إستشارة بخصوص الفيزا ..

الوزارة تطلب منك فيزا طالب عشان يعطونك قرار الاركاب
كيف راح تعطيهم فيزا سياحه ؟
( على اساس اني فاهمه ان عندك بعثه )..

لو انت بتروح على حسابك ممكن تعملها لكن لاسمح الله ممكن يصير فيها تعقيدات
وهالطريقه تناسب لو رايح تدرس لغه لأن دراسة اللغه ماتتطلب فيزا طالب عموما


ثاني شئ نصيحه مني انا للأسف جيت على حسابي فمااعطوني الا سنه واحدة للفيزا
بينما اللي قدمو عن طريق الوزارة اعطوهم فيزا بانتهاء الجواز

الحين مضطرة اجددها لأني انضميت للبعثه بس ماراح يعطوني اكثر لأن دراستي الحمدلله شبه انتهت


افضل لك تاخذ فيزا بضمان الوزارة يعطونك مدة اطول حتى لو عقدوها
وانت ماوراك شئ سواء اخذتها الحين او بعد شهر
كلة واحد
لو كنت ببريطانيا اقولك اوكيه تبي تلحق بداية السنه الدراسية بـ اكتوبر
وتبي تخلص اللغه قبلة
بس انت already راح تاخذ سنه ونص باللغه الفرنسيه يعني موب
مستعجل على بداية السنه الدراسية للدكتوارة
قدامك مشوار الله يسهلها ان شاء الله

طبعا هذا رأيي الشخصي و
بالتوفيق

Belle de jour

الصراحة كلمة already مسكته .. عيني عليك باردة

بخصوص قرار الإركاب .. ما أحتاجه .. لأني ما قد ركبت على طيران السعودية و لله الحمد
و بعدين أنا مازلت في لندن , يعني ما رجعت للسعودية ..

لكن أختي .. هل أنت متأكدة إن دراسة اللغة ما تحتاج لفيزا طالب ؟

عموماً .. شكراً لمرورك ..

و الله يوفق الجميع .

وعليكم السلام ورحمة الله وبركاته

حياك الله اخوي Kalee

<< ناشب لك في كل مكان

يا غريب كن أديب ,,, هذا أول جواب ,,, سالفة ليش ما اطلع وليش ما اسوي ما انصحك فيها ابد (الا اذا انحديت)

يكفي انه يكون عندك فيزا سياحية اذا كنت جاي تدرس لغة بس (واتوقع اذا ماصارت الفترة طويلة) بس اذا ناوي جامعة وتكمل ,, هنا امش تمام وقدم على فيزا دراسية بعيد عن سيم وجيم

انا اقول قدم زي العالم وشف ,,, في حالة لا سمح الله ما مشت امورك جرب فيزا سياحية همن تحول دراسية من داخل فرنسا ,,, ولو ما مشت بعد حاول من احد دول الشنقل وتعال فرنسا وجرب تحويل فيزا (برأيي ابد خطوة خطوة) والله يعينك ويوفقك

بعدين اسمح لي بـ سؤال غريب ,,, اذا انت مبتعث شلون ما عمرك ركبت الخطوط السعودية ,,, يعني التذكرة السنوية ترميها كذا ؟؟؟ ,,, ولا قصدك تحول خطوط ثانية (لان عندنا ما اظن يوافقون في فرنسا)
وبعدين اسمح لي ,,, انا ما قد ارتحت مع خطوط زي الخطوط السعودية ,,, والله ياهم فله !!!

تحياتي

يعني تركت الرد كلة ومسكت على already

عموما انا عارفة ان السالفة موب سالفة امر اركاب وماجات على التذكرة

ماراح يعطونك قرار الابتعاث بدون فيزا طالب!!
وهاشئ تقدر تتأكد منه من المستندات المطلوبه لأصدار قرار الابتعاث
لأن من شروطه قبول جامعي مشروط او غير مشروط او قبول لغه + فيزا طالب حتى يصدر

بخصوص فيزا السياحه لدراسة اللغه عادي بس ماتكون المدة طويلة
زي ماذكر الاخ مباري

الشئ الثاني والغريب اذكر رديت علي وقلت لي انك قضيت من الماستر ورجعت السعودية
ورحت الوزارة وجبت قبول من الوزير للدكتوارة
وبعدين قلت لي جبت ترقية من ملحقية بريطانيا وانهم ارسلو معاملتك من بريطانيا ودخلت بجلسه
وبعدين جاك القبول
والحين تقولي انا مازلت بلندن
للاسف مافهمت منك شئ بخصوص ترقية بعثتي على هالحوسه
والكلام المتضارب
ياليتك فعلا افدتني بالخطوات الصحيحة لاني فعلا محتاجتها
حتى لو كنت جايبها بواسطه موب مشكلة بس نفيد بعض باللي نقدر عليه


بخصوص الطيران السعودي للأمانه
اذا دولي فهو كويس وخصوصا اذا درجة اولى وحتى السياحي والله ممتاز
انا جربت السويسريه \الفرنسيه \ البريطانيه \اللوفتانازا الالمانيه \ KLM الهولنديه
والطيران التركي
والله السعودية في الرحلات الدولية مساوية لهم ماعدا البريطانيه والهولنديه تعتبر افضل


يعطيك العافية وسوري على القطه اخر مره

السلام عليكم يا مباري ..

هلا و الله و غلا ..

أجل ناشب لي في كل مكان ... يا زين ذي النشبة يا خوي ...

شورك بعد طاعة الله .. و بقدّم على فيزا الطالب و الله يسهّل .

بخصوص (النقل الجماعي) عفواً .. الخطوط السعودية .. أنا دائماً لي معهم معناة .. و دائماً أروح مع الإتحاد الإماراتي أو القطرية إذا بغيت أقضي لي كم يوم في قطر على حساب الخطوط القطرية (لأنها تتأخّر) .

أنا من سكان المنطقة الشرقية .. و إذا بغيت أروح لبريطانيا شوف جدول الرحلة و علمني وش رايك .. !!!
الأقلاع من الدمام إلى الرياض أستنى ساعتين في الرياض و أغادر لجدة (و أحياناً من الدمام لجدة مباشرة) أقعد (في الطيارة لمدة ساعتين) يعني ما فيه أمل تطلع من الطيارة .. بعد الساعتين إذا ما فيه تأخير كالعادة .. تقلع إلى ....... لا تحسبها تقلع مباشرة لبريطانيا ..لا .. تقلع إلى جنيف .. تنزّل ركاب و تحمّل ركاب (نقل جماعي) .. و الله لا يوريك (نخيس في الطيارة لمدة ساعة .. ساعة ونص) ليتهم يطلعونا في المطار نشرب كوفي و إلا نشوف المزايين ما فيه امل ... و بعدين تقلع إلى بريطانيا .. و مجموع الرحلة أكثر من 14 ساعة.
لا .. و عندهم طاقم (الله لا يحدّنا عليهم) إذا طلبت مويه مرتين .. يخزّك المظيف بنظرة خاطفة .. أما إذا قدّر الله عليك و تجرأت و طلبت شاي أو قهوتهم السوداء -اللي تجيب الحارق- .. أول شي ينقّعونك ساعة ساعتين .. و بعدين إذا كنت صامل يجيبه لك (نص كوب و بارد) .. و يحطّه لك على الطاولة بقوة .. يعني تراك ازعجتنا .. ما عندنا إلا أنت !!!

أحسن ما في الخطوط السعودية إن ما فيها مشروبات كحولية .. و المسجد تصلي فيه و تغط لك غطّه حلوة إذا ما أزعجك أحد ملاقيف الضيافة و صحّاك من النوم بجملة (ممنوع النوم هنا .. ممكن ترجع لمقعدك و تربط الحزام) ؟؟

في بريطانيا و بحكم إن الطلاب كثيرين .. يسمحون لنا نختار أي خطوط .

أهم شي العافية و أنا أخوك و الوصول بالسلامة ..

تحياتي أخوي مباري ..

Belle de jour

أشفيك زعلانة يا أختي ..
يمكن صار عندك خلط بين قضيتي و نصيحتي لك .. علشان كذا ما فهمتي .. !!

بخصوص قضيتي .. أنا مخلّص ماستر و قدمت على ترقية البعثة عن طريق الملحقية و وافقوا .. و بعدين غيّرت القرار إلى فرنسا عن طريق الوزارة في الرياض , و الآن أنا في لندن ..

نصيحتي لك كما سبق و قلت لك و أكررها ..
لا تحرصين على تغيير مكان الدراسة قبل الحصول على ترقية للبعثة , إلا إذا ضمنوا لك الملحقية ترقية البعثة و تغيير مكان الدراسة في وقت واحد .. و لا تثقين فيهم إلا إذا أعطوك موافقة مبدئية خطية ( ما فيه أمل) .. لهذا لا تعولين على الملحقية كثير.

عموماً أختي الفاضلة ... قدمي على مشرفك لترقية البعثة . ستحتاجين المستندات التالية :
( صور من شهادة التخرّج و كشف الدرجات ) و تعبّين نموذج (طلب ترقية بعثة) .. ما يحتاج تروحين للملحقية .. بإمكانك إرسالها على شكل attachment

و إذا جت الموافقة إن شاء الله و استلمتي القرار بيدك ... أطلبي تغيير مكان الدراسة و أذكري أسباب مقنعة .

ليش أنا قلت لك حاولي تغيّرين مكان الدراسة عن طريق الوزارة لأمرين:
1- الملحقية سيطالبونك بقبول من أي جامعة معترف بها في فرنسا.
2- و لو وافقوا و رفعوا لك .. سيصدر قرارك لمدة ثلاث سنوات .. يعني دراسة دكتوراة فقط بدون لغة .. و هذا صعب عليك أختي.

أنا قرار ترقية البعثة للدكتوراة 3 سنوات في بريطانيا .. لكن لما حوّلت لفرنسا وقّع لي الوزير على لغة و دكتوراة (5 سنوات).

بخصوص واسطتي .. ولله الحمد و الله ما قصرت معي , و كانوا ملحّين لين جتني الموافقة , و كان الإتصال بشكل يومي .. بل أكثر من مرّة في اليوم .
و واسطتي يا أختي الكريمة .. أنت تملكينها .. (دعوة الوالدين) .. و و الله ما عندي غيرها .
خلي الوالدين يرسلون برقيات عاجلة آخر الليل لمن إذا أراد للشئ أن يكون أن يقول له (كن فيكون) .. و بيوقع لك الوزير و هو ما يشوف .
إذا طلبتي أختي نقل مكان الدراسة مستقبلاً لازم تبدين أسباب مقنعة علشان يوافقون .

و الله يوفقك و يسهّل امرك .. و تراني تحت الخدمة , و يشرفني خدمتك و خدمة أي طالب مبتعث في بريطانيا أو في فرنسا مستقبلاّ .

و أعتذر إن كنت أسأت سابقاً ..

kalee

موب زعلانه بس انت نصحتني اكون ثقيلة وانا ماشية على نصيحتك

مشكور على كل المعلومات القيمه الله يجعلها في ميزان حسناتك
اخوي انا مشكلتي مالقيت احد زي وضعي
ماستر ببريطانيا وبيحول دكتوارة لدولة اخرى
معظهم بكالوريس يبي ترقية ماستر وبنفس الدولة وموب كثير بعد
يوم حصلتك يمكن سالتك اسئلة كثيرة لكن انت عارف الملحقية والوزارة
ماتاخذ منهم شئ يبرد القلب
وانا ماودي ارجع السعودية وابدأ اجراءات وحوسة تمتد ممكن لسنه
يعني اهون اكمل على حسابي ولا هالقرف لأني جربته ايام تقديم الماستر
واخرتها رحت على حسابي وجيت بريطانيا وانضميت !!!
فالحين ابيها من قاصرها


فلذلك اعذرني لو كثرت عليك اسئله
بخصوص اللغه انا ابي احول على امريكا فلذلك ماراح يعطوني اللغه لأني متجاوزتها
ومعاي ماستر من جامعة بريطانيه
واساسا انا داخلة الماستر بدون لغه لأني مختبره الايلتس بالسعودية وحصلت على قبول غير مشروط

فكرت اسوي مثل ماقلت اطلب ترقية واجيب قبول من جامعة بريطانيه
الين مايجيني القبول للترقية اكون نسقت لي قبول ثاني من جامعة امريكيه
ووقتها اقولهم علية بالملحقية..


بخصوص الجزء الاخير من كلامك عن العذر المقبول

تخصصي ( الدقيق ) غير موجود الا بثلاث جامعات حول ال UK بالاربعه اقسام ( انجلترا و اسكتلندا و ويلز و ايرلندا الشمالية )
وانا حاليا ادرس بوحدة من هالثلاث الماستر
ومابي اكمل فيها
والجامعة الثانيه ماتمنح هالتخصص الا درجتين البكالوريس والماستر يعني مافيها دكتوارة
والثالثه مااضمن قبولي فيها لانها خيار وحيد غير انها بأسكتلندا

بينما في امريكا فيه على الاقل 25 جامعة معترف فيها وفيها تخصصي الدقيق
او على الاقل تخصص متفرع منه

هل تتوقع ان هذا يدرج تحت الاسباب المقنعه ؟ بحكم انك قدمت لهم عذر وتعرف وش ممكن يكون مقنع لهم ؟
ولا تقصد الاعذار المقنعه مثلا ظروف عائلييه او صحية لاسمح الله ؟

لاني انا ودي اغير الدولة لعدة اسباب ولكن هالسبب هو اهمها
بقية الاسباب ثانوية واعرف مسبقا انهم ماراح ياخذون فيها


يعطيك العافية ومشكور ومتأسفه

Belle de jour

أولاً الله يوفقك ...
و ترى ترقية البعثة ما هي صعبة ولا تاخذ وقت خصوصاً إذا كان وقت إنعقاد الجلسة الوزارية قريبة.
مثل ما قلت لك قبل .. ركزي على ترقية البعثة و إذا جتك إن شاء الله اطلبي التحويل.

بالنسبة لأسباب التحويل ..
1- قلّة الخيارات في الجامعات (3 جامعات) و هذا في رأيي أقوى الأسباب .. لأن بإمكانك تقولين للملحقية أو الوزراة: ترى ما حد قبلني من هالجامعات.
2- كثرة الطلبة السعوديين في بريطانيا (وهذا سبب عدم قبول طلبة البكالوريس الدارسين على حسابعم الخاص) و كان الوزير في لقاءه مع الطلاب في الملحقية يركّز على هالسبب و يقول: وش تبون في بريطانيا كلها سعوديين .. روحوا لأمريكا أو كندا أو أوروبا .. و لهذا أشرت عليك بالروحه للوزير.

خيار أمريكا .. من وجهة نظري غير صائب .. و ذلك نظراً لبعدها (نص يوم سفر) أو أكثر , و تعقيدات في المطار (وقف على جنب يا راعي الدتسن - أقصد يا سعودي-) .. و سين جيم في المطار يكّرهك في الدراسة.

و بعدين بترجعين على لغة وحدة (الإنجليزية).

عموما .. الله يوفقك .
و أي استفسار أنا في الخدمة .

kalee

مشكور على الرد
ان شاء الله خلال الفترة الجاية بقدمه لأن المشرف قالي جيبي لنا شهادة مؤقته
ونقبل نسوي لك ترقية

1- انا ماعاد ابي بريطانيا لأسباب كثيرة منها زحمه السعوديين فيها ولكن السبب
الرئيسي هو التخصص اللي مالقيته الا بهالثلاث جامعات
غير تعقيد الدراسة ونظامهم الي يكرهك بالعلم

2- امريكا اريح لي بتعدد جامعاتها وتوفر التخصص وسهولة التعامل مع الشعب
بالاضافة الى رخصها مقارنه ببريطانيا
انا موب من النوع اللي ارجع السعودية كثير
ماتفرق معاي طول الرحلة
التعقيدات بالمطار للرجال بالغالب والحين صارو اهون بكثير


3- معاي لغه رابعه

غير العربية والانجليزية ونص الفرنسية


يعني مافية مشاكل بأذن الله


دعواتك والله يوفقنا واياك