كيف أصل إلى العائلة في بورموث من مطار هيثرو ؟

وعليكم السلام .... هلا أخوي...
ماعندك أي مشكلة..... على العموم جب معك صورة أشعة للصدر مع تقريرها باللغة الإنجليزية علشان ما تتأخر..... بعدما تختم جوازك بتروح للسير اللي عليه الشنط ( الجنط ) وبعدما تاخذ الشنط مالتك.... تروح لمحطة الباصات.... ( ما ذكرت أخوي بتجي على أي طيران أو أي تيرمينال راح توصل إن شاء الله )... لأن بين كل تيرمينال والثاني مسافة طويلة... فأحسن شيء تروح للباصات القريبة منك

وبعدين تشتري التذكرة ( شيكت عليها قبل شوي ولقيتها ب 25 باوند من المطار إلى بورموث... لكن يمكن تكون أغلى أو أرخص على حسب متى تشتريها )... وتركب الباص ويوديك إلى بورموث... والمدة تقريبا ساعتين ونصف.. وأحسن شيء في الباص أنك ما تغير.. لكن في القطار فيه تغييرتين إلى 3 تغييرات وهم بعد المدة أطول والتكلفة أكثر...

إذا وصلت لبورموث فيه أكيد تكاسي كثر الهبل..... بس خل معك العنوان واضح للعائلة اللي بتسكن عندها وهو بيوديك إن شاء الله ... والتكلفة على حسب بعد المكان أو قربه...

حاول تاخذ رقم العائلة كذلك قبل ... وياليت لو تكلمهم وتعلمهم متى بتجي بالضبط يمكن هم اللي بياخذونك من المحطة لما توصل بورموث...

بالتوفيق

كثر الله خيرك أخوي


بخصوص الاشعة : أنا طالب زائر فهل احتاج اشعة للصدر ؟!

وانا بخصوص الطيران 90% على برتش لأن لي الحين ما ضبط الطيران

أيه أخوي تحتاج أشعة.....
بريتيش أيرويز تنزل في تيرمينال 5 .... وإذا بتطلع من الكويت فدائما ما توصل إن شاء الله الساعة 1 ظهرا بتوقيت لندن..... وإن شاء الله يمديك على الباص اللي في الوقت 2 وربع ظهرا وتوصل بورموث إن شاء الله الساعة 4 تقريبا ( ساعة و50 دق ) أو لو طولت شوي في المطار بسبب زحمة أو ما شابه فتلحق على باص الساعة 4 إلا ربع وتوصل 5 و50 دقيقة ( ساعتين تقريبا ) إن شاء الله..

السعر ب 25 باوند .... بس يمكن كل ما قرب الوقت بيصير أغلى...

بالتوفيق

يعطيك العافية أخوي

أنا بكون طالب زائر

فإذا ما خذيت معاي أشعة شنو اللي راح يصير ؟؟؟؟؟!!!!

أخوي... إذا ما أخذت أشعة للصدر وتقريرها باللغة الإنجليزية ماراح يصير شيء..... بس احتمال ياخذون لك أشعة داخل المطار.... صحيح مو دائما ياخذون لكن الأسهل لك خذها من عندك في سعة وراحة أحسن مما لو وصلت وقالوا لازم تاخذها من عندنا فتقعد وقت وسرى يمكن ياخذ منك ساعة أنت في غنى عنها...

بالتوفيق

ولا اشعة ولا شي ..

أنا جاي قبل شهر ومعي 7 طلاب سعوديين واحد منهم معه اشعه
والله ولا طلبوها ولا حتى ناظروا فيها .. توكل على الله وأول ما توصل
المطار خذ شناطك وحقايبك واسأل عن محطة الباصات "باص ستيشن"
وتحصل مجموعة من الباصات كل باص مكتوب عليه اسم مدينة "اللي يوصّل لها"
شوف باص بوموث وأظن اسعارها من 20 إلى 30 باوند . وتوكل على الله
وتوصل بالسلامة إن شاء الله.

أخوي الفاكه.... مسيك بالخير

من قال لك ولا أشعة ولا شيء؟؟

أنا ما أقول له أنهم راح يسألونك عن الأشعة 100% لكنهم أحيانا يسألون...... فأحسن مما إذا سألوا وما لقوها عندك يقولون رح للعيادة اللي عندهم وسو لك أشعة ثم عاد تقعد بها مابين سرى وانتظار وهم أن شناطك يضيعن بسبب تأخرك في أخذها..

فأحسن للواحد أنه ياخذها في بلده ( السعودية أو الكويت أو أي بلد ) في السعة وراحة البال..... وإذا سألوا عنها أعطاهم وإذا ما سألوا الحمد لله....

أقول لك تجربة شخصية... أول مرة جيت لبريطانيا آخر 2008 طلبوها مني وكنت مجهزها من الرياض.... رحت وعلى طول مشوني وقدامي واحد سعودي ومعه زوجته.... مسكين عنده طيارة على طول من هيثرو إلى أدنبره ( عاصمة اسكوتلاند ) وبسبب أن ما عنده أشعة لا هو ولا زوجته قاعد ينتظر ويقول أظن أن الطيارة بتفوت عليه.... عاد أنا مشيت ولا أدري لحق على طيارته ولا لا ...... بعدها بسنة تقريبا رجعت للسعودية إجازة وتجديد جواز وفيزا .... ويوم وصلت للمطار طلبوا مني أشعة فقلت لهم ماعندي ووضحت لهم أني طالب قديم وقد سويتها من قبل ( الجواز مثل ما قلت لك جديد ولا فيه بيان للفيزا القديمة )... فعصبت الهندية المخيسة ( موظفة الجوازات ) وقالت: إذا سويت فيزا جديدة لازم تسوي معها أشعة جديدة وأرسلتني للعيادة اللي كانوا موظفيها حبيبين وطيبين وروحوني من دون ما يعملون لي أشعة بعدما شرحت لهم الوضع..... بعد ذلك أتيت مرة ثالثة بزوجتي وكانت أول مرة لها وكانت مسوية أشعة.... ومشونا ولا سالونا عن الأشعة ( مثل سالفتك أنت والطلاب ال7 )>>>>>>> قصة حياة ما صارت تجربة شخصية

فهي زي ما تقول: مرة تخيب ومرة تصيب..... لكن وش المشكلة أنك تخليها معك وإذا سألوك تعطيهم اياها أحسن مما لو سألوا ما تكون معك ثم تاكلها تعب من السفر وسرى الجوازات الطويل ثم بعده سرى في الأشعة وانتظار , وووو الخ

بالتوفيق

يامساء النور والسرور يالغالي ..
آسف إذا كنت فهمتني غلط ! أنا ما قصدي أكذبك وأدري يطلبونها أحيانا ً
بس على ما أظن هذاك أيام انتشار انفلونزا الخنازير والتشديد الأمني في المطارات
بالذات على الامراض الصدرية ، عموما ً إذا جابها خير وبركه ..


ربي يوفقكم جميع