حصلت عاى قبول و المدير يرفض تفرغي للدراسة !؟؟

كان الله في عونك يادكتورة

التاريخ عاد نفسه... نفس الظروف صارت معي شخصيا وللأمانة ..توفيق رب العالمين خدمني... حاولي معاه مره ومرتين وثلاث ولا توقفين محاولات وتذكري دائما كثرة المحاولات تزيد من فرصة الموافقة...

اضطريت اني اساير رئيسي المباشر 3 سنوات الين طق فيني عرق وقابلت المدير الطبي وللأسف كان حتى المدير الطبي رافض بحجة ان التخصص غير مطلوب مع العلم ان التخصص في قلب حاجة عملي كمرجعي الوظيفي.. واضطريت اني اروح لمدير المستشفى واقلقته بس بلطف! وكنت للأمانة متهور لانها كانت اخر محاولة لي يا اما يوقف بصفي او يتقفل الموضوع نهائيا...

مع دعاوي الوالدين وتوفيق رب العالمين وثم وقفة مدير المستشفى تغير الموضوع رئسا على عقب صار التخصص بحاجة اليه بعد ماكان هناك رفض قاطع له... بالعكس جزاه الله خير مدير المستشفى بين ان سبب الابتعاث لشغر وظيفة قيادية جديدة <<" وهنا كان مربط الفرس خوف المسئولين على مناصبهم!!" مع العلم بأننا كمنسوبين وزارة الصحة ممكن نخدم الوزارة كلها وليس القسم اللي اعمل فيه فقط!

عليك بالصبر والدعاء والمحاولة مع رئيسك المباشر مره ومرتين وثلاث لا توقفي محاولات ورب العباد بيعينك بإذن الله

بيني له ان هذا مستقبل عائلة كاملة ... بعثتك والحاق الزوج ببعثة .. وحتى اطفالك بيرجعون يرطنون انجليزي ..بيني له ان مستقبلك المهني واقف على خط قلم منه... وضحيله ان هذا مفصل حياتك الجايه وهو بيلعب دور كبير فيها بمجرد موافقته... واهم نقطة لا تجيبينها بالقوة خليها برضاه لا تكون له ردة فعل شنيعة!!

اتفق معاك والله يوفقكك يادكتورة سارة ونشوفك باعلى المراتب العلمية والوظيفية لأنك طموحة وتستاهلين والله كل خير وللأمام دائما وابدا

السلام عليكم .. أختي أنا أتفق مع كلام الأخوان . أنا مبتعث من وزارة الصحة ونفسك صيدلي . صح أن المدير وقف شوي لكن بتوفيق الله مشت الأمور. وحطي في بالك لو يبغى يستقعد المدير راح يكتب في خطابك (( لامانع مع توفر البديل )) هذي معناها في وزارة الصحة لاتطلعوون الموظف.
اللي أبغى أقوله انك لو تبغين تأخذين اجازة دراسية معناها اجازة بدون راتب نفس الاستثنائية. انتي استمري معه وانشبي له وقولي اذا ماوافقت على اجازتي انا مضطرة اقدم استقالتي وانت راح تكون السبب . هذي يمكن تفيدك واسأل الله ان يهدي مديرك . والحركه هذي مشت مع اثنين من الشباب . يمكن تمشي معك. واذا مرة مرة ملزم قدمي استثنائية سنة وكل سنة مددي لأنها من حق الموظف ان يقدم اجازة استثنائية بدون راتب. أما اذا كانك تبغين تقدمين على الابتعاث على حساب الوزارة فالله يعينك لأنها بالفعل ماراح يطلع الموظف الا بموافقة مرجعه.

جزاكم الله خيرا

و الله اني حاولت معه بكل الطرق و قلت له اذا ماتبغى تعطيني تفرغ سوف اخذ اجازة استثنائية
فقال لي انه سوف يرفض الأجازة لحاجة العمل
فقمت بلأتصال عاى شؤون الموظفين و سئلت هل من حق المدير رفض الأجازة الأستثنائية ؟ فكانت الأجابة نعم من حقه ذلك
مالعمل الأن ؟
حسبي الله و نعم الوكيل

الله يوفقك انشاء الله .
ولله كنت اتمنى اساعدك بس ما عندي اي معلمومة .

اختي دكتورة .. أنا موظف من وزارة الصحة وقد مرت علي مثل هالمعاملات . كانوا الناس اللي يبغون اجازة استثناية يقدمون عليها قبل ثلاثة اشهر على الأقل عشان تكون نظامية . واكتبي في الخطاب انك تبغين اجازة استثنائية والسبب ظروفك الخاصة . وماكان أحد يقدر يرفض اجازة استثنائية . ليه؟
لأنها بدون راتب . وماتحسب لك خدمة . وثانيا يجوز للموظف طلب اجازة استثناية والحصول عليها لمدة سنة كما يجوز للموظف الحصول هلى اجازة دراسية لإكمال دراساته العليا بدون راتب .
أتوقع ان مديرك فيه شوية حسد لأنه هذا اللي كنا نشوفه في الوزارة . يجيك واحد تعليمه متوسط وخدمته 20 سنة ومفكر ان الموظفين الجدد عبيد تحته ويرفض اكمال دراساتهم وحتى الدورات اللي هي يوم واحد . يقومون يدسونها . واذا كنت تمون عليه وسألته بيقول اذا وافقت على الموظف وعطيته اجازة دراسية او ابتعاث ابفتح على نفسي باب وبيقدمون كل الموظفين اللي عندي على ابتعاث. مدري من اللي كاذب عليهم وقايل اذا وافقتم على الموظفين وطلباتهم راح نسجنكم او نفصلكم ؟! قولي انا ابقدم استقالة اذا ماوافقت على اجازتي الاستثناية وانت السبب واذا كان فيه خوف من الله راح يتعاون .

اخي الشلباق

هل انت متأكد انه لا يستطيع رفض الآجازة الأستثنائية لاني سئلت شؤون الموظفين فقالوا ان من حقه ذلك!
جزاك الله خيرا

الإجازة الإستثنائية ماراح ترفض إذا كان مبينه فيها ان عندك ظروف خاصة ومقدمتها قبلها بفترة كافية انهم يوفرون احد . مثل ماقلت على الأقل 3 شهور . كلمي اللي اعلى منه واشرحي لهم وقولي انا عندي ظروف عائليه ومحتاجه اجازة استثنائية . راح يتساعدون معك .
كان فيه مدراء يعقدون الموظفين ويخوفونهم ويقولون ماراح نخليكم ومدري ايش ويكتب على الخطاب وفروا لي بديل . واذا جتنا المعاملات وافقنا على الخطاب واذا جينا بنجيب بديل نكتشف ان عنده عدد موظفين كافي يعني يقدرون يقومون بالشغل . بس هو كذا حسد.
جربي تكلمين الجهة اللي اعلى منه وقولي لهم انا عندي ظروف ومحتاجه استثنائية سنة ضروري , وانشالله يتساعدون معك . وبالنسبة للمدير قولي هذي معاملة اكتب اللي تكتبه عليها وارفعها . واخذيها واذا رحتي للجهة اللي اعلى منه بتلقين ناس يتساعدون معك.
الله يوفقك

جزاك الله كل خير في الدنيا و الأخرة