مساعدة بإختيار مدينة , نظم معلومات إداريه

المدينه : بليموث plymouth
المدينه سياحيه تقع في الجنوب الغربي
مدينه ساحليه
حلوه مررره المدينه " رأيي الشخصي "
من ناحية الامان : المدينه امنه باذن الله واللي ما يتعرض احد ما احد يتعرض له
من ناحية حجم المدينه : المدينه فعلا متوسطه مو مثل لندن ومانشستر ولا صغيره مره يعني حلوه
من ناحية الجو : معروف عن جنوب بريطانيا انه ادفى المناطق في بريطانيا طبعا لاحظي في بريطانيا مو مقارنة بالسعوديه عموما المدينه ما يجيها الثلج ابد
العرب والسعوديين : موجودين بس الصراحه قليل مو معدومين بس مو بالكثره اللي في مانشستر وليفربول ولندن وبورنموث واكسفورد وهالمناطق المعتاده على وجود العرب بس موجودين
من ناحية الجامعه : الجامعه ترتبيها في الرانك حق هيرو حسب موقع الوزاره 5 e في تخصص الكومبيوتر ساينس
من ناحية معهد اللغه : انا اشوف هالمدينه من افضل المدن لتعلم اللغه
فيه معهد هنا اسمه ماي فلور يمدحونه مررررررررره وانا ان شاء الله بانزل موضوع عن معاهد اللغه بالمدينه
الهدوء : المدينه ليست كئيبه ابدا بالعكس حلوه مره وسياحيه وفيها مناظر واماكن مررره حلوه وفله وهيصه
الاسعار :
الاسعار مره حلوه ومعقوله مقارنة بلندن والمدن الكبيره معقوله جدا
هذا رد مختصر على النقاط اللي ذكرتيها
وعموما المدينه مرررره حلوه ومناسبه

مشكور اخوي عبد العزيز على المعلومات ..
قبل ساعتين جاني قبول من مكتب ثاني غير اللي رسل لي بالاول !!
المهم جاني القبول لجامعه اسكس بكولشستر ..
قرأت عنها ولقيت اختلاف اراء اللي يقول المعهد مو ممتاز واللي يقول المدينه صغيره وكئيبه مره وفيه اللي يمدحون فيها بجامعتها ومعهدها وبقربها من لندن .
بس التخصص Computer Studies ,, مدري احترت زياده .

شوفي وانا اخوكي
كل ما قربتي من لندن كل ما زادت الاسعار
والمدن القريبه من لندن بالعاده تكون ممله لانها تكون عباره عن مدينه جامعيه او تاريخيه
ما فيها وناسه
بس اهم شي تلقين التخصص اللي يعجبك
والله يوفقك وين ما رحتي
اذا كان ولابد من الغلا شوفي مانشستر مليانه عرب بس حلوه وفله وبرضوا ارخص من لندن بس اغلى من الجنوب
وبالنهايه انا انصحك تركزين على التخصص شوفي الجامعه اللي فيها التخصص والمواد اللي بتدرسينها عاجبينك لا تحطين الاشياء الثانيه مقياس لان الراحه النفسيه مفتاحها هنا الراسه الدراسيه متى ما كنت متطمنه ومرتاحه للشي اللي بتدرسينه بترتاح نفسيتك
واذا ارتاحت النفسيه والله لو كنتي بالهند بتكونين مبسووووطه والله يوفقك وييسر امرك
انا حبيت اوصف لك المدينه فقط والقرار راجع لك وادخلي النت وشوفي صور لكل مدينه تفكرين فيها اكتبي اسم المدينه بالعربي وشوفي عنها مواضيع في منتديات المسافرون العرب فيها تفاصيل حلوه
وزي ما قلت لك اولا واخيرا اهم شي التخصص

يعطيك العافيه اخوي , وكلامك تمام والله يكتب اللي فيه الخير
الله يوفقك ويسهل لك أمرك ..

جامعة سري في مدينة سري
مدينة هادئة وبها جامعة سري وهي قريبة جدا من لندن وغالية طبعا والسعودين مش كثرة وبها سكن داخل الجامعة وبها تخصص إدارة نظم معلومات مطلوب في الايلتس 6

مشكوور اخوي القلم الساخن .. أضفتها لقائمة البحث
يعطيك العافيه