اللهم ارزق من يساعدني رزقنا لايعد اخره

مرحبا اخوي ابو فيصل , والله مارديت الا طمعا بالدعوة الطيبة من شخص شرواك

بالنسبة لمعهد كابلن مااعرفة ولا لي علم فيه يفيدونك الاخوان بمانشيستر

لكن بخصوص دروس one to one هذاي غاليه احسب الساعه باقل تقدير 15 باوند ولهم مواقع في النت كثير مجرد تدخل عنوان بيتك وتشوف المدرسين اللي حولك وتقييم كل مدرس , لكن المعهد في الغالب يكون فيه مدرسين يدرسون خاص ونفس السعر 15-20 باوند بالساعه وفيه غيرهم اكثر شوي حسب المواقع اللكترونية بعضهم يوصل 30 باوند بالساعه .

بالنسبة للسكن المشترك يعتمد على نفسية الشخص وانا اخوك يعني انا ماظن يناسبي ابدا السكن المشترك لانه بكل بساطة ازعاج وخصوصا لما تكون مع طلاب البكالريوس. ولا تنسى المطبخ مشترك يعني الخصوصية شوي معدومه
بالنسبة للسكن مع عائلة لاني مجربة فاقولك اذا الله وفقك بعائلة كويسة فراح تطور مهارة التحدث عندك بشكل كبير لان الانجليز غالبه ليسو ودوديين فلذلك عشان تحصل عائلة يكون فيهم احد يسولف معاك كثير في ظل انشغالهم باعمالهم واصدقائهم و و و صعب شوي , راح يكون فيه مجال للتحدث بس مقارنة مع عجوز مطيحه بالصاله كل شوي فاتح معها سالفه ولا طامر انت وهي لاي مكان وتسولف لك وتشرح لك واحيان ممكن تصحح لك وانت تتكلم

بالاخير بخصوص هالنقاط انصحك بعائلة بس تاكد قبل من وضعهم كم عدد افراد العائلة واعمارهم وهل لك حمام خاص (تكرم ويكرم من يقراء) لان بعض العوائل تحاسبك على التروش ماترضى تتروش اكثر من مره باليوم (حسب ماسمعنا ) وبعضهم مايبي الازعاج ليلا , وتاكد من الوجبات والسعر وهل عندهم خط انترنت وهل يوجد حيوانات ام لا (كلاب او قطط اعزكم الله)

اما بالنسبة لجدولك فصدقني راح يترتب اول ماتوصل ان شاء الله تعالي

يعني اتذكر جدولي المعهد - السنتر- البيت العشاء - جلسة محادثة مع العائلة ومتابعة التلفزيون - نهاية الاسبوع يوم دراسة (الجمعة) السبت مع الربع (يوم سعودي بشكل كامل) الاحد مفتوح (يعني ساعات تحضير ودراسة لو الاسبوع اللي بعد اختبار واحيان لا فله مع الربع )

ملاحظة: فيه ناس تفضل الدراسة بشكل خاص عن طريق المواقع مع اشخاص من امريكا او بريطانيا يكون ارخص والبعض يفضل مثل مواقع تسوي تصحيح وتقييم لكتابتك ومواقع محادثه وهكذا وتحصلها كثير بالنت بس ماادري هل تناسبك او لا لانها تحتاج رقابة ذاتية والتزام بشكل كبير

نقطة مهمه جدا احرص على القراءه فهي مفتاح كل مهاره , ولا يبرد عزمك وانا اخوك ترى الللغة اكتسابها سريع بالبداية لكن تحس ببط بالموضوع بعد فتره لكن استمر وتابع وان شاء الله فالك التوفيق

اخيرا الله يوفقك ويسهل امرك ويردك بما تتمنى واكثر

الله يوفقك دنيا واخره على نصائحك الثمينه