك أي والله العظيم ..قلت الآن انا اختارك صديق من بين ألف واحد واصطفيك من بينهم عشان أخليك في لحظه مو على كيفك يا غالي .. يا حبيبي أنت فلان مو أي فلان .. لو أنتا زعلت لك حق أرضيك ولو انا زعلت منك صداقتي معك وحبي لك تشفع لك وترضيني ..

سكرت عليه ولا حطيت مجال للشيطان ووالله انه كله بركه من رب العالمين وفضل منه ..

المهم
هو رسمي لدرجه جنونيه أول مره أشوفه عليها .. قال لا صحيح أنا ما عاد ودي أحتك فيك لأني أنا رجل أجرح ولا أحب أجرحك بأي كلمه

قلت يا حبيبي أنا بطيخه تحت سكينتك هههههههههههه واضحك شرشحني وقطع فيني يا كفته .. ومن هالكلام ..

المهم قال هالولد ما فيه حيله .. وقلت انت خلنا نقفل وبعدين يقضي الله بيني وبينك بإذنه تعالى ..

جلست ما كلمته ولا كلمني 10 أيام .. والعاده يومياً نشوف بعض ونطلع بالسياره وكانت أيام حلوه حقيقه وما اخفيكم فقدته فقده مو طبيعيه في العشر أيام .. بس كانت مراجعه للنفس بيني وبينه برضوه مع اني كنت حجر يوم كلمني .. بس في النهايه انا بشر ..

قسم بالله العلي العظيم .. والله يشهد علي .. أني جيته لبيته وطلع للشارع وقسم باللي خلقني ضمني ضمه مو طبيعيه واعتذر وارجوك سامحني

أنا أصلاً ما ادري بالضبط وش أسامحه عليه .. بس قلت لا والله انت اللي سامحني وارجوك لا تجيب سيره .. انتهت خلاااااااااص

ودخلت انا وياه للبيت ولا كأن شي حصل .. وطقاقنا ونقاشاتنا وهواشنا رجع بعد نص ساعه من رجعتنا ..

ليش ؟؟؟

ما حطينا للشيطان مدخل ولله الحمد .. والشيطان يكبرها في مخك ..

أفاااا يالرخمه .. والله انك دلخ كرامتك راحت طين .. أجل تدسدس وراه .. وين كرامتك ووين عزك .. أنت فلان اللي ما تهزك جبال فما بالك بواحد من مليار واحد .. إذا راح هو يجي بداله عشره .. شوف كيف الشيطان يلعب وينغز ..

بس في النهايه اكبت نفسك الأماره بالسوء واللي تؤز من قرينك .. ولا تفتح لها مجال وأنبها ووبخها ..

وعذراً والله على الإطاله .. والصحيح اني ما كتبت واسترسلت الا لأن الموضوع جاي في الصميم يا دكتور حسام ..

أشكرك وأشكر كل من أفاد على متصفحك ..

في النهايه ..

قال أحد السلف رحمهم الله جميعاً
( إذا لقيت وداً من أحد من الخلق .. فأمسك عليه .. فإنه يندر أن تجده في فرصة أخرى )

وجهة نضري باختصار..... الاصدقاء اللي كانوا زي السمنه على العسل بالسعوديه ماكانوا قريبين مررره زي هنا 24 ساعه مع بعض... ومثل مانتم عارفين السفر يسفر عن اخلاق الناس..... يعني اصدقائك اللي انت معهم هنا طول الوقت وانت مرتاح معهم ومتالف ترا هم الاصدقاء الحقيقيين..... غير كذا الله يخلف

ابو فيروز سلمت يمينك على الكلمات الرائعه والله يجزاك بها خير في الدنيا والاخره ويرفعك بها درجات في الدنيا والاخره

اللهم امين

اللهم آمين يا رب العالمين

وإياك يا أخت قطرة مطر

والله صدق اخوي الغالي

الهوشة دائما ما تكون سببها الضغوط النفسية والتوتر
وأعرف ناس تتهاوش مع غيرها حتى تطفأ النار الي بقلبة....!!! طيب ليش

يعني زعلان من العيشة هنا ومقهور على اشياء صارت لك من طرف تنزل حرتك بالطرف الاخر

اي منطق يقول كذا ولو تلاحظون يا عالم ان اكثر الشباب يدخنون وتقولي هم يدخنون من يوم كانوا
بالسعودية...اقلك لا مش الكل
انا اعرف 5 اصدقاء جايين من السعودية لدراسة اللغة ....يعني طازة من السعودية
اول شهرين الابتسامة للبعض حلوة..............بعدها وتشوف الابتسامة بالقوة تبان بالوجه
من قوة الكئابة
وبعدها كملوا شهرين وما الاقي الا الواحد معه سجاير والبكت بالجيب معبي احتياطاتة
اذا هذا حالهم مع سنة اللغة كيف الحال حيكون بالجامعة ولمدة لا تقل عن 4 سنوات.....؟

للأسف يا جماعة الوضع تغير لدا البعض من الشباب
وين الصلاة والاستغفار والتعوذ من الشيطان
وين الصبر عندنا يا جماعة

بأذكر لكم لكم قصتي بأحد المعاهد لما كنت ادرس لغة
انا كنت من جيتي من السعودية كانت ابتسامتي ما تفارق الوجة كوني مبسوط أقابل ناس معي بنفس حالتي بالغربة
ومبسوط اني يمكن أحكي لها ما يحدث من جديد في حياتي اليومية

لكن واجهت عكس كل ما كنت متوقع
واجهت ناس عديمة أحساس ناس تبي الواحد يمشي وراها بالباطل
ولما تبعد عن هالنوعية من الأجناس تجي وقتها دور الكلام عليك وتبدأ سالفة الغيبة
هذا فلان فية...هذا فلان حقير...هذا فلان وسخ....هذا فلان مدري ايش.....
ليش كل هالحقد والكراهية لدا البعض
والمشكلة يبتسم لك ومن وراك يتكلم عليك
ولي أصحاب تكلموا من خلفي وعارفهم وشفتهم من نافذة الفصل لكن
ما هاجمتهم ولا تهاوشت معه....لاني عارف نفسي أكبر من هالحركات والمشكلة الي يسوي هالحركات أكبر
مني بالعمر ومع كل الي سمعته ما زلت لما اقابلة اسلم علية ونسولف وما علي من كلامة لان كلامة لا نزل مني شي ولا رفعني لان هذا عمل الشهادة والسبب
بالعربي ابي حسنات تنفعني بالاخرة

فكرو بالاخرة واعملوا بهالنصيحة

اعمل لدنياك كأنك تعيش آبدا.......واعمل لاخرتك كأنك تموت غدا

تحياتي لكم جميعا