مساعدة ساعدوني في هالشهر الفضيل .. أخوكم من الامارات .. نخيتكم

August 20th, 2011, 08:09 AM

السلام عليكم ورحمة الله وبركاته .. الله يبلغ كل من يقرا موضوعي ليلة القدر وان شاء الله تغفر له ذنوبه جميعها في هالشهر الفضيل اللهم امين .

أتمنى من يملك العلم ان يساعدني بموضوع الفيزا .. أنا حاليا املك فيزا طالب بريطانيا استخرجتها في 2008 يعني قبل ما يكون هناك شي اسمه Tier 4 student visa .. كنت ادرس في جامعة ورسبت في السنة الاولى وفي 2009 غيرت الجامعة لاحدى الجامعات في بيرمنجهام , أرسلت للهوم اوفيس عشان اخبرهم اني حولت دراستي من جامعتي السابقة للجامعة الحالية بس مالقيت رد منهم وكملت دراستي عادي وكنت ادخل واطلع بريطانيا بدون محد يقولي شي .. يعني الامور كانت سليمة ولله الحمد .. هذي الفيزا تنتهي بتاريخ 31 اكتوبر 2011 .. يعني بعد تقريبا شهرين من الان . وانا مضطر اني امدد فيزتي لانه تخرجي بيكون في شهر 6 2012 .. يا اخوان انا متوهق في هالموضوع ومعلومات جديده اول مرة اسمع بها .

راسلت جامعتي وطرشولي ال CAS وكاتبين عند مؤهلاتي السابقة اللي لازم اقدمها مع ابليكيشن الفيزا ,, السنة الاولى اللي درستها في الجامعة السابقة بالاضافة الى شهادة الايلس .. ولله الحمد اني املك الشهادة الاصلية للسنة الاولى اللي قضيتها في جامعتي السابقة قبل التحويل ولكن المشكلة في الايلس لاني حصلت عليه سنة 2007 !! وعندي النسخة مب الاصلية وهم يطلبون الاصلية و اذا الله قدرني ولقيت الاصلية في مشكلة في تاريخها ؟ الايلس صالح لمدة سنتين مثل ما تعرفون لكن انا طالب مكمّل مب طالب جديد ..


بغيت شوركم ..

- بما انه فيزتي تنتهي بتاريخ 2011/10/31 اقدم عليها وانا في بريطانيا ؟ ولا اقدمها وانا في الامارات ؟ مع العلم اني متواجد حاليا في الامارات , اذا سافرت بتاريخ 25-9 في اشكالية ؟. واذا الافضل اني اقدمها في بريطانيا حد يقدر يدلني على محامي او شخص ملم بالموضوع في بيرمنجهام ؟

- تغييري للجامعة قبل سنوات بيأثر على استخراجي للفيزا الجديدة ؟ مع العلم انه محد قالي شي أبدا وأرسلت ايميل واذكر على ايام الفيزا الجديمة ما كان له داعي تستخرج فيزا ثانية اذا غيرت جامعتك مجرد تخبر الهوم اوفيس وكنت اطلع وادخل ومحد قالي شي .

- بما اني طالب مكمل لدراستي الجامعية وانهيت الفاونديشن والسنة الاولى والثانية بنجاح هل تاريخ امتحان الايلس (2007) بيخرب كل شي وبيرفضون يعطوني فيزا ؟ مع العلم اني املك اخر شهادة حاليا (شهادة السنة الثانية بنجاح)


يا اخوان والله اني ما انام الليل ,, الموضوع مارقني وانا ادرس على حسابي الخاص وتعتب في دراستي وما بقى الا القليل واخاف انه الابليكيشن ينرفض ولا اقدر اكمل دراستي ): كل تعبي يروح عالفاضي واقعد في البيت بطالي واندب حظي . اللهم لك الحمد في السرء والضراء .


ياليت اللي قدم ع الفيزا الجديدة يساعدني خاصة اللي قدم في هالصيف او مدد اقامته وهو في بريطانيا شو الاشيا المهمة اللي لازم اسويها .


جزاكم الله ألف خير .

• نشر عبر تويتر
• نشر عبر فيسبوك
• نشر عبر جوجل