بعض المعلومات المهمه للمستجدين المبتعثين إلى فرنسا أو لمن يرغب الدراسة فيها ..

October 21st, 2012, 06:19 PM

السلام عليكم ورحمة الله وبركاته ..

أنا طالب مبتعث من 2010 وحبيت أقدم ما عندي من معلومات للطلبة المستجدين لعل وعسى أقدر أفيدكم بشيء وما أبي منكم غير دعواتكم لي بالتوفيق :

1- الملحقيه :

لا تستشيروا الملحقيه في إختيار المعاهد أو في تحويل المعهد مهما حاولو يقنعوك إنه معهد كويس وإنه ماخذ جوائز عالميه ومن هذه الناحيه أجعلوا خياركم إنكم تسألو طلبة مبتعثين في موضوع المعاهد لمعرفتهم بالمعاهد ومستوياتها ..
ثاني شيء لا تعتمد على الملحقية بمسئلة القبول الجامعي لأنه راح يرسلوك على الجامعات المتعاملين معاها بغض النظر عن مستوى الجامعه أو تقييمها وبعض الأحيان يرسلو الطلبه على مدن "معفنه" وما تنفع للطلبة السعوديين كدراسة من ناحية نسبة الجرائم وإنعدام الأمان في هذه المدن وإجعل مرجعك للمدينة اللي ترتاح لها وأتواصل مع الجامعه بنفسك وشوف طلباتهم ..


2- اللغة :

أغلب الطلبة يسألوا عن فترة اللغه في فرنسا والملحقية راح تقلك سنه ونصف مع إنه فترة اللغة بالنسبة للدول الغير ناطقة بالإنقليزيه من سنتين ونصف إلى 3 سنين وبالنسبة للقبولات الجامعيه تقدروا تجيبوها بعد مستوى البي 1 في اللغه بحيث تدخل إختبار بسيط إسمه TCF ولو وصلت لمستوى البي 1 راح تقدر تجيب قبول جامعه بالنسبة للتخصصات العلميه والإدارية وبالنسبة لطلاب البكالوريس لهم إختبار معين إسمه TCF DAP يجي مع ملف أخضر وبالنسبة لطلاب الدكتوراه ما تحتاج أي شهادة لغه فقط تحتاج لمستوى يأهلك إنك تناقش خطة بحثك مع الدكتور اللي حيشرف على الرسالة ..


3- السكن والمواصلات :

بالنسبة للسكن حاول تبتعد عن مكاتب العقار وتوجه للإنترنت للبحث عن سكن وفيه أكثر من موقع للبحث عن سكن والمطلوب منك في البداية كمستأجر خطاب الضمان المالي للسكن من الملحقية وفيه بعض أصحاب العقار يطلبو إيجار شهر أو شهرين مقدم كتأمين للسكن ..
بعض المواقع :
leboncoin.fr
pap.fr
vivastreet.fr
والمواصلات تختلف من مدينة لأخرى يعني فيه ترام ومترو وباصات وحاول إنك تتحصل على كرت الطالب للباص أو الترام أو المترو برسوم رمزيه لأن شراء التذاكر على كل رحلة حيكلفك كثير وفيه حل أخر وما أنصح فيه غير للمدن الصغيرة اللي يكون سهل فيها إنك تلاقي مواقف وهي شراء سيارة بس راح تكون مكلفه لأنك تحتاج فلوس بنزين أو ديزل وتأمين تدفعه بشكل شهري أو سنوي وأنصح بالديزل لأنه أرخص ..


4- الوصول لفرنسا (للمستجدين) :

بالنسبة للتذاكر لو كانت على حسابك حاول تدور في الإنترنت على أرخص الرحلات عن طريق الخطوط القطرية أو التركيه أو الإماراتيه أو المغربية أما لو كانت عن طريق الملحقية أو الوزارة حاول تدور الرحلات اللي ما يكون فيها ترانزيت حتى لو كانت غاليه الحكومه بتدفع الله يخليها ..
بعد كذا حاول تكتب عنوان الملحقية والعناوين المهمه من سكن ومعهد .. إلخ عشان لو وصلت تعرف إنت حتروح على فين تقدر وقتها تعطي حق التاكسي العنوان المكتور وهوه بيوصلك بس إنتبه من التكاسي لأنه يحاسبك بالعداد يعني لو طلعت التاكسي شوفه يشغل العداد ولا لأ ولو ما شغله أطلبه إنه يشغله أو تحاول تسأل الناس وتستخدم وسائل المواصلات الأخرى الأقل كلفه ..
بالنسبة للطلبة اللي مكان دراستهم بعيد عن باريس تقدر تتوجه للمدينة اللي إنت فيها على طول وترسل أوراقك بالفاكس أو الإيميل عن طريق المعهد أو عن طريق محل إنترنت بدل ما تنزل على باريس وتضيع فلوسك على الفاضي بين المواصلات والسكن ..
ولو المعهد ما وفرلك سكن حاول تجيب حجز فندق يكون قريب للمعهد حق كم يوم ألين ربك يفرجها ..


5- المكافئة :

بالنسبة للمبتعث 1804 يورو والمتزوج 2600 يورو تقريباً ولو كان فيه طفل 3025 يورو والصرف ما يبدأ إلى من تاريخ 25 في الشهر يعني لو وصلت يوم 15 بينزلولك مكافئة 10 أيام يوم 25 بالهجري .. يعني أعمل حسابك وخذ معاك مبلغ ممكن يكفيك يعني تقريباً 2000 يورو لأنه لازم تعمل حسابك إنه ممكن يتنصب عليك ..


6- مدة الدراسة الجامعيه :

بشكل عام الدراسة في فرنسا للبكالوريس 3 سنين وللماجستير سنتين وللدكتوراه 3 سنين .. طبعاً يستثنى من هالكلام طلاب الطب لأن عندهم سنه تأهليله وبعدها ممكن يترشح لإكمال الدراسة أو لأ لأن الكراسي محدده وللأفضليه بعد كذا فيه 6 سنين طب عام وأعتقد سنتين تخصص يعني المجموع 9 سنين "الله يكون في عونهم" ..

7- الأطفال :

بالنسبة للي لديهم أطفال فيه روضات خاصه بالأطفال أقل من 3 سنين وهذه تعتبر الأقل كلفة تقريباً أما غير كذا فيه حاضنات بالساعات وتختلف أسعارهم لو كانو رسميين من الحكومه يكونو أغلى بس أنصح إنك تسأل الجاليات العربيه عن حاضنات عرب يكونو غير رسميين بيكونو أرخص وعشان تضمن إنها مسلمه أو لو كان غير ذلك أطلب من الحاضنه إنها ما تأكل الطفل لحم خنزير أو أي من مشتقاته ..
بالنسبة للأطفال 3 سنين فما فوق ممكن تسجله في روضه حكوميه بتكون تقريباً مجانيه بس تدفع رسوم الوجبات بالشهر ما تتجاوز الـ 40 يورو ويكون التسجيل في مقر البلديه المتواجد في الحي ولازم يكون عندك شهادة التطعيمات للتسجيل ..

8- الأكل :

حاول تبحث عن المطاعم الحلال أو إنك تتجنب أكل اللحوم في المطاعم الفرنسيه يعني مثلا تقدر تأكل سمك أو تونه أو خضار بدون أي مشاكل أو إنك تدور ملحمه حلال وتشتري منها اللي تبغاه وحاول قد ما تقدر لو نزلت السوبرماركت إنك تشوف المقادير للمنتجات اللي تشتريها إنه ما يكون فيها جلاتين أو أحد مشتقات الخنزير مع العلم إنه في فرنسا أغلب المنتجات يكون فيها كحول أو مشتقات خنزير حتى الشامبو حق الشعر في بعض الأحيان يحطو فيه مشتقات خنزير .

أتمنى ما أكون نسيت شيء مهم ولو نسيت إن شاء الله الأخوان ما يقصروا ويضيفوه على الموضوع وراح أحاول قد ما أقدر أرجع أطلع على أسألتكم أو تقدرو ترسلولي رساله على الخاص ..

تحياتي لكم وموفقين ولا تنسوني من دعواتكم
أخوكم : فيصل

• نشر عبر تويتر
• نشر عبر فيسبوك
• نشر عبر جوجل