مبتعثات فرنسا .. أرجو الدخول

طبعاُ انا مبتعث ... مش مبتعثة !

الله يكون في مونك يا اخت Lamloom ، لكن هذي مشكلة عادية ان شاء الله و دائما تصير

الشي الأصح انك تسويه هو ان اخوكي يروح يطلع فيزة شنغن لمدة 6 أشهر (اذا كان طلع قبل كذا لأوروبا يقدر ياخذ سنة)

طبعا الأفضل انه ما يطلعها من سفارة فرنسا ... خليه يروح لسفارة ايطاليا و يقدم عليها عشان لا يأخروه الفرنسيين بحكم الضغط اللي ممكن يكون عندهم و لأنه أصلا سفارتهم معروف انها معقدة و بطيئة

اذا ما يبغى يروح بنفسه للسفارة ..... يقدر يروح لمكتب سفريات من المكاتب الكبيرة و يعطيهم أوراقه و هم يقدموا له (انا انصح بهذا الحل لأنه أسرع و يقدروا يجيبوا له الفيزة في 10 أيام أو أقل) .......... طبعا راح يكلفوا الموضوع 600 ريال لمكتب السفريات (ممكن أقل)

بعد ما يطلع الفيزة تقدري تطلعي انتي و هو على فرنسا و من هناك يجيب قبول في نفس المعهد اللي انتي تدرسي فيه و بعدها يرسل أوراقه للملحقية و هم راح يعطوه خطاب بعثة من هناك و بعدها يقدم على الفيزة من فرنسا

في أسوأ الظروف راح يضطر انه يتركك لمدة أسبوع أو أسبوعين و يرجع للسعودية يغير الفيزة و بعدها يرجع لفرنسا ........ بس ان شاء الله الشي هذا ما يصير

شكراً أخوي target على الرد ما أعرف كتبت أسمك صح ولا غلط على العموم .. أنا أخويا عنده قبول لغة في نفس معهدي ومختوم كمان من الملحقية السعودية في باريس يعني ما جبته بنفسي الملحقية هي اللي جابتلي هو .. وكمان كنت عملتله توصية من القنصل الفرنسي وأوراقه كلها تمام لما قدمتها رفضت الموظفة إنها تقدمله كطالب وقدمتله كمرافق ... والآن تقولي أرجعي قدميلوا كطالب ومو أكيد !!!!!!!!!!!!!!!!!!!

أنا بالنسبة ليّا الحل اللي عندي إنه أقدمله على شنغن بس علشان أطلِّع قرار الابتعاث وأمر الإركاب وأسافر لوحدي مع ماما أخلص أوراق الملحقية ليه وأرسله أوراقوا يقدم على فيزة طالب وبعدين يسافر بالتذكرة اللي اتصرفتله مع أمر الإركاب ... لإنه للمعلومية ما في تقديم فيزة طالب من هناك لازم من هنا..بس إذا كنت طالع بفيزة الإقامه الطويلة ممكن تتجدد من هناك.. بس إذا طلعت بفيزة إقامه قصيرة ما تتغير إلا من هنا...

الآن الكل يقولي حوّلي على بريطانيا علشان فيزتها أسرع وبصراحة أنا مرة خايفة من بريطانيا .. أنا تخصصي ماجستير تجارة إلكترونية وما أبغى أعمل بحوث يعني نظام الماجستير في فرنسا له نوعين مهني وبحثي وأنا ما أبغى أعمل بحث .. ما أعرف هل في بريطانيا نفس الشيء ولا لا..

- بالنسبة لموضوع اخوك فإقتراحك جيد ، مع العلم انك تقدري تطلبي من الوزارة يغيروا لك الخطاب و يعطوك خطاب لأخوك يفيد بأنه طالب و تعطيه للسفارة ......... انصحك في هذي الحالة تخلي أخوكي يدخل بنفسه على القنصل و يشرح له ان عامل الوقت راح يأثر على دراستك و انه يفترض يتدخل شخصياُ عشان يخلص لك أمورك ..

- تقدري تجربي الإقتراحين في نفس الوقت و تاخذي بالأسهل و الأسرع ... بس أعيد و أقول ان اقتراحك جيد

- بالنسبة لبريطانيا انا اقدر افيدك بكل شي بخصوصها بحكم اني درست فيها ......... 99% من تخصصات الماجستير دراسة فقط من غير بحوث (فقط مشروع التخرج) ....... يعني ماهي نظام أبحاث ....... و مدة الماجستير لكل التخصصات تقريباُ 11 شهر (تبدأ في اكتوبر و تخلص في سبتمبر) ........... بالنسبة للقبول راح ياخذ من اسبوعين لثلاثة بالكثير و هو عندك و ما يحتاج الوزارة تجيب لك قبول لأن اجراءات القبول مرة سهلة و سريعة

- فيزة بريطانيا كانت تطلع في نفس اليوم بس قبل 7 اشهر غيروا النظام و صارت تطلع في يومين بدل يوم واحد

- اهم شي في بريطانيا تختاري المكان و الجامعة لأني دائما كنت الاحظ ان الطلاب السعوديين يختاروا جامعات ما تعتبر الأفضل

- طبعا بريطانيا اغلى من فرنسا (المكافاة 853 باوند) بس تكفي و تمشي الشخص اذا كان اقتصادي

- ما اعرف اش الاسئلة اللي عندك بس هذي مجرد معلومات سريعة عن بريطانيا

- على العموم احاى شي في بريطانيا ان كثير من جامعاتها عندها تخصصات مركبة ......... يعني مو ماجستير تجارة الكترونية و بس .......... ممكن تاخذي تخصصين في تخصص واحد

- بس فرنسا تظل لها ميزة نسبية و هي انك راح تكوني متميزة بموضوع اللغة (الانجليزية تقدري تاخذيها بعدها) ......... واذا تفكري في الدكتوراة تقدري تاخذي درجة علمية من فرنسا و الثانية من انجلترا

اتمنى اكون افدتك ...........اذا فيه اي استفسار لا تترددي

طبعا تخصص الماجستير في بريطانيا يكون 9 مواد دراسية تدرسيها من اكتوبر لحد جون و في جون تكون الاختبارات النهائية (9 أشهر دراسة) و بعدها عندك 3 اشهر تجهزي فيها مشروع التخرج

هل فيه عندهم تدريب في الشركات ولا لا؟
إيش الجامعات القوية في مجال التجارة الإلكترونية ؟
إيش رأيك في مدينة liverpool?

طبعا ليفربول ما انصح فيها ............ بالنسبة لأفضل معهد لغة فهو معهد جامعة ردينغ (University of Reading) .......... عندهم معهد مرة مشهور و ممتاز ......... ماهي غالية مرة و موقعها جدا متميز بحكم انها تبعد نص ساعة عن لندن بالقطار فقط

بس اللي اعرفه ان المعهد ما يقبل مبتدئين ........ يعني اذا لغة صاحبتك الانجليزية ضعيفة ماراح يقبلوها في المعهد ....... على العموم ريدنغ فيها معاهد كثيرة

نصيحيتي ان صاحبتك تروح لمعهد من معاهد مدينة ريدنغ و تدرس فيه لمدة شهرين او ثلاثة و بعدها تقدم على معهد جامعة ريدنغ

على العموم لازم تعرفي ان معظم معاهد اللغة في بريطانية تجارية و ما تضيف الشي الكثير للشخص .........ز يعني صاحبتك لازم تكون حريصة في اختيار المعهد .......

بالنسبة للماجستير ماهو نظام بحث ............ نظامهم دراسة (مكثفة) و اختبارات ...... بس بعد الاختبارات لازم تسلمي مشروع تخرج ....... العادة هو اسهل شي في الماجستير لأنه ياخذ منك شهرين فقط

بالنسبة للتجارة الالكترونية و الله ما عندي فكرة اي جامعة تعتبر الاقوى لكن عندك سنة كاملة للغة و تقدري على مهلك تبحثي و تسالي عن كل الجامعات و تشوفي الافضل ......... في الغالب الافضل راح يكون في لندن

على العموم ترى فيه تخصصات كثيرة ممتازة و مستقبلها على المدى البعيد افضل بكثير من التجارة الالكترونية ........... لان مجالها في السعودية محدود بعض الشي

بس ارجع و اقولك ان فرنسا فيها ميزات كثيرة تتميز فيها عن انجلترا

اتمنى اكون افدتك و تحت امرك اذا فيه اي استفسارات عندك

- زي ما قلتلك ما انصح بليفربول ابدا ............. الجامعة عادية و أهلها لهجتهم اصعب من باقي المدن و تعاملهم جاف

- بالنسبة للتدريب بعد الماجستير راح يكون صعب ......... بس اذا كانت دراستك في واحدة من الجامعات الراقية و المشهورة فمن الممكن انك تتدربي لمدة سنة في شركة من الشركات الكبيرة و البنوك (جامعات زي CAMBRIDGE, LONDON BUSINESS SCHOOL ..ETC(

- راح اجيب لك ان شاء الله اسماء اشهر الجامعات في مجال التجارة الالكترونية